“Susan H. Porter,” Liahona, Mei 2022.
Susan H. Porter
Praemeri Jeneral Presiden
“Wan samting we oli putum i stap strong long maen blong yumi ova long las yia i kam, i ?hao nao bae yumi save mekem ol pikinini oli kam strong moa long saed blong spirit?” Sista Susan H. Porter i talem. “Taem yumi tokbaot tugeta olsem wanem blong mekem fet blong jeneresen we i stap kam antap i kam strong moa, hemia i mas stat long Praemeri.”
Sista Porter i luk ol blesing we oli kam long ol pikinini we oli baptaes taem oli stap tekem pat olsem ol kavenan memba blong Jos.
“Plante taem, hem i taem yumi mekem mo yumi givim seves we i mekem ol testemoni blong yumi oli kam antap moa,” hem i eksplenem. “Ol pikinini oli save lanem blong lukaotem insperesen we i kam long heven.”
Bifo koling blong hem olsem Praemeri Jeneral Presiden, Presiden Porter i bin givim seves olsem Fas Kaonsela Insaed long Praemeri Jeneral Presidensi, blong wan yia.
Hem i talem se plante long ol pikinini oli no save tekpat long Praemeri long taem blong KOVID-19 wol sik ia. Mo tu, hem i bin luk, mo save ol jalenj we ol singgel woman oli stap fesem. Hasban blong hem, Elda Bruce D. Porter blong Olgeta Seventi, i bin ded long 2016.
“I bin gat plante Sandei we mi no bin gat sakramen,” hem i talem.
Taem hem i stap serem ol eksperiens blong hem, ol nara woman oli talem long hem: “From se yu yu stap givim seves insaed long Jos, i mekem se mi luk klia moa se Jos i nidim mi tu.”
Susan Elizabeth Porter, i bon i kam long wol ia long 31 Julae 1955, long Ponka Siti, Oklahoma, YSA, mo papa mo mama blong hem i Hans J. Mo Charlene Coleman Holland. Hem i bin groap long Niu Yok, YSA.
Hem i maredem Elda Porter long 2 Febwari 1977, insaed long Wasington D.K. Tempol. Tufala i bin lukaotem fo pikinini long Is Yunaeted Stet, Jemani, mo Yuta, mo mekem ol wok blong Jos long Yurop Is Eria.
Sista Porter i bin graduet wetem wan bajela digri long kemistri long Brigham Yang Yunivesiti. Hem i bin wok olsem wan lab asisten long Masajusets Institiut blong Teknoloji, mo olsem wan matematik tija. Mo tu, hem i bin volontia wetem ol defren komuniti, mo oganaesesen.
Sista Porter i bin givim seves long Rilif Sosaeti jeneral advaes kaonsel, mo koling blong hem bifo hemia i stek Rilif Sosaeti Presidensi kaonsela, wod Rilif Sosaeti mo Yang Woman presiden, Gospel Doktrin tija, mo Praemeri miusik lida.