“Nao Ol Samting Ia we Oli No Strong long Olgeta, Bae Mi Mekem Olgeta Oli Winim mo Kam Strong long Olgeta”
Taem yumi putum tingting i stap daon mo praktisim fet long Jisas Kraes, gladhat blong Kraes mo sakrifaes blong Atonmen blong Hem we i nogat en i mekem i posibol blong jenis.
Presiden Thomas S. Monson i bin serem wantaem, stori blong wan prisen gad, Clinton Duffy. “Long ol yia 1940 mo 1950, [prisen gad, Duffy], plante man oli save long hem from ol hadwok we hem i stap givim blong helpem ol prisena oli save kambak long nomol laef blong olgeta. Wan man blong jajem wok blong ol man i se: ‘!Yu mas save se animol ia lepad oli no save jenisim kala blong skin blong olgeta!’
“Prisen gad Duffy i ansa se: ‘Yu sud save se mi no wok wetem ol lepad. Mi wok wetem ol man, mo ol man oli jenis evri dei.’”1
Wan long ol bigfala giaman blong Setan i we ol man mo woman oli no save jenis. Giaman toktok ia ol man oli talem mo oli ripitim long plante defren wei olsem we wol i talem, se yumi no save jenis nomo—o moa nogud, se yumi no sapos blong jenis. Yumi bin lanem se ol situesen long laef blong yumi oli soem huia yumi. Yumi “no sud jenisim huia yumi,” wol ia i talem, “mo yumi stap olsem we yumi stap, stap tru long yumi wan.”
Yumi Save Jenis
Hem i gud tumas blong stap tru long yumi wan, yumi sud stap tru long ol samting we i tru abaot yumi, olsem ol pikinini boe mo gel blong God wetem wan tabu fasin mo fiuja ples blong kam olsem Hem.2 Spos gol blong yumi i blong stap tru long tabu fasin mo fiuja ples ia, bae yumi evriwan i nid blong jenis. Skripja toktok blong toktok ia jenis hem i fasin blong sakem sin. “Plante pipol,” Presiden Russell M. Nelson i tijim, “oli luk fasin blong sakem sin, se i wan panismen—wan samting blong stap longwe long hem, be nomo sapos bigfala samting i hapen. … Taem Jisas i askem yu mo mi, blong ‘sakem sin;’ Hem i stap invaetem yumi blong jenis.”3
Ol Kondisen blong God
Ol man blong krietem ol program blong kompiuta oli yusum ol toktok we i talem long ol kompiuta wanem blong mekem. Samtaem yumi singaotem ol sentens ia sapos mo bambae. Olsem hemia; sapos x i tru, bambae y i tru.
Lod i wok tu tru long ol kondisen ia: ol kondisen blong fet, ol kondisen blong stret mo gud fasin, ol kondisen blong sakim sin. I gat plante eksampol blong ol toktok we i gat sapos insaed we God i talem olsem:
“Spos yu stap obei long ol komanmen blong mi mo stap strong kasem en, [bambae] yu gat laef we i no save finis, we presen ia, i presen blong God we i moa bigwan long evri narafala presen blong hem.”4
O “sapos yufala i askem wetem wan tru hat, wetem wan tru tingting blong wantem save, wetem fet long Kraes, [bae] Hem i soemaot trutok blong ol samting ia long yufala, tru long paoa blong Tabu Spirit.”5
Iven lav blong God, nomata hem i nogat en mo i klin evriwan, hem i gat ol kondisen blong hem tu.6 Eksampol:
“Sapos yufala i stap obei long ol tok blong mi, [bambae] mi lavem yufala olwe, stret olsem we mi stap obei long ol tok blong papa blong mi, nao oltaem hem i stap lavem mi.”7
Elda D. Todd Christofferson i eksplenem moa long saed blong trutok ia blong gospel taem hem i tijim: “Sam bae oli laekem blong talem, ‘Sevya i lavem mi olsem we mi stap,’ mo hemia i tru. Be Hem i no save tekem eniwan long yumi i go insaed long kingdom blong Hem from huia yumi, ‘from se i no gat eni samting we i no klin we i save stap ia, o stap long ples we hem i stap long hem.’ [Moses 6:57]. Yumi mas stretem sin blong yumi faswan.”8
Ol Samting we Yumi No Strong long Olgeta, I Mekem Yumi Kam Strong
Ol blesing blong stap kasem paoa blong God blong helpem yumi jenis i kam wetem kondisen tu. Ol toktok blong Sevya, tru long profet Moronae long Buk blong Momon i tijim: “Mo sapos ol man oli kam long mi, bae mi soem long olgeta, wiknes blong olgeta. Mi givim wiknes long ol man blong mekem se oli save putum tingting blong olgeta i stap daon; mo gladhat blong mi, i naf blong evri man we i putum tingting blong olgeta i stap daon long fored blong mi; from sapos oli putum tingting blong olgeta i stap daon long fored blong mi, mo gat fet long mi, nao ol samting ia we oli no strong long olgeta, bae mi mekem olgeta oli winim mo kam strong long olgeta.”9
Lukluk gud long wanem Lod i stap tijim yumi long ples ia. Yumi luk se, faswan Hem i talem se Hem i givim ol man mo ol woman wiknes, wan wiknes nomo, we i pat blong eksperiens long laef ia olsem fasin blong wol o fasin blong foldaon blong yumi. Yumi kam ol man mo woman we i folem fasin blong wol from Foldaon blong Adam. Be tru long Atonmen blong Jisas Kraes, yumi save winim wiknes blong yumi o fasin blong foldaon blong yumi.
Hem i talem se gladhat blong Hem i naf blong evri man mo we sapos yumi putum tingting blong yumi i stap daon mo gat fet long Hem, afta, Hem bae i “mekem ol samting ia [plante samting] we oli no strong long ol, i mekem [yumi] winim mo kam strong long olgeta.” Long nara toktok, taem yumi jenisim faswan fasin blong foldaon blong yumi, wiknes blong yumi, bae yumi save jenisim ol fasin blong yumi, ol wiknes blong yumi.
Ol Samting blong Mekem blong Save Jenis
Letem yumi lukluk long ol samting blong mekem yumi save jenis folem oda blong Lod:
Fas samting, yumi mas putum tingting i stap daon. Kondisen blong Lod blong jenis hem i fasin blong putum tingting i stap daon. “Sapos oli putum tingting blong olgeta i stap daon long fored blong mi,”10 Hem i talem. Oposit blong fasin blong putum tingting i stap daon hem i fasin blong gat hae tingting. Hae tingting i stap taem yumi ting se yumi save moa gud—hem i taem wanem yumi tingting o filim i kam faswan bitim tingting mo filing blong God .
King Benjamin, i bin tijim se: “From man we i folem fasin blong wol i wan enemi blong God …mo bae i stap olsem, blong oltaem mo oltaem, be sapos nomo hem … i tekemaot man we i folem fasin blong wol, mo kam wan sent tru long atonmen blong Kraes we i Lod, mo i kam olsem wan pikinini, we i stap lisin, i no stap flas, i putum tingting blong hem i stap daon, i save wet longtaem, i gat plante lav, i glad blong stap biaen long evri samting [we] Lod i tingting blong putum long hem.”11
Blong yumi jenis, yumi nidim blong tekemaot man we i folem fasin blong wol, mo putum tingting i stap daon. Yumi mas putum tingting i stap daon plante blong folem wan profet we i stap laef. Putum tingting i stap daon plante blong mekem mo kipim ol kavenan blong tempol. Putum tingting i stap daon plante blong sakem sin evri dei. Yumi mas putum tingting i stap daon plante blong wantem jenis, blong givim hat blong yumi i go long God.”12
Nambatu samting, yumi mas gat fet long Jisas Kraes. Bakegen, Sevya long toktok blong Hem i talem: “Sapos oli putum tingting blong olgeta i stap daon long fored blong mi, mo gat fet long mi,”13 Hem bae givim yumi paoa blong winim ol wiknes blong yumi. Fasin blong putum tingting i stap daon, tugeta wetem fet long Jisas Kraes, bae i openem doa long paoa blong gladhat, mo ol blesing we i fulwan we i stap oltaem tru long Atonmen blong Hem.
Presiden Nelson i tijim se “Tru fasin blong sakem sin, i stat wetem fet se Jisas Kraes i gat paoa ia blong klinim yumi, hilim yumi mo mekem yumi kam strong moa. … Hem i fet blong yumi we i openem doa blong paoa blong God insaed long laef blong yumi.”14
Nambatri samting, tru long gladhat blong hem, Hem i save mekem ol samting we oli no strong, oli kam strong. Sapos yumi putum tingting i stap daon mo gat fet long Jisas Kraes, bae gladhat blong Hem bae i helpem yumi blong jenis. Long nara toktok, Hem bae givim paoa long yumi blong jenis. Hemia i posibol from we Hem i talem se, “gladhat blong mi i naf blong evri man.”15 Strong paoa blong gladhat blong Hem i givim yumi paoa blong winim evri samting we i blokem yumi, evri jalenj, mo evri wiknes taem yumi lukaotem blong jenis.
Ol bigfala wiknes blong yumi i save kam ol bigfala samting we yumi kam strong long olgeta. Yumi save jenis mo “ bon bakegen”16 Ol samting we yumi no strong long hem, “ [yumi] save kam strong long olgeta.”17
Sevya i mekem atonmen blong Hem we i no gat en blong yumi save jenis, sakem sin, mo kam gud moa. Yumi save bon bakegen. Yumi save winim ol aksen we oli kam wan fasin, ol adiksen, mo iven “blong nomo wantem blong mekem nogud fasin.”18 Olsem ol pikinini boe mo gel blong wan Papa long Heven we i gat lav, yumi gat paoa insaed long yumi blong jenis.
Ol Eksampol blong Jenis
Ol skripja oli fulap long ol eksampol blong ol man mo woman we oli bin jenis.
Sol, wan Feraresi mo wan man blong ronem ol man long Kristin jos bifo,19 hem i kam Pol, wan Aposol blong Lod Jisas Kraes.
Alma i wan pris blong nogud king ia, King Noa. Hem i bin harem ol toktok blong Abinadae, hem i sakem sin fulwan mo kam wan long ol gudfala misinari long Buk blong Momon.
Pikinini boe blong hem Alma, long taem blong Yut blong hem, hem i traem blong brekem daon jos. Hem i wan long olgeta we “oli moa nogud long ol rabis man blong mekem ol sin”20 kasem taem hem i bin gat wan jenis long hat, mo kam wan misinari folem tingting blong hemwan.
Moses we famli blong Fero oli adoptem, mo lukaotem hem long wan rij mo naesfala hom olsem wan prins blong Ijip. Be taem hem i luksave huia hem mo lanem abaot tabu fiuja blong hem, hem i jenis mo kam wan profet blong givim loa long OlTesteman.21
Apu man blong waef blong mi, James B. Keysor, oltaem i leftemap tingting blong mi wetem bigfala jenis long hat blong hem.22 Hem i bon long jos we papa mo mama oli ol fetful Lata Dei Sent, ol bubu paeonia long Sol Lek Vali we oli ded finis long 1906. Mama blong hem i ded taem hem i yang mo hem i fesem hadtaem kasem yut yia blong hem. Long taem we hem i yangfala mo kasem ol yia we hem i kam wan bigfala man, hem i nomo go long Jos mo long taem ia, hem i bin lanem plante rabis fasin. Nomata long hemia, hem i mitim mo maredem wan fetful woman mo tugeta tufala i gat faef pikinini.
Long 1943, afta long ol had yia we ekonomi blong wol i foldaon bigwan mo long taem blong Wol Wo 2, Bud, (nem we ol fren mo famli blong hem oli singaotem hem long hem), i go long Yuta mo muv i go long Los Anjeles, Kalifonia, blong lukaotem wok. Long taem ia we hem i stap longwe long hom, hem i stap wetem sista blong hem mo man blong hem, we hem i stap olsem bisop blong wod blong olgeta.
Wetem lav mo paoa ia we sista blong hem mo tawi blong hem i gat ova long hem, hem i stat blong gat interes long Jos mo stat blong ridim Buk blong Momon evri naet bifo hem i stap go slip.
Long wan naet, taem hem i stap rid long Alma japta 34, ol toktok ia oli tajem hat blong hem:
“Mi wantem se yufala i kam fored mo yufala i nomo mekem hat blong yufala i kam strong. …
“Nao luk, laef ia i taem blong ol man oli rere blong mitim God; yes, dei blong laef ia i dei blong ol man oli mekem ol wok blong olgeta.”23
Taem hem i stap ridim ol ves ia, wan filing we i strong i tajem hem mo hem i save se hem i nid blong jenis, blong sakem sin, mo hem i save wanem hem i mas mekem. Hem i go long bed blong hem mo nildaon mo stat blong prea. Hem i askem strong long Lod blong fogivim hem mo givim hem strong paoa we hem i nidim blong jenisim laef blong hem. Hem i kasem ansa long prea blong hem, mo stat long taem ia, hem i neva lukluk i gobak biaen. Bud i bin givim seves long Jos mo stap wan fetful memba we i givim hem fulwan long wok blong Jos kasem en blong laef blong hem. Hem i bin jenis long evri wei. Tingting blong hem, hat blong hem, ful fasin blong hem i bin jenis.
Ol brata mo sista. Fiuja ples ia we i tabu, mo stamba tingting blong yumi i blong kam olsem blong Papa we i stap long Heven mo Sevya Jisas Kraes. Yumi kam olsem hem taem yumi jenis o sakem sin. Yumi “karem pikja blong [Sevya] long [ol] fes blong yumi.”24 Yumi kam niu, klin, defren, mo simpol taem yumi gohed blong wok long hem evri dei. Samtaem yumi filim olsem se yumi stap tekem tu step i go fored mo wan step i kambak biaen, be yumi gohed blong putum tingting i stap daon mo muv fored long fet.
Mo taem yumi putum tingting i stap daon mo eksasaesem fet long Jisas Kraes, gladhat blong Kraes mo sakrifaes blong Atonmen blong Hem we i nogat en i mekem i posibol blong jenis.
Mi witnes mo testifae se Jisas Kraes hem i tru Sevya mo Ridima blong yumi. Gladhat blong Hem tru hem i inaf. Mi talemaot se Hem “nao i rod ya, mo stamba blong trutok, mo stamba blong laef.”25 Long nem blong Jisas Kraes, amen.