“Elda Ryan K. Olsen,” Liahona, Mei 2022.
Elda Ryan K. Olsen
Jeneral Atoriti Seventi
Taem we Elda Ryan K. Olsen i bin stap groap long Sandi, Yuta, YSA, papa mo mama blong hem i neva letem hem i aot long haos sapos tufala i no talem toktok ia: “Tingbaot se huia yu.”
“Toktok ia, i stap mekem mi lus tingting smol taem mi mi wan yang man,” hem i laf mo talem. “Be ol toktok ia oli bin helpem mi blong tingbaot tabu aedentiti blong mi. Oli bin helpem mi blong tingbaot se mi mi gat wan Papa long Heven we i lavem mi, mo Sevya i bes fren blong mi. Evri samting we yumi save hop blong mekem, o mekem i kamtru, i tru long Hem nomo.”
Fasin ia, blong tingbaot aedentiti blong hemwan, mo ol eksampol blong papa mo mama blong hem, ol nara misinari, olgeta we oli wok wetem hem long Jos, mo ol waes bisnis mento, oli ol impoten tul we Elda Olsen bae i yusum taem hem i statem seves blong hem olsem wan Jeneral Atoriti Seventi.
Hem i bon i kam long wol ia long 11 Oktoba 1974, mo hem i groap long Sol Lek Vale blong Yuta; Ryan Kirk Olsen i boe blong Kirk mo Cathy Olsen.
Lav we Elda Olsen i gat long Latin Amerika mo Spanis lanwis, i kam strong moa taem hem i givim seves olsem wan fultaem misinari long Ajentina Resistensia Misin. Afta long hemia, hem mo waef blong hem, Julie Dorrington Olsen, oli bin givim seves tugeta taem we hem i bin prisaed ova long Yurugwe Montevideo Wes Misin stat long 2016 i go kasem 2019.
Hem mo Sista Olsen, tufala i bin mared long 20 Novemba 1998, long Sol Lek Tempol. Tufala i papa mo mama blong fo pikinini.
Long taem we oli bin singaotem hem i kam wan Jeneral Atoriti Seventi, Elda Olsen i bin stap olsem wan Eria Seventi. Mo tu, hem i bin givim seves olsem wan stek presiden, stek misin presiden, hae kaonsela, bisop, kaonsela long wan bisoprik, mo kaonsela long wan wod Yang Man presidensi.
Elda Olsen i kasem wan digri long saed blong komunikesen long Yunivesiti blong Yuta, mo i bin wok long plante defren eria blong bisnis. Hem i bin wan eria presiden blong Arthur J. Gallagher & Co., wan wol insurens kampani, kasem taem hem i kasem koling olsem wan misin presiden. Long taem blong koling blong hem olsem wan Seventi, hem i bin stap wok olsem wan eria senia vaes presiden blong kampani ia.