Presiden Nelson i Givim Seves

Presiden Russell M. Nelson i yusum ol divosen brodkas mo ol post long sosol media blong gohed blong invaetem evri pipol blong kam long Kraes mo lanem samting aot long Kraes.

Long taem blong wan divosen brodkas, Presiden Nelson i leftemap tingting blong ol memba blong Jos long Oklahoma mo Kansas, YSA, blong lukluk nomo long “wan long ol hae presen olgeta blong Papa long Heven, we Hem i bin givim, blong mekem yumi putum laef blong yumi i fas long Hem mo long Pikinini blong Hem we Hem i Lavem Tumas,” hem i talem. “Mi mi stap tokbaot Buk blong Momon. Hem i wan presen we i kam long God we Hem i givim long yumi. Hem i ki ston blong relijin blong yumi from se hem i holem stret hat, senta ia blong doktrin blong Hem.”

Taem hem i bin stap toktok long ol memba long Kalifonia, YSA, long wan nara brodkas, Presiden Nelson i givimaot trifala invitesen: (1) blong lukaotem trutok tru long prea, blong luklukgud insaed long ol skripja, mo blong stadi long ol toktok blong ol profet, sia, mo reveleta; (2) blong kam antap long paoa long saed blong spirit mo luksave samting tru long Spirit taem wanwan i mekem kavenan wetem God mo i stap kipim olgeta kavenan ia; mo (3) blong stap aktiv fulwan blong stap help blong pulum Isrel i kam tugeta.

Mo long wan brodkas long 48 kantri, Presiden Nelson i talem bakegen long Ol Sent long Yurop se: “Plante long ol fren blong yufala oli wantem blong andastanem from wanem oli stap long ples ia, long wol ia. Oli wantem blong save sapos laef i gat eni mining, mo i gat eni stamba tingting long hem. Oli wantem blong mekem samting i defren long wol ia. Oli stap askem olgetawan huia nao oli save trastem. ?Yu yu luksave se yu gat ol ansa we ol fren ia oli stap lukaotem?”

Long sosol media, Presiden Nelson i stap invaetem yumi, i no blong filim nomo se yumi talem tangkyu, be tu, blong yumi soemaot hemia. Hem i bin invaetem yumi blong mekem spes insaed long hat blong yumi blong olgeta ia we oli “stap gat trabol blong luk laet blong Sevya mo filim lav we Sevya i gat.” Hem i leftemap tingting blong yumi blong “wok tugeta blong lidim rod blong soem fasin blong lego ol fasin mo ol aksen blong no mekem gud long man.” Mo hem i testifae se “i gat wan stamba we evriwan i save tanem hem long hem, hemia blong leftemap lav we yumi filim long ol narawan, o blong stretem hat blong yumi taem yumi filim se hat i brokbrok—we hem i Sevya, Jisas Kraes.”