“Elda Jonathan S. Schmitt,” Liahona, Mei 2022.
Elda Jonathan S. Schmitt
Jeneral Atoriti Seventi
Elda Jonathan S. Schmitt i talem se “blong stap rere oltaem” i wanem i tekem hem i kam long koling ia olsem wan niu Jeneral Atoriti Seventi we oli jes sastenem hem.
“Hemia i wanem we mifala i oltaem gat,” hem i bin talem. “Mining blong wan hat we i fulap wetem sore mo wan spirit we i wantem blong sakem sin, hem i we, yu jes putum hat blong yu long olta, mo yu letem Lod i mekem tingting blong Hem stat long ples ia i go.”
Elda Schmitt i ademap: “Lod i save givim yumi paoa, ol talen, ol presen we yumi nidim blong mekem wok i kamtru. Be, sapos yumi no mekem yumi stap rere oltaem blong Hem i yusum yumi, nao yumi stap jusum wanem yumi wantem, mo yumi no stap givim Hem janis ia blong blesem yumi long ol hadwok blong yumi blong givim seves long Hem.”
Jonathan Stephen Schmitt i bin bon long 16 Epril 1973 long Mesa, Arisona, YSA; papa mo mama blong hem i Robert Edward mo Dianne Lyda Schmitt. Hem i groap long Yuma, Arisona. Long 21 Julae 1995, hem i bin maredem Alexis Swain Udall long Mesa Arisona Tempol. Tufala i papa mo mama blong fo pikinini.
Elda Schmitt i kasem wan bajela blong saens digri long saed blong agrikalja mo risos ekonomiks long 1997, mo wan juris dokta digri long 2000, tugeta long Yunivesiti blong Arisona.
Afta we hem i stap olsem wan loa klak long Suprim Kot long Arisona, hem i bin wok olsem wan loya long intanasonol loa kampani blong Akin Gump Strauss Hauer & Feld LLP. Afta long hemia, hem i bin wok olsem wan loya mo kaonsel blong Baker Hughes Incorporated. Antap long hemia, hem i bin wok olsem wan asisten vaes presiden blong Arisona Stet Yunivesiti.
Elda Schmitt i bin stap wok olsem wan Eria Seventi long Not Amerika Saot Wes Eria taem oli bin singaotem hem olsem wan Jeneral Atoriti Seventi. Koling blong hem blong bifo, i gat presiden blong Kalifonia San Diego Misin, stat long 2014 kasem 2017, stek presiden, bisop, stek presidensi kaonsela, hae kaonsela, presiden blong kworom blong ol elda, wod eksekutiv sekretari, kaonsela long stek Yang Man presidensi, hae pris grup lida, stek misinari priperesen tija, mo fultaem misinari long Kalifonia Fresno Misin.