Blong Stap Folem Jisas Kraes: Stap Olsem Man blong Putum Pis

I Kam long Elda Neil L. Andersen

Blong Kworom blong Olgeta Twelef Aposol

Ol man blong putum pis oli no stap nating; oli winim tingting blong man long fasin blong Sevya.

Ol dia brata mo sista blong mi. Taem yumi stap gotru ol strong taem blong samting oli muvmuv, raorao, mo blong plante, bigfala safa, nao hat blong yumi i fulap long tangkyu from Sevya mo ol blesing blong gospel we i kambak, blong Jisas Kraes. Yumi lavem Hem mo yumi trastem Hem, mo prea se bae yumi folem Hem oltaem.

Jalenj Ia blong Sosol Media

Paoa blong intanet blong tajem ol laef, i wan blesing mo wan jalenj, we i blong taem blong yumi nomo.

Long wan wol blong sosol media, mo open rod blong infomesen, voes blong wan, bae oli save ripripitim i go i go. Voes ia, sapos i tru o giaman, sapos i stret o i wan saed, sapos i kaen o i nogud, i muv olsem nomo raon long wol.

Ol post long sosol media, abaot ol tingting mo gud fasin, plante taem oli jekem gud kwaet nomo; be ol toktok blong raorao, blong kros, plante taem oli faerap long sora blong yumi, nomata se i abaot politik tingting, pipol long nius, o tingting long saed blong wol sik ia. I no gat wan man, o i no gat wan samting, mo i tekem tu Sevya mo gospel blong Hem we i kambak, we i fri long sosol fos ia blong ol voes ia we oli stap seraotem man.

Kam Wan Man blong Putum Pis

Toktok Antap long Hil i wan mesej blong evriwan, be Hem i bin givim stret long ol disaepol blong Hem, olgeta ia we oli bin jusum blong folem Hem.

Lod i bin tijim olsem wanem blong laef long tetaem ia, mo naoia, long wan wol we i no gat respek. Hem i talem: “Mo olgeta evriwan we oli mekem pis, bae oli kasem blesing, from bae oli singaotem olgeta ol pikinini blong God.”¹

Tru long sil blong fet blong yumi long Jisas Kraes, yumi kam ol man blong putum pis, we yumi katemaot—we i minim blong mekem i kwaet, i kolkol, o katemaot fulwan—evri spia blong faea blong enemi.²

Taem yumi mekem pat blong yumi, promes blong Hem i we, bambae oli singaotem yumi “ol pikinini blong God.” Evriwan long wol ia i stret laen³ blong God, be blong oli singaotem yumi “ol pikinini blong God,” hem i minim plante moa samting. Taem yumi kam long Jisas Kraes, mo mekem ol kavenan wetem Hem, yumi kam “sid blong Hem,” mo yumi “kasem evri samting blong kingdom,”⁴ yumi kam “ol pikinini blong Kraes, ol boe mo ol gel blong Hem.”⁵

?Olsem wanem nao wan we i putum pis i mekem ol faea spia i kwaet mo i kam kolkol? Hem i no stap ronwe long fored blong olgeta we oli stap spolem yumi. Be, yumi gohed blong gat tras long bilif blong yumi, yumi serem ol bilif wetem strong tingting, be oltaem, yumi no mas stap mekem long fasin blong stap kros o gat nogud tingting.⁶

I no longtaem i pas, afta we mi luk wan strong toktok we i agensem Jos, Revren Amos C. Brown, wan lida we i difendem ol nasonal raet mo pasta blong Nambatri Baptis Jos long San Fransisko, i ansa, i talem:

“Mi respektem eksperiens mo lukluk blong hem we i bin raetem ol toktok ia. Mi agri, mi no luk wanem nao hem hem i luk.”

Mi kaontem se i wan long ol bigfala glad blong mi blong save ol lida blong Jos, wetem Presiden Russell M. Nelson tu. Long tingting blong mi, oli stret eksampol blong bes lidasip we kantri blong yumi i gat blong givim.”

Afta hem i ademap: “Yumi save toktok from wei we ol samting oli stap. Yumi save sakemaot evri gud samting we i stap gohed. … Be ol rod ia blong luk samting, bae i no hilim seraot long kantri. Olsem we Jisas i bin tijim, bae yumi no katemaot ivel fulwan wetem moa ivel. Yumi mas gat moa lav, mo laef wetem moa sore, iven long olgeta we yumi ting we oli ol enemi blong yumi.”⁷

Revren Brown i wan man blong putum pis. Kwaet mo wetem respek, hem i mekem ol faea spia ia oli kam kolkol. Ol man blong putum pis oli no stap nating; oli winim tingting blong man long fasin blong Sevya.⁸

?Wanem nao i givim paoa insaed long yumi blong mekem ol faea spia ia we oli poen i go long trutok we yumi lavem, oli kolkol, kwaet mo kilimaot olgeta? Paoa ia, i kam aot long bilif we yumi gat long Jisas Kraes, mo bilif we yumi gat long ol toktok blong Hem.

“Mo yufala i kasem blesing long taem we bae ol man oli talem ol rabis samting long yufala … mo bae oli talem evri kaen nogud samting agensem yufala we i no tru, from nem blong mi;

“ … from presen blong yufala long heven bae i bigwan: from long sem fasin ia oli bin givim hadtaem long ol profet we oli bin stap bifo long yufala.”⁹

Hamas Fridom blong Mekem Joes I Impoten

I gat tufala prinsipol we oli lidim hat blong yumi blong stap olsem man blong putum pis.

Faswan, Papa blong yumi long Heven i givim wanwan long yumi fridom blong save mekem joes, wetem paoa ia blong wanwan i jusum rod blong hem.¹⁰ Fridom blong mekem joes ia, i wan long hae presen blong God.

Nambatu, wetem fridom blong mekem joes ia, Papa blong yumi long Heven i letem blong i gat “fasin blong go agens long evri samting.”¹¹ Yumi “testem samting we i konkon blong mekem se [yumi] save glad long wanem we i gud.”¹² Fasin blong agens, i no mas mekem yumi sapraes. Yumi lan blong seperetem wanem we i gud mo wanem we i nogud.

Yumi stap glad long blesing blong fridom blong mekem joes, mo andastanem se i gat plante we oli no bilivim wanem we yumi bilivim. Wanem we i tru, i we, i gat samfala nomo long ol las dei ia we bae oli jusum blong mekem bilif blong olgeta long Jisas Kraes i stap olsem stamba blong evri samting we oli tingting long hem mo mekem.¹³

From ol sosol media we i stap, wan voes we i no biliv, bae i save kam olsem bigfala grup blong ol nogud voes,¹⁴ be iven sapos oli plante voes, yumi jusum rod blong stap man blong putum pis.

Ol Lida blong Lod

Sam oli luk Fas Presidensi mo Kworom blong Olgeta Twelef olsem se oli gat ol risen blong fasin blong wol olsem politik, bisnis, mo olsem ol kalja lida.

Be, mifala i luk ol responsabiliti blong mifala i defren. Oli no ilektem mifala, o jusum mifala aot long ol aplikesen. Mifala i no gat spesel wei blong rere blong wok, be oli singaotem mo odenem mifala blong talemaot testemoni blong mifala long nem blong Jisas Kraes, raon long wol kasem mifala i pulum las win blong mifala. Mifala i wokhad blong blesem ol sikman, olgeta we oli stap olgetawan, olgeta we hat i soa, mo olgeta puaman, mo mekem kingdom blong God i kam strong moa. Mifala i lukaotem blong save tingting blong Lod mo taltalemaot tingting ia, speseli long olgeta we oli stap lukaotem laef we i no save finis.¹⁵

Nomata we hambol tingting blong mifala i blong evriwan i ona long ol tijing blong Sevya, ol toktok blong Lod, tru long ol profet blong Hem, plante taem, oli no go wetem ol tingting mo rod blong wol ia. I bin olsem ia oltaem longtaem i kam.¹⁶

Sevya i talem long Ol Aposol blong Hem:

“Spos ol man blong wol ya oli no laekem yufala oli agens long yufala, yufala i mas tingbaot we fastaem, olgeta oli no laekem mi oli agens long mi.

“Bambae olgeta oli mekem ol samting ya … from we oli no save Papa blong mi we hem i sanem mi mi kam.”¹⁷

Kea long Evriwan

Yumi gat tru hat blong lavem mo kea long evriwan long ol neba blong yumi, i nomata se oli biliv semmak olsem yumi. Jisas i tijim yumi parabol blong Gudfala Man Sameria, se olgeta we oli gat defren bilif, oli mas go aot blong helpem eniwan we i gat nid, we oli man blong putum pis, we oli lukaotem ol gud mo hae samting blong wok from.

Long Febwari, i gat wan hedlaen long Arisona Ripablik we i talem se “Baepartisan bil, we ol Ol Lata-dei Sent oli sapotem, bae i protektem ol gei mo ol transjenda blong Arisona.”¹⁸

Yumi, olsem ol Ol Lata-dei Sent, “yumi glad blong stap pat blong koalisen blong fet, bisnis, we ol LGBTQ pipol mo komuniti lida we oli wok tugeta wetem wan spirit blong tras mo respek long wanwan.¹⁹

Presiden Russell M. Nelson i bin tingting wan taem mo askem: “?Weswe? ?Bae ol baondri laen oli no save stap mo semtaem oli no kam ol laen blong faet?”²⁰

Yumi wantem tumas blong stap man blong Kraes we i putum pis.²¹

Ol Taem we I No Nid blong Givim Ansa

Sam long ol atak long Sevya, oli nogud evriwan, be Hem i no talem wan samting. “Nao ol jif pris, wetem ol tija blong Loa oli stanap, mo oli stap tok strong, oli talemaot ol poen agens long Jisas” be “Be Jisas i no talem wan samting nating long olgeta.”²² I gat ol taem we blong putum pis, i minim blong yumi holemtaet yumi blong ansabak, be, wetem hae fasin, yumi stap kwaet nomo.²³

I brekem hat blong yumi evriwan taem we, olgeta we oli bin stanap wan taem wetem yumi, oli talem ol strong toktok o sakemaot ol toktok abaot Sevya, olgeta man blong Hem, mo Jos blong Hem; olgeta ia, i bin gat wan taem we oli bin tekem sakramen wetem yumi, mo bin testifae wetem yumi abaot tabu misin blong Jisas Kraes.²⁴

Hemia tu i bin hapen long taem blong seves blong Sevya.

Sam long ol disaepol blong Jisas, we oli bin stap wetem Hem long ol taem blong bigfala merikel, oli mekem tingting blong nomo “[wokbaot wetem Hem.”²⁵ Sore tumas, i no evriwan we bae i gohed blong stap strong long lav blong olgeta long Sevya mo strong tingting blong olgeta blong obei ol komanmen blong Hem.²⁶

Jisas i tijim yumi blong kamaot long sekol blong kros mo raorao. Long wan eksampol, afta we Ol Farisi oli fesem Jisas mo toktok long hao bae oli prapa spolem Hem, nao skripja i tokbaot se Jisas i kamaot long olgeta,²⁷ mo ol merikel oli hapen taem “ol bigfala grup blong ol pipol oli bin folem Hem, mo Hem i bin hilim olgeta evriwan.”²⁸

Stap Blesem Laef blong Ol Narawan

Yumi tu, yumi save muvaot long ol raorao mo blesem laef blong ol narawan,²⁹ be i no blong go haed long kona blong yumi.

Long Mbui Mayi, long Dimokratik Ripablik blong Kongo, fastaem, plante oli tokbaot Jos, oli no andastanem ol bilif blong yumi, o no save ol memba blong yumi.

Samtaem i pas, Kathy mo mi i go long wan spesel Jos seves long Mbui Mayi. Ol pikinini oli dresap gud we i gud, oli gat ae we i saen mo ol bigfala smael. Mi bin hop blong tokbaot edukesen blong olgeta, be mi harem se plante oli no bin stap go skul. Ol lida blong mifala, wetem sam mane blong yumaniterian, oli faenem wan wei blong help.³⁰ Naoia, moa long 400 studen—ol gel mo ol boe, ol memba, mo tu, olgeta we oli no blong Jos—i gat 16 tija memba blong Jos, we oli stap tijim olgeta.

Fotin yia Kalanga Muya,i talem: “mi gat smol mane nomo, mekem mi no skul blong fo yia. … Mi glad tumas from samting we Jos i mekem. … Naoia mi save rid, save raet mo toktok Franis.”³¹ Taem hem i tokbaot puswok ia, meya blong Mbui Mayi i talem: “Jos Ia blong Jisas Kraes Ia blong Ol Lata-dei Sent i givim insperesen long mi, from se taem ol nara Jos oli stap seraot mo stap long kona blong olgeta, yufala i stap wok wetem ol narawan blong helpem komuniti we i stap long nid.”³²

Lavlavem Wanwan long Yufala

Evri taem we mi ridim Jon japta 13, mi tingbaot stret eksampol blong Sevya olsem man blong putum pis. Jisas Kraes i stap wasem leg blong Ol Aposol wetem lav. Afta, yumi ridim se tingting blong Hem i stap long trabol,³³ taem Hem i stap tingting long wan ia we Hem i lavem, we i stap rere blong salem Hem. Mi bin traem blong tingting long ol tingting mo ol filing blong Sevya taem we Judas i aot. I intresting blong luk se, long nogud taem ia, Jisas i nomo tokbaot ol trabol filing blong Hem, o abaot rong fasin ia. Be, Hem i toktok long ol Aposol blong Hem abaot lav, ol toktok blong Hem oli stap kasem tedei.

“Wan niufala komanmen mi givim long yufala, blong yufala i lavlavem yufala; olsem we Mi mi lavem yufala, blong yufala i lavem ol narafala man tu.”

“Nao from we yufala i stap lavlavem yufala, bambae olgeta man oli luksave se yufala i man blong mi.”³⁴

Bae yumi lavem Hem mo lavlavem yumi. Bae yumi man blong putum pis blong oli singaotem yumi “ol pikinini blong God,” mi prea olsem long nem blong Jisas Kraes, amen.

Ol Not

1. Matiu 5:9.

2. Luk long Efesas 6:16; Doktrin mo Ol Kavenan 3:8.

3. Ol Wok 17:28.

4. Mosaea 15:11.

5. Mosaea 5:7.

6. Presiden Dallin H. Oaks i talem: “Olgeta we oli stap folem Kraes oli mas stap olsem ol eksampol blong wan pipol we oli gat stret mo gud laef. Yumi mas lavem evri pipol, save stap ol man we i save lisingud, mo save soem intres long ol bilif blong ol narawan. I nomata se bae yumi no save agri, yumi no mas mekem hemia long wan rabis fasin. Ples we yumi stanap long hem, mo ol toktok blong yumi long saed blong ol topik we man i gat plante defren tingting long hem, oli no mas gat rao long hem,” (“Lavem mo Laef Wetem Olgeta we Oli Defren long Yu,” Jeneral Konfrens, Okt 2014).

7. “Amos C. Brown: Follow the LDS Church’s Example to Heal Divisions and Move Forward,” Salt Lake Tribune, Jan. 20, 2022, sltrib.com.

8. Elda Dale G. Renlund i bin talem: “Taem we lav blong Kraes i kavremap laef blong yumi, yumi fesem ol samting we yumi no agri long ol wetem fasin blong no stap flas, longfala tingting mo fasin we i kaen.” (“Pis blong Kraes I Katemaot Nogud Filing Agensem Man,” LiahonaNov 2021, 84).

9. Matiu 5:11–12.

10. Luk long 2 Nifae 10:23.

11. 2 Nifae 2:11.

12. Moses 6:55.

13. Luk long 1 Nifae 14:12.

14. Ol namba i soem se 3 aot long 5 pipol oli serem hedlaen blong wan stori we oli neva ridim (luk long Caitlin Dewey, “6 in 10 of You Will Share This Link without Reading It, a New, Depressing Study Says,” Washington Post, June 16, 2015, washingtonpost.com; Maksym Gabielkov and others, “Social Clicks: What and Who Gets Read on Twitter?” [pepa we oli presentem long 2016 ACM Sigmetrics International Conference on Measurement and Modeling of Computer Science, 14 Jun 2016], dl.acm.org).

15. Yu no sek sapos, samtaem, ol tingting blong yuwan i no oltaem agri, long fas ples, wetem ol tijing blong profet blong Lod. Ol taem ia, oli ol taem blong lanem samting, blong putum tingting i stap daon, taem yumi go daon long ol ni blong yumi blong prea. Yumi wokbaot fored wetem fet, yumi trastem God, yumi save se long stret taem bae yumi kasem samting i klia moa we i kam long Papa long Heven.

16. Luk long Doktrin mo Ol Kavenan 1:14–16.

17. Jon 15:18, 21; oli ademap italik.

18. “Bipartisan Bill Supported by Latter-day Saints Would Protect Gay and Transgender Arizonans,” Arizona Republic, Feb. 7, 2022, azcentral.com.

19. “Why the Church of Jesus Christ Supports a New Bipartisan Religious Freedom and Non-discrimination Bill in Arizona,” Feb. 7, 2022, newsroom.ChurchofJesusChrist.org.

20. Russell M. Nelson, “Teach Us Tolerance and Love,” Ensign, May 1994, 69.

21. Moronae 7:3. Presiden Gordon B. Hinckley i bin talem: “Yumi mas gat fasin blong akseptem nara man, be tu, yumi mas developem wan spirit blong talem tangkyu from olgeta we oli no stap luk ol samting long sem ae we yumi stap luk olgeta. Yumi no mas, long eni wei, salem wei blong tingting blong yumi, ol strong bilif blong yumi, save blong yumi abaot trutok we i no save finis, olsem we God blong Heven i soemaot long yumi. Yumi save givim witnes blong yumi abaot trutok, long kwaet, tru mo ones fasin, be neva long wan fasin we bae i mekem nara man i harem nogud. … Yumi mas lan blong mekem fasin blong talem tangkyu mo respek long ol narawan oli joen wan, speseli olgeta ia we oli tru long ol bilif mo praktis blong olgeta, semmak olsem yumi” (“Out of Your Experience Here” Brigham Young University devotional, Oct. 16, 1990], 6, speeches.byu.edu).

22. Luk long Luk 23:9–11.

23. Elda Dieter F. Uchtdorf i talem: “Olsem ol man o woman we i stap folem Jisas Kraes, yumi stap folem eksampol, blong Hem? Yumi no mekem nara man i sem o atakem olgeta. Yumi lukaotem blong lavem God mo givim seves long ol neba blong yumi. Yumi lukaot blong stap obei long ol komanmen blong God, mo laef folem ol prinsipol blong gospel” (“Five Messages That All of God’s Children Need to Hear” BYU Education Week, Aug. 17, 2021).

24. Elda Neal A. Maxwell i bin talem: “Ol memba blong Jos bae oli laef long situesen blong gud gras mo nogud gras kasem taem blong Mileniom. Sam nogud gras bae oli toktok olsem ol gud gras, mo samfala bae oli toktok plante long yumi abaot ol doktrin blong Jos we olgeta bakegen oli nomo biliv long hem. Oli poenem fingga long wei blong yusum ol risos blong Jos, we oli nomo kontribiut long Jos ia. Oltaem, oli lukaotem blong givim advaes long Ol Brata Lida we oli nomo sastenem olgeta. Oli fesem evriwan, be olgeta nomo, nao oli aot long Jos, be oli no save lego Jos i stap mo no tokbaot Jos.” (“Becometh As a Child,” Ensign, May 1996, 68).

25. Jon 6:66.

26. “Blong glad from sin i blong wan sot taem nomo” (luk long Hibrus 11:24–26).

27. Luk long Matiu 12:1–15.

28. Matiu 12:15.

29. Luk long 3 Nifae 11:29–30.

30. Wetem help blong Don Bosco Foundation, skul program ia i bin kasem plante help blong ol man wetem save blong tij mo ol tul blong tij.

31. Muleka, wan mama, i talem se: “Mi lavem program ia from se i bin givim long gel blong mi, janis ia, blong lan blong rid mo raet mo hop from wan moa gud fiuja. Mi no bin save sendem hem i go long skul from se mi mi stap salem kon flaoa nomo long maket, mo winim mane we i naf nomo blong pem kaekae. Mi talem bigfala tangkyu long Jos from hemia.” Sista Monique, wan tija, i talem: “Program ia i kam olsem wan bigfala blesing long ol pikinini ia. Long klas blong mi, plante oli no gat papa mo mama. Oli laekem, mo go long klas oltaem mo mekem homwok blong olgeta (Ol toktok mo ol foto oli kam long Elda Joseph W. Sitati, 24 Feb 2022).

32. Meya Louis d’or Ntumba Tshiapota, i givim toktok long wan pablik miting long saed blong litresi projek blong Mbuji-Mayi we Jos Ia blong Jisas Kraes blong Ol Lata-dei Sent i statem, 10 Okt 2021.

33. Jon 13:21.

34. Jon 13:34–35.