Ol Lesen long Wel
Yumi save tanem yumi i go long Sevya from paoa mo hiling we bae i helpem yumi blong mekem evri samting we oli sendem yumi i kam ia, blong mekem.
!I wan bigfala glad blong stap mo kam tugeta wetem wanwan long yufala long jeneral konfrens sesen ia blong ol woman!
Mi groap long wes blong Niu Yok mo stap go long wan smol branj blong Jos we i 32 kilometa longwe long haos blong mifala. Taem mi stap sidaon long Sandei Skul klas long storej rum blong olfala haos we oli rentem olsem japel, wetem wan fren blong mi ia nomo, Patti Jo, mi neva save pikjarem se bae mi pat blong wan felosip blong milian blong ol woman raon long wol.
Faef yia i pas, hasban blong mi, Bruce, i kasem wan series sik taem mifala i bin stap givim seves wetem ol Sent long Is blong Yurop Eria. Mitufala i gobak hom mo sam wik i pas, hem i lusum laef blong hem. Laef blong mi i bin jenis long wan naet ya nomo. Mi harem nogud mo mi filim se mi wik mo mi fraet. Mi plis long Lod blong lidim rod blong mi: “?Wanem nao Yu wantem mi blong mekem?”
Sam wik i pas, mi stap go tru long ol imel blong mi taem wan smol pikja long wan katalog i kasem ae blong mi. Taem mi lukluk i go kolosap, mi luksave se wan artis i bin mekem wan penting blong wan woman Samari wetem Jisas long wel. Long taem ya spirit i toktok klia long mi: “Hemia nao i wanem yu mas mekem.” Wan Papa long Heven we i gat lav, i stap invaetem mi blong kam long Sevya mo lanem samting.
Mi laekem blong serem wetem yu, trifala lesen we mi stap lanem taem mi gohed blong drink long wel blong Hem, we i “wota ia we i laef.”1
Faswan: Ol Situesen blong Yumi long Taem Bifo mo Tedei I No Talem Fiuja blong Yumi
Ol sista. Mi save se plante long yufala i bin filim semmak olsem mi, blong no save olsem wanem blong fesem ol had jalenj mo yu lus—lus from se laef blong yu i no hapen folem wei we yu hop from, prea from, mo plan from.
Nomata long ol situesen olsem, laef blong yumi i tabu mo i gat mining mo stamba tingting. Wanwan long yumi i wan stret pikinini gel blong God, wetem tabu aedentiti long sol blong yumi.
Sevya blong yumi Jisas Kraes, tru long sakrifaes blong Hem we i pem praes, i mekem i posibol blong yumi, blong kam klin mo kam oraet bakegen, we i mekem se yumi save mekem stamba tingting blong yumi long wol ia i hapen, nomata long ol desisen blong ol memba blong famli, sapos yumi mared o singgel, helti long bodi o tingting, o eni narafala situesen.
Tingting long woman ia long wel. ?Laef blong hem i bin olsem wanem? Jisas i save se woman ia i bin gat faef hasban mo man we hem i stap wetem naoia i no mared wetem hem. Mo yet, nomata ol hadtaem blong hem, Sevya i talemaot long wan toktok blong Hem long pablik se, Hem i Mesaea ia nao. Hem i talem se: “Mi we mi stap toktok long yu hem i mi ya nao.”2
Woman ia i kam wan strong witnes blong stap talemaot long olgeta we oli stap long siti se Jisas Hem i Kraes. “Nao long taon ya, i gat plante man Sameria we oli bilif long Jisas from tok ya we woman ya i talem.”3
Ol situesen blong hem long taem bifo mo tedei i no talem fiuja blong hem. Semmak olsem woman ia, yumi save jusum tedei blong tanem yumi i go long Sevya from paoa mo hiling we bae i helpem yumi blong mekem evri samting we oli sendem yumi i kam ia blong mekem.
Nambatu: Paoa Ia I Stap Insaed long Yumi
Long wan ves we yumi save long hem insaed long Doktrin mo Kavenan, Lod i leftemap tingting blong ol man mo woman blong “oli mas wok wetem strong tingting long wan gudfala wok, mo mekem plante samting long tingting blong olgetawan nomo, mo mekem i hapen ol plante stret mo gud wok; from paoa i stap long olgeta.”4
Ol sista. !Paoa ia i stap wetem yumi blong mekem plante stret mo gud wok!
Presiden Nelson i tijim yumi se: “Evri woman mo evri man, we oli mekem ol kavenan wetem God mo i stap kipim ol kavenan ia, mo i stap klin inaf blong tekpat long ol prishud odinens ia, oli save go stret blong kasem paoa blong God.”5
Mi kam blong save se taem yumi traehad blong respektem ol tabu kavenan we yumi bin mekem taem yumi baptaes mo insaed long ol tabu tempol, Lod bae i blesem yumi “wetem paoa blong Hem we i save hilim mo givim moa strong paoa” mo wetem “ol niu tingting mo blong yu wekap long saed blong spirit olsem i neva hapen bifo.”6
Nambatri: “Aot long Ol Smol Samting, Ol Samting we Oli Bigwan Oli Kamaot”7
Jisas i stap tijim ol man blong Hem antap long hil: “Yufala i olsem sol long ol man long wol,”8 mo “Yufala i olsem laet long ol man long wol.”9 Afta Hem i komperem gro blong kingdom blong heven olsem is, “we woman i putum long wan bigfala dis flaoa, nao is ya, man i no moa save luk, be i mekem olgeta flaoa ya i solap.”10
-
Sol
-
Is
-
Laet
Iven long ol smosmol namba, wanwan samting ia i givim paoa long evri samting we i stap raon long hem. Sevya hem i invaetem yumi blong yusum paoa blong Hem blong stap olsem sol, is, mo laet.
Sol
Hem i gud tumas blong luk olsem wanem wan smol namba blong sol i save givim wan gudfala tes long wanem yumi kakae. Mo yet, sol i wan long ol ingridien we i no sas mo hem i simpol.
Long buk blong 2 King, yumi rid abaot “wan smol gel,”11 we ol man Siria oli kasem hem mo mekem hem i kam wan wokman blong waef blong Neman we hem i kapten blong ol ami blong Siria. Hem i semmak olsem solhem i yang, hem i no wan impoten gel, mo laef blong hem olsem wan slef long wan nara kantri i no wanem hem i bin hop from.
Be, hem i sakem tu toktok wetem paoa blong God, mo hem i testifae long waef blong Neman: “Misis, mi mi wantem tumas sipos masta i save go luk profet ya we i stap long Sameria; Man ya bambae i save tekemaot sik ya, i mekem hem i kam gud bakegen.”12
Ol toktok blong fet blong hem i kasem Neman mo Neman i mekem folem ol toktok blong hem we i mekem hem i kam oraet bakegen, tugeta long saed blong spirit mo long bodi.
Plante taem yumi lukluk nomo long ol wokman we oli winim tingting blong Neman blong swim long reva Jodan, olsem we profet Elisa i bin talem, be Neman i no save stanap long doa blong Elisa sapos i no bin “smol gel ia.”
Maet yu yangfala o yu filim se yu no impoten, be yu save stap olsem sol long famli blong yu, long skul mo long komuniti blong yu.
Is
?Yu bin kakae bred we i no gat is? ?Hao bae yu tokbaot? ?Stakstak? ?Hevi? ?Strong? Wetem wan smol namba blong is, bred i solap, i gro i kam bigwan blong i kam moa laet mo sopsop.
Taem yumi invaetem paoa blong God insaed long laef blong yumi, yumi save riplesem “hat we i hevi”13 wetem ol lukluk we i kam tru long insperesen, we i leftemap tingting blong ol narawan mo i mekem rum blong ol hat oli kam oraet bakegen.
I no longtaem pas, wan fren blong mi i ledaon long bed long wan Krismes moning, mo hem i fulap wetem harem nogud. Ol pikinini blong hem oli plis long hem blong hem i girap; be hem i fulap long harem nogud from divos blong hem we oli no stretem yet. Taem hem i stap ledaon mo krae smosmol long bed, hem i kapsaetem ful sol blong hem long prea i go long Papa long Heven, mo stap talemaot long Hem abaot harem nogud blong hem.
Long en blong prea blong hem, Spirit i talem kwaet long hem, se, God i save harem nogud blong hem. Hem i fulap long lav mo sore blong God long hem. Tabu eksperiens ia, i pruvum ol filing blong hem mo i givim hop long hem se i no hem wan nomo i stap harem nogud. Hem i girap mo go aotsaed mo i bildim wan sno man wetem ol pikinini blong hem, from hem i putum laflaf mo glad i tekem ples blong hat we i hevi long harem nogud.
Laet
?I nidim hamas laet blong i ronemaot tudak long wan rum? Wan smol laet we i saen. Mo smol saen blong laet ia i save go olbaot tru long paoa blong God we i stap long yu.
Iven sapos yu filim se yu stap yuwan taem hariken blong laef oli stap kam, yu save saenem wan laet long tudak blong andastaning we i no klia, tingting we i fasfas mo no bilif. Laet blong fet blong yu long Kraes i save stap strong mo stap tru, blong stap lidim olgeta raon long yu i go long sefti mo pis.
Ol sista. Hat i save jenis mo laef i save kasem blesing taem yumi givim smol sol, wan spun we i fulap long is, mo wan smol saen blong laet.
Mi testifae se Sevya hem i sol long laef blong yumi, mo Hem i stap invaetem yumi blong testem glad mo lav blong Hem.14 Hem i Hem we i is long taem we laef blong yumi i had, i givim hop long yumi mo15 leftemap ol hevi samting blong yumi16 tru long paoa blong Hem ia we i bitim eni narafala paoa mo lav blong pemaot man.17 Hem i laet blong yumi,18 we i saenem rod blong yumi i gobak hom.
Mi prea se bae yumi save go long Sevya, olsem woman ia long wel, mo drink aot long wota blong Hem we i laef. Wetem ol pipol blong Sameria, yumi save talemaot strong se: “Be naoia mifala i bilif, … from we mifala nomo i harem tok blong hem, mo mifala i save we hem i Kraes, Sevya blong wol.”19 Long nem blong Jisas Kraes, amen.