Lada blong Fet
Taem yumi no bilif, i blokem janis blong yumi blong luk ol merikel, be taem tingting i stap fulwan long fet long Sevya, bae i karemaot lok long ol paoa blong heven.
?Olsem wanem nao ol jalenj blong laef oli afektem fet blong yumi long Jisas Kraes? Mo ?wanem nao glad mo pis we yumi eksperiensem long laef ia bae i mekem long fet blong yumi?
Hem i yia 1977. Fon i bin ring mo mesej i brekem hat blong mifala. Carolyn mo Doug Tebbs, tufala i rere blong stap muv i go long niufala hom blong tufala, afta we tufala i graduet long skul. Kworom blong ol elda oli bin kam blong putum ol ting blong tufala long bigfala trak. Doug i lukluk laswan blong mekemsua se rod i klia bifo trak i muvaot. Wanem we hem i no save luk, hem i smol gel blong hem, Jennie, we i ron kwiktaem biaen long trak long rong taem. Long sot taem ia, Tufala i lusum gel blong tufala.
?Wanem nao bae i hapen afta? Harem nogud ia we tufala i filim we i dip mo no bilivim tingting ia blong lusum hem, ?i save krietem wan filing we i seperetem Carolyn mo Doug o bae i fasem taet hat blong tufala tugeta mo mekem fet blong tufala i kam moa strong long plan blong Papa long Heven?
Rod blong tufala tru long ol hadtaem i bin longwan mo i soa tumas, be long sam ples, paoa long saed blong spirit i kambak long tufala blong no lusum hop “stap long rod blong tufala.”1 Long sam wei, naesfala kapol ia i developem moa fasin olsem hemia blong Kraes. Moa komitmen. Moa fasin blong lav mo sore. Tufala i bilif se, long taem blong Hem, God bae i konsekretem ol hadtaem blong tufala blong oli kam wan blesing blong tufala.2
Nomata se harem nogud mo filing ia blong lusum wan bae i no save finis fulwan, Carolyn mo Doug i bin gat strong tingting mo trastem se, blong stap strong long rod blong kavenan, bae Jennie we tufala i lavem, hem i blong tufala blong oltaem.3
Eksampol blong tufala i bin mekem fet blong mi i kam moa strong long plan blong Lod. Yumi no luk evri samting. Hem, Hem i luk. Lod i bin talem long Josef Smit long Libeti Kalabus se “ evri samting ia bae i givim eksperiens long yu, mo bae i blong gud blong yu. Pikinini blong Man i bin kamdaon mo fesem i bitim evri samting ia. ?Yu yu moa hae long hem?”4
Taem yumi akseptem tingting blong Lod, Hem i stap tijim yumi olsem wanem blong wokbaot wetem Hem.5 Olsem wan yangfala misinari we i stap givim seves long Tahiti, oli askem mi blong givhan long wan smol pikinini we i sik. Mitufala i putum han blong mitufala long hed blong hem mo givim blesing long hem blong i kam oraet. Helt blong hem i stat blong kam gud, be afta, hem i sik bakegen. Seken taem mitufala i givim blesing long hem, be i semmak bakegen. Namba tri rikwes i kam. Mitufala i plis long Lod blong i mekem tingting blong Hem i hapen be i no tingting blong mifala. Smoltaem afta, smol spirit ia i gobak long hom blong hem long heven.
Mifala i bin stap long pis. Mifala i wantem smol pikinini blong laef, be Lod i gat ol narafala plan blong hem. Blong akseptem tingting blong Hem long ples blong wanem we yumi wantem, i ki blong stap faenem glad nomata long ol situesen blong yumi.
Simpol fet we yumi gat long Jisas Kraes long taem we yumi stat blong lanem abaot Hem, i save stap long hat blong yumi taem yumi fesem ol jalenj blong laef. Fet blong yumi long Hem i save mo bae i lidim yumi tru long ol had samting blong laef. I tru, bae yumi luk se i isi long narasaed blong ol had problem blong laef6 taem yumi oltaem gat “[strong bilif] long Kraes wetem wan stret mo klin hop.”7
Pat blong stamba tingting blong laef i blong letem ol samting we oli stap mekem yumi foldaon, blong kam ol ston blong stanap long olgeta taem yumi stap klaem long wanem we mi singaotem “lada blong fet”—wan lada, from se i soem se fet i no wan samting we i stap semmak. Hem i save go antap o daon folem ol joes we yumi stap mekem.
Taem yumi stap traehad blong bildimap fet long Sevya, bae yumi no save andastanem fulwan lav blong God long yumi mo from hemia yumi stap obei nomo long ol loa blong Hem, from yumi filim se i wan wok we yumi mas mekem. Iven filing blong mekem ol rong samting i save kam stamba tingting blong pusum yumi blong kam long Hem, bitim taem yumi gat lav long Hem Maet yumi no gotru long wan eksperiens yet we bae i mekem yumi rili joen long Hem.
Taem yumi lukaotem blong mekem fet blong yumi i kam antap, bae yumi save konfius long wanem we Jemes i bin tijim. Hem i rimaenem yumi se “man we i bilif be i no mekem gudfala wok, bilif blong hem i ded.”8 Bae yumi save foldaon sapos yumi ting se evri samting oli dipen long yumi. Taem yumi dipen tumas long yumiwan, i save stopem janis blong yumi blong kasem ol paoa blong heven.
Be taem yumi muv fored wetem tru fet long Jisas Kraes, fasin blong wei we yumi tingting bae i stat blong jenis. Yumi luksave se fasin blong stap obei mo gat fet long Sevya i kwalifaem yumi blong gat Spirit blong Hem i stap wetem yumi oltaem.9 Fasin blong obei i nomo wan samting we i stap distebem yumi be i wan samting we yumi stap lukaotem.10 Yumi luksave se fasin blong obei long ol komanmen blong God i mekem se yumi save stap trastem Hem. Wetem tras long Hem, laet blong yumi bae i kam antap. Laet ia bae i lidim wokbaot blong yumi tru long laef mo letem yumi blong luk moa klia rod we yumi mas folem.
Be i gat moa. Taem fet blong yumi long Sevya i kam antap, yumi luk wan naesfala jenis bae i hapen mo bae yumi luksave tu rilesensip blong yumi wetem God—wan rilesensip we i muvaot i go longwe long “?Wanem nao mi mi wantem?” i go long “?Wanem nao God i wantem?” Olsem Sevya, yumi wantem blong folem toktok ia “Be yu no mekem olsem we mi mi wantem, yu mekem olsem we yu nomo yu wantem.”11 Yumi wantem blong mekem wok blong God mo stap olsem wan tul long han blong Hem.12
Fasin blong yumi blong gro i kam antap i wan samting we i no save finis. Presiden Nelson i bin tijim se, i gat plante moa samting we Papa long Heven i wantem yumi blong save.13 Taem yumi progres, yumi mas andastanem wanem we Lod i bin tijim long Josef Smit: “From we sapos yufala i stap obei long ol komanmen blong mi, bambae yufala i kasem ful paoa mo glori blong hem, mo gat glori tru long mi olsem we mi gat glori tru long Papa; taswe, mi talem long yufala, bambae yufala i kasem gladhat from wan gladhat.”14
Hamas we yumi klaem long lada blong fet, hem i desisen blong yumi. Elda Neil L. Andersen i bin tijim: “Fet i no kam tru long janis, be tru long joes.”15 Yumi save jusum blong mekem ol joes we i nid blong mekem, blong mekem fet blong yumi long Sevya i kam moa antap.
Tingting long risal blong ol joes we Leman mo Lemyul i bin mekem we i mekem lada blong fet i go daon, be Nifae i klaem i go moa antap. ?I gat wan narafala stori we i moa klia we i ripresentem wanem we i defren bitwin ansa blong Nifae blong “Bae mi go mo mekem”16 agensem Leman mo Lemyul we oli jes luk wan enjel mo komplen se, “?Olsem wanem nao i save hapen se Lod bae i putum Leban long han blong yumi?”17
Taem yumi no bilif, i blokem janis blong yumi blong luk ol merikel, be taem tingting i stap fulwan long fet long Sevya, bae i karemaot lok long ol paoa blong heven.
Iven taem fet blong yumi i no strong, oltaem bae Lod i stretem han blong Hem blong leftemap yumi.18 Sam yia i pas, mi kasem wan wok blong oganaesem bakegen wan stek long Naejeria. Long las minit, i gat wan jenis blong deit. I gat wan man long stek we i disaed blong ronwe long taon stat long fas deit blong konfrens. Hem i no wantem stap, mo afta, bae oli singaotem hem olsem stek presiden.
Taem hem i stap longwe, hem i kasem wan bigfala aksiden, be hem i oraet nomo. Hemia i mekem hem i tingting long from wanem hem i stap sef. Hem tingtingbak long desisen we hem bin mekem. Hem i sakem sin mo wetem tingting we i stap daon, hem i go long niu deit blong konfrens. Mo yes, oli singaotem hem olsem niufala stek presiden.
Elda Neal A. Maxwell i bin tijim: “Yumi save faenem hapines we i fulwan taem tingting blong yumi i mas ron stret wetem ol tingting blong God. Sapos no, bae yumi kasem smol pat nomo.”19
Afta we yumi mekem “evri samting we i stap long paoa blong yumi,” afta hem i taem blong “stanap kwaet … blong luk fasin blong God blong sevem man.”20 Mi luk hemia taem mi stap givim seves olsem givhan brata long famli McCormick. Tufala i mared blong 21 yia, Mary Kay i bin fetful blong givim seves long ol koling blong hem. Ken i no bin wan memba blong Jos, mo hem i no gat intres blong kam wan, be hem i lavem tumas waef blong hem, mo hem i bin jusum blong go long jos wetem waef blong hem.
Wan Sandei mi filim strong blong serem testemoni blong mi wetem Ken. Mi askem hem sapos i oraet blong mi mekem. Ansa blong hem i simpol nomo mo klia: “No tangkyu.”
Mi konfius. Mi bin filim wan kwaet voes mo traem blong folem. Mi wantem tumas blong talem se mi bin mekem pat blong mi finis. Be afta long prea mo plante tingting, mi save luksave se nomata ol tingting blong mi oli stret, mi bin dipen tumas long miwan be smol nomo long Lod.
Afta, mi gobak, be wetem wan defren tingting. Bae mi go simpol nomo, olsem wan tul long han blong Lod mo no gat eni narafala tingting, be blong folem Spirit. Tugeta wetem fetful kompanion blong mi, Gerald Cardon, mitufala i go insaed long hom blong McCormick.
I no longtaem i pas, mi filim spirit i talem mi blong invaetem Gerald blong singsing: “Mi Save Ridima Hem I Laef.”21 Hem i lukluk wetem kwestin long fes blong hem, be hem i gat fet long fet blong mi, hem i mekem. Wan naesfala spirit i fulumap rum. Spirit i talem long mi blong invaetem Mary Kay mo Kristin, gel blong tufala blong serem testemoni blong tufala. Taem tufala i mekem, Spirit i kam moa strong. I tru, afta long testemoni blong Kristin, wota blong ae i stap ron daon long fes blong Ken.22
God i bin tekova. I no tajem ol hat nomo be i mekem wan jenis we bae i stap oltaem. Wota blong ae i wasemaot twantewan yia blong no bilif tru long paoa blong Tabu Spirit. Wan wik afta, Ken i bin kasem baptaes. Mo wan yia afta, Ken mo Mary Kay, tufala i sil long haos blong Lod blong taem ia mo taem we i no save finis.
Tugeta mifala i bin eksperiensem wanem i minim blong riplesem tingting blong yumi wetem hemia blong Lod, mo fet blong yumi long Hem, i kam moa antap.
Plis tingting long ol kwestin ia we ol tabu profet blong God oli bin askem, taem yu stap traehad blong klaem lada blong fet blong yu:
?Mi bin karemaot fasin blong gat hae tingting?23
?Mi gat ples long hat blong mi blong toktok blong God i stap long hem?24
?Mi stap letem Lod i konsekretem ol hadtaem blong mi blong oli kam wan blesing blong mi?25
?Mi stap letem tingting blong mi i draon insaed long wanem we Papa i wantem?26
Sapos mi bin filim blong singim singsing blong lav blong pemaot man, ?mi save filim lav ia naoia?27
?Mi stap letem God i win long laef blong mi?28
Sapos yu filim se rod we yu stap long hem naoia i stap go agensem fet blong yu long Sevya, plis, faenem rod blong yu i kambak long Hem. Blong yu mo laen blong yu i kam olsem wan god, i dipen long hem.
Bae yumi planem ol sid blong fet dip insaed long hat blong yumi. Bae yumi fidim gud ol sid ia, taem yumi fasem yumi i go wetem Sevya tru long fasin blong yumi stap ona long ol kavenan we yumi bin mekem wetem Hem. Long nem blong Jisas Kraes, amen.