Go Aot mo Helpem Ful Wol Ia

Ol memba blong Fas Presidensi mo blong Kworom blong Olgeta Twelef Aposol oli gohed long seves blong olgeta olsem ol profet, ol sia, mo ol reveleta, mo oli stap olsem witnes raon long wol abaot Restoresen blong gospel mo ol blesing blong stap folem Sevya. Hemia samfala samting we oli bin mekem stat long las jeneral konfrens.

Ol memba blong Fas Presidensi

Blong gat wan sot lukluk long seves blong Presiden Russell M. Nelson stat long las jeneral konfrens, luk long pej 135.

Taem hem i bin toktok long wan yunivesiti long Rom, Itali, Presiden Dallin H. Oaks, Fas Kaonsela long Fas Presidensi, i talem se fridom blong relijin i tekem plante gud samting i kam long sosaeti, mo hem i leftemap tingting blong ol pipol we oli gat fet blong oli “faenem ol wei blong lanem samting aot long wanwan long olgeta, mo blong oli mekem strong moa wanem we i semsemmak bitwin olgeta, we i stap holemtaet yumi tugeta.”

Ol Memba blong Kworom blong Olgeta Twelef Aposol

Presiden M. Russell Ballard, Akting Presiden, mo Ol Elda Jeffrey R. Holland, mo Quentin L. Cook, oli givhan truaot long Inglan, mo mit wetem ol misinari mo ol memba blong Jos. Evri trifala ia, oli bin mekem misin blong olgeta long Yunaeted Kingdom taem oli bin yangfala, mo Elda Holland mo Elda Cook, tufala i bin kompanion.

Elda David A. Bednar i bin toktok long wan divosen long Jordan. Long Yunaeted Arab Stet, hem i mit wetem ol lida blong Abu Dhabi Stek mo hem i bin visitim ekspo eria blong ples we, wan dei, bae oli bildim wan tempol long hem. Long Bahren, hem i mit wetem ol memba blong Manama Wod, mo i holem wan divosen blong ol yut.

Elda D. Todd Christofferson i kam fas Aposol blong visitim Ripablik blong Gambia. Hem i mit wetem presiden, fas ledi, mo vaes presiden blong ripablik mo hem i toktok blong i gat ol joen wok i hapen bitwin Jos mo fandesen blong fas ledi ia, blong helpem olgeta we oli stap long nid. Elda Christofferson i bin visitim tu Aevori Kost, Naejeria, mo Gana.

Long taem blong ol miting ia mo ol trening ia long Kolombia mo Ekuado, Elda Neil L. Andersen i tingbaot plante memba blong Jos we oli bin ded finis from KOVID. Hem i bin mitim ol misinari, 36 misin presiden mo waef blong olgeta, mo ol lida blong stek, mo plante taem, hem i toktok Spanis nomo. Long wan divosen long Kolombia, hem i bin toktok abaot fasin blong mekem ol mared mo ol famli oli kam strong moa.

Long Panama, Elda Gary E. Stevenson i kam fas Aposol blong visitim aelan ia blong Karti Tupile long San Blas Akipelago, we i stap long Guna Yala distrik, samples tu mo haf aoa aot long Panama Siti.

Elda Geritt W. Gong i bin toktok long ol yut long Filipin, se oli mas mekem ol waes desisen, mo se oli mas tekem long olgetawan, nem ia blong Jisas Kraes. Hem i mit wetem ol misinari, mo long wan brodkas truaot long Filipin, i bin toktok long ol yang singgel adalt.

Long stret hom kantri blong hem, long Brasil, Elda Ulisses Soares i bin givim kaonsel long ol yang adalt blong oli mas mekem Sevya i kam long senta blong laef blong olgeta. Hem i talem long ol misinari blong praktisim fet long Jisas Kraes, mo blong stap angka long trutok. Sam manis afta, Elda Soares i gobak long Brasil blong toktok long wan simposiom long saed blong fridom blong relijin. Mo tu, hem i mit wetem vaes presiden blong Dominik Ripablik mo wetem ambasada blong Kiuba long kantri ia. Jos i gat wan distrik mo fo branj long Kiuba.

Long ol onlaen miting, Elda Dieter F. Uchtdorf i bin toktok long ol yut, ol misinari, mo ol lida blong Jos long Esia: Elda Quentin L. Cook i toktok long ol yang adalt long Yurop, Is Yurop, Afrika, mo Medel Is Eria; Elda D. Todd Christofferson i bin toktok long ol yang adalt we oli toktok Potugis; Elda Neil L. Andersen, i toktok long ol yang adalt we oli stap laef long Latin Amerika mo Spen; Elda Ronald A. Rasband i toktok long ol yang adalt we oli toktok Franis; mo Elda Dale G. Renlund i toktok long ol yang adalt we oli toktok Franis.