Tempol Nius
Presiden Russell M. Nelson i bin anaonsem ol plan blong bildim 17 niu tempol, mo i tekem namba ia i kam long 100; hemia namba blong ol tempol we oli bin anaonsem stat long taem we hem i kam presiden blong Jos.
Bae i gat ol tempol we bae oli bildim long, o kolosap long Welington, Niu Silan; Brasavil, Ripablik blong Kongo; Barselona, Spen; Birmingham, Yunaeted Kingdom; Kusko, Peru; Maseyo mo Santos, Brasil; San Luis Potosi mo Meksiko Siti Benemerito, Meksiko; mo long YSA, Tampa, Florida; Noksvil, Tenesi; Klevelan, Ohaeo; Wijita, Kansas; Austin, Teksas; Misoula, Montana; Montpelier, Aedaho; mo Modesto, Kalifonia.
Sam Moa Apdeit
Stat long las jeneral konfrens, oli bin dediketem o dediketem bakegen ol tempol, oli bin anaonsem ol open haos, mo oli bin putum taem blong holem ol graonbreking raon long wol.
Winipeg Manitoba Tempol (Kanada) mo Pokatelo Aedaho Tempol (YSA) oli bin dediketem olgeta, mo Mesa Arisona Tempol (YSA) oli bin dediketem bakegen. Ol dedikesen o nambatu dedikesen deit mo open haos, oli bin anaonsem olgeta blong ol tempol ia: Yigo, Guam; Praia Kep Verde; Rio de Janero, Brasil; Wasington, D.K., YSA; mo Tokio, Japan.
Oli brekem graon blong Kaspa Waeoming Tempol (YSA), Pago Pago Ameriken Samoa Tempol, Bakolod Filipin Tempol, mo Fritaon Siera Leone Tempol. Oli putum deit finis blong brekem graon blong ol tempol long ol ples ia long YSA: Gran Janksen, Kolorado; Lindon, Yuta; Famington, Niu Meksiko; Elko, Nevada; Beli, Aedaho; Yorba Linda, Kalifonia; mo Smitfil, Yuta.
Oli anaonsem ol ples, mo oli givim ol droing blong ol tempol ia: Kep Taon Saot Afrika Tempol, Kweretaro Meksiko Tempol, mo Ifrem Yuta Tempol.
Ol Wok blong Mekem Tempol I Niu Bakegen
Ol bilding wok mo ol wok blong mekem tempol i kam niu bakegen oli stap gohed long plante tempol raon long wol, we i tekem hemia blong Sol Lek Tempol, mo ol graon blong hem, wetem Jos Ofis Bilding platsa. Projek ia bae i mekem tempol mo raon long hem i kam gud moa, i luk niu, mo bae i naes moa; bae oli riplesem ol sistem we oli nomo wok, i lukluk long ol wari long saed blong sefti mo graon i seksek.
Tempol ia, oli mekem i kam strong moa blong i save fesem wan 7.2 etkwek; fandesen blong hem oli mekem i kam strong moa from graon i seksek; ol sistem blong lektrisiti mo wota oli mekem i kam niu; i gat ol niu ples blong go insaed; platsa, oli stap riplesem ol ples we oli brokbrok, mo oli mekembak ples blong i naes mo i no gat tumas graon long ol ples andagraon; ol yad blong tempol mo ofis bilding platsa, oli mekembak blong krietem wan ples we i moa open mo i mekem man i filim se oli welkam. Ol wok blong mekem ples i kam niu bakegen, we oli stat long 2020, oli putum se bae oli finis long 2025.
Ol wok blong mekembak ol tempol long Hamilton, Niu Silan; Hong Kong, Jaena; Kolombas, Ohaeo, YSA; mo Sent Joj, mo Mantae, Yuta, YSA, oli stap gohed yet. Blong luk se ol wok oli stap wea long saed blong ol nara tempol, luk long link andanit ia.
Gobak long Nomol
Long wan leta i go long ol lida blong Jos, we deit blong hem i 15 Maj 2022, Fas Presidensi i bin anaonsem se ol tempol raon long wol bae, sloslo, oli gobak long ol nomol fasin blong wok. Hemia i minim se bae oli nomo werem ol fes mask, mo i nomo gat smol namba blong ol pipol, hemia bae i folem situesen blong wanwan ples. Blong statem hemia long wanwan tempol, bae ol tempol presiden mo ol Eria Presidensi nao bae oli disaed long hem, long semtaem we oli toktok wetem Tempol Dipatmen.