Elda Isaac K. Morrison

Jeneral Atoriti Seventi

Elda Isaac K. Morrison i talem se, hem mo waef blong hem, oli no bin silip gud stat long taem we Presiden Russell M. Nelson i givim koling long Elda Morrison blong stap olsem wan Jeneral Atoriti Seventi.

“Mitufala i save se hemia bae i wan longfala wokbaot long mitufala,” hem i talem. “Mitufala i dipen long Lod blong soem long mitufala wanem nao mitufala i nidim blong mekem.”

Elda Morrison, oli bin singaotem hem olsem wan stek presiden long 2014, wan Eria Seventi long 2018, mo presiden blong Gana Kep Kost Misin long 2020.

“Evri wok ia we oli bin givimaot, oli bin kam long wan taem we mitufala i no ting long hem,” hem i talem. “Be mi dipen long Lod, be i no long paoa blong mi.”

Elda Morrison i gat wan masta blong saens digri long stratejik manejmen mo lidasip long Kwame Nikrumah Yunivesiti blong Saens mo Teknoloji long Gana. Hem i bin wok blong Jos long ol defren posisen stat long 2004, mo laswan olsem wan lida mo memba sapot maneja blong Wes Afrika.

Isaac Kofi Morrison, i bon i kam long wol ia long 25 Novemba 1977, long Takoradi, Gana; papa mo mama blong hem i Josef Kojo Morrison, mo Meri Efua Obua Sarfo.

Taem hem i smol pikinini, Elda Morrison mo famli blong hem oli bin stap go long ol miting blong wan narafala jos. Taem hem i muv i go long famli blong angkel blong hem blong go long sekendri skul, hem i stap go long ol miting blong Ol Lata-dei Sent wetem olgeta, mo afta, ol miting blong jos blong hem. Wan eli moning seminari tija i invaetem hem blong kam long seminari, mo long ples ia, hem i bin mitim Hannah Nyarko.

“Hem i gat waes, mo bae i givim ol gudfala tingting,” hem i talem. “Hemia nao i givim mi strong tingting blong stadi i go moa.” Afta we mifala i stadi long Buk blong Momon long yia ia, hem i talem: “Mi bin rere blong kasem baptaes.”

Long namba 18 Disemba 2004, hem mo Hannah, tufala i mared long Takoradi, mo tufala i sil tri dei afta long Akra, Gana Tempol. Tufala i gat tri boe.

Antap long ol nara koling blong hem, Elda Morrison i bin givim seves olsem wan stek presidensi kaonsela, wan bisop, wan kaonsela blong bisop, presiden blong kworom blong ol elda, Gospel Doktrin tija, seminari tija, mo fultaem misinari long Naejeria.