Tabu Fasin mo Fiuja blong Yu we I No Save Finis
Mi invaetem yufala blong mekem laef blong yufala i lukluk long Jisas Kraes mo tingbaot ol fandesen trutok we oli stap long stamba toktok blong Ol Yang Woman.
Ol dia sista. Tangkyu blong yu stap ia. Mi gat bigfala ona blong tekpat long Jeneral Konfrens sesen ia blong ol woman. Wanwan taem, mi gat spesel janis blong go long klas blong Ol Yang Woman. Be mi mas talem stret—mi no yangfala, mo mi mi no wan woman. Be, mi lanem se bae mi no filim tumas se mi no stap long ples blong mi sapos mi talem stamba toktok blong Ol Yang Woman baehat. Dip doktrin we oli stap tijim insaed long stamba toktok blong Ol Woman1 i impoten blong ol yang woman, be i blong yumi evriwan, wetem yumi tu we yumi no ol yang woman.
Stamba toktok blong Ol Yang Woman i stat olsem: “Mi mi wan gel blong Papa mo Mama long Heven, we Tufala i laekem mi tumas, mo mi gat wan tabu fasin mo wan ples we i no save finis.”2 Toktok ia i gat fo impoten trutok insaed. Faswan, yu yu wan gel we Tufala i lavem yu tumas. I no gat wan samting we yu mekem, o no mekem, we bae i jenisim hemia. God i lavem yu, from se yu yu spirit gel blong Hem. Samtaem, bae yumi no filim lav blong Hem, be lav ia i stap oltaem. Lav blong God i stret gud evriwan.3 Paoa blong yumi blong filim lav ia, i no stret evriwan.
Spirit i plei wan stamba rol blong pasem lav blong God long yumi.4 Be yet, paoa blong Tabu Spirit i bin haed biaen long “ol strong filing, olsem bigfala kros, fasin blong no laekem man, … [o] fraet, … semmak olsem bae yu traem blong haremsave swit tes blong wan grep long semtaem we yu stap kakae wan strong jalapenio jili. … [Wan i tes] i kavremap narawan.”5 I semmak olsem, ol fasin we oli sakem yumi longwe long Tabu Spirit, wetem sin tu,6 i mekem se i had long yumi blong filimsave lav ia we God i gat long yumi.
Semmak, blong haremsave lav ia blong God, bae ol strong jalenj, sik long bodi mo tingting i save kavremap, wetem sam moa samting. Long evri kes ia, kaonsel blong ol lida we yumi save trastem, mo ol profesonol, oli save helpem yu bigwan. Yumi save traem tu blong kam antap blong filimsave lav blong God taem yumi askem yumiwan: ?Olsem wanem? ?Lav blong mi long God i stap oltaem, o mi mi lavem Hem taem we mi gat ol gud dei nomo, be i no long ol nogud dei blong mi?
Seken trutok i we, yumi gat papa mo mama long heven, wan papa mo wan mama.7 Doktrin blong wan Mama long Heven, i kam tru long revelesen, mo i wan bilif blong Ol Lata-dei Sent. Presiden Dallin H. Oaks i bin eksplenem hamas trutok ia i impoten: “Tingting ia i stat wetem papa mo mama long heven. Wanem yumi wantem tumas, i blong kam olsem olgeta.”8
I no gat tumas samting abaot Mama long Heven, be wanem we yumi save, i stap long Gospel Topik Essay insaed long Gospel Laebri aplikesen.9 Taem yu ridim finis wanem i stap long ples ia, bae yu save evri samting we mi mi save abaot topik ia. Mi wantem tumas blong save moa. Yufala tu i gat ol kwestin i stap mo wantem moa ansa. Blong stap lukaot blong andastanem moa ol samting, i wan impoten pat blong kam antap long spirit, be plis, yufala i mas lukaot. Gud wei blong tingting i no save tekem ples blong revelesen.
Blong mekemap tingting i save lidim man i go long moa save long spirit, be i save lidim yumi i go long giaman, o tanem tingting i kamaot long wanem i kam finis tru long revelesen.10 Eksampol: Sevya i bin tijim ol disaepol blong Hem blong “mas prea oltaem long Papa long nem blong mi.”11 Yumi folem paten ia mo daerektem wosip blong yumi i go long Papa long Heven, long nem blong Kraes, mo yumi no stap prea long Mama long Heven.12
Longtaem finis i kam, God i bin jusum ol profet, mo oli bin gat raet blong toktok long bihaf blong Hem. Be oli no stap talem ol doktrin we oli mekemap “long tingting blong olgeta”13 o oli no stap tijim wanem we i no kam tru long revelesen. Tekem ol toktok blong profet blong OlTesteman, Balam, we i bin givim wan samting blong mekem nogud long Ol Man Isrel blong gud blong Moab. Balam i talem: “Nating we sapos king i tekemaot olgeta gol mo silva we i stap long haos blong hem, i givim i kam long mi, be Hae God i God blong mi, mo mi bambae mi no save ova long tok blong hem. Nating we wan smol samting nomo, be mi no save brekem tok blong hem.”14 Ol profet blong lata-dei oli folem semmak. Blong askem revelesen we i kam long God i no wan stret fasin mo bae i no tekem yumi go samples. Be, yumi wet long Lod mo taem blong Hem, blong i talemaot ol trutok blong Hem tru long ol wei we Hem i stanemap finis.15
Nambatri trutok long fas paragraf blong stamba toktok blong Ol Yang Woman, i we, yumi gat wan “tabu fasin.” Hemia stret huia yumi. I “stap long blad,” (long saed blong spirit) we yumi tekem long papa mo mama long heven16 mo i no nidim blong yumi mekem wan samting blong kasem. Hemia impoten aedentiti blong yumi, nomata se yumi jusum blong putum aedentiti blong yumi i defren. Blong evriwan i andastanem dip trutok ia, i impoten, be speseli, wanwan we i pat blong sam grup we oli no stap luksave olgeta, o oli bin mekem nogud olgeta. Tingbaot se aedentiti blong yu we i impoten moa i gobak long tabu fasin blong yu olsem wan pikinini blong God.
Nambafo trutok i we, yumi gat wan “fiuja we i no save finis.” Wanem fiuja ia, bae oli no fosem yumi long hem. Afta long ded, bambae yumi kasem wanem yumi bin kwalifae from, mo “stap glad [nomo] long wanem yumi wantem kasem.”17 Blong kasem fiuja blong yumi we i no save finis, i dipen long ol joes blong yumi. Hem i askem blong mekem mo kipim ol tabu kavenan. Kavenan rod ia i wei blong kam long Kraes mo i stanap long ful trutok mo wan loa we i no jenis, we i no save finis. Yumi no save krietem rod blong yumiwan mo ting se God bae i kipim promes blong hem. Blong ting se ol blesing blong Hem bae oli kam be yu no folem loa we i no save finis we ol blesing ia oli kam folem,18 hem i wan rong tingting, i semmak olsem se yu ting se bae yu tajem wan hot stov mo disaed se bae yu no bon.
Yufala i save se bifo mi stap lukaot ol sikman we oli gat hat problem. Ol bes risal blong olgeta, bae i save kamaot nomo sapos oli folem ol tritmen plan we i bin wok finis. Nomata we oli save hemia, sam sikman oli traem tokbaot nara tritmen plan. Oli talem se: “Mi no wantem tekem plante meresin, o mi no wantem folem ol step ia.” I tru, sam sikman oli bin fri blong mekem desisen blong olgeta, be sapos oli kamaot smol long tritmen plan we i stap, bae risal blong olgeta i go nogud. Ol sikman wetem hat problem, oli no save jusum wan rod we i no stret, mo afta, putum rong long dokta blong hat blong olgeta from risal i nogud.
Hemia i tru blong yumi tu. Rod we Papa long Heven i putum, i lidim yumi long bes risal blong taem we i no save finis. Yumi fri blong jusum, be yumi no save jusum risal taem yumi no folem rod we Hem i putum.19 Lod i talem: “Huia i brekem wan loa, mo i no obei long loa ia, be i traem blong kam wan loa long hemwan, … hem i no save kam tabu tru long loa, no tru long sore, no tru long jastis, no tru long jajmen.”20 Yumi no save kamaot long rod we Papa long Heven i putum i stap mo afta, putum rong long Hem from risal i nogud.
Seken paragraf blong stamba toktok blong Ol Yang Woman i go olsem: “Olsem wan disaepol blong Jisas Kraes, mi traehad blong kam olsem Hem. Mi lukaot mo tekem aksen folem revelesen we mi kasem blong miwan, mo givhan long ol narawan long tabu nem blong Hem.” Yumi save developem wan testemoni abaot Jisas Kraes taem yumi mekem samting wetem fet.21 Yumi save klemem presen ia “blong save se Jisas Kraes i Pikinini blong God, mo se oli bin nilim hem long kros from ol sin blong wol ia.” O, yumi save kasem presen ia blong save biliv long ol toktok blong olgeta we oli save,22 kasem taem yumiwan yumi save. Yumi save folem ol tijing blong Sevya mo stap go helpem ol narawan blong go long Hem. Long wei ia, yumi joenem Hem long wok blong Hem.23
Stamba toktok blong Ol Yang Woman i gohed i se: “Bae mi stanap olsem wan witnes blong God long evri taem, mo long evri samting, mo long evri ples.” Evri memba blong Jos, oli nidim olgeta olsem ol witnes blong God,24 nomata Ol Aposol mo Ol Seventi oli kasem spesel wok ia blong stap ol spesel witnes long nem blong Kraes.25 Traem tingting wan futbol maj, we golkipa nomo i protektem gol. Sapos i no gat help blong ol nara memba blong tim, golkipa bae i no save difendem gud gol ia, mo tim bae i lus oltaem. Semmak, oli nidim evriwan blong i stap long tim blong Lod.26
Las paragraf blong stamba toktok blong Ol Yang Woman i talem: “Taem mi stap traehad blong kwalifae blong kam olsem wan god, bae mi holemtaet strong presen ia we i fasin blong sakem sin, mo bae mi kam gud moa evri dei. From Sevya i mekem sakrifaes we i pem praes, yumi save sakem sin, lanem samting aot long ol mistek blong yumi mo no kasem panismen from. Presiden Russell M. Nelson i tijim: “Tumas pipol oli tekem se fasin blong sakem sin, i wan panismen. … Be filing ia, blong kasem panismen, i kam long Setan. Hem i stap traem blong blokem yumi blong lukluk i go long Jisas Kraes, we i stanap wetem ol han blong Hem i open i stap, i stap hop mo i wantem hilim, fogivim, klinim, mekem i kam strong, klinim evriwan, mo mekem yumi kam tabu.”27
Taem yumi sakem sin wetem tru hat, i no gat mak long spirit i stap, i nomata wanem yumi bin mekem, se i series hamas, mo hamas taem yumi bin ripitim hemia.28 Be evri taem we yumi sakem sin mo lukaotem blong kasem fogivnes, wetem tru tingting, Hem i fogivim yumi.29 !Hemia i wan gudfala presen we i kam long Sevya blong yumi, Jisas Kraes!30 Tabu Spirit i save talem stret long yumi se Lod i fogivim yumi. Taem yumi filim glad mo pis,31 filing blong rong ia i kamaot,32 mo tingting i nomo trabol from sin blong yumi.33
Iven afta we yu sakem sin tru, be afta, yumi save kikim ston bakegen. “Kikim ston” ia i no minim se yumi no sakem gud sin, be i save soemaot nomo se yumi, olsem man yumi no strong. I gud blong save se “Lod i luk ol wiknes blong yu long wan ae we i defren long wei we Hem i luk fasin blong agens. … Yumi no mas gat tu tingting long paoa blong Sevya blong helpem yumi wetem ol wiknes blong yumi, from se, “taem Lod i tokbaot wiknes, oltaem, hem i wetem sore.”34
Stamba toktok blong Ol Yang Woman long en, i talem, “wetem fet, bae mi mekem hom mo famli blong mi i kam strong moa, bae mi mekem mo kipim ol tabu kavenan, mo kasem ol odinens mo ol blesing blong tabu tempol.” Blong mekem hom mo famli i kam strong moa, i save minim blong kilkilim fas ia ring long wan jen blong fetful fasin, we i stap gohed blong tekem wan histri blong fet, o i putumbak histri ia.35 Nomata long wanem i stap hapen, paoa i kam tru long bilif long Jisas Kraes, mo taem yumi mekem ol tabu kavenan.
Insaed long tempol, yumi lanem huia yumi, mo weaples yumi bin go long hem. Man Rom ia, Sisero, i talem: “Sapos yu no save long wanem i bin hapen long yu bifo yu bon, i olsem panismen ia blong yu stap olsem pikinini olwe.”36 Yes, i tru , hem i bin stap tokbaot histri, be tingting blong hem ia, yumi save pulum i go moa. Yumi stap laef olsem ol pikinini olwe nomo sapos yumi no save abaot lukluk we i no save finis we yumi kasem insaed long ol tempol. Long ples ia, yumi groap wetem Lod, yumi kasem Tabu Spirit we i fulwan,”37 mo yumi kam blong komitim yumi moa fulwan olsem ol disaepol blong Sevya.38 Taem yumi stap kipim ol kavenan blong yumi, yumi kasem paoa blong God long laef blong yumi.39
Mi invaetem yufala blong mekem laef blong yufala i lukluk long Jisas Kraes mo tingbaot ol fandesen trutok we oli stap long stamba toktok blong Ol Yang Woman. Sapos yu yu glad, bae Tabu Spirit i lidim yu. Papa blong yumi long Heven i wantem yu blong kasem evri ting we Hem i gat.40 Hem i no save givim yu moa. Hem i no save promesem yu moa. Hem i lavem yu moa bitim we yu save, mo Hem i wantem yu blong yu hapi long laef ia, mo long laef we i stap kam. Long nem blong Jisas Kraes, amen.