Naoia Hem I Taem
Naoia i taem we yumi save lanem samting. Naoia i taem we yumi save sakem sin. Naoia i taem we yumi save blesem ol narawan.
Ol dia brata mo sista. !Konfrens ia i bin wan histri long plante wei! Yumi gat blesing tru long ol prea, ol mesej, mo miusik. Ol wokman blong Lod oli bin givim insperesen long yumi.
Yumi kasem ol impoten daereksen we oli kam long hem, from fiuja we i stap kam. Prea blong mi se, Spirit i bin toktok stret long yu abaot ol samting we Lod i wantem yu blong mekem.
Fiuja, yumi no save stret wanem bae i kam. Weta i jenis. Ekonomi, yumi no save talem. Ol disasta, ol aksiden, mo ol sik, oli save jenisim laef kwiktaem. Ol aksen ia, oli bitim wanem yumi save kontrolem. Be i gat sam samting we yumi save kontrolem, mo i tekem wei we yumi spendem taem blong yumi evri dei.
Mi laekem poem ia we i kam long Henry Van Dyke, we oli putum long wan san baten long Wels Kolej long Niu Yok. I go olsem:
Sado blong fingga blong mi i go
I serem fiuja, i lego wanem i pas:
Long fored, aoa we i no kam yet i slip,
Long wan tudak, mo bitim paoa blong yu.
Biaen long laen we yumi no save gobak long hem,
Aoa we i pas, i nomo blong yu:
I gat wan aoa nomo i stap long han blong yu,—
We hem i NAOIA, we sado ia i stap soem.1
Yes, yumi sapos blong lanem samting aot long wanem i pas, mo yes, yumi sapos blong rere from fiuja. Be naoia nomo, yumi save mekem. Naoia i taem we yumi save lanem samting. Naoia i taem we yumi save sakem sin. Naoia i taem we yumi save blesem ol narawan mo leftemap han we i hang i stap daon.”2 Olsem we Momon i bin givim advaes long boe blong hem, Moronae: “Bae yumi wok strong wetem strong tingting oltaem, … from yumi gat wan wok blong mekem, taem we yumi stap long bodi blong mit mo bun, blong yumi save winim enemi blong evri stret mo gud fasin, mo putum sol blong yumi i go spel long kingdom blong God.”3
Enemi i neva slip. Oltaem bae i gat samting i kam agensem trutok. Mi talem bakegen strong singaot blong mi long moning, blong yufala i mekem olgeta samting we bae i mekem yufala i filim Spirit moa, blong go antap ia, we Elda Dieter F. Uchtdorf i bin stap tokbaot, we bae i kipim yufala blong gohed blong muvum yufala i go fored tru long wanem jalenj mo janis we i kam.
Gud spirit i kam antap taem yumi wosip insaed long tempol, mo yumi kam antap long andastaning blong hamas ol blesing we yumi kasem insaed, we oli bigwan tumas. Mi plis long yufala, blong stanap agensem ol wei we i folem fasin blong wol taem yufala i lukluk nomo long ol blesing we oli no save finis, blong tempol. Taem blong yu long ples ia i tekem ol blesing oli kam blong taem we i no save finis.
Taem we Jos i stap gro, yumi stap traehad blong kipim spid blong bildim moa tempol. I gat fotifo niu tempol we oli stap bildim naoia. Plante moa bae oli mekem i niu bakegen. Mi prea from ol pipol wetem skil mo talen, we oli stap wok long ol projek ia raon long wol.
Wetem wan spirit blong tangkyu wetem prea, mi mi glad blong anaonsem ol plan blong mifala blong bildim wan niu tempol long wanwan long ol ples ia: Welington, Niu Silan; Brasavil, Ripablik blong Kongo; Barselona, Spen; Birmingham, Yunaeted Kingdom; Kusko, Peru; Maseyo, Brasil; Santos, Brasil; San Luis Potosí, Meksiko; Meksiko Siti Benemerito, Meksiko; Tampa, Florida; Noksvil, Tenesi; Klevalan, Ohaeo; Wijita, Kansas; Austin, Teksas; Misoula, Montana; Montpelier, Aedaho; mo Modesto, Kalifonia.
Ol 17 niu tempol ia, bambae oli blesem laef blong plante pipol long tugeta saed blong vel. Mi lavem yufala ol dia brata mo sista. Moa impoten, Lod i lavem yufala. Hem i Sevya blong yufala mo Hem i Ridima blong yufala. Hem i stap lidim mo gaedem Jos blong Hem. Bae yumi stap wan pipol we i inaf long Lod, we i bin talem: “Mi bambae mi God blong yufala, mo yufala bambae i kam man blong mi bakegen.”4
From hemia, mi prea, long tabu nem blong Jisas Kraes, amen.