Mekem Wanem we I Impoten Moa
Taem Jisas Kraes i stamba blong laef blong yumi, yumi bae kasem blesing blong gat paoa long saed blong spirit, fasin blong stap hapi, mo bigfala glad.
I no longtaem i pas, wan dia fren i bin kasem wan strong filing blong go visitim wan woman long wod blong hem. Hem i sakemaot tingting ia from hem i no save gud woman ia—i no saon stret nomo. Tingting ia i wokem kam long hem, mekem hem i disaed blong mekem folem strong filing ia. From we hem i stap wari taem taem blong visit i stap kam kolosap, hem i wantem tumas blong tekem wan samting i go long sista ia blong wari blong hem i go daon. !Bae hem i no save go emti han! Hem i tekem wan kontena blong aeskrim, mo go mekem wan visit we i had tumas long hem blong mekem.
Hem i noknok long doa blong woman ia mo i no longtaem sista ia i ansa. Fren blong mi i givim hem aeskrim ia we i stap insaed long wan braon pepa bag, mo storian i stat. I no tekem long taem tumas blong fren blong mi i luksave from wanem hem i nid blong mekem visit ia. Taem tufala i sidaon tugeta long fored blong haos, woman ia i serem ol jalenj we hem i stap fesem. Afta long wan aoa blong toktok long wom weta blong sama ia, fren blong mi i luksave se aeskrim i stap ron tru long braon pepa bag ia.
Hem i singaot: “!Mi sori we aeskrim blong yu i stap ron!”
Woman ia i ansa long wan swit voes se: “!Hem i oraet! !Mi mi kasem sik blong kas!”
Long wan drim, Lod i bin talem long profet Lihae: “Mi blesem yu Lihae, from ol samting we yu bin mekem.”1
Blong stap olsem wan disaepol blong Jisas Kraes hem i moa bitim blong stap hop mo stap biliv. Hem i nidim efot, fasin blong muv, mo komitmen. Hem i nidim yumi blong mekem samting, stap olsem ol man blong “mekem ol samting we tok ya i talem, be i no stap lisin long tok ya mo yumi i no mekem”2
?Long saed blong aeskrim we i bin ron, wanem nao i moa impoten? ?Aeskrim ia? ?O we fren blong mi we i bin mekem wan simpol samting?
Mi bin gat wan swit eksperiens wetem wan daling yang woman we i bin askem wan ones kwestin: “Sista Craven, ?olsem wanem nao yu save se eni samting abaot Jos i tru? From mi no filim wan samting.”
Bifo mi kwik blong ansa, mi askem hem sam kwestin fastaem. “Talem long mi abaot skripja stadi blong yuwan.”
Hem i ansa, “Mi no ridim ol skripja.”
Mi askem: “?Be yu stadi wetem famli blong yu? ?Yufala i stadi Kam Folem Mi tugeta?”
Hem i talem: “No.”
Mi askem abaot ol prea blong hem: “?Wanem nao yu filim taem yu prea?”
Hem i ansa, “Mi no prea.”
Ansa blong mi long hem i simpol: “Sapos yu wantem save eni samting, yu mas mekem wan samting.”
?Hemia i no tru wetem eni samting we yumi wantem lanem o save? Mi invaetem niu fren blong mi blong stat mekem folem gospel ia blong Jisas Kraes: stap prea, stap stadi, stap givim seves long ol narafala, mo stap trastem Lod. Fasin blong jenisim laef bae i no save kam taem yumi no mekem wan samting. Hem i kam tru long paoa blong Tabu Spirit taem yumi wantem blong mekem wan efot blong save samting, taem yumi stap askem, stap lukaotem, mo stap noknok. Hem i kam taem yumi mekem samting.3
Long Doktrin mo ol Kavenan, Lod i talem: “i nomata.”4 Hem i mekem mi tingting hevi se sapos i gat sam samting we i nomata, o i nomata tumas, i mas gat sam samting we i mata o impoten. Long ol efot blong yumi blong mekem samting o mekem eni samting, yumi save askem long yumiwan se: “?Wanem nao i impoten moa?”
Ol man blong advetaes, plante taem oli yusum ol toktok olsem “Impoten” o “Mas Gat” wetem hop ia blong pulum tingting blong man blong biliv se prodak we oli stap salem, yumi mas gat blong mekem yumi hapi o blong laef i gud. ?Be wanem we oli stap salem i rili impoten? ?Yumi mas gat? ?Hem i rili impoten?
Hemia samfala kwestin blong tingting long hem: ?Wanem nao i Impoten moa?
-
?Hamas man i laekem ol pos blong yu long sosol media? ?O hamas nao Papa long Heven i lavem mo luksave yumi?
-
?Stap werem niufala stael klos? ?O soem respek long ol bodi blong yumi taem yumi kavremap gud bodi blong yumi?
-
?Faenem ol ansa tru long intanet? ?O kasem ol ansa tru long Tabu Spirit?
-
?Stap wantem moa? ?O stap glad wetem wanem we yumi bin kasem?
Presiden Russell M. Nelson i tijim se:
“Wetem Tabu Spirit olsem kompanion blong yu, yu save lukluk ova long kalja blong ol supa sta we i tajem sosaeti tedei. Yu save kam moa waes bitim ol jeneresen we i pas finis. …
“!Putum wan standet blong wol!”5
Hem i tekem efot blong stap lukluk nomo long wanem we i impoten tumas we i givim glad we i no save finis. Setan bae i laekem blong luk yumi lusum valiu blong yumi ia we i no save finis. Hem i stap lidim yumi blong westem ol impoten taem, talen, o strong paoa long saed blong spirit long ol samting we oli no impoten. Mi invaetem wanwan long yumi blong prea taem yumi stap tingting long ol samting we oli stap spolem yumi blong mekem wanem we i impoten moa.
Klas tri tija blong fasbon boe blong mitufala i tijim klas blong hem blong “bos long hed blong yuwan.” Hem i olsem wan rimaenda long ol yangfala studen blong hem se olgeta oli kontrolem tingting blong olgetawan, mo oli save kontrolem wanem we olgeta i wantem mekem. Mi rimaenem miwan blong “mi bos long hed blong miwan” taem mi stap mekem ol samting we oli no impoten.
Wan studen blong sekendri i talem long mi, i no longtaem i pas se, fasin ia blong no stap folem ol komanmen wetem tingting blong brekem, mo afta sakem sin, i stap kam antap long ol yut blong Jos naoia. “Hem i wan samting blong karem ona long hem,” hem i talem olsem long mi. I tru, Lod bae i gohed blong fogivim olgeta we ol sakem sin wetem tingting i stap daon “wetem tru tingting.”6 Be bigfala soa blong Sevya tru long Atonmen blong Hem i neva wan samting blong stap mekem fani long hem. Yumi save long parabol blong sipsip we i lus. I tru, man blong lukaot sipsip bae i lego ol narafala 99 sipsip blong faenem wan we i go lus. ?Be traem tingbaot glad ia, we olgeta we oli jusum blong stap olsem ol 99 i givim long Gudfala Man ia blong Lukaot long Sipsip? ?Olgeta we oli stap tugeta mo helpem wanwan long olgeta blong laef folem ol kavenan blong olgeta? ?Yu save pikjarem long tingting blong yu hamas bae wol, o skul, o wok, o hom blong yu bae i defren sapos fasin blong stap obei hem i bin nambawan samting blong mekem? Hem i no blong mekem laef i kam gud evriwan—hem i blong faenem glad taem yumi stap wok had blong laef folem ol kavenan we yumi bin mekem wetem Lod.
Naoia we wol i mekem pipol oli gat tu tingting abaot God, mo konfius, mo ol presa oli stap kam antap, hem i taem blong yumi mas mekem wanem profet i talem. Olsem maot pis blong Lod, yumi save trastem wanem hem i wantem yumi blong mekem, ol kaonsel, mo ol rikwes blong hem long yumi long ol samting we oli moa impoten.
Nomata se hemia bae i no isi blong mekem, oltaem i gat wan wei blong mekem raet samting. Taem hem i stap toktok wetem wan grup blong ol fren long skul, yang woman ia i harem nogud taem olgeta oli agensem ol standet blong Jos. Hem i luksave se hem i no save stap kwaet—hem i mas mekem wan samting. Wetem respek, hem i tokabaot lav blong Papa we i stap long Heven mo olsem wanem ol komanmen we Hem i putum oli blesem mo protektem ol pikinini blong Hem. Bae i isi moa long hem blong no mekem wan samting. ?Be wanem nao i impoten moa? ?Folem wanem evriwan i talem? ?O stanap klia olsem wan witnes blong God “long evri taem, mo long evri samting, mo long evri ples.”?7
Sapos Jos Ia blong Jisas Kraes we i bin kambak bae i kamaot long ples we i haed mo tudak, yumi mas kamaot long ples we i haed mo tudak. Olsem ol woman we oli kipim ol kavenan, yumi mas letem laet blong gospel i saenaot long ful wol taem yumi tekem aksen mo stap wan gud eksampol. Yumi mekem hemia tugeta olsem ol pikinini gel blong God—wan ami blong 8.2 milian woman stat long 11 yia i go antap we wok blong yumi i semmak nomo. Yumi stap tekem Isrel i kam tugeta taem yumi stap tekpat long wok blong sevem man mo fasin blong kam olsem wan god: stap traehad blong laef folem gospel blong Jisas Kraes, kea long olgeta we oli stap long nid, stap invaetem evriwan blong kasem gospel, mo stap tekem famli oli kam tugeta blong taem we i no save finis.8 !Gospel blong Jisas Kraes hem i wan gospel blong aksen mo gospel blong glad! Letem yumi no lukluk daon long paoa blong yumiwan blong mekem ol samting we oli impoten moa. Tabu raet ia we yumi kasem i givim yumi strong paoa long tingting mo tras blong mekem, mo kam olsem we Papa long Heven we yumi lavem i save se yumi save mekem.
Stamba toktok blong ol yut long yia ia i kam long Ol Proveb 3:5–6:
“I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.
Long olgeta samting we yu stap mekem, yu mas tingbaot hem oltaem, mo sapos yu stap mekem olsem, hem bambae i soemaot stret rod long yu, blong yu yu folem.”
Wan long ol ki pat blong stap trastem Lod, hem i blong muv fored, stap biliv se Hem bae i lidim yumi iven taem yumi nogat evri ansa.
Ol sista. Hem i no abaot aeskrim. Mo i no blong mekem moa. Hem i blong mekem wanem we i impoten moa. Hem i blong stap laef folem doktrin blong Kraes long ol laef blong yumi taem yumi stap traehad blong kam moa olsem Hem.
Moa yumi mekem blong stap strong long kavenan rod ia, moa fet blong yumi long Jisas Kraes bae gro. Moa fet blong yumi i gro, moa bae yumi wantem tumas blong sakem sin. Mo moa yumi sakem sin, moa bae kavenan rilesensip blong yumi wetem God bae kam moa strong. Kavenan rilesensip ia, i tekem yumi i go long tempol, from se blong stap kipim tempol kavenan hem i olsem wanem yumi stanap strong kasem en.
Taem Jisas Kraes i kam stamba blong laef blong yumi, bae yumi kasem help blong mekem wanem we i impoten moa Mo yumi bae kasem blesing blong gat paoa long saed blong spirit, fasin blong stap hapi, mo wetem !bigfala glad! Long nem blong Jisas Kraes, amen.