Fas Mesej
Mifala i givim ona long ol gel blong God long spesel sesen ia we i lukluk bigwan long ol wari mo ol oganaesesen blong olgeta.
Ol dia sista blong mi, taem yumi statem wan defren sesen blong ol woman blong jeneral konfrens, mi glad blong givim fas mesej we i kam long Fas Presidensi.
Long ol Satedei sesen, yumi gat wan histri wetem ol defren stamba tingting mo ol defren pipol blong kam long hem. Long naet ia, yumi ademap sam moa long histri ia taem yumi statem wan niu stamba tingting mo fasin blong wok long fiuja we i stap kam. Gospel blong Jisas Kraes i no jenis. Doktrin blong gospel i no jenis. Ol kavenan blong yumiwan, oli no jenis. Be ova long ol yia, ol miting we yumi stap holem blong pasem ol mesej blong mifala, oli stap jenis mo i luk se bambae oli gohed blong jenis wetem ol yia we oli stap kam.
Long naoia, Satedei naet sesen ia i wan sesen blong jeneral konfrens, be i no wan sesen blong eni oganaesesen. Semmak olsem evri sesen blong jeneral konfrens, plan, ol spika, mo miusik, Fas Presidensi nao i disaed long hem.
Mifala i bin askem Presiden Jean B. Bingham, Jeneral Presiden blong Rilif Sosaeti, blong hem i kondaktem sesen ia. Long ol fiuja Satedei sesen, bae hem we i kondaktem i save wan long ol nara Jeneral Ofisa blong Jos, olsem ol memba blong Ol Jeneral Presidensi blong Rilif Sosaeti, Ol Yang Woman, mo Praemeri, olsem we Fas Presidensi bae i jusum.
Tedei long naet, Satedei sesen ia blong jeneral konfrens, bae i lukluk moa long ol Lata-dei Sent woman. Hemia i tekem doktrin blong Jos Ia blong Jisas Kraes blong Ol Lata-dei Sent, ol polisi blong Jos we i go speseli wetem ol woman, mo ol jeneral responsabiliti mo wok blong ol oganaesesen we i tekem ol woman mo ol gel blong Jos ia. I nomata we sesen ia oli brodkastem long evriwan raon long wol, semmak olsem evri sesen blong jeneral konfrens, olgeta we mifala i stap invaetem blong stap long Konfrens Senta, blong sesen ia, oli ol woman mo ol gel, stat long 12 yia i go antap. Mifala i jusum tu sam prishud lida we oli prisaed ova long ol oganaesesen ia we oli stap tekpat.
Wanem we mifala i stap statem long ples ia, i ansarem komunikesen risos we i stap insaed long lidasip mo membasip blong Jos blong Lod, raon long wol. Doktrin blong gospel blong Jisas Kraes, hem i blong evriwan, mekem se hemia nao fasfala stamba tingting mo fasin blong givimaot. Mifala i givim ona long ol gel blong God long spesel sesen ia we i lukluk bigwan long ol wari blong olgeta mo oganaesesen blong olgeta.
Mifala i talem tangkyu se brodkas teknoloji, naoia, i givim long ol lida blong Jos paoa blong kondaktem ol ditel trening, taem oli toktok i go stret long ol spesifik pipol long fil. Mo tu, mifala i glad se ol janis blong travel oli stap kam antap. Hemia i letem mifala blong sendem ol lida blong Jos blong kondaktem ol fes tu fes lidasip trening long fil, we i gat nid from.
Hemia i tru wok blong Lod Jisas Kraes. Olsem ol wokman blong Hem, Tabu Spirit blong Hem i daerektem mifala. Mifala i askem ol blesing blong Lod blong yumi long ol lida blong ol oganaesesen ia, mo long ol fetful woman mo gel we oli stap givim seves long Lod long ol oganaesesen ia, mo long wanwan laef blong olgeta. Long nem blong Jisas Kraes, amen.