Hat blong Mifala I Filim Evri Samting
Sapos yumi wantem Sevya i leftemap yumi i go antap long heven, komitmen blong yumi long Hem mo gospel blong Hem bae i no save blong wanwan taem nomo.
Wan Ofring i go long Hem
Sam dei bifo we Hem i givim laef blong Hem from yumi, Jisas Kraes i stap long tempol long Jerusalem, i stap wajem ol man oli kam putum ol donesen i go long tempol. “Mo i gat plante rijman we oli sakem plante mane,” be afta, wan pua wido i kam, “mo hem i sakem tu smol mane [we i olsem twante vatu].” Hem i wan mane we i smol tumas, oli no save rekodem.
Be donesen ia i kasem ae blong Sevya. Donesen ia i mekem Sevya i glad tumas: “Nao Jisas i singaot ol man blong hem oli kam long hem, mo i talem long olgeta se, ‘Tru mi talem long yufala. Kleksen we wido ya i sakem i moa long ol mane we ol narafala man ya oli sakem.
“Ol man ya, taem oli sakem kleksen blong olgeta, oli stap sakem haf mane blong olgeta we i stap nating nomo. Be woman ya we i pua, hem i sakem olgeta mane we hem i gat, we i blong pem kakae blong hem long mane ia.”1
Wetem simpol lukluk ia nomo, Sevya i tijim yumi olsem wanem oli skelem ol ofring long kingdom blong Hem—mo hem i defren long hao yumi skelem ol samting. Long Lod, valiu blong donesen oli no skelem folem olsem wanem i mekem wok long bokis blong sakem mane be olsem wanem i wok long hat long man we i givim.
Taem Hem i leftemap fetful wido ia, Sevya i givim wan standet blong skelem olsem wanem yumi folem Hem long plante wei. Jisas i tijim se ol ofring blong yumi bae oli bigwan o bae oli smol, be tufala tugeta, i mas kam long hat blong yumi fulwan.
Prinsipol ia oli ripitim long krae blong profet Amalekae long Buk blong Momon: “Kam long Kraes, we i Tabu Wan blong Isrel, mo tekem pat long fasin blong hem blong sevem man, mo paoa blong hem we i blong pemaot man. Yes, kam long hem, mo givim ol ful sol blong yufala olsem wan ofring long hem.”2
?Be olsem wanem nao hemia i posibol? Long plante long yumi, standet ia blong givim ful sol blong yumi i no save hapen nomo. Yumi gat plante samting we i stap tekem taem blong yumi. ?Olsem wanem yumi save skelem ol samting long laef blong yumi mo blong givim ful sol blong yumi i go long Lod?
Ating ol jalenj blong yumi, i yumi ting se balens i minim blong yumi seraotem taem blong yumi i stret blong mekem evri samting we yumi wantem blong mekem. Lukluk long wei ia, komitmen blong yumi long Jisas Kraes bae i wan long ol plante samting we yumi mas putum long ol bisi taem blong yumi. Ating bae i gat wan narafala wei blong lukluk long hem.
Balens: Olsem Ron long wan Baeskel
Waef blong mi, Harriet, mo mi mitufala laekem blong ron long baeskel tugeta. Hem i wan naes wei blong mekem eksasaes taem mitufala i spendem taem tugeta. Taem mitufala stap ron tugeta, bae mi no traem blong pulum win blong mi tumas, mitufala gat wan gud taem long naesfala wol raon long yumi mo gat wan gud taem blong storian. Plante taem mitufala no tingting tumas blong mekem baeskel blong mitufala i balens. Mitufala i bin ron plante taem finis mekem se mitufala no tingting tumas long hemia—hem i kam nomol long mitufala.
Be taem mi stap lukluk wan i stap traem blong lanem olsem blong hem i ron long baeskel blong fas taem, i rimaenem mi se blong mekem yu balens long ol smol wil ia i no isi nating. Hem i tekem taem. Hem i tekem praktis. Hem i tekem fasin blong save wet long taem. Iven yu mas foldaon wan o tu taem.
Plante, long olgeta we oli save balens long wan baeskel, oli lanem ol impoten poen ia:
No lukluk leg blong yu.
Luk long fored.
Lukluk rod fored long yu. Lukluk long wea ples bae yu go long hem. Mo gohed blong padel. Blong stap balens hem i abaot evri samting blong stap muv i go fored.
Semmak prinsipol i hapen taem yu stap traem blong faenem balens long laef blong yu olsem wan disaepol blong Jisas Kraes. Olsem wanem blong serem taem mo paoa blong yu long plante impoten samting bae i defren long wan man mo wan nara man mo long wan defren pat long laef i go long wan nara pat blong laef. Be stamba lukluk we i semmak blong yumi evriwan, hem i blong yumi folem Wei blong Masta blong yumi, Jisas Kraes, mo gobak stap wetem Papa blong yumi long Heven we yumi lavem tumas. Stamba lukluk ia i mas stap semmak mo gohed oltaem, i no mata huia yumi mo wanem i stap hapen long laef blong yumi.3
Leftemap: Olsem wan Plen I Stap Flae
Naoia, blong olgeta we oli laekem tumas blong ron long baeskel, blong stap komperem fasin blong stap olsem wan disaepol long hemia we yu ron long baeskel, i wan gudfala eksampol. Olgeta we oli no laekem, yufala no wari. Mi gat wan nara stori we mi sua, se evri man, woman, mo pikinini bae i save andastanem.
Olsem fulap samting long laef, yu save komperem fasin blong stap olsem wan disaepol, olsem wan plen we i stap flae.
?Yu eva stop mo tingting long olsem wanem i gud tumas blong wan bigfala plen we i save aot long graon mo i flae? ?Wanem nao i mekem ol masin blong flae i stap flae long skae, krosem solwota mo ol kantri?
Blong mekem i simpol, wan plen i flae nomo taem win i stap blo long ol wing blong hem, Olsem wanem win i muv i krietem defren presa blong win mekem i leftemap plen i go antap. ?Olsem wanem nao bae yu mekem inaf win i muv ova long ol wing blong plen blong leftemap plen? Ansa hem i, taem ol enjin i pusum plen i go fored.
Plen i no save go antap, taem hem i stap long rod blong plen. Iven long wan dei we i gat strong win, bae plen i no save go antap, nomo sapos i stap muv i go fored, wetem enjin we pusum plen aot long ol fos we i stap holemtaet plen.
Semmak olsem we bodi blong yu i mekem baeskel i balens mo i stanap stret, blong stap muv i go fored i helpem wan plen blong i save winim fos ia, graviti we i holemtaet plen.
?Hem i minim wanem long yumi blong stap olsem ol disaepol blong Jisas Kraes? Hem i minim blong yumi save faenem balens long laef blong yumi, mo sapos yumi wantem Sevya blong i leftemap yumi go long heven, yumi mas mekem ol komitmen blong yumi long Hem mo long gospel blong Hem mo gospel blong Hem i no blong wanwan taem o samtaem nomo. Olsem wido long Jerusalem, yumi mas givim Hem ful sol blong yumi. Ofring blong yumi maet bae i smol, be hem i mas kam long hat mo sol blong yumi.
Blong stap olsem wan disaepol blong Jisas Kraes i wan long ol plante samting we yumi mas mekem. Sevya i gat bigfala paoa long evri samting we yumi mekem. Hem i no wan ples blong spel long rod blong yumi. Hem i no wan naes samting we yu luk long rod blong yu, o wan bigfala mak blong histri. “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi”—stret ples we bae yumi go long hem i—“[tru long Jisas Kraes]”4 Hemia i Wei mo bigfala ples ia we yumi stap go from.
Balens mo leftemap i kam taem yumi “mas wokbaot fored wetem strong bilif long Kraes wetem wan stret mo klin hop, mo wan lav blong God mo blong evri man.”5
Sakrifaes mo Konsekresen
?Mo olsem wanem long ol plante wok mo responsabiliti we i mekem laef blong yumi i bisi tumas? Blong spendem taem wetem olgeta we yumi lavem, go long skul o rere from wan wok, wok from mane blong laef, lukaotem famli, givim seves long komuniti—?wea ples nao evri samting ia i stap long hem? Sevya i talem bakegen long yumi:
“Papa blong yu long heven i save se yu nidim ol samting ia.
“Be lukaotem fastaem kingdom blong God mo stret mo gud fasin blong hem, mo evri samting ia bae hem i ademap long yufala.”6
Be hemia i no minim se hem i isi.7 Hem i nidim tugeta sakrifaes mo konsekresen.
Hem i nidim blong letem sam samting i go mo letem ol narafala samting i gro.
Sakrifaes mo konsekresen tufala i loa blong heven we yumi mekem kavenan long tabu tempol blong obei long hem. Tufala loa ia i kolosap semmak be tufala i no semmak. Blong sakrifaes i minim blong yu givim aot wan samting we yu laekem tumas. Bifo, ol pipol blong God oli mekem sakrifaes long ol fasfala animol we oli gat blong givim ona long Mesaea we i stap kam. Truaot long histri, ol fetful sent oli sakrifaesem wanem oli wantem, ol kamfot, mo iven laef blong olgeta blong Sevya.
Yumi evriwan i gat ol samting, bigwan mo smolwan. Yumi nid blong sakrifaes blong mekem se yumi save folem Jisas Kraes fulwan.8 Ol sakrifaes blong yumi i soem wanem yumi laekem tumas. Ol sakrifaes oli tabu mo Lod i givim ona long hem.9
Konsekresen i defren long sakrifaes long wan wei we i impoten. Taem we yumi konsekretem wan samting, yumi no lego i stap nomo long olta. Be, yumi putum taem blong yumi long seves blong Lod. Yumi dediketem ol samting i go long Hem, mo long ol tabu stamba tingting blong Hem.10 Yumi kasem ol talen blong yumi, we Lod i givim long yumi, mo traehad blong mekem i kam gud moa blong save givhan moa blong bildim kingdom blong Lod.11
I gat smol long yumi nomo we bae oli askem blong yumi sakrifaesem laef blong yumi blong Sevya. Be oli invaetem yumi evriwan blong konsekretem laef blong yumi long Hem.
Wan Wok, Wan Glad, Wan Stamba Tingting
Taem yumi stap lukaotem blong mekem laef blong yumi i klin mo lukluk nomo long Kraes long evri samting,12 evri samting bae i foldaon stret. Laef bae i nomo filim olsem wan longfala lis blong ol seperet efot we oli holem long wan balens we i no strong inaf.
Afta samtaem, bae evri samting i kam wan wok nomo.
Wan glad.
Wan tabu stamba tingting.
Hem i wok blong lavem mo givim seves i go long God. Hem i blong lavem mo givim seves long ol pikinini blong God.13
Taem yumi lukluk long laef blong yumi mo luk handred samting blong mekem, yumi harem se i tumas. Taem yumi luk wan samting nomo—blong lavem mo givim seves long God mo ol pikinini blong Hem, long handred defren wei—nao yumi save lukluk ol samting ia wetem glad.
Hemia i olsem wanem nao yumi givim ful sol blong yumi—taem yumi sakrifaesem eni samting we i stap holemtaet yumi mo stap konsekretem evri narafala samting i go long Lod mo ol stamba tingting blong Hem.
Wan Tok blong Leftemap Tingting mo Testemoni
Ol dia brata mo sista blong mi, mo ol dia fren blong mi. Bae i gat oltaem we bae yu ting se yu save mekem moa. Papa blong yumi we i stap long Heven i save hat blong yu. Hem i save se yu no save mekem evri samting hat blong yu i wantem blong mekem. Be yu save lavem mo givim seves long God. Yu yu save mekem bes blong yu blong stap obei long ol komanmen blong Hem. Yu save lavem mo givim seves long ol pikinini blong Hem. Mo ol efot blong yu bae oli mekem hat blong yu i kam klin mo rere long long yuwan blong wan fiuja blong glori.
Hemia nao wanem wido long tempol i andastanem. Hem i save se ofring blong hem bae i no jenisim wanem bae i hapen long Isrel, be bae i save jenisim mo blesem hem—from nating i smol, be hem i bin evri samting blong hem.
Ol dia fren blong mi mo ol disaepol blong Jisas Kraes we oli lavem tumas, “Yufala i no taed blong mekem gud samting, from we [yumi] i stap putum fandesen blong wan bigfala wok.” Mo aot long ol smol samting, ol samting we oli bigwan oli kamaot.”14
Mi testifae se hemia i tru, mi testifae tu se Jisas Kraes i Masta blong yumi, Ridima blong yumi, mo wan Wei ia nomo blong yumi gobak long Papa we yumi lavem tumas long Heven. Long tabu nem blong Jisas Kraes, amen.