Jos I Givim Help mo Givhan
Raon long wol, Ol Lata-dei Sent oli stap wok strong blong givim spel long ol rifuji. Long Yurop, oli stap help blong givim kaekae, klos, ol samting blong bebi, selta, mo plante moa samting blong helpem olgeta ia we oli nomo stap long haos blong olgeta. I no longtaem i pas, Jos i jes givim 2 Milian US dola long Hae Komisena blong Yunaeted Nesen blong Ol Rifuji, mo wan nara 2 milian US dola i go long World Food Programme. Ol donesen bae oli helpem WFP blong givim kaekae long kolosap 11,000 pipol blong fo manis taem.
“Yumi gat ol memba long evri kantri we i stap long trabol,” Sista Sharon Eubank i talem, we hem i Fas Kaonsela insaed long Rilif Sosaeti Jeneral Presidensi, mo i presiden blong Ol Latter-day Saint Charities. From se Jos i stap holemtaet wan mane i stap, hem i bin save putum kaekae mo wota i stap bifo trabol i kam long Yukren, hem i talem. Mo tu i talem se Jos i komitim hem long ol longtaem nid blong ol kantri we oli gat trabol.
Long Paragwe mo long Peru, ol mane blong Jos oli help blong givim ol medikol tul blong ol hospital, mo long Peru, Jos i givim ol fan, ol laet, ol fenija, ol lektrik tul, mo seven laptop kompiuta i go long ol oganaesesen we oli stap lukaot long ol pikinini mo ol olfala, wan kaonsel we i joenem ol relijin, mo wan selta blong ol yang gel. Long Kolombia, oli bin yusum ol mane blong fast ofring blong givim 1,200 bokis blong kaekae mo saplae i go long olgeta we oli stap long nid. Long Panama, Jos i bin donetem ol tul blong help blong kipim gud ol KOVID-19 stik meresin.
Ol pipol long 10 siti long Yunaeted Stet oli bin visitim Saenem Wol Givim Masin long 2021, long Krismes taem, mo donetem samples 5.8 milian US dola evriwan. Ol masin ia, oli letem wan man blong pem wan samting (olsem klos, kaekae, klin wota, mo animol), we afta, oli serem i go long 44 jareti long Yunaeted Stet, mo tu, long faef wol ejensi.
Jos i bin helpem tu olgeta we ol wael win i spolem olgeta long medel Wes blong Yunaeted Stet, olgeta we wan taefun i spolem olgeta long Filipin, mo olgeta long Tonga we volkeno mo tsunami i spolem olgeta.