Hem I Raesap Finis wetem Paoa blong Hiling long Ol Wing blong Hem: Yumi Save Kam Moa Bitim Ol Man blong Win

Mei 2022

12:15

“Hem I Raesap Finis wetem Paoa blong Hiling long Ol Wing blong Hem”

Yumi Save Kam Moa Bitim Ol Man blong Win

I Kam long Elda Patrick Kearon

Blong Presidensi blong Olgeta Seventi

Jisas i winim finis ol abius blong wol ia blong givim paoa long yu blong no stap laef nomo yet, be wan dei, tru long Hem, bae yu save winim mo win.

Marin, mi mi Elda Holland, mo ol samting bae oli stap go nogud ia nao.

Yumi Save Kam Moa Bitim Ol Man blong Win

Yumi evriwan i intres long ol stori blong olgeta we oli stap laef yet afta long wan bigfala faet. Yumi harem ol stori blong ol man we oli stap travel, oli nogat fraet, be i no olsem ol nomol pipol we oli traem blong lukaot gud long olgetawan blong stap laef, agensem ol nogud taem mo ol samting we oli save we i stap kam, mo yumi no save stop blong askem yumiwan se, “?Bae mi save mekem olsem ia?”

Kwiktaem mi tingbaot Inglis Man ia we i stap travel Ernest Shackleton mo kru blong sip blong hem HMS Endurance, we oli rek long aes blong Antaktik mo oli stak i stap Long wan emti aelan blong kolosap tu yia. Gudfala lidasip blong Shackleton mo waes tingting blong hem i bin sevem laef blong ol man blong hem, nomata raf situesen ia.

!Afta mi tingting long kru blong Apollo 13 spesflaet we i stap spid long spes blong go lan long mun! Be problem i hapen taem wan tank blong oksijen i brok mo misin blong olgeta i mas stop. Oksijen i no naf, ol kru mo olgeta we oli wok long misin ia blong kontrolem flaet, oli yusum ol gudfala skil mo save we oli gat blong save tekem olgeta tri man we oli travel i go long spes, oli kambak sef long wol.

Afta mi tingting mo sapraes long ol wanwan man mo woman mo ol famli we oli bin ol viktim blong wo, oli kam ol prisena long ol kamp, o olgeta we oli kam ol rifuji, we oli bin stap strong mo gat strong paoa long tingting blong gohed blong mekem faea ia blong hop i laet, blong olgeta we oli stap safa, we oli stap kaen nomata oli tritim nogud olgeta, mo long sam wei oli bin helpem ol narawan blong stap strong iven blong wan moa narafala dei.

?Bae yu o mi i save stap laef long wan long ol bigfala nogud situesen olsem?

Ating sam long yufala, be, tingting long ol stori blong olgeta we oli stap laef afta long wan had situesen, mo sol blong yu i stap krae bigwan se yu stap laef tu long ol had situesen blong laef naoia olsem wan viktim blong abius, oli no wantem save long yu, oli stap jikim yu, yu stap fesem ol raorao o eni harem nogud blong kaen ia. Yu yu stap naoia long medel blong taem blong yuwan we yu lusum hop mo traem blong winim wan situesen we i semmak gud olsem, wan sip we i rek nogud, o wan misin we oli givim long yu blong mekem, be afta i mas stop. ?Yu ting se bae i gat man blong sevem yu? ?bae yu save mekem yuwan blong stap laef yet?

Ansa i yes. Yu save stap laef yet. I tru, oli bin sevem yu finis, yu yu sef finis—tru long Man ia we i bin safa from evri trabol we yu stap fesem mo i bin winim evri sobodi we yu stap go tru long hem.¹ Jisas i winim finis ol fasin blong ol abius long wol ia² we i no blong givim nomo paoa blong stap laef yet be wan dei, tru long Hem, i save winim mo iven faet strong—blong mekem yumi kamaot fulwan long evri soa blong bodi, harem nogud we i no gat en, ol trabol, mo bae pis i tekem ples blong olgeta.

Aposol Pol i askem:

“?I no gat man we i save tekemaot yumi long Kraes ya we hem i lavem yumi tumas? ?[Bae] trabol, o hadtaem, o ol man oli stap spolem yumi, o hanggri, o puaman, o klosap yumi lusum laef, o ol man oli kilim yumi? …

“[No], Kraes ya we i lavem yumi tumas hem i stap mekem we yumi winim olgeta samting ya oltaem.”³

Ol Promes long Isrel we I Mekem Kavenan

Bae yu tingbaot taem Presiden Russell M. Nelson i bin givimaot invitesen ia long jeneral konfrens. Hem i talem: “Taem yumi stap stadi long ol skripja … , mi leftemap tingting blong yufala blong mekem wan lis blong evri samting we Lod i bin promesem se bae Hem i mekem long kavenan Isrel ia. !Mi ting se bae yu sapraes bigwan!”⁴

Hemia samfala promes we famli blong mi i bin faenem, we oli gat bigfala paoa mo oli save givim kamfot. Pikjarem long maen blong yu se Lod i stap talem ol toktok long long yu—long yu we yu stap laef yet—from se oli blong yu:

No fraet.⁵

Mo from samting ya, mi mi kamdaon blong tekemaot olgeta.⁶

Bambae [Mi] no save lego yufala.⁷

Nem blong Mi i stap wetem yufala mo ol enjel blong mi oli lukaotem gud yufala.⁸

Bambae mi mekem ol merikel long medel blong yufala.⁹

Yufala i kam long mi, nao mi bambae mi tekemaot ol hevi samting ya, mi mekem we yufala i spel gud.¹⁰

Mi stap long medel blong yufala.¹¹

Yufala i blong Mi.¹²

Long Olgeta we Oli Stap Traehad Yet

Wetem ol tingting blong hop ia long maen, mi wantem toktok stret long olgeta we maet oli filim se i nomo gat rod blong kamaot long stori blong olgeta blong stap laef yet, from ol strong nogud fasin blong ol narafala man. Sapos hemia i stori blong traehad blong yu, mifala i krae wetem yufala. Mifala i wantem tumas se yufala i winim ol tingting we i fasfas, fasin blong sem, mo fraet, mo mifala i wantem tumas se tru long Jisas Kraes, bae yufala i faet mo win.

Aot long Viktim I Go long Wan we I Laef I Go Tru , I Go long Wan we I Win

Sapos yu stap fesem eni kaen fasin blong abius, vaelens, o oli stap tritim nogud yu longtaem, bae yu stap gat ol tingting ia se, ol samting ia we oli hapen, oli rong blong yuwan mo we yu mas karem filing blong sem mo harem nogud i stap wetem yu. Bae yu gat ol tingting olsem:

Mi save stopem hemia finis.
God i nomo lavem mi.
I no gat wan man bae i eva lavem mi.
Mi brokbrok gud, mo bae i mi nomo save kam gud.
Atonmen blong Sevya i blong ol narafala man, be i no blong mi.

Ol giaman tingting mo ol filing ia, bae i kam wan samting we i blokem yu blong lukaotem help long famli, ol fren, ol lida, o ol profesonol, mekem se bae yu stap traehad yuwan. Sapos yu bin lukaotem help long olgeta we yu trastem, bae yu stap gohed blong faet agensem ol tingting blong sem mo iven stap kroskros long yuwan. Ol filing mo ol tingting blong ol samting we oli bin hapen ia, bae i save stap blong plante yia. Yu hop se wan dei bae yu save filim gud, be i hapen se dei ia i no kam yet.

Fasin blong abius ia hem i no bin, i no, mo bae i neva rong blong yu, nomata man we i abiusum yu o eniwan i save talem i oposit long wanem we yu save. Taem yu kam olsem wan viktim from fasin blong wan we i stap tok nogud long yu, fosem yu from seks, o eni nara fasin long saed blong seks, yu yu no nid blong sakem sin; yu yu no responsibol.

I no minim se yu yu no klin inaf, o no gat valiu o i no gat wan i lavem yu olsem wan man o woman, o olsem pikinini gel mo boe blong God, from wanem we wan narafala man i mekem long yu.

God i no lukluk long yu naoia o neva bifo olsem wan we i nogud. Wanem we i bin hapen long yu, Hem i no sem o no hapi long yu from. Hem i lavem yu long wan wei we bae yu mas faenemaot yet. Mo bae yu faenemaot taem bae yu putum tras blong yu long ol promes blong Hem, mo taem bae yu lanem blong biliv long Hem taem Hem i talem se “Hem i leftemap yufala.”¹³

Valiu blong yu i no olsem ol nogud samting ia we oli bin hapen long yu. Naesfala trutok i we, aedentiti blong yu olsem wan pikinini boe o gel blong God we i stap laef naoia mo kasem laef we i no save finis, mo tru long Man we i Krietem yu we i stret evriwan, we lav blong Hem i no gat en mo invitesen blong Hem i blong mekem man i kam oraet fulwan.

Nomata i luk olsem se bae i no posibol, filim se i no posibol, hiling i save kam tru ol merikel blong fasin blong pemaot man mo paoa blong Atonmen blong Jisas Kraes, we i bin girap bakegen long ded “wetem paoa blong hiling long ol wing blong hem.”¹⁴

Sevya blong yumi we i gat plante sore, mo we i bin winim ol harem nogud mo filing blong sem, Hem i gat paoa blong mekem evri samting we i rong i kam oraet, hemia i wan laeftaem trutok long olgeta we i mekem i nogud long ol narawan.¹⁵

Plis save se Sevya i bin kamdaon bitim evri samting, iven ol samting we i bin hapen long yu. From hemia, Hem i save stret wanem ia filing blong fraet mo sem mo olsem wanem i filim blong oli lego yu yuwan mo yu brokbrok i stap.¹⁶ Aot long ol stamba blong harem nogud blong Atonmen blong Hem, Sevya i givim yu hop ia we yu ting se i bin lus blong oltaem; paoa ia we yu bin biliv se bae yu neva gat, mo hiling ia we yu neva ting se bae i posibol.

Man we I Stap Abiusum Ol Narafala Man bae I Kasem Wan Klia Panismen we I Kam long Lod mo Ol Profet blong Hem

I no gat ples blong eni kaen fasin blong abius—long saed blong bodi, seks, filing, o tru long toktok—long eni hom, eni kantri o eni kalja. I no gat eni samting we wan waef o wan pikinini bae i mekem o talem, we i mekem se “oli mas” kilim olgeta from. I no gat wan long eni kantri o kalja we bae i eva “stap askem” blong wan we i gat atoriti o long wan we i bigwan mo i strong moa long hem, blong i kilim hem o i givim vaelens long hem.

Olgeta we oli stap abiusum ol narawan mo we oli stap haedem ol series sin blong olgeta, bae oli save haed wetem blong wan sot taem. Be Lod we i luk evri samting, Hem i save ol aksen mo ol tingting mo wanem we hat blong olgeta i wantem.¹⁷ Hem i wan God blong jastis, mo bae tabu jastis blong Hem bae i hapen.¹⁸

From bigfala merikel, God i gat bigfala sore tu, long olgeta we oli sakem sin fulwan. Ol man we oli mekem abius—i gat tu olgeta we oli abiusum olgetawan—we oli konfes, oli sakem sin fogud, mo mekem evri samting long paoa blong olgeta blong putum bakegen mo mekem i kam gud bakegen, blong save kasem fogivnes tru long merikel blong Atonmen blong Kraes.

Olgeta we oli kasem ol giaman toktok, se oli wan man blong abius, oli bin eksperiensem bigfala harem nogud we i series mo soa ia we i kam tru ol toktok blong agens, mo we oli kasem panismen we i no fea. Be olgeta ia tu oli kasem blesing tru long Sevya we i bin safa from olgeta, mo save ia se long en, trutok bae i win.

Be olgeta we oli stap abius mo oli no sakem sin, bae oli stanap long fored blong Lod blong givim wan ripot from ol rabis fasin blong olgeta.

Sevya Hemwan i tok strong mo mekem i klia abaot eni kaen fasin blong abius: “Be sipos wan man i mekem wan long ol pikinini ia i foldaon long sin … i moa gud long hem sipos oli fasem wan bigfala ston long nek blong hem, nao oli draonem hem long medel solwota.”¹⁹

Las Toktok

Ol dia fren we yufala i gat ol bigfala soa insaed—mo semmak taem, eni wan we i bin karem ol tritmen long laef we i no fea—yu save gat wan niu stat mo wan fres stat. Long Getsemane mo long Kalvari, Jisas “i tekem long Hemwan … evriwan long ol trabol mo safaring we, yu mo mi, i eva gotru,”²⁰ !mo Hem i bin winim evriwan! Wetem han blong Hem we i open, Sevya i givim presen ia blong hiling long yu. Wetem strong paoa long tingting, fasin blong save wet longtaem, mo stap fetful blong lukluk nomo long Hem, i no longtaem, bae yu save kam blong akseptem presen ia fulwan. Yu save lego harem nogud blong yu mo lego i stap long leg blong Hem.

Gudfala Sevya blong yu i talem: “Be man blong stil, hem i kam blong wan samting nomo. Hem i kam blong stil, mo blong kilim ol sipsip oli ded, mo blong spolem evri samting. Be mi mi kam blong mekem rod blong ol sipsip oli save gat laef, mo blong laef ya blong [yu] i save fulap gud long evri samting.”²¹ Yu wan man o woman we i traehad, yu save kasem hiling, mo yu save trastem se tru long paoa mo gladhat blong Jisas Kraes, bae yu save winim mo win long faet.

Jisas i spesel Man ia blong mekem ol samting we yumi ting se i no posibol. Hem i kam long ples ia blong mekem ol samting we oli no posibol blong oli kam posibol, hemia we i no save sef bae i save sef, blong hilim hemia we i no save kam oraet, blong mekem rong i kam raet, blong mekem ol promes oli hapen.²³ Mo Hem i gud tumas blong mekem ol samting ia. Be wanem i tru, i we, Hem i stret evriwan blong mekem hemia. Long nem blong Jisas Kraes, Man blong hilim yumi, amen.

Blong moa infomesen mo risos, luk long “Abuse” insaed long seksen blong Life Help long ChurchofJesusChrist.org mo long Gospel Library ap.