“Camille N. Johnson,” Liahona, Mei 2022.
Camille N. Johnson
Rilif Sosaeti Jeneral Presiden
Camille N. Johnson, “oltaem hem i stap filim se hem i stap hom” insaed long Rilif Sosaeti.
“Mi faenem fasin blong stap olsem wan sista long medel blong ol woman we oli defren long mi,” hem i talem abaot ol eksperiens blong hem long Rilif Sosaeti, wetem moa long 30 yia long ol famli wod insaed long Yunaeted Stet mo Peru. “Mi laekem tumas paoa we i laef, mo waes tingting blong ol woman insaed long Rilif Sosaeti.”
Hem i faenem ol mento (wan we i givim advaes) mo ol fren insaed long Rilif Sosaeti, wetem sam we oli bin olfala bitim hem, mo samfala we oli bin yangfala moa bitim hem.
“Mifala evriwan i ol sista, mo mifala i serem ol eksperiens from mifala i wantem gobak long hom blong mifala long heven, be wetem ol defren eksperiens we yumi save yusum blong helhelpem wanwan long mifala,” Sista Johnson i talem.
Sista Johnson i bin givim seves olsem wan Praemeri Jeneral Presiden long las yia i kam. Bambae hem i statem seves blong hem olsem Rilif Sosaeti Jeneral Presiden long namba 1 Ogis.
Wan long ol koling we hem i laekem tumas, i blong save tij insaed long Rilif Sosaeti.
“Mi bin laekem janis ia blong mekem ol sista oli mekem samting, mo blong Spirit i tijim mi mo ol narawan long tabu aoa ia long Rilif Sosaeti. Long ples ia nao mifala i stap tokbaot Kraes, stap glad long Kraes, mo tokbaot ol samting we i stap long hat blong mifala.”
Camille Neddo i bon i kam long wol ia long Septemba 1963. Papa mo mama blong hem i, Hal mo Dorothy Neddo long Pokatelo, Aedaho, YSA. Hem i bin maredem Douglas R. Johnson long 31 Julae 1987 long Sol Lek Tempol. Tufala i gat tri boe mo faef apupikinini.
Hem i graduet long Yunivesiti blong Yuta long Inglis long 1985, mo long Yunivesiti blong Yuta Sent J. Kwini Kolej blong Loa long 1989. Hem i bin wok 30 yia olsem wan loya, mo i bin presiden blong Snow Christensen& Martineau ofis blong loya.
Olsem wan foma presiden blong Ol Yang Woman, Sista Johnson i bin givim seves tu olsem wan memba blong wod Rilif Sosaeti mo Praemeri presidensi, mo olsem wan Gospel Doktrin mo Rilif Sosaeti tija. Hem i bin givim seves tu wetem hasban blong hem, stat long 2016 i go kasem 2019, taem hasban blong hem i bin stap prisaed ova long Peru Arekipa Misin.