Elda Mark D. Eddy

Jeneral Atoriti Seventi

Long Samataem bifo long sekendri skul blong Elda Mark D. Eddy, i gat wan seminari tija we i bin invaetem hem mo ol nara memba blong seminari studen kaonsel blong oli ridim Buk blong Momon. Hem i bin ridim buk ia plante taem wetem famli blong hem, be hemia bae i fas taem we bae hem i mekem hemwan.

Hem i disaed blong prea bifo mo afta we hem i ridim buk ia evri dei. Hem i bin hop se bae i gat wan klia ansa i kam, se buk ia i tru o no, mo hem i ting se ansa ia bae i kam long wan o tu wik taem olsem. Afta we hem i bin stap ridim buk blong moa long tu manis, hem i no kasem konfemesen ia we hem i stap tingting long hem.

Sam aoa bifo wan “welkam bak” seminari divosen, we oli bin askem hem blong talem testemoni blong hem long hemia, Elda Eddy i bin kam eli blong help blong putum gud ol samting. Afta, hem i faenem wan kwaet ples blong ridim Buk blong Momon mo prea.

“Nao mi kasem filing ia we i klia mo man i no save mestem, se buk ia i tru,” hem i talem. “Hem i kam stret long taem blong mi save serem testemoni blong mi long naet ia. Filing ia i kam from mi wok strong from blong kasem, mo i stap longtaem inaf blong mi neva fogetem hemia.”

Elda Mark David Eddy, i bon i kam long wol ia long Long Bij, Kalifonia, YSA, long 30 maj 1973; papa mo mama blong hem i Richard Cleighton Eddy mo Mary Louise Savage Eddy. Hem i bin groap long Orem, Yuta, mo i bin maredem Annette “Annie” Allen long Provo Yuta Tempol long Ogis 1994. Tufala i gat sikis pikinini.

Elda Eddy i graduet long Brigham Yang Yunivesiti long 1996, wetem wan bajela digri long komunikesen, mo hem i kasem wan Juris Dokta digri long BYY long 2001. Stat long tetaem ia, hem i bin wok olsem wan loya mo bisnis eksekutiv.

Elda Eddy i bin givim seves olsem wan Eria Seventi, presiden blong Yurugwe Montevideo Misin, kaonsela long wan stek presidensi, bisop, hae kaonsela, kaonsela long wan bisoprik, wod presiden blong Ol Yang Man, mo fultaem misinari long Dominik Ripablik Santo Domingo Is Misin.