Mga Pangunahing Aral ng Ebanghelyo

Pangangalaga sa mga Nangangailangan

He Healed Many of Diverse Diseases [Pinagaling Niya ang Marami sa Iba’t ibang Karamdaman], ni J. Kirk Richards, hindi maaaring kopyahin

Bilang mga miyembro ng Ang Simbahan ni Jesucristo ng mga Banal sa mga Huling Araw, sinusunod natin ang turo ng Panginoon na pangalagaan ang mga nangangailangan. Pinangangalagaan natin ang ating kapwa sa pamamagitan ng paglilingkod sa kanila, pagtulong sa kanila na maging self-reliant, at pagbabahagi ng kung anong mayroon tayo.

Halimbawa ni Jesucristo

Minahal, inalo, at ipinagdasal ni Jesucristo ang mga nakapaligid sa Kanya. “Naglibot Siya na gumagawa ng mabuti” (Mga Gawa 10:38). Matutularan natin ang Kanyang halimbawa sa pamamagitan ng pagmamahal, pag-alo, paglilingkod, at pagdarasal para sa mga nasa paligid natin. Maaari tayong palaging maghanap ng mga paraan para matulungan ang iba.

Ministering

Ang salitang ministering ay ginagamit sa mga banal na kasulatan at sa Simbahan ng Panginoon upang ilarawan kung paano natin pinangangalagaan ang isa’t isa. Ang mga mayhawak ng priesthood ay inaatasan bilang mga ministering brother sa bawat indibiduwal o pamilya sa ward o branch. Ang mga ministering sister ay naka-assign sa bawat adult na babae. Sinisiguro ng mga ministering brother at sister na lahat ng miyembro ng Simbahan ay naaalala at pinangangalagaan.

Pagtulong sa Iba na Maging Self-Reliant

Matutulungan natin ang mga miyembro ng pamilya at mga kaibigan na maging self-reliant sa pamamagitan ng paghikayat sa kanila na maghanap ng mga pangmatagalang solusyon sa kanilang mga problema. Pagkatapos ay masusuportahan natin sila habang nagsisikap silang kamtin ang kanilang mga mithiin. Maghanap ng iba pang impormasyon tungkol sa self-reliance sa Liahona na artikulo na Mga Pangunahing Aral ng Ebanghelyo sa Agosto 2023.

Paglilingkod sa Kapwa

Maraming paraan para mapaglingkuran natin ang mga nasa paligid natin at matugunan ang kanilang temporal, espirituwal, at emosyonal na mga pangangailangan. Ang pagkilala sa iba ay makakatulong sa atin na malaman kung paano natin sila mas mapaglilingkuran. Maaari din tayong manalangin na patnubayan tayo para malaman kung ano ang magagawa natin para makatulong.

Pagbabahagi ng Kung Ano ang Mayroon Tayo

Mapaglilingkuran natin ang iba sa pamamagitan ng pagbabahagi ng mga bagay na ipinagkaloob sa atin ng Diyos. Halimbawa, maaari tayong magbigay ng bukas-palad na handog-ayuno o magbigay ng donasyon sa pondo ng Humanitarian Aid ng Simbahan. Maaari din tayong maglingkod sa ating komunidad at sa ating mga tungkulin sa Simbahan.

Mga Tungkulin ng mga Lider ng Simbahan

Ang bishop ang namamahala sa pangangalaga sa mga nangangailangan sa kanyang ward. Magagamit niya ang pera mula sa mga handog-ayuno para tulungan ang mga miyembrong mayroong mga pangangailangan. Ang iba pang mga lider, kabilang na ang kanyang mga tagapayo at ang mga panguluhan ng Relief Society at elders quorum, ay tumutulong sa mga miyembro na makahanap ng resources na magagamit nila para matugunan ang kanilang mga pangangailangan.

Mga Humanitarian Effort (Gawaing Pangkawanggawa) ng Simbahan

Tinutulungan ng Simbahan ang mga tao sa iba’t ibang panig ng mundo sa pamamagitan ng pagtugon sa emergency, mga proyekto sa komunidad, at iba pang mga programang tulad ng malinis na tubig at pagbabakuna. Para malaman pa ang tungkol dito, tingnan sa Dallin H. Oaks, “Pagtulong sa mga Maralita at Naghihirap,” Liahona, Nob. 2022, 6–8.

Mula sa mga Banal na Kasulatan

“Iniibig ng Dios ang nagbibigay na masaya” (II Mga Taga Corinto 9:7).

Tinuturuan natin ang ating mga anak na paglingkuran ang mga nangangailangan (tingnan sa Mosias 4:15–16).

Pinapanatag natin ang iba at tinutulungan natin silang tiisin ang kanilang mga pasanin (tingnan sa Mosias 18:8–9).

Mga Salitang Dapat Tandaan

Calling o Tungkulin: isang partikular na responsibilidad na maglingkod sa Simbahan. Ang mga lider ng Simbahan ay naghahangad ng inspirasyon na malaman kung sino ang nais ng Panginoon na tawagin nila.

Mga handog-ayuno: perang ibinibigay natin sa Simbahan kapag nag-aayuno tayo, na katumbas man lang ng halagang ginastos sana natin sa pagkain sa oras ng ayuno.

Self-reliant: kakayahang tustusan ang ating sariling mga pangangailangan at ng ating pamilya.

Alamin ang Iba pa

Kung may mga tanong ka tungkol sa resources ng Simbahan para sa mga bata at kabataan, maaari mong kausapin ang iyong mga ministering brother o sister, ang inyong lider sa ward o branch, o ang mga missionary. Makikita mo rin ang mga mensahe sa pangkalahatang kumperensya tungkol sa paksang ito at sa iba pang resources sa Gospel Library (sa ChurchofJesusChrist.org o sa mobile app).