“Lesona 17 Anomea mo le Sauniuniga o le Vasega: Tumau i le Faamaoni i le totonugalemu o Feteenaiga ma Puapuaga,” Anomea a le Faiaoga O Faavae o le Toefuataiga (2019)
“Lesona 17 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 17 Anomea mo le Sauniuniga a le Vasega
Tumau i le Faamaoni i le totonugalemu o Feteenaiga ma Puapuaga
E tofu uma lava i tatou ma aafiaga e tofotofo ai o tatou faatuatua. O se tasi o o tatou luitau i le olaga o le, ia tumau lea o le lototoa ma mausali i le Atua i taimi tatou te feagai ai ma na taimi faigata. A o e suesue i anomea nei, vaavaai mo mataupu faavae e mafai ona fesoasoani e taiala ai oe i taimi o le tofotofoina o le faatuatua.
Vaega 1
O a ni faalavelave na aafia ai le Au Paia i Katelani, Ohaio, i le faaiuga o le vaitau o le 1830?
“Ua vaivai tulivae o le toatele o tamalii aupito malolosi o le Ekalesia” na saunoa ai Polika Iaga e uiga i faafitauli na piimau i le Ekalesia i le 1837, (Aoaoga a Peresitene o le Ekalesia: Iosefa Samita [2007],317). O le tausaga lava na te’a atu, sa olioli ai le Au Paia i le filemu ma le solo mai o faaaliga i le faapaiaga o le Malumalu o Katelani. Peitai, i masina ina ua uma le faapaiaga, na amata i ai se “agaga o le fematea’i” lea na oo i le atunuu ma amata ai foi ona manumalo i le Au Paia. Sa tusia e Heber C. Kimball, “sa foliga mai na agai atu [Katelani] i le manuia tele, ma sa foliga mai na naunau tagata uma ia mauoa; i lo’u lagona, sa o ni oa pepelo pe faafoliga. O lenei foliga mai o le manuia na taitai ai le toatele o le Au Paia e talitonu ua oo mai le taimi mo le Alii e faatamaoaiga ai i latou i oa o le lalolagi, ma i le talitonu ai i lea tulaga, na faaosofia ai i latou i taumafaiga tetele, sa matuai tele lava lea na o ai le toalua o le Toasefululua o Lyman E. Johnson ma John F. Boynton, i Niu Ioka ma faatau mai ni oloa e tusa ma le $20,000 le tau, ma ulufale ai i totonu o pisinisi faafetauai, ma nono ai ni tupe tetele mai le Polly Voce ma isi Au Paia i Boston ma eria lata ane, lea sa laua le’i toe totogia lava” (i le Orson F. Whitney, The Life of Heber C. Kimball [1888], 111–12).
Sa amata ona salalau atu se agaga o le faamaualuga, saili masei, ma le liliuese i le toatele o le Au Paia. Na ta’ua e Eliza R. Snow:
O le toatele o e sa lotomaulalo ma faamaoni i le faatinoina o tiute uma … sa amata ona faasausili i o latou agaga, ma siitia i luga i le faamaualuluga o o latou loto. A o inufano le Au Paia i le alofa ma le agaga o le lalolagi, sa aluese mai le Agaga o le Alii mai o latou loto. (I le Aoaoga a Peresitene o le Ekalesia: Iosefa Samita [2007], 317)
E ui lava i le faaseseina i le manuia, ae sa maualuga lava faafitauli tautupe i luga o le Ekalesia i le mavae ai o tupe faaalu o le fauina o se malumalu ma le faatauina mai o fanua lea na alai ona oo le Ekalesia i le faitau sefulu afe tala o aitalafu. O le taimi lea, i Katelani ma i Misuri, sa tauivi ai le Au Paia e mulimuli i le poloaiga a le Alii ia maua mai nisi fanua ma fausia ni nofoaga fou i Sisifo Mamao ma i le Itumalo o Jackson. I se taumafaiga ina ia fesoasoani e tuumama faafifatuli tautupe i luga o le Ekalesia, sa fatuina ai e Iosefa Samita ma isi taitai o le Ekalesia se tamai faletupe na ta’ua o le Sosaiete Saogalemu o Katelani. Sa feololo ni tagata o le Au Paia sa faatauina mai ni oloa i le faletupe fou, na aofia ai ma Iosefa. E toatele le Au Paia sa talitonu, o le a aumai e le lumanai le manuia ma le tamaoaiga pe afai sa latou faamaoni.
Peitai, o se taunuuga o le salalau o le pau o le tamaoaiga i le amataga o le 1837, e tele ni faletupe na le manuia ai i le Iunaite Setete atoa. O le popole i le tamaoaiga o le atunuu atoa faatasi ai ma le mamafa o feteenaiga mai nisi o tagatanuu e le auai i le ekalesia sa saofaga i le le manuia o le Sosaiete Saogalemu o Katelani i le pe a ma le fitu masina talu ona tatalaina. E luaselau tagata faaunetupe i le faletupe na toetoe a gau ai a latou tupe uma, ma o Iosefa Samita sa sili ona tele lona gau.
E ui ina sa tali atu le toatele o le Au Paia i le faatuatua, sa tumau faamaoni i a latou molimau i le taimi o lenei vaitau o le tofotofoina, e toetele lava isi, e aofia ai nisi o taitai o le Ekalesia, sa tuuaia Iosefa Samita mo o latou faafitauli tautupe. Sa fai mai nisi o ia o se perofeta toilalo ma sa mananao e tofia se Peresitene fou o le Ekalesia e suitulaga ia te ia.
Vaega 2
O le a se mea e mafai ona ou faia ia tumau ai le malosi ma le mausali pe a tofotofoina lo’u faatuatua?
I le amataga o le 1837, sa fesoasoani ai Tomasi B. Marsh, o le sa Peresitene o le Korama a Aposetolo e Toasefululua, e taitai le Ekalesia i Misuri. Ina ua faalogo ua faitio nisi o sui o le korama ia Iosefa Samita ma na amata ona fefinauai le tasi ma le isi, sa malaga atu Tomasi i Katelani, Ohaio, ma le faamoemoe e faalotogatasi le Toasefululua.
A o agai atu o ia i Katelani, sa ia iloa ai ua valaauina e le Perofeta ni sui se toalua o le korama e auauna atu i ni misiona i Egelani. Sa talitonu Tomasi e faapea, i le avea ai ma se peresitene o le korama, o lona tiute lava o le valaau o i latou i misiona. Ina ua taunuu Tomasi i Katelani, sa ia faasoa atu ona atugaluga ia Iosefa Samita, ma sa maua e le Perofeta se faaaliga ma se fautuaga mo Tomasi (tagai Revelations in Context [2016], 55–57).
A o e faitau i fetalaiga a le Alii ia Tomasi, mafaufau po o a fautuaga ma upumoni mai lenei fuaitau e mafai ona fesoasoani i se tasi o loo tauivi ma lona faatuatua. Mafaufau e faailoga mea e te mauaina.
Suesue e Sauniuni ai mo le Vasega
Faitau le Mataupu Faavae ma Feagaiga 112:10, 12–15.
Mafaufau Loloto a o Sauniuni mo le Vasega
O a ni mataupu faavae na faamaumauina i lenei faaaliga e mafai ona fesoasoani e te tumau malosi ma mausali ai i taimi e tofotofoina ai lou faatuatua?
Vaega 3
E mafai faapefea e faigata ona saunia i tatou mo nisi o o tatou aoaoga aupito sili ona taua?
O ni nai nisi o i latou i Katelani o e sa tuua le Ekalesia sa saili e fasioti Iosefa Samita. O le lapataiina ai e le Alii i se faaaliga, sa o ese ai i laua ma Sini Rikitone i le po ma malaga atu i Sisifo Mamao, Misuri, ma taunuu ai ia Mati 1838. I le aluga o le taumafanafana ma le tautoulu o le tausaga lena, o le le malamalama ma feeseeseaiga i le va o tagata Misuri ma tagata o le Ekalesia na oo ai i ni feteenaiga faaauupegaina i Misuri i matu. O le faalagolago ai i lipoti faateleina e uiga i lenei feteenaiga, na tuuina atu ai e le kovana o Misuri se poloaiga o le faaumatiaga ina ia tutuliese faamalosi ai le Au Paia mai le setete. E le’i leva ona mavae lenei mea, ia Novema 1838, sa pueina ai le Perofeta o Iosefa Samita ma isi taitai o le Ekalesia, molia seseina i le fouvale e faasaga i le setete, ma iu ai ina faafalepuipuiina i le Falepuipui i Liperate i le Itumalo o Clay, Misiuri.
Ata pue ua leva o le Falepuipui i Liperate, Misuri.
O le olaga i totonu o le falepuipui na vaivai ai Iosefa. E faamatatasi atu le au faasoesa i faamalama puipui e autilo pe feei atu ni upumasoa ia te ia. O i latou ma isi pagota sa masani ona tau leai ni a latou mea e ai vagana ai se fasi falaoasana itiiti. O vaovaomago sa latou faaaogaina mo ni moega talu mai Tesema ua mafolafola tau ma na leai se lagolelei na maua ai. A latou tutuina se afi e taumafai ai e faamafanafana i latou lava, na faatumulia le ana i le asu ma latou momole ai. …
Talu mai ona maua lona valaauga faalelagi, sa fetaomi lava i luma Iosefa a o fetaia’i ai ma le tetee, i le taumafai e usitai i le Alii ma faapotopoto mai le Au Paia. Ae peitai, e ui lava i le ola o le lotu i le aluga o tausaga, ae na foliga mai nei ua i ai i le faatausiusiuga o le talaloa.
Na tutuli e tagata faatupu vevesi le Au Paia i fafo o Siona i totonu o le Itumalo o Jackson. O feeseeseaiga i totonu na vaevaeina ai le lotu i Katelani ma tuua ai le malumalu i lima o e na nofoaitalafu ai. Ma o lea, i le mavae ai o se taua leaga lava ma o latou tuaoi, sa taapeape solo le Au Paia i luga a’e o auvai i sasae o le Vaitafe o Misisipi, i le lotovaivai ma le leai o ni fale. …
[Na manatu Iosefa] o le Au Paia sa o ni tagata lelei o e sa alolofa i le Atua. Sa le’i tatau ona tosofetātāa’i solo i latou mai o latou fale, sasaina, ma tuua ia feoti. (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tulaga o le Upumoni, 1815–1846 [2018], 384–85)
I se tusi i taitai o le Ekalesia ma le Au Paia i le fale, sa tagi atu ai ma le agaga tatalo Iosefa, “Le Atua e, o fea o i ai oe?… O le a le umi e taofi ai lou aao, ma silasila mai ai mai le lagi faavavau lou fofoga … i sese ua faia i lou nuu ma au auauna, ma oo atu ai i ou fofoga-faafofoga a latou tagi?“ (Mataupu Faavae ma Feagaiga 121:1–2).
Mafaufau i se taimi na e tauivi ai ma faigata ma e tagi atu ai i le Atua mo se fesoasoani. A o e suesue i fetalaiga nei a le Alii na fetalaia mai ia Iosefa i le Falepuipui i Liperate, vaai faalemafaufau e faapea o loo fetalai mai e le Alii ia te oe. Mafaufau e faailoga fuaitau ma mataupu faavae e tulaga ese ia te oe.
Suesue e Sauniuni ai mo le Vasega
Faitau le Mataupu Faavae ma Feagaiga 121:7–10 ma le Mataupu Faavae ma Feagaiga 122:7–9.
Tusifaamaumau Ou Lagona Uunai
I lau apitalaaga po o le avanoa na tuuina atu, faamaumau ai upu ma mataupu faavae na faagaeetiaina oe mai le fuaitau o le mau o loo i luga. Ia saunia e faasoa atu i le vasega mea ua e aoaoina. Na faapefea ona e iloa mo oe lava le moni o mataupu faavae na aoao ai e le Alii ia Iosefa Samita i totonu o le Falepuipui i Liperate?