“Lesona 6 Anomea mo le Sauniuniga o le Vasega: O Le Tusi a Mamona—o le Maa’au’au o la Tatou Tapuaiga,” Anomea a le Faiaoga O Faavae o le Toefuataiga (2019)
“Lesona 6 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 6 Anomea mo le Sauniuniga o le Vasega
O Le Tusi a Mamona—o le Maa’au’au o la Tatou Tapuaiga
O le a sau molimau i le Tusi a Mamona? O le a se mea e mafai ona e faia e faaauau ona faamalosia ai? A o e suesue i mea nei, e tatau ona lelei atu ona e faamalamalama le pogai ua avea ai le Tusi a Mamona ma maa’au’au o la tatou tapuaiga ma a tatou molimau.
Vaega 1
O le a nisi o faamaoniga o le moni ma le taua o le Tusi a Mamona?
E le’i leva lava ona uma le lomiaina o le Tusi a Mamona ia Mati 1830, ae poloaiina loa e le Alii ia Iosefa e faatulaga le Ekalesia toefuataiina a Iesu Keriso. Sa amata ona faatau atu e faifeautalai ia kopi o le Tusi a Mamona pe a latou malaga. Sa amata ona i ai se aafiaga loloto o le tusi i le faapotopotoina mai o tagata i le Ekalesia.
O le tausaga lava lea na lomiaina ai le Tusi a Mamona, sa lagona ai e se alii talavou na igoa ia Pale P. Palate le musuia e faatau atu lana faatoaga i Ohaio ina ia mafai ona ia talai atu le Tusi Paia. E le’i leva ona uma ona faatau atu le faatoaga, ae malaga atu loa Pale ma lona faletua o Thankful i sasa’e. A o la latalata atu i Palamaira, Niu Ioka, sa lagona e Pale le uunaia o ia e aluese mai le vaa. Sa aluese o ia, ae sa faaauau pea le malaga a Thankful. Ona savali ai lea o Pale i le 10 maila e agai atu i le maota o se tiakono lotu Papatiso. Sa faamatala atu e le tiakono ia te ia e uiga i se tusi sa ia mauaina sa faapea ona faaliliuina mai i papatusi auro. Sa tusifaamaumauina mulimuli ane e Pale le mea lenei:
“Sa ou susueina [le Tusi a Mamona] ma le naunautai, ma faitau lona itulau autu. Ona ou faitauina lea o molimau a nisi o molimau e faatatau i lona mauaina ma le faaliliuina. Ina ua mavae lenei mea, sa ou amata faitauina ona anotusi mai le amataga. Sa ou faitau i le aso atoa; o le ai, sa o se avega mamafa, sa leai so’u manao i se meaai; o le moe sa o se avega mamafa pe a oo mai le po, aua sa sili atu ia te a’u le faitau i lo o le moe.
A o ou faitau, sa i ai le agaga o le Alii i o’u luga, ma sa ou iloa ma malamalama e moni le tusi, e pei o le manino ma le iloagofie e pei ona malamalama ma silafia e le tagata o loo i ai o ia. (Autobiography of Parley P. Pratt,ed. Parley P. Pratt Jr. [1938], 37)
Talu mai aso popofou o le Ekalesia, e faitau miliona tagata ua iloaina le mea na aoaoina ai Pale e le Agaga Paia i lena po—e moni le Tusi a Mamona. O loo i ai le afioga a le Atua.
A o faamaeaina e Iosefa Samita le faaliliuga o le Tusi a Mamona ia Iuni 1829, sa molimau mai le Alii lava Ia e uiga i lona moni.
Suesue e Sauniuni ai mo le Vasega
Faitau le Mataupu Faavae ma Feagaiga 17:6.
Sa faamautinoa mulimuli mai e le Alii le moni o le Tusi a Mamona ma tuuina mai ni mafuaaga na Ia aumaia ai i luma.
Suesue e Sauniuni ai mo le Vasega
Faitau le Mataupu Faavae ma Feagaiga 20:8–12, 14.
O tausaga mulimuli ane, i se Aso Sa i le 1841, na faaalu ai e le Perofeta o Iosefa Samita se aso i fonotaga faatasi ma Aposetolo e Toasefululua i le maota o Peresitene Polika Iaga, o le sa auauna atu i lena taimi o le peresitene o lena korama. A o talanoa ai ma i latou e uiga i ni mataupu eseese, sa aoao atu e Iosefa le taua o le Tusi a Mamona:
Na ou tauina atu i le usoga e faapea o le Tusi a Mamona o se tusi silisili ona sa’o i tusi uma lava o i le lalolagi, ma o le maa autu o la tatou ekalesia, ma e sili atu ona latalata le tagata i le Atua e ala i le usitaia o ona mataupu, nai lo se isi lava tusi. (Aoaoga a Peresitene o le Ekalesia: Iosefa Samita [2007], 64)
Suesue i vaega nei e aoao atili ai e uiga i upumoni nei sa aoao mai e le Perofeta o Iosefa.
Vaega 2
O le a le uiga e faapea, o le Tusi a Mamona o le tusi aupito sao o soo se tusi i luga o le fogaeleele?
Na aoao mai Elder David A. Bednar o le Korama a Aposetolo e Toasefululua e faapea:
O le Tusi a Mamona ua aupito sili ona sa’o nai lo se isi lava tusi i luga o le fogaeleele aua o loo faatotonugalemu i le Upumoni (tagai Ioane 14:6; 1 Nifae 13:40), o Iesu Keriso, ma ua toefuatai mai ai mea taua ma le manino na aveesea mai le talalelei moni (tagai i le 1 Nifae 13:26, 28–29, 32, 34–35, 40). O le sootaga tulaga ese o nei mea moni e lua—o se taulai atu i le Faaola ma le faigofie o aoaoga—ua matua mamana ai le aumaia o le molimau mautu a le sui lona tolu o le Aigaatua, le Agaga Paia. O le mea lea, e tautala atu le Tusi a Mamona i le agaga ma le loto o le tagata faitau e le pei o se isi lava voluma o tusi e paia. (David A. Bednar, “Ia Mataala Pea ma le Maelega Atoatoa,” Ensign po o le Liahona, Me 2010, 41)
Mafaufau Loloto a o Sauniuni mo le Vasega
O a ni upumoni mai le Tusi a Mamona ua faamalosia ai lou faatuatua ia Iesu Keriso ma Lana talalelei toefuataiina?
Vaega 3
E faapefea ona avea le Tusi a Mamona ma maa‘au‘au o la tatou tapuaiga?
A fausiaina se faitotoa faaofuofu, e fausia i luga ia itu e lua faatasi ai ma lagolago e taofiofi ai i luga. O le avanoa e i le pito i luga o le faitotoa faaofuofu e fuaina ma le faaeteete, ma e tipiina le maa’au’au ina ia ofi tonu lava i ai. A tuu loa i ai le maa’au’au i lona tulaga ma lalago i ai le fufusi mai isi maa, ona tu mausali loa lea o le faitotoa faaofuofu e aunoa ma se lagolago.
Na faamalamalama mai e Peresitene Ezra Taft Benson le ala ua avea ai le Tusi a Mamona ma maa’au’au o la tatou tapuaiga:
E tolu auala ua avea ai le Tusi a Mamona ma maa’au’au o la tatou tapuaiga. O le maa’au’au lea i la tatou molimau ia Keriso. O le maa’au’au lea o la tatou aoaoga faavae. O le maa’au’au o le molimau.
O le Tusi a Mamona o le maa’au’au i la tatou molimau ia Iesu Keriso. … Ua teena e le toatele o le lalolagi Kerisiano o ona po nei le paia o le Faaola. Ua latou fesiligia Lona soifua mai faavavega, Lona soifuaga atoatoa, ma le moni o Lona toetu mamalu. Ua aoao mai e le Tusi a Mamona i upu manino ma lē masalomia e uiga i le moni o na mea uma. Ua tuuina mai ai foi se faamalamalamaga aupito atoatoa o le aoaoga faavae o le Togiolaina. …
O le Tusi a Mamona o le maa’au’au foi o le aoaoga faavae o le Toetu. … E tele mea ua aoaoina mai i le Tusi a Mamona e faalautele ai lo tatou malamalamaaga e uiga i aoaoga faavae o le faaolataga. A aunoa ma ia mea, o le tele o mea ua aoaoina i isi tusitusiga paia, o le a le manino ma taua tele. …
… O le Tusi a Mamona o le maa’au’au lea o le molimau. E faapei ona talaloa le faitotoa faaofuofu pe a aveese le maa’au’au, e faapena foi ona tumau pe talaloa le Ekalesia atoa faatasi ai ma le moni o le Tusi a Mamona. Ae a faapea ua moni le Tusi a Mamona … e tatau lava i se tagata ona ia talia talitonuga o le Toefuataiga ma mea uma e o mai faatasi ai. (Ezra Taft Benson, “The Book of Mormon—Keystone of Our Religion,” Ensign, Nov. 1986, 5–6; ua faaopoopo le faatusilima)
Mafaufau Loloto a o Sauniuni mo le Vasega
O a ni auala e tumau pe talaloa ai le Ekalesia faatasi ai ma le moni o le Tusi a Mamona? E faapefea ona avea le Tusi a Mamona ma se maa‘au‘au o lau molimau patino?
Vaega 4
E faapefea ona fesoasoani le Tusi a Mamona ia tatou latalata atili atu ai i le Atua?
Mafaufau e faailoga upu po o fuaitau o loo i faamatalaga nei, o loo aoao mai ai le ala e fesoasoani ai le Tusi a Mamona ia tatou latalata atili atu ai i le Atua ma faamanuia ai o tatou olaga.
Na aoao mai Peresitene Benson:
O loo i ai se mana i totonu [o le Tusi a Mamona] lea e amata ona oo mai i o outou olaga i le taimi lava e amata ai ona e suesue ma le manatu mamafa i le tusi. O le a outou maua ai le malosi sili atu e tetee atu ai i faaosoosoga. O le a outou maua ai le mana e aloese ai mai mea tau faasese. O le a outou maua ai le mana e tumau ai i le ala lauitiiti ma le vaapiapi. O tusitusiga paia ua ta’ua o “afioga o le ola” (Mataupu Faavae ma Feagaiga 84:85), ma e leai se isi mea e sili atu ai ona moni lena faaupuga nai lo o le Tusi a Mamona. A amata loa ona e matelaina ma galala i le fia maua o na afioga, o le a e mauaina le ola i se faatelega sili atu naua o faamanuiaga. (Ezra Taft Benson, “The Book of Mormon—Keystone of Our Religion,” 7)
Na molimau mai foi Peresitene Henry B. Eyring o le Au Peresitene Sili:
Ae o le aafiaga o le Tusi a Mamona i ou uiga, mana ma le lototele e avea ai ma se molimau mo le Atua ua mautinoa. O aoaoga faavae ma faataitaiga lototoa o i lena tusi o le a siitia ai, taialaina ai, ma faamalosia ai oe. … O le suesue ma le agaga tatalo i le Tusi a Mamona o le a fausia ai le faatuatua i le Atua le Tama, i Lona Alo Pele, ma i Lana talalelei. O le a fausia ai lou faatuatua i perofeta a le Atua, o anamua ma ona po nei. E mafai ona e latalata atili ai i le Atua nai lo se isi lava tusi. E mafai ona suia ai se olaga mo le lelei. … Ou te augani atu ia te outou ina ia e inu soo mai le loloto o ona itulau. (Henry B. Eyring, “O Se Molimau,” Ensign po o le Liahona, Nov. 2011, 69–71)
Ma na folafola mai e Peresitene Russell M. Nelson:
Ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu—i aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava ia i le Tusi a Mamona i aso taitasi, e mafai ona puipuia oe mai mea leaga o le aso, e aofia ai le mala faataumaoi o ponokalafi ma isi vaisu ua punitia ai le mafaufau i mea faaleagaga. (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?” Ensign po o le Liahona, Nov. 2017, 60–63)
Tusifaamaumau Ou Lagona Uunai
Na faapefea ona fesoasoani le suesueina ma le ola ai i aoaoga o loo maua i le Tusi a Mamona e te faalatalata atili atu ai i le Atua? O a ni ni fuaitau o mau mai le Tusi a Mamona ua fesoasoani ia te oe e avea atili ai e faapei o Ia? Tusi au tali i fesili nei i le avanoa ua saunia. Sau sauni i le vasega e faasoa mai ou manatu.