“Lesona 7 Anomea mo le Sauniuniga o le Vasega: Toefuataiga o le Perisitua,” Anomea a le Faiaoga O Faavae o le Toefuataiga (2019)
“Lesona 7 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 7 Anomea mo le Sauniuniga o le Vasega
Toefuataiga o le Perisitua
Mafaufau i le taimi mulimuli na e auai ai i se sauniga o le perisitua po o le mauaina o se faamanuiaga faaleperisitua. O le a se mea na e lagonaina i le taimi o lena aafiaga? A o e suesue, mafaufau pe o faapefea ona tuuina atu ia te oe e le pule ma ki o le perisitua ia e maua faamanuiaga o le talalelei toefuataiina a Iesu Keriso.
Vaega 1
Na faapefea ona toefuatai mai e le Alii le pule o le perisitua i le lalolagi?
Sa i ai ni fesili a Iosefa Samita ma Oliva Kaotui e uiga i le pule o le perisitua a o laua faaliliuina le Tusi a Mamona. Sa faitau Iosefa ma Oliva i le 3 Nifae e faapea, ina ua uma ona aoao e Iesu ia Ona soo sa Nifae e toasefululua, o le papatisoga sa manaomia mo le faaolataga, ona Ia tuuina atu lea i le au soo le pule o le perisitua e papatiso ai (tagai i le Iosefa Samita—Talafaasolopito 1:68; 3 Nifae 11:21–27).
Sa faateia Iosefa ma Oliva i nei aoaoga. … Sa le’i papatisoina lava Iosefa, ma sa ia fia iloa atili e uiga i le sauniga ma le pule tatau e faatino ai.
I le aso 15 Me, 1829, ua te’a timuga ma na savavali atu Iosefa ma Oliva i le vao e latalata i le Vaitafe o Susquehanna. [Sa laua] tootutuli, ma ole atu i le Atua e uiga i le papatisoga ma le faamagaloga o agasala. A o la tatalo, sa fetalai malū mai le siufofoga a le Faaola Alii ia i laua, ma na faaali mai se agelu i totonu o se ao o le malamalama. Sa ia faailoa mai o ia o Ioane le Papatiso ma tuu ona lima i luga o o laua ulu. Sa faatumulia o laua loto i le olioli a o siomia i laua e le alofa o le Atua.. (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018], 66–67)
Ona faaee atu lea e Ioane le Papatiso ia le Perisitua Arona i luga o i laua, e pei ona tusia i le Iosefa Samita—Talafaasolopito ma le Mataupu Faavae ma Feagaiga 13.
Suesue e Sauniuni ai mo le Vasega
Tagai Iosefa Samita—Talafaasolopito 1:68–70, 72. (Tagai foi Mataupu Faavae ma Feagaiga 13.)
O se taimi ina ua uma ona maua e Iosefa Samita ma Oliva Kaotui le Perisitua Arona mai ia Ioane le Papatiso, sa laua maua mai le Perisitua Mekisateko mai ia Peteru, Iakopo, ma Ioane (tagai i le Mataupu Faavae ma Feagaiga 27:12–13). E le o iloa le aso tonu o lenei mea na tupu. Ae peitai mo faamaoniga faaletalafaasolopito ua fautuaina mai ai, na tupu ia Me po o Iuni o le 1829. (Tagai Larry C. Porter, “The Restoration of the Aaronic and Melchizedek Priesthoods,” Ensign, Dec. 1996, 30–47.)
Na faasolosolo malie ona faaali mai e le Alii isi mea e tele e uiga i le perisitua ma ona faamoemoega ma auina mai ni avefeau o e na tuuina mai ki faaopoopo o le perisitua ia Iosefa Samita ma Oliva Kaotui. O le siata lenei ua faaali atu ai lenei toefuataiga.
O Le Toefuataiga o le Pule o le Perisitua, Ki, ma le Malamalama
|
Aso |
Avefeau Faaleagaga ma Faaaliga |
Toefuataiina o le Pule o le Perisitua, Ki, ma le Malamalama |
|---|---|---|
Aso 1829 | Avefeau Faaleagaga ma Faaaliga Ioane le Papatiso | Toefuataiina o le Pule o le Perisitua, Ki, ma le Malamalama Na tuuina mai le pule ma ki o le Perisitua Arona (Mataupu Faavae ma Feagaiga 13) |
Aso 1829 | Avefeau Faaleagaga ma Faaaliga Peteru, Iakopo, ma Ioane | Toefuataiina o le Pule o le Perisitua, Ki, ma le Malamalama Na tuuina mai le Perisitua Mekisateko ma ki o le malo (Mataupu Faavae ma Feagaiga 27:12–13) |
Aso 1830 | Avefeau Faaleagaga ma Faaaliga | Toefuataiina o le Pule o le Perisitua, Ki, ma le Malamalama Na faaali mai ai aiaiga mo le papatisoga ma le faamanatuga, ma faataoto mai ai tiute o e umia le perisitua |
Aso 1832 | Avefeau Faaleagaga ma Faaaliga | Toefuataiina o le Pule o le Perisitua, Ki, ma le Malamalama Na faaali mai ai le talafaasolopito, faamoemoega, ma le feagaiga o le perisitua |
Aso 1831, 1835 | Avefeau Faaleagaga ma Faaaliga | Toefuataiina o le Pule o le Perisitua, Ki, ma le Malamalama Na faaali mai ai le faaigoaina, puleaina, ma le faatulagaga o tofi o le perisitua ma korama |
Aso 1836 | Avefeau Faaleagaga ma Faaaliga Mose | Toefuataiina o le Pule o le Perisitua, Ki, ma le Malamalama Na tuuina mai ai ki e faapotopoto ai le aiga o Isaraelu (Mataupu Faavae ma Feagaiga 110:11) |
Aso 1836 | Avefeau Faaleagaga ma Faaaliga Elaia | Toefuataiina o le Pule o le Perisitua, Ki, ma le Malamalama Na tuuina mai ai “le tisipenisione o le talalelei a Aperaamo” (Mataupu Faavae ma Feagaiga 110:12) |
Aso 1836 | Avefeau Faaleagaga ma Faaaliga Elia | Toefuataiina o le Pule o le Perisitua, Ki, ma le Malamalama Na tuuina mai ai ki mo le mana o faamauga (Mataupu Faavae ma Feagaiga 110:13-16) |
Aso 1839 | Avefeau Faaleagaga ma Faaaliga | Toefuataiina o le Pule o le Perisitua, Ki, ma le Malamalama Na faaali mai ai le malamalama e uiga i amioga o e umia le perisitua |
Aso Le Mailoa | Avefeau Faaleagaga ma Faaaliga Atamu, Kaperielu, Refaelu ma agelu eseese | Toefuataiina o le Pule o le Perisitua, Ki, ma le Malamalama Na folafola mai ai o latou tisipenisione, aia tatau, ki, ma le mana o lo latou perisitua (Mataupu Faavae ma Feagaiga 128:21) |
Aso 1978 | Avefeau Faaleagaga ma Faaaliga | Toefuataiina o le Pule o le Perisitua, Ki, ma le Malamalama Na faaali mai ai, o alii agavaa uma o le Ekalesia a Iesu Keriso e mafai ona maua le perisitua |
Faamatalaga: O le uiga o ki faapitoa o le perisitua o le a talanoaina atili i le lesona 16, “O Le Malumalu o Katelani ma Ki o le Perisitua.”
Mafaufau Loloto a o Sauniuni mo le Vasega
E mafai faapefea ona faamalosia lau molimau e uiga i le perisitua e ala i le iloa o le auala na toefuataiina mai ai i le lalolagi?
Vaega 2
O le a le sootaga i le va o le pule o le perisitua ma ki o le perisitua?
Sa aoao mai Peresitene Iosefa F. Samita:
O le Perisitua i lona aotelega o le pule ua tuuina mai i tagata latou te galulue ai mo le Atua. O alii taitasi ua faauuina i soo se vaega o le perisitua, ua i ai lenei pule ua faasafuaina atu ia te ia.
Peitai e manaomia, o gaoioiga uma e faia i lalo o lenei pule, e ao ona faia i le taimi ma le nofoaga e tatau ai, i le auala e tatau ai, ma mulimuli i le faatulagaga e tatau ai. O le mana e taitaia ai ia galuega, ua i ai ki o le Perisitua. (Aoaoga a Peresitene o le Ekalesia: Iosefa F. Samita [1998],252)
Sa aoao mai foi Peresitene Dallin H. Oaks o le Au Peresitene Sili:
“O ki o le perisitua o le pule lea ua tuuina mai e le Atua i [e umia] le perisitua e faatonu ai, faafoe ai, ma pulea ai le faaaogaina o Lana perisitua i luga o le fogaeleele” [Tusitaulima 2: Taitaiina o le Ekalesia (2010), 2.1.1]. O galuega po o sauniga uma e faatinoina i totonu o le Ekalesia e faia i lalo o le pule tuusao po o le pule faamatuu a le tagata o loo umiaina ki mo lena matafaioi. E pei ona faamatalaina e Elder M. Russell Ballard, “O i latou o loo i ai ki o le perisitua … ua latou faafaigofieina moni mo tagata uma o loo auauna atu ma le faamaoni i lalo o la latou taitaiga e faaaoga le pule o le perisitua ma maua ai le mana o le perisitua.” …
O le faatumutumuga lava, o ki uma o le perisitua o loo umiaina e le Alii o Iesu Keriso, o Le e ana le perisitua. O Ia Na te fuafuaina po o a ki e faamatuu mai i tagata ma pe o le a faapefea foi ona faaaogaina na ki. (Dallin H. Oaks, “O Ki ma le Pule o le Perisitua,” Ensign po o le Liahona, Me 2014, 49–50)
Vaega 3
E faapefea ona fesoasoani sauniga o le perisitua ia i tatou ia maua ai le mana togiola o le Faaola?
I le Ekalesia, o se sauniga, o se faatinoga paia ma aloaia e faatinoina i le pule o le perisitua. O nisi o sauniga e taua i lo tatou faaeaga. O nei sauniga ua taua o sauniga faaola. E aofia ai le papatisoga, faamauga o le papatisoga, faauuga i le Perisitua Mekisateko (mo alii), o faaeega paia o le malumalu, ma le faamauga o le faaipoipoga. Faatasi ai ma nei sauniga taitasi, tatou te ulufale atu ai i ni feagaiga paia ma le Alii. (“Sauniga,” Gospel Topics, topics.ChurchofJesusChrist.org)
Sa faamalamalama mai e Elder Dale G. Renlund o le Korama a Aposetolo e Toasefululua le mana tatou te maua e ala mai i sauniga o le perisitua:
Ina ia ausiaina faamoemoega a le Tama Faalelagi, e tatau ona avanoa le mana togiola a Keriso i fanau a le Atua [tagai 1 Nifae 11:31; 2 Nifae 2:8]. E tuuina mai e le perisitua nei avanoa. … E taua le perisitua aua ua na o lana pule e faatautaia ai ia sauniga ma feagaiga talafeagai i luga o le fogaeleele. Afai e toilalo le perisitua i le tuuina atu o le avanoa ia manuia ai mai le mana togiola a le Faaola, o le a la lona faamoemoega? …
… E ala atu i le perisitua, ua faaalia ai le mana faale-Atua i olaga o i latou uma o e osia ma tausia feagaiga o le talalelei ma maua sauniga e faatatau i ai [tagai Mataupu Faavae ma Feagaiga 84:19–21]. O le auala lenei tatou te o mai taitoatasi ai ia Keriso, ia faamamaina, ma faalelei ma le Atua. Ua mafai ona avanoa le mana togiola a Keriso e ala i le perisitua. (Dale G. Renlund, “O Le Perisitua ma le Mana Togiola o le Faaola,” Ensign po o le Liahona, Nov. 2017, 65)
Na ofoina mai foi e Peresitene Oaks le faamalamalamaga lenei o le ala ua avea ai le Perisitua Arona ma se auala e maua ai le mana faamama o le Alii.
O le papatisoga e mo le faamagaloina o agasala, ma o le faamanatuga o se faafouina lea o feagaiga ma faamanuiaga o le papatisoga. E tatau ona muamua le salamo i ia mea e lua. …
E leai se tasi o i [tatou] ua ola e aunoa ma se agasala talu mai lo [tatou] papatisoga. A aunoa ma nisi mea mo lo tatou faamamaina atili pe a mavae lo tatou papatisoga, e augapiu i tatou taitoatasi ma mea faaleagaga. …
Ua poloaiina i tatou ina ia salamo mai a tatou agasala ma ia o mai i le Alii ma se loto momomo ma se agaga salamo, ma taumamafa i le faamanatuga e ogatasi ma ona feagaiga. A tatou faafouina a tatou feagaiga o le papatisoga i le auala lenei, e faafouina foi e le Alii ia aafiaga o le faamamaina o lo tatou papatisoina. …
E le mafai ona tatou soona faamamafa atu le taua o le Perisitua Arona i le vaega lenei. O nei laasaga taua uma e faatatau i le faamagaloina o agasala, o loo faatinoina e ala i le sauniga faaola o le papatisoga ma le sauniga faafouina o le faamanatuga. (Dallin H. Oaks, ”O Le Perisitua Arona ma le Faamanatuga,” Liahona, Ian. 1999, 44-45)
Tusifaamaumau Ou Lagona Uunai