Dagiti Libro ken Adalen
Kapitulo 1: Ti Amatayo iti Langit

Ti Nailangitan nga Amatayo

Kapitulo 1

Hubble image of the galaxy

Adda Maysa a Dios

  • Ania dagiti sumagmamano a banag a mangipaneknek kenka nga adda maysa a Dios?

Insurat ni Alma, maysa a propeta iti Libro ni Mormon, “Ipamatmat amin dagiti banag nga adda Dios; wen, uray pay ti daga, ken amin a banag nga adda iti rabawna, wen, ken ti panagpusiposna, wen, ken kasta met amin dagiti planeta nga aggunay iti gagangay a langada ti mangpaneknek nga adda Kangatuan a Namarsua” (Alma 30:44). Mabalintayo ti tumangad iti tangatang iti rabii ket mapanunottayo no ania ti kayat a sawen ni Alma. Riniwriw dagiti bituen ken planeta, naan-anay ti pannakaurnosda amin. Saan a paspasarak ti kaaddada idiay. Makitatayo ti aramid ti Dios kadagiti langit ken iti rabaw ti daga. Dagiti adu a napipintas a mulmula, dagiti adu a kita ti ay-ayup, dagiti bantay, dagiti karayan, dagiti ulep a mangted kadatayo iti tudo ken niebe—amin dagitoy ket mangipaneknek kadatayo nga adda maysa a Dios.

Insuro kadatayo dagiti propeta a ti Dios ti Mannakabalin Amin nga Agturay ti sangalubongan. Agnaed ti Dios iti langit (kitaen iti DkK 20:17). Babaen ti Anakna, ni Jesucristo, pinarsuana dagiti langit ken ti daga ken ti amin a banag nga adda ditoy (kitaen iti 3 Nephi 9:15; Moises 2:1). Inaramidna ti bulan, dagiti bituen, ken ti init. Binukelna daytoy a lubong ket inikkanna iti sukog, garaw, ken biag. Pinunnona ti tangatang ken ti danum kadagiti nabiag a banag. Pinunnona dagiti turod ken tanap iti amin a kita ti nabiag nga ayup. Inikkannatayo iti aldaw ken rabii, panawen ti kalgaw ken lam-ek, panawen ti panagmula ken panagapit. Inaramidna ti tao a kaaspingna tapno agbalin nga agturay iti dadduma pay a pinarsuana (kitaen iti Genesis 1:26–27).

Ti Dios ti Kangatuan ken Naan-anay a Nabiag a pagpatian ken pagrukbabantayo. Isu “ti Naindaklan a Naganak ti sangalubongan,” ken Isu ket “kitaenna ti sibubukel a pamilia ti sangkataw-an nga addaan iti naamaan a pammateg ken panangasikaso” (Teachings of Presidents of the Church: Joseph Smith [2007], 39).

Ti Kinatao ti Dios

  • Ania dagiti sumagmamano a kababalin ti Dios?

Gapu ta naaramidtayo iti ladawanna (kitaen iti Moises 2:26; 6:9), ammotayo a dagiti bagitayo ket kapada ti bagina. Ti agnanayon nga espirituna ket naitaeng iti marikna a bagi a nagtagilasag ken nagtagitulang (kitaen iti DkK 130:22). Nupay kasta, naan-anay wenno perpekto ken naitan-ok ti bagi ti Dios, nga addaan iti gloria wenno dayag a saan a kabaelan nga iladawan gapu iti kinaindaklanna.

Naan-anay wenno perpekto ti Dios. Isu ti Dios ti kinalinteg, nga addaan kadagiti kababalin kas iti ayat, asi, panangngaasi, kinapudno, bileg, pammati, pannakaammo, ken pangngeddeng. Adda Kenkuana ti amin a pannakabalin. Ammona ti amin a banag. Napnuan Isuna iti kinaimbag.

Amin a nasayaat a banag ket aggapu iti Dios. Amin a banag nga ar-aramidenna ket mangtulong kadagiti annakna nga agbalin a kas Kenkuana. Kinunana, “Adtoy, daytoy ti aramidko ken gloriak—ti mangipatungpal iti saan nga ipapatay ken agnanayon a biag ti tao” (Moises 1:39).

  • Apay a nasken a maawatantayo ti kinatao ti Dios?

Panangam-ammo iti Dios

  • Kasano a maam-ammotayo ti Dios?

Napateg unay ti panangam-ammo iti Dios gapu ta kinuna ti Mangisalakan: “Daytoy ti biag nga agnanayon, a maammuandaka koma a maymaysa a pudno a Dios, ken ni Jesucristo nga imbaonmo” (Juan 17:3).

Ti umuna ken kadakkelan a bilin “Ayatem ti Apo a Diosmo iti amin a pusom” (Mateo 22:37).

Ti ad-adda a pannakaammotayo iti Dios, ad-adda met nga ayatentayo Isuna ket agtungpal kadagiti bilinna (kitaen iti 1 Juan 2:3–5). Babaen ti panagtungpaltayo kadagiti bilinna makapagbalintayo a kas Kenkuana.

Maam-ammotayo ti Dios no:

  1. Mamatitayo nga adda Isuna ken ay-ayatennatayo (kitaen iti Mosiah 4:9).

  2. Agadaltayo kadagiti nasantuan a kasuratan (kitaen iti 2 Timoteo 3:14–17).

  3. Agkararagtayo Kenkuana (kitaen iti Santiago 1:5).

  4. Agtungpaltayo iti amin a bilinna agingga iti amin a kabaelantayo (kitaen iti Juan 14:21–23).

Bayat ti panangaramidtayo kadagitoy a banag, maam-ammotayo ti Dios ken iti kamaudiananna maaddaantayo iti agnanayon a biag.

  • Utobem no ania ti maaramidmo tapno ad-adda a mayasidegka iti Dios.

Dagiti Mainayon a Nasantuan a Kasuratan