Aramid ti Misionario

Kapitulo 33

Simbaan ti Misionario ti Simbaan ti Apo

• Iti ania a wagwagas a paset ti plano ti Dios para kadagiti annakna ti aramid ti misionario?

Impaltiing ti Apo ti plano ti ebanghelio ken ni Adan: “Ket kastoy ti pannakairugi a maikasaba ti Ebanghelio, manipud idi punganay” (Moises 5:58). Kalpasanna, naibaon dagiti nalinteg nga an-annabo ni Adan a mangikasaba iti ebanghelio: “Inawaganda amin a tao, iti amin a lugar, nga agbabawi; ket naisuro ti pammati kadagiti annak ti tattao” (Moises 6:23).

Para kadagiti mannursuro: Ti panangibinglay kadagiti padas kadagiti pagbatayan ti ebanghelio ket mangawis iti Espiritu. Mabalin a kayatmo a kasao iti nasapsapa ti sumagmamano a miembro ti klase wenno miembro ti pamilia, a mangkidkiddaw kadakuada nga agsagana a mangibinglay kadagiti padas a napateg kadakuada ken mabalin a makatulong kadagiti dadduma.

Misionario amin dagiti propeta. Nabilin ti tunggal maysa iti panawenna a mangikasaba iti mensahe ti ebanghelio. Manipud idi addan priesthood iti daga, kinasapulanen ti Apo dagiti misionario a mangikasaba kadagiti agnanayon a pagbatayan ti ebanghelio kadagiti annakna.

Ti Simbaan ti Apo ket kanayon a simbaan ti misionario. Idi nagbiag ti Mangisalakan iti daga, nangorden Isuna kadagiti Apostol ken Pitupulo ken inikkanna ida iti turay ken pagrebbengan a mangikasaba iti ebanghelio. Kaaduan kadagiti panangikasabada ket kadagiti bukodda a tao, dagiti Judio (kitaen iti Mateo 10:5–6). Kalpasan ti panagungar ni Jesus, nangibaon kadagiti Apostol a mangikasaba iti ebanghelio kadagiti Gentil. Imbilinna kadagiti Apostol, “Inkayo iti isu amin a lubong, ket ikasabayo ti ebanghelio iti isu amin a parsua” (Marcos 16:15).

Naindaklan a misionario ni Apostol Pablo a naibaon kadagiti Gentil. Kalpasan ti pannakapasurotna iti Simbaan, binubosna ti nabati pay a panawen ti biagna a nangikasaba iti ebanghelio kadakuada. Isu ket nasaplit, nabato, ken nabalud iti nadumaduma a panawen kabayatan ti panagmisionna. Ngem intultuloyna nga inkasaba ti ebanghelio (kitaen iti Dagiti Aramid 23:10–12; 26).

Nairugi manen ti aramid ti misionario idi naisubli ti Simbaan ti Apo babaen ken ni Propeta Joseph Smith. Ita nga agdama naited kadagiti Apostol ken Pitupulo ti kangrunaan a pagrebbengan a mangikasaba iti ebanghelio ken mangkita a maikasaba daytoy iti sangalubongan. Imbaga ti Apo ken ni Joseph Smith: “Ipakdaarmo ti ebangheliok iti tunggal daga, ken iti tunggal siudad. … Mangiburayka iti pammaneknek iti tunggal lugar, kadagiti tunggal tao” (DkK 66:5, 7). Idi Hunio 1830, inrugi ni Samuel Harrison Smith, ti kabsat ti propeta, ti umuna a panagdaliasatna kas misionario para iti Simbaan.

Manipud iti dayta a panawen, nasuroken a maysa a milion a misionario ti naawagan ken naibaon a mangikasaba iti ebanghelio. Idanonda ti mensaheda iti lubong a ni Jesucristo ti Anak ti Dios ken Mangisalakantayo. Ipaneknekda a naisublin ti ebanghelio iti daga babaen ti maysa a propeta ti Dios. Maikkan dagiti misionario iti pagrebbengan a mangikasaba iti ebanghelio iti amin a tao, mangbuniag kadakuada, ken mangisuro kadakuada a mangaramid iti amin a banag nga imbilin ti Apo (kitaen iti Mateo 28:19–20). Igastuan dagiti misionario a Santo iti Ud-udina nga Aldaw ti bagbagida iti papanda iti amin a paset ti lubong tapno ikasabada ti mensahe ti ebanghelio.

Maikasabanto ti Ebanghelio iti Intero a Lubong

• Ania dagiti sumagmamano a nadumaduma a wagas nga insaganan ti Apo para kadatayo tapno maibinglay ti ebanghelio?

Naibagan kadatayo iti paltiing iti ud-udina nga aldaw a nasken nga ikasabatayo ti naisubli nga ebanghelio iti tunggal pagilian ken tattao (kitaen iti DkK 133:37). Dinatayo kaano man ikkan ti Apo iti bilin a saan a mangisagana iti wagas para kadatayo tapno maipatungpal daytoy (kitaen iti 1 Nephi 3:7). Nangisagana ti Apo kadagiti wagas para kadatayo tapno maisuro ti ebanghelio iti amin a pagilian a naminsan idi a nakaserra kadatayo. Bayat ti panagtultuloytayo nga agkararag ken mangusar iti pammati, luktanto ti Apo dagiti dadduma pay a pagilian iti aramid ti misionario.

Ti Apo pay ket “parparegtaenna ti panunot dagiti naindaklan a tao tapno mangparnuay kadagiti partuat wenno imbension a mangpadur-as ti aramid ti Apo kadagiti wagas a saan a kaano man naammuan daytoy a lubong” (Russell M. Nelson, iti “Computerized Scriptures Now Available,” Ensign, Abr. 1988, 73). Tumultulong dagiti pagiwarnak, magasin, telebision, radio, satellite, kompiuter, ti Internet, ken mainaig a teknolohia tapno mayeg iti mensahe ti ebanghelio kadagiti minilion a tattao. Datayo nga addaan iti pakabuklan ti ebanghelio ket kasapulantayo nga usaren dagitoy nga imbension a mangitungpal iti bilin ti Apo: “Ta, pudno, nasken a maisaknap iti intero a lubong ti aweng nga agtaud iti daytoy a lugar, ken iti intero a daga—nasken a maikasaba ti ebanghelio iti tunggal [tao]” (DkK 58:64).

• Kadagiti ania a wagas a nakitamon a nasamay a nausar ti teknolohia tapno maibinglay ti ebanghelio?

Napateg ti Aramid ti Misionario

• Apay a napateg para iti tunggal tao a mangngeg ken maawatanna ti ebanghelio?

“Daytoy ti umuna a kalikagumtayo a kas maysa a Simbaan tapno isalakan ken itan-ok dagiti kararua dagiti annak ti tattao” (Ezra Taft Benson, iti Conference Report, Abr. 1974, 151; wenno Ensign, Mayo 1974, 104). Kasapulan ti aramid ti misionario tapno maited kadagiti tao ti lubong ti maysa a gundaway tapno mangngeg ken awatenda ti ebanghelio. Kasapulanda a masursuro ti kinapudno, agsublida iti Dios, ken awatenda ti pannakapakawan dagiti basolda.

Adu kadagiti kakabsattayo iti daga ti binulsek dagiti palso a pannursuro ken “mailiklik laeng iti kinapudno gapu ta dida ammo ti pangsapulanda” (DkK 123:12). Babaen ti aramid ti misionario mayegtayo kadakuada ti kinapudno.

Imbilin ti Apo, “Agtrabahokayo iti bangkagko iti maudi a gundaway—iti maudi a gundaway awaganyo dagiti agindeg iti daga” (DkK 43:28). Bayat ti panangisurotayo iti ebanghelio kadagiti kakabsattayo, isagsaganatayo ti dalan para iti Maikadua a Yaay ti Mangisalakan (kitaen iti DkK 34:6).

Nasken nga Agbalintayo Amin a Misionario

• Iti ania a wagwagas a makapagbalintayo a naregget nga agsapul kadagiti gundaway a mangibinglay iti ebanghelio kadagiti dadduma? Iti ania a wagwagas a pakaisaganaantayo ti bagbagitayo para kadagiti kasta a gundaway?

Misionario ti tunggal miembro ti Simbaan. Nasken nga agbalintayo a misionario nupay saantayo a pormal a naawagan ken napasingkedan [set apart]. Pagrebbengantayo nga isuro ti ebanghelio babaen ti balikas ken aramid kadagiti amin nga annak ti Nailangitan nga Amatayo. Imbaga kadatayo ti Apo, “Umno a ballaagan ti tunggal tao a naballaaganen ti padana a tao” (DkK 88:81). Naibagan kadatayo ti maysa a propeta a nasken nga ipakitatayo kadagiti kaaarrubatayo nga ay-ayatentayo ida sakbay a ballaagantayo ida (kitaen iti Teachings of Presidents of the Church: Spencer W. Kimball [2006], 262). Kasapulanda a marikna ti pannakigayyem ken pannakikaduatayo.

Sitatallugod dagiti annak a lallaki ni Mosiah a nangawat iti pagrebbenganda a mangisuro iti ebanghelio. Idi napasurotda iti Simbaan, napno dagiti pusoda iti panangngaasi para kadagiti dadduma. Tinarigagayanda nga ikasaba ti ebanghelio kadagiti kabusorda, dagiti Lamanite, “ta dida maawat a matay ti ania man a kararua; wen, uray pay ti amin a panunot a nasken nga agibtur iti awan inggana a panagtutuok a mamagaringenggen ken mamagpigerger kadakuada” (Mosiah 28:3). Bayat ti panangpunno ti ebanghelio iti biagtayo iti rag-o, mariknatayo daytoy a kita ti ayat ken panangngaasi para kadagiti kakabsattayo. Kayattayto nga ibinglay ti mensahe ti ebanghelio iti amin nga agtarigagay a dumngeg.

Adu a wagas a mabalintayo nga ibiglay ti ebanghelio. Sumaganad dagiti sumagmamano a singasing:

1. Mabalintayo nga ipakita kadagiti gagayyem ken dadduma pay ti ragsak a lak-amentayo gapu iti panagtungpal kadagiti kinapudno ti ebanghelio. Agbalintayto a silaw iti lubong ti kastoy a wagas (kitaen iti Mateo 5:16).

2. Mabalintayo a rimbawan ti gagangay a kinamanagbabaintayo babaen ti pannakigayyem kadagiti dadduma pay ken panagaramid kadagiti nasayaat a banag para kadakuada. Matulongantayo ida a mangkita a napudno ti tarigagaytayo kadakuada ken saantayo nga agkalikagum iti bukod a pagsayaatan.

3. Mabalintayo nga ilawlawag ti ebanghelio kadagiti saan a miembro a gagayyem ken dadduma pay.

4. Mabalintayo nga awisen dagiti gagayyem nga agessem nga agsursuro iti ad-adu pay maipapan iti ebanghelio kadagiti pagtaengantayo tapno isuro ida dagiti misionario. No agnanaed dagiti saan a miembro a gagayyem iti adayo unay, mabalintayo a kiddawen a sarungkaran ida dagiti misionario kadagiti lugarda.

5. Maisurotayo kadagiti annaktayo ti kinapateg ti panangibinglay iti ebanghelio, ken maisaganatayo ida a naespirituan ken iti gastuenda a mapan agmision. Mabalintayo pay nga isagana ti bagbagitayo tapno makapagserbi iti full-time mission kadagiti nataenganen a tawentayo.

6. Mabalintayo a bayadan ti apagkapullotayo ken mangidonar iti pundo nga agpaay kadagiti misionario. Dagitoy a donasion ket mausar para iti pannakaituloy ti aramid ti misionario.

7. Mabalintayo ti mangidonar iti pundo ti misionario iti ward, branch, wenno sapasap [general missionary fund] tapno makaited iti tulong a kuarta kadagiti misionario a saan a kabaelan a tulongan dagiti pamiliada.

8. Mabalintayo ti agaramid iti family history research ken aramid iti templo tapno matulongan dagiti kapuonantayo nga umawat kadagiti naan-anay a bendision ti ebanghelio.

9. Mabalintayo nga awisen dagiti saan a miembro kadagiti aktibidad a kas kadagiti family home evening ken kadagiti pasken, komperensia, ken miting iti Simbaan.

10. Mabalintayo ti mangted iti kopia dagiti magasin ti Simbaan. Mabalintayo pay ti mangibinglay kadagiti mensahe ti ebanghelio babaen ti panangusar kadagiti artikulo nga adda iti opisial nga Internet site ti Simbaan, LDS.org ken Mormon.org.

Tulongannatayo ti Nailangitan nga Amatayo nga agbalin a nasamay a misionario no adda tarigagaytayo a mangibinglay iti ebanghelio ken agkararag para iti pannarabay. Tulongannatayonto a mangsapul kadagiti wagas a pakaibinglayan ti ebanghelio kadagitay adda iti aglawlawtayo.

• Mangpanunotka maipapan kadagiti tao a pakaibinglayam iti ebanghelio. Ikeddengmo no kasano ti panangaramidmonto iti daytoy. Ibilangmo ti panangituding iti maysa a panggep a tun-oyen a mangibinglay iti ebanghelio kadagitoy a tao iti masinunuo a petsa.

Ikari ti Apo Kadatayo dagiti Bendision iti Panangitrabaho iti Aramid ti Misionario

Imbaga ti Apo ken ni Propeta Joseph Smith nga umawat dagiti misionario iti adu a bendision. Iti panagsaritana kadagiti elder a nagsublin manipud kadagiti panagmisionda, kinuna ti Apo, “Nagasatkayo ta naisurat iti langit ti imburayyo a pammaneknek a kitaen dagiti anghel; ket naragsakanda kadakayo” (DkK 62:3). Kinunana pay a dagiti agtrabaho para iti pannakaisalakan dagiti dadduma ket mapakawandanto kadagiti basolda ken mangyegto iti pannakaisalakan kadagiti bukodda a kararua (kitaen iti DkK 4:4; 31:5; 84:61).

Imbaga kadatayo ti Apo:

“Ket no pudno a kasapulan ti panagtrabahoyo iti unos ti panagbiagyo a mangyararaw kadagitoy a tao iti panagbabawi, ket yegyo, uray no maysa la a kararua kaniak, anianton a rag-oyo iti sibayna iti pagarian ti Amak!

“Ket ita, no nalausto ti rag-oyo iti maysa a kararua a mayegyo kaniak iti pagarian ti Amak, anianto la ketdin a rag-oyo no mangyegkayo kaniak iti adu a kararua!” (DkK 18:15–16).

• Kaano a nariknamon ti rag-o ti aramid ti misionario?

Dagiti Mainayon a Nasantuan a Kasuratan

• DkK 1:17–23 (nabilin ni Joseph Smith a mangasaba)

• DkK 24:12 (papigsaen ti Apo dagiti kanayon nga agkalikagum a mangipakdaar iti ebangheliona)

• DkK 38:41 (ibinglay ti ebanghelio a siaalumamay ken sipapakumbaba)

• DkK 34:4–6; Dagiti Aramid 5:42 (maikasabanto ti ebanghelio)

• DkK 60:1–2 (ballaagan ti Apo dagiti mabuteng a mangikasaba iti ebanghelio)

• DkK 75:2–5 (mabendisionanto iti agnanayon a biag dagiti mangipakdaar iti ebanghelio ken dagiti napudno)

• DkK 88:81–82 (nasken a ballaagan ti amin a naballaaganen dagiti padada a tao)

• Mateo 24:14 (maikasabanto ti ebanghelio sakbay nga umayto ti panungpalan)

• Abraham 2:9–11 (maitedto ti ebanghelio ken priesthood iti amin a pagilian)