Dagiti Libro ken Adalen
Kapitulo 27: Panagtrabaho ken Bukod a Pagrebbengan

Panagtrabaho ken Bukod a Pagrebbengan

Kapitulo 27

A man working indoors on a lathe.

Ti Panagtrabaho ket Agnanayon a Pagbatayan

  • Ania dagiti padasmo a nangipakitan kenka iti kinapateg ti panagtrabaho?

Impakita kadatayo ti Nailangitan nga Amatayo ken ni Jesucristo babaen dagiti pagwadan ken pannursuroda a napateg ti panagtrabaho iti langit ken iti daga. Nagtrabaho ti Dios tapno maparsua ti langit ken ti daga. Pinagtitiponna dagiti baybay iti maysa a disso ken pinaltuadna ti namaga a daga. Inaramidna nga agtubo dagiti ruot, mula, ken kayo iti rabaw ti daga. Pinarsuana ti init, ti bulan, ken dagiti bituen. Pinarsuana ti tunggal nabiag a banag iti baybay wenno iti rabaw ti daga. Kalpasanna impanna da Adan ken Eva iti daga tapno taripatuenda daytoy ken mangituray kadagiti amin a nabiag a banag. (Kitaen iti Genesis 1:1–28.)

Kinuna ni Jesus, “Ni Amak agingga ita agar-aramid, ket agar-aramidak met” (Juan 5:17). Kinunana pay, “Rebbengko nga aramiden dagiti aramid ti nangibaon kaniak” (Juan 9:4).

Nabilintayo nga Agtrabaho

Nagbalinen ti panagtrabaho a paset ti biag iti daga manipud pay pimmanaw da Adan ken Eva iti Minuyongan ti Eden. Kinuna ti Apo ken ni Adan, “Babaen ti ling-et ta rupam mangankanto iti taraon” (Genesis 3:19). Nagtrabaho da Adan ken Eva iti talon tapno maipaayda dagiti bukodda a kasapulan ken dagiti kasapulan dagiti annakda (kitaen iti Moises 5:1).

Kinuna ti Apo kadagiti tao ti Israel, “Kadagiti innem nga aldaw agtrabahokanto” (Exodo 20:9).

Kadagiti nagkauna nga aldaw ti naisubli a Simbaan, kinuna ti Apo kadagiti Santo iti Ud-udina nga Aldaw, “Ita, siak, ti Apo, saanak unay a maragsakan kadagiti agindeg iti Zion, ta adda dagiti sadut kadakuada” (DkK 68:31).

Kinuna ti maysa a propeta ti Dios, “Nasken a mabigbig manen ti panagtrabaho a kas kangrunaan a pagbatayan ti biag dagiti miembro ti Simbaan (Heber J. Grant, Teachings of Presidents of the Church: Heber J. Grant [2002], 115).

Ti Pagrebbengan ti Pamilia

  • Ania dagiti sumagmamano a pagrebbengan a nasken a pagtalinaeden dagiti amma, inna, ken annak iti pagtaengan? Ania ti mabalin nga aramiden dagiti miembro ti pamilia a makitinnulong iti trabaho?

Agtinnulong nga agtrabaho dagiti nagannak tapno maipaay ti pagsayaatan ti bagi, espiritu, ken rikna ti pamiliada. Nasken a dida kaano man mangnamnama iti maysa a tao a mangaramid iti daytoy a pagrebbengan para kadakuada. Insurat ni Apostol Pablo, “No adda saan a mangtaraon kadagiti adda iti aywanna, ket nangruna kadagiti kabbalayna met laeng, naglikudanna ti pammati” (1 Timoteo 5:8).

Nasken nga agkalikagum a manggun-od dagiti agassawa iti pammaregta manipud iti Apo ken surotenda ti pammalakad dagiti propeta no ipasdekda dagiti pagrebbengan ti tunggal maysa. Ti panangparnuay iti maysa a pagtaengan a pakaisuruan dagiti pagbatayan ti ebanghelio iti inaldaw ken pakapadur-asan iti ayat ken urnos ket kas kapateg ti pannangted kadagiti kangrunaan a kasapulan iti taraon ken aruaten.

Nasken nga aramiden dagiti annak ti pasetda iti trabaho ti pamilia. Kasapulan a maaddaan dagiti annak kadagiti naituding nga aramiden a trabaho a mayannatup kadagiti kabaelanda. Kasapulanda ti madayaw gapu kadagiti balligida. Masursuro babaen dagiti naballigian a padas iti pagtaengan dagiti nasayaat a kababalin iti panagtrabaho, ugali, ken paglaingan.

No dadduma mapasaran dagiti tao ti rigat no ikarkarigatanda nga ipaay ti kasapulan dagiti pamiliada. Ti mabayag a panagsakit, ti ipapaatay ti asawa, wenno ti kaadda ti lakay wenno baket unayen a naganak ket mabalin a mangnayon kadagiti pagrebbengan iti maysa a pagtaengan. Laglagipen ti Nailangitan nga Amatayo dagiti pamilia kadagitoy a kasasaad ket ik-ikkanna ida iti pigsa a mangaramid kadagiti pagrebbenganda. Kanayon a bendisionanna ida no agkiddawda Kenkuana a sipapammati.

Mabalintayo a Kaay-ayo ti Trabahotayo

  • Kasano nga aringan ti ugalitayo ti panagtrabahotayo?

Iti sumagmamano a tattao ti panagtrabaho ket kadukotan iti amin a makauma nga aramid. Kadagiti dadduma makaparegta daytoy a paset ti biag. Maysa a wagas tapno maay-ayotayo kadagiti naan-anay a parabur ti biag ket ti pannakasursurotayo a mangipateg iti panagtrabaho.

Saantayo amin a makapagpili iti kita ti trabaho nga aramidentayo. Sumagmamano kadatayo ti agbannog iti uneg dagiti napaut nga oras para laeng kadagiti kasapulantayo. Narigat a maay-ayotayo iti kasta a panagtrabaho. Ngem ti karagsakan a tattao ket dagiti nakasursuro a naay-ayo iti trabahoda, ania man daytoy.

Makapagtitinnulongtayo iti panagtrabahotayo. Lumag-an ti kadagsenan a trabaho no agtitinnulongtayo iti daytoy.

Napateg unay ti ugalitayo iti panagtrabaho. Ipakita ti sumaganad nga estoria no kasano ti panangparmata ti maysa a lalaki iti maipapan iti inaldaw a panagtrabahona. Ti maysa nga agdaldaliasat ti limmabas iti pagkalian ken pagtabasan iti bato ket nakitana ti tallo a lallaki nga agtartrabaho. Dinamagna iti tunggal lalaki no ania ti ar-aramidenna. Aggigidiat ti sungbat ti tunggal lalaki iti isu met laeng a trabaho. “Agtabtabasak iti bato,” insungbat ti umuna a lalaki. Insungbat ti maikadua, “Mangmanggedak iti tallo a pedaso a balitok iti inaldaw.” Immisem ti maikatlo a lalaki ket kinunana, “Tumultulongak a mangbangon iti balay ti Dios.”

Makapagserbitayo iti Dios iti ania man a napudno a panagtrabaho. Kinuna ni Ari Benjamin, maysa a propeta a Nephite, “No agserbikayo iti padayo a tao, agserserbikayo laeng iti Dios” (Mosiah 2:17). No ti trabahotayo ket mangmangted laeng iti makaanay para kadagiti kasapulan ti bagbagitayo wenno dagiti pamiliatayo, tumultulongtayo pay laeng kadagiti sumagmamano nga annak ti Dios.

  • Kasano a mapasayaattayo ti ugalitayo maipapan iti panagtrabaho?

Ilunod ti Dios ti Kinasadut

Saan a maragsakan ti Apo kadagiti nasadut wenno managpalabas iti oras. Kinunana, “Awan ti lugar ti sadut iti simbaan, malaksid no agbabawi ken aturenna dagiti wagasna” (DkK 75:29). Imbilinna pay, “Saankayo nga agsadsadut; ta ti managsadsadut saanto a mangan iti tinapay wenno agkawes iti pagan-anay ti trabahador” (DkK 42:42).

Manipud pay kadagiti nagkauna nga aldaw ti Simbaan, insuron dagiti propeta dagiti Santo iti Ud-udina nga Aldaw nga agwayas ken biagenda ti bagida ken liklikanda ti kinasadut. Awan kadagiti pudno a Santo iti Ud-udina nga Aldaw ti aginnanakem a mangyakar manipud iti bagbagida iti dagensen nga imetda. Agingga a kabaelanda, ipaayandanto ti bagbagida ken dagiti pamiliada kadagiti kasapulan ti biag.

Agingga a kabaelanda, nasken nga awaten amin a miembro ti Simbaan ti pagrebbengan a mangaywan kadagiti kabagianda a saan a makabael nga agsapul iti agpaay kadakuada.

  • Kasano nga aringan ti kinasadut ti maysa a tao? ti maysa a pamilia? ti maysa a komunidad?

Panagtrabaho, Panagaliwaksay, ken Panaginana

  • Apay a napateg ti panangbalanse iti panagbiag iti nagbaetan ti panagtrabaho, panagaliwaksay, ken panaginana?

Nasken a kitaen ti tunggal maysa kadatayo ti umno a panagbalanse ti panagtrabaho, panagaliwaksay, ken panaginana. Adda maysa a kadaanan a pagsasao: “Ti kaawan ti ar-ar-aramiden ti karigatan iti amin nga aramid, gapu ta saan a mabalin nga agsardeng ti maysa a tao tapno aginana.” No awan ti panagtrabaho, awan ti kaipapanan ti panaginana ken panagaliwaksay.

Saan laeng a nasayaat ken kasapulan ti aginana, ngem nabilintayo nga aginana iti aldaw ti Sabbath (kitaen iti Exodo 20:10; DkK 59:9–12). Daytoy nga aldaw ti panaginana kalpasan ti tunggal innem nga aldaw a panagtrabaho ket mangyeg iti gin-awa para kadagiti sumarsaruno nga aldaw. Ikari pay ti Apo ti “pakabuklan ti daga” kadagiti mangngilin iti aldaw ti Sabbath (kitaen iti DkK 59:16–20; kitaen met iti kapitulo 24 iti daytoy a libro).

Kadagiti dadduma pay nga aldaw ti lawas, malaksid iti panagtrabaho, mabalintayo a bubosen ti panawen tapno mapasayaat dagiti paglaingantayo ken maliwliwa kadagiti pagduyosantayo nga aramid, panagaliwaksay, wenno dadduma pay nga aktibidad a makapabang-arto kadatayo.

  • Ania ti maaramidtayo tapno mapagtalinaed ti nasayaat a panangbalanse iti panagtrabaho, panagaliwaksay, ken panaginana? Kasano a matulongan dagiti nagannak dagiti annakda a mangpatalinaed iti daytoy a pannakabalanse?

Dagiti Bendision ti Panagtrabaho

  • Ania dagiti sumagmamano a bendision a sumangbay manipud iti napudno a panagtrabaho?

Impalgak ti Apo ken ni Adan, “Babaen ti ling-et ta rupam mangankanto iti taraon” (Genesis 3:19). Mainayon iti panagbalin a naindagaan a linteg, daytoy a linteg ket para iti pannakaisalakan ti kararua ni Adan. Awan ti pudno a pakabennegan iti nagbabaetan ti trabaho a mainaig iti naespirituan, mainaig iti panunot, ken mainaig iti bagi. Kasapulan ti panagtrabaho iti tunggal maysa kadatayo para iti panagdakkel, pannakapasayaat iti kababalin, ken adu a pakapnekan a saan a kaano man ammo dagiti nasadut.

Kinuna ni Presidente David O. McKay, “Panunotentayo koma a maysa a sagut ti gundaway nga agtrabaho, a maysa a bendision ti pannakabael nga agtrabaho, a maysa a balligi ti panangipateg iti panagtrabaho” (Pathways to Happiness [1957], 381).

“Panggep ti tao, ket tapno maaddaanda iti ragsak” (2 Nephi 2:25). Ti panagtrabaho ti tulbek iti pakabuklan a rag-o iti plano ti Dios. No nalintegtayo, agsublitayonto a makipagtaeng iti Nailangitan nga Amatayo, ken maaddaantayonto iti trabaho nga aramiden. Bayat ti panagbalintayo a kas Kenkuana, ti trabahotayo ket agbalinto a kas iti trabahona. Ti trabahona ket “mangipatungpal iti saan nga ipapatay ken ti agnanayon a biag ti tao” (Moises 1:39).

Dagiti Mainayon a Nasantuan a Kasuratan