Dagiti Propeta ti Dios
Kapitulo 9
Dagiti Propeta ket Pannakabagi ti Dios iti Daga
-
Ania dagiti bileg ken sagut nga adda iti maysa a propeta?
“Kinapudnona awanto ti aramiden ni Apo Jehova a dinto maipalgak ti palimedna kadagiti adipenna, dagiti mammadto” (Amos 3:7).
Adu a tattao ti agbibiag iti kinasipnget, agduadua iti pagayatan ti Dios. Mamatida a naserraan dagiti langit ken nasken a sanguen dagiti tao dagiti peggad nga is-isuda laeng. Naggasaten dagiti Santo iti Ud-udina nga Aldaw! Ammotayo a makisarsarita ti Dios iti Simbaan babaen iti propetana. Addaanda kadagiti managyaman a puspuso, dagiti Santo iti lubong ket kantaenda ti himno, “O Dios, agyamankami ‘ti propeta a mangibagnos kadakami” (Pagbatayan ti Ebanghelio, p. 330).
Ti propeta ket maysa a tao nga inawagan ti Dios nga agbalin a pannakabagina iti daga. No agsao ti maysa a propeta para iti Dios, kasla ti Dios ti agsasao (kitaen iti DkK 1:38). Ti propeta ket maysa pay a naisangsangayan a saksi para ken ni Cristo, nga agipampaneknek maipapan iti kinadiosanna ken mangisursuro iti ebangheliona. Ti propeta ket mangisursuro iti kinapudno ken agipatpatarus iti balikas ti Dios. Awisenna dagiti saan a nalinteg a tao nga agbabawi. Isu ti umawat kadagiti paltiing ken pangiturong manipud iti Apo para iti pagimbagantayo. Mabalin a makitana ti masakbayan ket ipadtona dagiti sumangbay a pasamak tapno maballaagan ti intero a sangalubongan.
Ti propeta ket mabalin a maysa a tao a naggapu iti ania man a kita ti kasasaad iti biag. Mabalin nga isu ket agtutubo wenno nataengan, nangato ti adalna wenno saan a nagadal. Mabalin nga isu ket maysa nga agtaltalon, abogado, wenno mannursuro. Agkawes dagiti nagkauna a propeta iti roba ken addaanda iti sarukod. Agkawes dagiti kabaruanan a propeta iti terno ken addaanda iti portfolio. No kasta, ania ngarud ti pakailasinan iti maysa a pudno a propeta? Ti pudno a propeta ket kanayon a pinili ti Dios ken naawagan babaen iti umno a turay wenno awtoridad ti priesthood (kitaen iti Pagannurotan ti Pammati 1:5).
Kanunongan dagiti Santo iti Ud-udina nga Aldaw ti Umuna a Panguluen ken dagiti Sangapulo-ket-dua nga Apostol kas propeta. Nupay kasta, no agsaotayo maipapan “dagiti propeta ti Simbaan,” kayattayo a sawen ti Presidente ti Simbaan, nga isu ti Presidente ti nangato a priesthood.
Iti Unos ti Pakasaritaan ti Lubong Inawaganen ti Dios dagiti Propeta a Mangidaulo iti Sangkataw-an
-
Iti ania a wagas nga inwanwan dagiti propeta dagiti annak ti Dios iti napalabas?
Addan dagiti propeta iti daga manipud pay kadagiti aldaw ni Adan. Dagiti padas dagitoy a naindaklan a tattao ket mangguyugoy ken mangparegta kadatayo. Indauluan ni Moises, ti propeta iti Daan a Tulag, ti rinibu kadagiti taona nga inruar iti Egipto ken iti pannakaadipen a nagturong iti maikari a daga. Insuratna dagiti umuna a lima a libro ti Daan a Tulag ken inrekordna dagiti Sangapulo a Bilin. Nagdaliasat ni Nephi, ti propeta ti Libro ni Mormon, manipud iti Jerusalem agingga kadagiti kontinente ti America 600 a tawen sakbay ti pannakayanak ni Cristo. Daytoy naindaklan a dadaulo ken mannakup ket nangted kadatayo iti adu a napapateg a sinurat iti Libro ni Mormon. Napili ni Juan Bautista a mangisagana iti lubong para iti yaay ni Apo Jesucristo. Babaen ken ni Joseph Smith, propeta iti ud-udina nga aldaw, insubli ti Apo ti Simbaan. Impatarus pay ni Joseph Smith ti Libro ni Mormon idi agtutubo pay laeng.
-
Ania ti nasursurom manipud kadagiti biag ken pannursuro dagiti propeta?
Addaantayo iti Sibibiag a Propeta iti Daga iti Agdama
-
Apay a kasapulantayo ti sibibiag a propeta iti agdama?
Addaantayo iti sibibiag a propeta iti daga iti agdama. Daytoy a propeta ket isu ti Presidente ti Ti Simbaan ni Jesucristo dagiti Santo iti Ud-udina nga Aldaw. Addaan isuna iti karbengan iti paltiing para iti intero a Simbaan. Iggemna “dagiti tulbek ti pagarian,” kayatna a sawen nga addaan isuna iti turay wenno awtoridad a mangiturong iti intero a Simbaan ken pagarian ti Dios iti daga, agraman ti panangimaton kadagiti ordinansa iti priesthood (kitaen iti Mateo 16:19). Awan ti tao malaksid iti napili a propeta ken Presidente a mabalin nga umawat iti pagayatan ti Dios para iti intero a miembro ti Simbaan. Kinuna ti Apo, “Awanto iti kaano man malaksid iti maysa iti daga iti kanito a maitalek daytoy a bileg ken dagiti tulbek ti kinasaserdote” (DkK 132:7). Ti Presidente ti Simbaan ket tulongan dagiti mamagbagana iti Umuna a Panguluen ken dagiti kameng ti Korum dagiti Sangapulo-ket-dua, nga isuda pay dagiti propeta, mammadto, ken mammaltiing.
Nasken nga aramidentayo dagita a banag nga ibaga dagiti propeta nga aramidentayo. Kinuna ni Presidente Wilford Woodruff a saan iti kaano man a mapalugodan ti maysa a propeta a mangyaw-awan iti Simbaan:
“Ti Apo ket dinakto kaano man palubosan wenno ti asino man a naawagan nga agbalin a Presidente daytoy a Simbaan tapno mangyaw-awan kadakayo. Saanto a mapasamak daytoy. Saan a kapanunotan daytoy ti Dios. No gandatek nga aramiden dayta [mangyaw-awan kadakayo], ikkatennak ti Apo iti saadko kas Presidente ti Simbaan” (Teachings of Presidents of the Church: Wilford Woodruff [2004], 199).
-
Iti ania a wagas nga inimpluensiaan iti sibibiag a propeta ti Simbaan?
Nasken a Kanunongantayo ti Propeta ti Apo
-
Ania ti maaramidtayo tapno masurot ken makanunongantayo ti propeta?
Para iti adu a tao nalaklaka a mamatida kadagiti propeta iti napalabas. Ngem dakdakkel nga amang a mamati ken sumurottayo iti sibibiag a propepta. Ingatotayo dagiti imatayo a mangkanunong iti Presidente ti Simbaan kas propeta, mammadto, ken mammaltiing.
Kasano a makanunongantayo ti propeta? Nasken nga ikararagantayo isuna. Nadagsen dagiti parikutna, ket kasapulanna ti mapapigsa babaen kadagiti kararag dagiti Santo.
Nasken nga adalentayo dagiti balikasna. Mabalintayo ti dumngeg kadagiti bitlana iti komperensia. Mabalintayo pay ti agsuskribir iti Ensign wenno Liahona tapno mabasatayo dagiti bitlana iti komperensia ken ti dadduma pay a mensahe nga itedna.
Nasken a surotentayo a naan-anay dagiti naparegta a pannursurona. Nasken a saantayo a pilien ti parte ti naparegta a mensahena ken saan a pagan-ano dayta saan a makaay-ayo wenno narigat. Binilinnatayo ti Apo a mangsurot kadagiti naparegta a pannursuro dagiti propetana.
“Imdengamto amin a balikas ken bilbilin [dagiti propetana] nga itednanto kenka bayat ti panangawatna kadakuada, a magna iti amin a kinasanto iti imatangko;
“Ta maawatmonto ti balikasna, a kasla agtaud iti ngiwatko, iti amin a kinaanus ken pammati” (DkK 21:4–5).
Ti Apo ket dinanto ipalubos iti kaano man ti Presidente ti Simbaan a mangyaw-awan kadatayo.
-
Ania ti insuro wenno inyunay-unay ti Presidente ti Simbaan itay kallabes?
Umawattayo kadagiti Naindaklan a Bendision No Agtungpaltayo iti Propeta
No agtungpaltayo, ikari ti Apo, “Saanto nga agballigi kenka dagiti ruangan ti impierno; wen, ket paksiatento ti Apo a Dios dagiti bileg ti kasipngetan iti imatangmo, ket padayyegennanto dagiti langit nga agpaay iti pagimbagam, ken iti dayag ti naganna” (DkK 21:6). No aramidentayo kas iti ibilin ti propetatayo, maibukbok dagiti bendision manipud iti langit.
Tapno agtalinaed kas pudno a Simbaan, nasken a ti pudno a Simbaan ket “nabangon iti rabaw ti simiento dagiti apostol ken dagiti mammadto, ket ni Jesucristo met laeng ti bato a nangnangruna ti iking” (Taga Efeso 2:20). Naparaburantayo iti daytoy saan a natalged a lubong nga addaantayo iti maysa a propeta a babaen kenkuana ipalgak ti Apo ti pagayatanna.
-
Ania dagiti padas a napasaram idi nagtungpalka iti balakad ti propeta?
Dagiti Mainayon a Nasantuan a Kasuratan
-
Numeros 12:6 (agsao ti Dios babaen kadagiti propeta)
-
1 Samuel 9:9 (ti propeta naawagan a mammadto)
-
Amos 3:7 (ipalgak ti Dios dagiti palimedna kadagiti propeta)
-
Mosiah 8:16–18 (ti mammadto maammuanna dagiti banag a napalabas ken dagiti banag nga umay)
-
Lucas 1:70 (agsao ti Dios babaen kadagiti propeta)
-
DkK 45:10, 15 (agsao ti Dios ita kas kadagidi aldaw a nagkauna)
-
1 Nephi 22:2 (babaen iti Espiritu maipakaammo dagiti banag kadagiti propeta)
-
DkK 68:3–5 (no agsao dagiti katulongan ti Apo no tignayen ida ti Espiritu Santo, daytoy ti panunot, pagayatan, ken timek ti Apo)
-
DkK 107:65–67, 91–92 (dagiti pagrebbengan ti Presidente ti Simbaan)
-
DkK 43:1–7 (ti laeng propeta ti adda turayna nga umawat kadagiti paltiing para iti Simbaan)
Joseph Smith
Brigham Young
John Taylor
Wilford Woodruff
Lorenzo Snow
Joseph F. Smith
Heber J. Grant
George Albert Smith
David O. McKay
Joseph Fielding Smith
Harold B. Lee
Spencer W. Kimball
Ezra Taft Benson
Howard W. Hunter
Gordon B. Hinckley
Thomas S. Monson