Dagiti Libro ken Adalen
Kapitulo 4: Wayawaya a Pumili

Wayawaya a Pumili

Kapitulo 4

Man standing at crossroads

Ti Kinawaya nga Agpili ket Maysa nga Agnanayon a Pagbatayan

  • No saludsoden kenka ti maysa a tao no apay a napateg ti maaddaan iti kinawaya nga agpili, ania koma ti masaom?

“Siwawayaka a mangpili iti kayatmo, ta naited kenka” (Moises 3:17).

Imbaga ti Dios kadatayo babaen kadagiti propetana a nawayatayo nga agpili iti nagbaetan ti nasayaat ken dakes. Mabalintayo a pilien ti wayawaya ken agnanayon a biag babaen ti panangsurot ken ni Jesucristo. Mabalintayo met a pilien ti pannakabalud ken ipapatay babaen ti panangsurot ken ni Satanas. (Kitaen iti 2 Nephi 2:27.) Ti karbengan a pumili iti nagbaetan ti nasayaat ken dakes ken panagtignay para iti bagbagitayo ket maawagan iti kinawaya nga agpili.

Iti biagtayo sakbay daytoy a biag naaddaantayo iti kinawaya nga agpili a mainaig iti nadalus ken nalinteg a panagbiag. Maysa a panggep ti biag iti daga ket tapno ipakita no ania dagiti pili nga aramidentayonto (kitaen iti 2 Nephi 2:15–16). No napilittayo nga agpili iti rumbeng, ditayo koma kabaelan nga ipakita no ania ti pilientayo para iti bagbagitayo. Kasta met a, naragragsaktayo iti panagaramid kadagiti banag no inaramidtayo dagiti bukodtayo a pili.

Ti kinawaya nga agpili ket maysa kadagiti kapatgan wenno kangrunaan a napagsasaritaan iti Konseho idiay Langit sakbay daytoy a biag. Maysa daytoy kadagiti kangrunaan a gapu ti panagsusupiat dagiti pasurot ni Cristo ken dagiti pasurot ni Satanas. Kinuna ni Satanas, “Adtoy, adtoyak, ibaonnak, siakto ti anakmo, ken subbotekto amin a sangkataw-an, tapno awan ti mapukaw nga uray no maysa a kararua, ket awan duadua nga aramidek, gapuna itdem ti panagraemmo” (Moises 4:1). Iti panangisaona iti daytoy, isu ket “immalsa iti [Dios] ket pinanggepna a dadaelen ti kinawaya ti tao nga agpili” (Moises 4:3). Saan a naawat ti indiayana, ket napatapuak isuna iti ruar ti langit a kaduana dagiti pasurotna (kitaen iti DkK 29:36–37).

Ti Kinawaya nga Agpili ket Napateg a Paset ti Plano ti Pannakaisalakan

Ti kinawaya nga agpili ket aramidenna ti biagtayo iti daga a panawen ti pannakasubok. Idi agplamplano iti mortal a panagparsua kadagiti annakna, kinuna ti Dios, “Subokentayo [suoten] ida babaen daytoy, ta kitaentayo no aramidenda amin a banag nga ibilin kadakuada ti Apo a Diosda” (Abraham 3:25). No awan ti sagut ti kinawaya nga agpili, ditayo koma kabaelan nga ipakita iti Nailangitan nga Amatayo no aramidentayo met laeng ti amin nga imbilinna kadatayo. Gapu ta kabaelantayo ti agpili, datayo ti agsungbat para kadagiti aramidtayo (kitaen iti Helaman 14:30–31).

No pilientayo ti agbiag a mayannurot iti plano ti Dios para kadatayo, mapatibker ti kinawayatayo nga agpili. Dagiti umno a pili ket mangpapigsa iti kabaelantayo nga agaramid iti ad-adu pay nga umno a pili.

Bayat ti panagtungpaltayo iti tunggal maysa kadagiti bilin ti Amatayo, dumur-astayo iti sirib ken pigsa iti kinatao. Dumakkel ti pammatitayo. Agbalin a nalaklakatayo nga agaramid kadagiti umno a pili.

Rinugiantayo a nagaramid kadagiti pili kas espiritu nga annak iti sidong ti Nailangitan nga Amatayo. Dagiti pilitayo idiay ti nangpabalin iti pannakaikaritayo nga umay iti daga. Kayat ti Nailangitan nga Amatayo a dumur-astayo iti pammati, pannakaikari, sirib, ken amin a dadduma pay a banag. No agtungpaltayo kadagiti bilinna ken agaramid kadagiti umno a pili, masursuro ken maawatantayonto. Agbalintayonto a kas Kenkuana. (Kitaen iti DkK 93:28.)

  • Kasano a ti panagaramid kadagiti umno a pili ket makatulong kadatayo nga agaramid iti ad-adu pay nga umno a pili?

Agkasapulan ti Kinawaya nga Agpili nga Adda Pili

  • Apay a napateg ti pagsusupadian?

Ditayo makapili iti kinalinteg malaksid no maikabil iti sangotayo dagiti pagsusupadian ti nasayaat ken dakes. Ni Lehi, ti naindaklan a propeta iti Libro ni Mormon, imbagana iti anakna a ni Jacob a tapno maipatungpal dagiti agnanayon a panggep ti Dios, nasken nga adda “pagsusupadian iti amin a banag. No saan a kasta, … saan a maipatungpal ti kinalinteg, wenno ti kinadangkes, wenno ti kinasanto wenno kinarigat, wenno imbag ken dakes” (2 Nephi 2:11).

Palugodan ti Dios ni Satanas a mangsupiat iti naimbag. Kinuna ti Dios maipapan ken ni Satanas:

“Imbilinko a nasken a mapapanaw;

“Ket nagbalin a Satanas, wen, nga isu ti sairo, ti ama ti amin a kinaulbod, a mangallilaw ken mangbulsek kadagiti tao, ken mangitunda kadakuada a balud iti pagayatanna, a kas iti kaadu dagiti saan a dumngeg iti timekko” (Moises 4:3–4).

Aramiden ni Satanas ti amin a kabaelanna a mangdadael iti aramid ti Dios. Kalikagumanna “ti pagladingitan ti amin a tao. … kalikagumanna ti pannakaitebbang ti amin a tao a kas kenkuana” (2 Nephi 2:18, 27). Saannatayo nga ay-ayaten. Saanna a kayat ti ania man a nasayaat a banag para kadatayo (kitaen iti Moroni 7:17). Saanna a kayat nga agragsaktayo. Kayatnatayo a pagbalinen nga adipenna. Agusar iti adu a panglimlimo tapno maadipennatayo.

No surotentayo dagiti pannulisog ni Satanas, mapabassittayo dagiti pilitayo. Isingasing ti sumaganad a pagarigan no kasano a maipatungpal daytoy. Ipapanmo a nakakitaka iti maysa a karatula iti igid ti baybay a mabasa: “Peggad—alinuno. Maiparit ti aglangoy ditoy.” Mabalin a panunotentayo a maysa daytoy a panagiget. Ngem panagiget kadi daytoy? Adu pay la dagiti pilitayo. Nawayatayo nga aglangoy iti sadino man a lugar. Nawayatayo a magna iti igid ti baybay ket agpidut kadagiti butbutiki. Nawayatayo a mangbuya iti panaglennek ti init. Nawayatayo nga agawid. Nawayatayo pay a di mangikankano iti katarula ket aglangoytayo iti napeggad a lugar. Ngem apaman a maalanatayo ti alinuno ket alun-unennatayo, bassit unay dagiti pilitayo. Mabalintayo a padasen ti aglibas, wenno mabalintayo ti umawag iti tulong, ngem mabalin a malmestayo.

Nupay nawayatayo nga agpili kadagiti aramidtayo, saantayo a nawaya nga agpili kadagiti bunga dagiti aramidtayo. Sumaruno dagiti bunga, nasayaat man wenno dakes, kas gagangay a resulta ti ania man a pili nga aramidentayo (kitaen iti Taga Galacia 6:7; Apocalipsis 22:12).

Imbaga kadatayo ti Nailangitan nga Ama no kasano a malibasan ti pammalud ni Satanas. Nasken nga agannad ken agkararagtayo a kanayon, nga agdawdawat iti Dios a tulongannatayo a mangsarked kadagiti pannulisog ni Satanas (kitaen iti 3 Nephi 18:15). Saanto a palugodan ti Nailangitan nga Amatayo a masulisogtayo iti nalablabes pay ngem iti kabaelantayo a mangkedked (kitaen iti 1 Taga Corinto 10:13; Alma 13:28).

Dagiti bilin ti Dios ket yadayonatayo iti peggad ken iturongnatayo iti agnanayon a biag. Babaen ti nainsiriban a panagpilitayo, magun-odtayonto ti pannakaitan-ok, dumur-as iti agnanayon, ken mangsagrap iti naan-anay a ragsak (kitaen iti 2 Nephi 2:27–28).

  • Ania dagiti sumagmamano a pagarigan dagiti aramid a mangpabassit kadagiti pilitayo? Ania dagiti sumagmamano a pagarigan dagiti aramid a mangted kadatayo iti ad-adu a wayawaya?

Dagiti Mainayon a Nasantuan a Kasuratan