Dagiti Apagkapullo ken Daton

Kapitulo 32

Panagbayad iti Apagkapullo ken Daton

• Kasano nga ipakita ti kinatallugodtayo nga agbayad kadagiti apagkapullo ken daton ti panagyamantayo iti Nailangitan nga Amatayo iti amin a bendisionna kadatayo?

Naikkantayo kadagiti bilin a tumulong kadatayo nga agsagana iti tunggal wagas tapno makapagnaed iti sidong ti Nailangitan nga Amatayo. Inikkannatayo iti maysa a wagas a makapagyaman Kenkuana kadagiti bendisiontayo. Ti sitatallugod a panagbayad kadagiti apagkapullo ken daton ket maysa a wagas a pakapagyamanantayo Kenkuana. Bayat ti panagbayadtayo kadagitoy a daton, ipakitatayo nga ay-ayatentayo Isuna ken agtungpaltayonto iti balakadna.

• Iti ania a wagas a matulongannatayo ti panagbayad kadagiti apagkapullo ken daton nga agyaman iti Nailangitan nga Amatayo?

Panagtungpal iti Linteg ti Apagkapullo

• Ania ti napudno nga apagkapullo?

Para kadagiti mannursuro: Agusarkayo kadagiti saludsod iti rugi ti maysa a benneg tapno mangirugi iti maysa a panaglilinnawag ket iturongyo dagiti miembro ti klase wenno miembro ti pamilia iti teksto a mangsapul iti ad-adu pay nga impormasion. Agusarkayo kadagiti saludsod iti gibus ti benneg tapno matulongan dagiti miembro ti klase wenno miembro ti pamilia a mangutob ken mangilawlawag iti kaipapanan ti nabasada ket yaplikarda daytoy iti biagda.

Idi punganay, tinungpal da Abraham ken Jacob ti bilin nga agbayadda iti apagkapullo ti matgedanda (kitaen iti Hebreo 7:1–10; Genesis 14:19–20; 28:20–22).

Kadagiti kabaruanan a panawen inkararag ni Propeta Joseph Smith, “O Apo, ipakitam kadagiti katulongam no mano ti dawatem nga apagkapullo kadagiti sanikua dagiti taom” (DkK 119, pakauna ti benneg). Insungbat ti Apo: “Daytoyto ti pangrugian ti pannangted dagiti taok iti apagkapullo. Ket kalpasan dayta, amin dagiti nangted iti apagkapullo agbayaddanto iti apagkapullo ti amin a matgedanda iti tinawen; ket daytoyton ti masurot a paglintegan iti agnanayon” (DkK 119:3–4). Inlawlawag ti Umuna a Panguluen a ti “apagkapullo ti amin a matgedanda iti tinawen” ket maiturong iti nasapulantayo (kitaen ti surat ti Umuna a Panguluen, Mar. 19, 1970).

No agbayadtayo iti apagkapullo ipakitatayo ti kinapudnotayo iti Apo. Isurotayo pay kadagiti annaktayo ti kinapateg daytoy a linteg. Kayatdanto a suroten ti pagwadantayo ket bayadanda ti apagkapullo iti ania man a kuarta nga awatenda.

• Iti ania a wagas a ti apagkapullo ket ad-adda pay a maysa a pagbatayan ti pammati ngem maysa a pagbatayan maipapan iti kuarta?

• Ania ti maaramid dagiti nagannak tapno maisuroda dagiti annakda nga agbayad iti apagkapullo ket maawatanda ti kinapateg daytoy?

Nasken a Mangtedtayo a Sitatallugod

• Apay a napateg ti ugalitayo iti panagbayadtayo iti apagkapullo?

Napateg ti mangted a sitatallugod. “No agbayad ti maysa a tao iti apagkapullona a saan a naragsak matakawan isuna iti paset ti bendision. Nasken a sursuruenna ti mangted a siraragsak, sitatallugod ken sirarag-o, ket mabendisionanto ti sagutna” (Stephen L Richards, The Law of Tithing [polieto, 1983], 8).

Insuro ni Apostol Pablo a no kasano ti panangtedtayo kasta met ti kapateg ti itedtayo. Kinunana, “Tunggal maysa itdenna koma ti pinanggepna iti pusona; saan nga iti dakes a nakem wenno mapilpilit; ta ti Dios ayatenna ti mangted a siaayat” (2 Taga Corinto 9:7).

• Ania ti kaipapanan kenka ti “mangted a siaayat”?

Apagkapullo ken dagiti Dadduma pay a Daton

• Iti ania a wagwagas a pangus-usaran ti Simbaan kadagiti pondo ti apagkapullo ken dadduma pay a daton?

Kas miembro ti Simbaan, mangtedtayo iti apagkapullo ken dadduma pay a daton iti Apo.

Apagkapullo

Usaren ti Simbaan ti apagkapullo para iti adu a panggep. Sumagmamano kadagitoy ket tapno:

1. Maipatakder, mapagtalinaed, ken maimatonan dagiti templo, balay a pagmimitingan, ken dadduma pay a pasdek.

2. Maited dagiti pangimaton a pondo para kadagiti stake, ward, ken dadduma pay a yunit ti Simbaan. (Agus-usar dagitoy a yunit kadagiti pondo tapno maipatungpalda dagiti programa a mainaig iti Simbaan, a pakairamanan ti panangisuro iti ebanghelio ken panangimaton kadagiti aktibidad a paglalangenan.)

3. Matulongan ti programa ti misionario.

4. Mapaadal dagiti agtutubo kadagiti eskuela, seminary, ken institute ti Simbaan.

5. Maiprenta ken maiwaras dagiti material nga adalen.

6. Tumulong iti family history ken aramid iti templo.

Dagiti Dadduma pay a Daton

Dagiti Daton iti Panagayuno. Agayuno dagiti miembro ti Simbaan iti tunggal bulan babaen ti saan a pannangan ken yiinum iti dua nga agsaruno a pannangan. Yabuloyda uray laeng ti gatad ti kuarta a nagastosda koma para kadagiti pannangan. Mabalinda ti mangted a siwawadwad agingga a kabaelanda. Maawagan daytoy a daton iti daton iti panagayuno. Aramaten dagiti bishop dagitoy a daton iti panagayuno a mangipaay iti taraon, pagtaengan, aruaten, ken tulong a pagpaagas para kadagiti agkasapulan. (Kitaen ti kapitulo 25 iti daytoy a libro.)

Kas paset ti aldaw a panagayuno, dumar-ay dagiti miembro iti miting a maawagan iti miting ti panagayuno ken panagpaneknek, a pangibinglayanda iti tunggal maysa iti pammaneknekda maipapan ken ni Jesucristo ken ti ebangheliona.

Dagiti Dadduma pay a Donasion. Mabalin a mangted iti donasion dagiti miembro ti Simbaan para kadagiti dadduma pay nga aramid ti Simbaan, a kas iti aramid ti misionario, ti Perpetual Education Fund, pangpatakder ti templo, ken tulong nga agpaay iti tao.

Panagserbi. Ipaay pay dagiti miembro ti panawen, paglaingan, ken sanikuada a pangtulong kadagiti dadduma. Daytoy a panagserbi ti mangpalugod iti Simbaan a mangtulong kadagiti miembro ken saan a miembro iti intero a lubong, kadagiti lebel ti komunidad, sangailian ken sangalubongan, nangnangruna no mapasamak dagiti didigra.

Mabendisionantayo No Mangtedtayo kadagiti Apagkapullo ken Daton

Ikari kadatayo ti Apo a bendisionannatayo bayat ti panagbayadtayo a sipupudno kadagiti apagkapullo ken datontayo. Kinunana, “Yegyo ti amin nga apagkapullo iti kamalig, tapno adda koma taraon iti balayko, ket padasendak ita iti daytoy … no siak diakto luktan kadakayo dagiti tawtawa ti langit, ket ibuyatkonto kadakayo ti bendision, nga awanto ti lugar a makalaon nga umawat” (Malakias 3:10).

Ibaga kadatayo ti paltiing iti ud-udina nga aldaw maipapan iti sabali pay a bendision para kadagiti agbayad iti apagkapullo: “Pudno nga isu ti aldaw ti panagsakripisio, ken aldaw a pannangted iti apagkapullo dagiti taok; ta isu a nangted iti apagkapullo saanto a mapuoran iti yaayna” (DkK 64:23).

Dagiti bendision a naikari kadatayo ket agpada a naindagaan ken naespirituan. No mangtedtayo a sitatallugod, tulongannatayo ti Nailangitan nga Ama a mangipaay kadagiti inaldaw a kasapulantayo a taraon, aruaten, ken pagtaengan. Iti panagsaritana kadagiti Santo iti Ud-udina nga Aldaw iti Pilipinas, kinuna ni Presidente Gordon B. Hinckley a no dagiti tao “awatenda ti ebanghelio ket tungpalenda daytoy, agbayadda kadagiti apagkapullo ken datonda, uray bassit laeng dagidiay, tungpalento ti Apo ti nagkauna a karina para kadakuada, ket maaddaandanto iti taraon ken aruaten ken pagtaenganda. Diak makakita iti sabali pay a pangrisut. Kasapulanda ti maysa a bileg a dakdakkel pay ngem iti ania man a naindagaan a bileg a mangitag-ay ken tumulong kadakuada” (“Inspirational Thoughts,” Ensign, Ago. 1997, 7). Tulongannatayto pay ti Apo a dumur-as “iti pannakaammo maipapan iti Dios, ken iti pammaneknek, ken iti bileg a mangtungpal iti ebanghelio ken mangparegta kadagiti pamiliatayo a mangaramid met iti kasta” (Teachings of Presidents of the Church: Heber J. Grant [2002], 124).

Mabendisionan iti nawadwad dagiti agbayad kadagiti apagkapullo ken datonda. Addaanda iti nasayaat a rikna ta tumultulongda a mangipasdek iti pagarian ti Dios iti daga.

• Ania dagiti sumagmamano a bendision a naawatmon, dagiti miembro ti pamiliam, wenno dagiti gagayyemmo babaen ti panagbayad iti apagkapullo ken dadduma pay a daton?

Dagiti Mainayon a Nasantuan a Kasuratan

• DkK 119:1–4 (ti linteg ti panagayuno)

• Genesis 14:18–20; Alma 13:13–16 (nagbayad ni Abraham iti apagkapullo)