Dagiti Libro ken Adalen
Kapitulo 7: Ti Espiritu Santo

Ti Espiritu Santo

Kapitulo 7

Immay ti Espiritu Santo kada Adan ken Eva

  • Apay a kinasapulan da Adan ken Eva ti pannarabay ti Espiritu Santo?

Kalpasan a pimmanaw da Adan ken Eva iti Minuyongan ti Eden, nangrugida a sinukay ti daga ken nagtrabahoda iti dadduma pay nga aramid para iti pagbiagda. Naaddaanda iti adu nga annak, ket nagasawa dagiti annakda a lallaki ken babbai ket naaddaanda iti annak (kitaen iti Moises 5:1–3). Ngarud, nangrugi a pimmanaw dagiti espiritu nga annak ti Nailangitan nga Amatayo iti sidongna tapno umayda iti daga kas iti naikarin kadakuada (kitaen iti Abraham 3:24–25). Bayat ti yaayda iti daga, naala manipud kadakuada ti lagip maipapan iti nailangitan a pagtaenganda. Ngem saan nga impaidam ti Amatayo kadakuada ti impluensiana. Imbaonna ti Espiritu Santo a mangliwliwa ken mangtulong ken mangtarabay iti amin nga espiritu nga annakna.

Inawagan da Adan ken Eva ti Nailangitan nga Ama iti kararag. Kinasaona ida ken inikkanna ida kadagiti bilin, a tinungpalda. Immay ti anghel ti Apo ken insurona kada Adan ken Eva ti plano ti pannakaisalakan. Imbaon ti Apo ti Espiritu Santo a mamaneknek maipapan iti Ama ken iti Anak ken mangisuro kada Adan ken Eva iti ebanghelio. (Kitaen iti Moises 5:4–9.)

Babaen ti bileg ti Espiritu Santo, ni Adan “rinugianna ti nagipadto maipanggep kadagiti kaamaan iti daga, a kinunana: Madaydayaw koma ti nagan ti Dios, ta gapu iti panaglabsingko nalukatan dagiti matak, ken maaddaanak iti rag-o iti daytoy a biag, ket manen iti lasag makitakto ti Dios” (Moises 5:10). Gapu iti panagpaneknek ti Espiritu Santo ken ni Eva, kinunana, “No saan a gapu iti panaglabsingmi saankami koma a naaddaan iti bukel [annak], ket pulos koma a dimi naammuan ti naimbag ken dakes, ken ti rag-o iti pannakasubbotmi, ken ti agnanayon a biag nga ited ti Dios kadagiti amin a managtungpal” (Moises 5:11).

  • Kasano a maipada ti panagkasapulantayo iti pannarabay manipud iti Espiritu Santo iti panagkasapulan iti pannarabay da Adan ken Eva?

Dagiti Kababalin ti Espiritu Santo

  • Kasano a maigiddiat ti Espiritu Santo iti Ama ken iti Anak? Apay a napateg kadatayo dayta a paggidiatan?

Ti Espiritu Santo ket maysa a miembro ti Kinadios [Godhead] (kitaen iti 1 Juan 5:7; DkK 20:28). Isu ti “kinatao ti Espiritu” (DkK 130:22). Mabalin nga adda iti maysa a lugar iti maysa a panawen, ngem mabalin nga adda ti impluensiana iti amin a lugar iti isu met la a panawen.

Ti Nailangitan nga Ama, ni Jesucristo, ken ti Espiritu Santo ket maawagan iti Kinadios. Agkaykaysada iti panggep. Addaan ti tunggal maysa iti napateg a naituding nga aramiden iti plano ti pannakaisalakan. Ti Nailangitan nga Amatayo ket isu ti Amatayo ken agturay. Ni Jesucristo isu ti Mangisalakantayo. Ti Espiritu Santo ket isu ti mammaltiing ken mamaneknek ti amin a kinapudno.

Ti Espiritu Santo ket isu ti mensahero ti Nailangitan nga Amatayo ken isu ti naisangsangayan a sagut kadatayo (kitaen iti kapitulo 21 iti daytoy a libro).

Ti Mision ti Espiritu Santo

  • Ania ti sumagmamano kadagiti kinapudno nga ipalgak ti Espiritu Santo kadatayo?

Ti mision ti Espiritu Santo ket mamaneknek maipapan iti Ama ken iti Anak ken maipapan iti kinapudno ti amin a banag.

Ipaneknekto kadatayo ti Espiritu Santo a ni Jesus ti Mangisalakan ken Mannubbottayo (kitaen iti 3 Nephi 28:11; DkK 20:27). Ipalgaknanto kadatayo a ti Nailangitan nga Amatayo ti Ama dagiti espiritutayo. Tulongannatayonto a makaawat a makapagbalintayo a naitan-ok kas iti Nailangitan nga Amatayo. (Kitaen iti Taga Roma 8:16–17.) Inkari dagiti propeta ti Apo, “Babaen ti pannakabalin ti Espiritu Santo maammuanyo ti kinapudno ti amin a banag” (Moroni 10:5).

No awan ti Espiritu Santo, ditayo maammuan a ni Jesus ti Cristo. Insurat ni Apostol Pablo, “Awan ti makabalin nga agsao a ni Jesus isu ti Apo, no di babaen ti Espiritu Santo” (1 Taga Corinto 12:3). Kinuna ti Mangisalakan Mismo, “Daytoy ti biag nga agnanayon, a maammuandaka koma a maymaysa a pudno a Dios, ken ni Jesucristo nga imbaonmo” (Juan 17:3). Iti pannakabalin ti Espiritu Santo a maiturongtayo nga umawat ken agtungpal iti ebanghelio ni Jesucristo.

Ti makaallukoy a pannakabalin ti Espiritu Santo ket naindaklan unay tapno awan duadua a pudno ti ipalpalgakna. Inlawlawag ni Presidente Joseph Fielding Smith:

“No addaan ti tao iti parangarang manipud iti Espiritu Santo, mangibati daytoy iti agnanayon a parikna iti kararuana, maysa a saan a nalaka a malipatan. Daytoy ti Espiritu a makisasao iti espiritu ti tao, ken umay daytoy nga addaan iti makaallukoy a bileg. Ti parangarang ti maysa nga anghel, wenno uray pay ti Anak ti Dios mismo, ket mangiparikna iti mata ken panunot, ken in-inut nga agkudrep, ngem dagiti parikna ti Espiritu Santo ket sumlep iti kaunggan ti kararua ken narigrigat a malipatan” (Answers to Gospel Questions, comp. Joseph Fielding Smith Jr., 5 vols. [1957–66], 2:151).

Kinuna pay ni Presidente Smith, “Babaen iti Espiritu Santo ti kinapudno ket kasla panait a mayabel iti tunggal paset ti bagi tapno saan a malipatan” (Doctrines of Salvation, comp. Bruce R. McConkie, 3 vols. [1954–56], 1:48).

Kas miembro ti Ti Simbaan ni Jesucristo dagiti Santo iti Ud-udina nga Aldaw, nasken a pagbalinentayo dagiti bagitayo a maikari nga umawat iti daytoy naisangsangayan a mensahero ken saksi ti Nailangitan nga Amatayo ken ni Jesucristo.

  • Panunotem maipapan kadagiti panawen idi tinulongannaka ti Espiritu Santo a dimmur-as iti pammaneknekmo. No maitutop, ibinglay ti sumagmamano kadagitoy a padas kadagiti miembro ti klase wenno miembro ti pamilia.

Dagiti Mainayon a Nasantuan a Kasuratan