Dagiti Libro ken Adalen
Kapitulo 35: Panagtungpal

Panagtungpal

Kapitulo 35

An angel appearing to Adam and Eve as they prepare to offer a lamb as a burnt offering. The illustration depicts the angel explaining to Adam and Eve that the animal sacrifice was symbolic of the sacrifice to be made by Jesus Christ.

Nasken nga Agtungpaltayo a Sitatallugod iti Dios

  • Ania ti pagdumaan a maaramid ti panagtungpal a sitatallugod imbes a saan a sitatallugod?

Idi adda ni Jesus iti daga, maysa nga abogado ti nagsaludsod Kenkuana:

“Mannursuro, ania ti dakkel a bilin iti linteg?

“Ni Jesus kinunana kenkuana, Ayatem ti Apo a Diosmo iti amin a pusom, ken iti amin a kararuam, ken iti amin nga isipmo.

“Daytoy isu ti umuna ken dakkel a bilin.

“Ket ti maikadua isu ti umasping kenkuana, Ayatem ti padam a tao a kas iti bagim.

“Kadagitoy dua a bilin mapukpok amin a linteg ken ti sinao dagiti mammadto” (Mateo 22:36–40).

Masursurotayo manipud kadagitoy a nasantuan a kasuratan no kasano ti kinapateg para kadatayo ti mangayat iti Apo ken dagiti padatayo a tao. Ngem kasano nga ipakitatayo ti panagayattayo para iti Apo?

Sinungbatan ni Jesus daytoy a saludsod idi kinunana, “Ti addaan kadagiti bilbilinko ket tungpalenna ida, isu dayta ti agayat kaniak: ket ti agayat kaniak, ayatento ni Amak” (Juan 14:21).

Tunggal maysa kadatayo ket nasken a saludsodentayo iti bagbagitayo no apay a tungpalentayo dagiti bilin ti Dios. Gapu kadi ta mabutengtayo iti pannusa? Gapu kadi ta tarigagayantayo dagiti gunggona para iti panagbiag iti nalinteg a biag? Gapu kadi ta ay-ayatentayo ti Dios ken ni Jesucristo ket kayattayo ti agserbi Kadakuada?

Nasaysayaat ti agtungpal kadagiti bilin gapu ta mabutengtayo iti pannusa ngem ti saan a mangtungpal kadagitoy. Ngem naragragsaktayo no tungpalentayo ti Dios gapu ta ay-ayatentayo Isuna ken kayattayo a tungpalen Isuna. No tungpalentayo Isuna a siwawaya, bendisionannatayo a siwawaya. Kinunana, “Siak, ti Apo, … pagaayatko a padayawan dagiti agserbi kaniak iti kinalinteg ken iti kinapudno agingga iti panungpalan” (DkK 76:5). Tumulong pay kadatayo ti kinamanagtungpal a dumur-as ken agbalin nga ad-adda pay a kas iti Nailangitan nga Amatayo. Ngem dagiti awan ti ar-aramidenda agingga a mabilinda ket kalpasanna tungpalenda dagiti bilin a nga awanan iti panagtallugod ket mapukawda ti gunggonada (kitaen iti DkK 58:26–29).

  • Kasano a mapadakkeltayo ti tarigagaytayo nga agtungpal?

Mabalintayo ti Agtungpal a Ditayo Maawatan No Apay

  • Apay a saantayo kanayon a kasapulan a maawatan dagiti panggep ti Dios tapno agbalin a managtungpal?

Babaen ti panagtungpal kadagiti bilin ti Dios, agsagsaganatayo para iti agnanayon a biag ken pannakaitan-ok. No dadduma saantayo nga ammo ti gapu para iti maysa a masinunuo a bilin. Nupay kasta, ipakitatayo ti pammati ken panagtalektayo iti Dios no tungpalentayo Isuna a ditay ammo no apay.

Nabilin da Adan ken Eva a mangidaton kadagiti sakripisio iti Dios. Maysa nga aldaw nagparang ti maysa nga anghel ken ni Adan ket sinaludsodna no apay a nangidaton isuna kadagiti sakripisio. Insungbat ni Adan a dina ammo ti gapu. Inaramidna daytoy gapu ta binilin isuna ti Apo. (Kitaen iti Moises 5:5–6 ken ti ladawan iti daytoy a kapitulo.)

Kalpasanna insuro ti anghel ken ni Adan ti ebanghelio ket imbagana kenkuana ti maipapan iti Mangisalakan nga umayto. Limmukon ti Espiritu Santo ken ni Adan, ket namadto ni Adan maipapan kadagiti agindeg iti daga agingga iti maudi a kapupotan. (Kitaen iti Moises 5:7–10; DkK 107:56.) Immay daytoy a pannakaammo ken adu a bendision ken ni Adan gapu ta managtungpal isuna.

Mangisagananto ti Dios iti Wagas

Isalaysay kadatayo ti Libro ni Mormon nga immawat ni Nephi ken dagiti in-inauna a kabsatna a lallaki iti narigat unay a naituding nga aramiden manipud iti Apo (kitaen iti 1 Nephi 3:1–6). Nagreklamo dagiti kakabsat ni Nephi, a nagkunaanda a nagkiddaw ti Apo iti narigat a banag kadakuada. Ngem kinuna ni Nephi, “Mapanak ket aramidek dagiti banag nga imbilin ti Apo, ta ammok a saan nga ited ti Apo ti bilin kadagiti annak ti tao, malaksid no naisagananan ti wagas nga agpaay kadakuada a mangtungpal kadagiti banag nga imbilinna kadakuada” (1 Nephi 3:7). No marigatantayo nga agtungpal iti maysa a bilin ti Apo, nasken a lagipentayo dagiti balikas ni Nephi.

  • Kaano a nangisagana ti Apo iti maysa a wagas para kenka tapno matungpalmo Isuna?

Awan ti Bilin a Nalag-an Unay wenno Nadagsen Unay a Tungpalen

No dadduma ipapantayo a saan unay a napateg ti maysa a bilin. Isalaysay dagiti nasantuan a kasuratan ti maipapan iti maysa a tao nga agnagan iti Naaman a nagpanunot iti kasta a wagas. Naaddaan ni Naaman iti nakabutbuteng a sakit ket nagdaliasat manipud iti Siria a nagturong iti Israel tapno kiddawenna iti propeta Eliseo nga agasanna isuna. Napateg a tao ni Naaman iti bukodna a pagilian, isu a nabainan idi saan a ni Eliseo mismo ti nangsango kenkuana no di ket ti imbaonna a tagabona. Ad-adda pay a nabainan ni Naaman idi maawatna ti mensahe ni Naaman: agdigus iti maminpito a daras idiay karayan Jordan. “Saan aya a nasaysayaat [dagiti] karayan ti Damasco ngem dagiti isu amin a dandanum ti Israel? diak mabalin aya ti agdigus kadakuada, ken madalusan?” indawatna. Pimmanaw a siluluksaw. Ngem indawat kenkuana dagiti tagabona: “No ti mammadto binilinnaka a mangaramid iti maysa a dakkel a banag, isu ti dika kayat koma a tungpalen? di nasaysayaat ngarud, idinto a kunana kenka, Agdiguska, ken madalusanka?” Masirib ni Naaman tapno maawatanna a napateg ti agtungpal iti propeta ti Dios, uray no kasla bassit laeng a banag daytoy. Isu a nagdigus isuna iti Jordan ket naimbagan. (Kitaen iti 2 Ar-ari 5:1–14.)

No dadduma mabalin nga ipapantayo a narigat unay para kadatayo a tungpalen ti maysa a bilin. Kas kadagiti kakabsat ni Nephi, mabalin a kunaentayo, “Narigat a banag ti kidkiddawen kadatayo ti Dios.” Ngem, kas ken ni Nephi, masinunuotayo a dinatayo ikkan ti Dios iti bilin malaksid no mangisagana Isuna iti maysa a wagas para kadatayo tapno matungpal Isuna.

Maysa a “narigat a banag” idi imbilin ti Apo ken ni Abraham nga idatonna ti patpatgenna nga anak a ni Isaac a kas maysa a sakripisio (kitaen iti Genesis 22:1–13; kitaen met iti kapitulo 26 iti daytoy a libro). Naguray ni Abraham iti adu a tawen para ti pannakayanak ni Isaac, ti anak nga inkari ti Dios kenkuana. Kasano a mapukawna lattan ti anakna iti kasta a wagas? Mabalin a narigat unay para ken ni Abraham daytoy a bilin. Ngem pinilina ti agtungpal iti Dios.

Nasken a sitatallugodtayo met a mangaramid iti ania man a banag a kiddawen ti Dios. Kinuna ti Propeta Joseph Smith, “Inaramidko daytoy nga annurotek: No ibilin ti Apo, aramiden daytoy” (Teachings of Presidents of the Church: Joseph Smith [2007], 160). Mabalin nga annurotentayo met daytoy.

  • Kaano a nakaawatka kadagiti bendision a kas bunga ti panagtungpalmo kadagiti bilin a kasla babassit?

Tinungpal ni Jesucristo ti Amana

  • Ania a pagarigan ti umapay iti panunotmo no panunotem ni Jesucristo a mangtungtungpal iti Amana?

Ni Jesucristo ti naindaklan a pagwadan ti panagtungpal iti Nailangitan nga Amatayo. Kinunana, “Bimmabaak manipud langit, saan a tapno aramidek ti pagayatak, no di ti pagayatan ti nangibaon kaniak” (Juan 6:38). Ti sibubukel a biagna ket impaayna iti panagtungpal iti Amana; ngem saan a kanayon a nalaka daytoy para kenkuana. Nasulisog isuna iti amin a wagas a kas kadagiti dadduma a mortal (kitaen iti Hebreo 4:15). Iti Minuyongan ti Gethsemane, nagkararag Isuna a kinunana, O Amak, no mabalin lumabas koma kaniak daytoy a kopa: ngem saan a kas iti kayatko, no di ket kas iti kayatmo” (Mateo 26:39).

Gapu ta tinungpal ni Jesus ti pagayatan ti Ama iti amin a banag, inaramidna ti pannakaisalakan a posible para kadatayo amin.

  • Kasano a makatulong kadatayo nga agbalin a managtungpal ti pananglaglagip iti pagwadan ti Mangisalakan?

Dagiti Bunga ti Panagtungpal ken Panagsukir

  • Ania dagiti bunga ti panagtungpal wenno panagsukir kadagiti bilin ti Apo?

Ti pagarian ti langit ket iturayan ti paglintegan, ket no umawattayo iti ania man a bendision, babaen daytoy ti panagtungpal iti dayta a paglintegan a nakaibatayan dayta a bendision (kitaen iti DkK 130:20–21; 132:5). Imbaga kadatayo ti Apo a babaen ti kinamanagtungpal ken kinaganetget makagun-odtayo iti pannakaammo ken kinasaririt (kitaen iti DkK 130:18–19). Mabalintayo pay ti dumur-as a naespirituan (kitaen iti Jeremias 7:23–24). Iti sabali a bangir, mangyeg ti panagsukir iti pannakauppapay ken agbanag iti pannakapukaw dagiti bendision. “Asinoak, kuna ti Apo, a nagkari ket saan a tinungpal? Agbilinak ket saan nga agtungpal dagiti tao; mangwaswasak ket dida awaten ti bendision. Sa kunada iti puspusoda: Saan nga aramid ti Apo daytoy, ta saan a natungpal dagiti karina” (DkK 58:31–33).

No tungpalentayo dagiti bilin ti Dios, tungpalenna dagiti karina, a kas iti imbaga ni Ari Benjamin kadagiti taona: “Kalikagumanna nga aramidenyo ti imbilinna kadakayo; gapu ta no aramidenyo, bendisionannakayo a dagus” (Mosiah 2:24).

Magun-od dagiti Managtungpal ti Agnanayon a Biag

Ibalbalakad ti Apo kadatayo, “No tungpalem dagiti bilinko ken agibturka agingga iti panungpalan maaddaanka iti agnanayon a biag, a sagut a kapatgan iti amin a sagut ti Dios” (DkK 14:7).

Inladawan ti Apo dagiti dadduma pay a bendision a sumangbay kadagiti agtungpal Kenkuana iti kinalinteg ken kinapudno agingga iti panungpalan.

“Ta kastoy ti kinuna ti Apo—Siak, ti Apo, manangngaasiak ken managparaburak kadagiti agbuteng kaniak, ken pagaayatko a padayawan dagiti agserbi kaniak iti kinalinteg ken kinapudno agingga iti panungpalan.

“Naindaklanto ti gunggonada ken agnanayonto ti dayagda.

“Ket kadakuada ipalgakkonto amin a kinadatdatlag, wen, amin dagiti naitalimeng a kinadatdatlag ti pagariak manipud idi punganay, ken kadagiti tawen nga umay, ipakaammokto kadakuada ti naimbag a panggepko maipapan kadagiti amin a banag nga adda pakainaigan ti pagariaak.

“Wen, uray pay dagiti pagsidsiddaawan ti kinaagnanayon maammuandanto, ket ipakitakto kadakuada dagiti dumteng a banag, uray pay dagiti banag ti adu a kaputotan.

“Ket naindaklanto ti kinasiribda, ket tumuknonto iti langit ti pannakaawatda. …

“Ta lawlawagak ida babaen ti Espirituk, ken ipakaammok kadakuada dagiti palimed ti pagayatak babaen ti pannakabalinko—wen, uray pay dagiti banag a di pay nakita ti mata, wenno nangngeg ti lapayag, wenno di pay nakastrek iti puso ti tao” (DkK 76:5–10).

  • Ania ti kaipapanan kenka ti ragup dagiti balikas nga “agibtur agingga iti panungpalan”?

  • Ania ti mabalintayo nga aramiden tapno agtalinaed a napudno kadagiti pagbatayan ti ebanghelio uray no saan a nalatak nga aramiden ti kasta? Kasano a matulongantayo dagiti ubbing ken agtutubo nga agtalinaed a napudno kadagiti pagbatayan ti ebanghelio?

Dagiti Mainayon a Nasantuan a Kasuratan