Ti Panagparsua

Kapitulo 5

Plano ti Dios para Kadatayo

• Apay a kasapulan nga umaytayo iti daga?

Idi nakipagnaedtayo a kas espiritu nga annak kadagiti nailangitan a nagannaktayo, imbaga kadatayo ti Nailangitan nga Amatayo maipapan iti planona para kadatayo nga agbalin nga ad-adda pay a kas Kenkuana. Nagdir-itayo iti rag-o idi nangngegantayo ti planona (kitaen iti Job 38:7). Naggagartayo para kadagiti baro a padas. Tapno mapasamak dagitoy a banag, kinasapulantayo ti pumanaw iti sidong ti Amatayo ket umawat kadagiti mortal a bagi. Kinasapulantayo ti sabali pay a lugar a pagnaedan a pakapagsaganaantayo tapno agbalin a kas Kenkuana. Maawagan iti daga ti baro a pagtaengantayo.

• Apay iti panagkunam a nagdir-itayo iti rag-o idi naammuantayo maipapan iti plano ti pannakaisalakan?

Para kadagiti mannursuro: Mabalin a saan a marikna a nagin-awa iti panagbasa iti napigsa ti sumagmamano a miembro ti klase wenno miembro ti pamilia. Sakbay ti panagkiddaw kadakuada nga agbasa iti napigsa, mabalin a kayatmo a saludsoden ti, “Asino ti kayatyo nga agbasa?” Kalpasanna awagam ti tunggal maysa a nagboluntario.

Pinarsua ni Jesus ti Daga

Pinarsua ni Jesucristo daytoy a lubong ken amin a banag nga adda iti daytoy. Pinarsuana pay ti adu a dadduma pay a lubong. Inaramidna daytoy babaen ti pannakabalin ti priesthood, iti babaen ti panangiturong ti Nailangitan nga Amatayo. Kinuna ti Dios nga Ama, “Saan a mabilang dagiti lubong ti pinarsuak; … ket babaen iti Anak pinarsuak ida, nga isu ti Bugbugtongko” (Moises 1:33). Adda dagiti sabali pay a pammaneknek maipapan iti daytoy a kinapudno. Nakita da Joseph Smith ken Sidney Rigdon ni Jesucristo iti maysa a parmata. Impaneknekda “a babaen kenkuana, ken gapu kenkuana, ken kenkuana, mabukel ken nabukel dagiti lubong, ket nagbalin nga annak a lallaki ken babbai ti Dios dagiti agindeg kadagitoy” (DkK 76:24).

Panangipatungpal iti Panagparsua

• Ania dagiti panggep ti Panagparsua?

Ti daga ken amin a banag nga adda ditoy ket naparsua a naespirituan sakbay a naparsuada a naindagaan (kitaen iti Moises 3:5). Iti panangplanona a nangparsua iti naindagaan a lubong, kinuna ni Cristo kadagiti kimmadua Kenkuana, “Bumabatayo, ta adda lugar sadiay, … ket mangaramidtayo iti daga a pagtaengan dagitoy [dagiti espiritu nga annak ti Nailangitan nga Amatayo]” (Abraham 3:24).

Babaen ti panangiturong ti Ama, pinarsua ken binukel ni Cristo ti daga. Biningayna ti lawag manipud iti sipnget tapno mangaramid iti aldaw ken rabii. Pinarsuana ti init, bulan, ken dagiti bituen. Biningayna dagiti danum manipud iti namaga a daga tapno mangaramid kadagiti baybay, karayan, ken dan-aw. Inaramidna a napintas ken nabunga ti daga. Inaramidna ti ruot, kaykayo, sabsabong, ken dadduma pay a mula iti amin a kita. Naglaon dagitoy a mula kadagiti bukel a pakapagtubuan dagiti baro a mula. Kalpasanna pinarsuana dagiti ayup—ikan, baka, insekto, ken tumatayab iti amin a kita. Addaan dagitoy nga ayup iti kabaelan nga aganak iti bukodda a kita.

Ita nakasaganan ti daga para iti kaindaklan a pannakaparsua ti amin—sangkataw-an. Maikkan dagiti espiritutayo iti bagi nga addaan iti lasag ken dara tapno makapagbiagda iti daga. “Ket siak, a Dios, kinunak iti Bugbugtongko, a kaduak manipud pay idi punganay: Mangaramidta iti tao a kaing-ingasta, a kas iti kalanglangata; ket naaramid” (Moises 2:26). Ket iti kasta ti umuna a lalaki, ni Adan, ken ti umuna a babai, ni Eva, ket naparsua ken naikkanda iti bagi a kalanglanga ti bagi dagiti nailangitan a nagannaktayo. “Iti ladawan ti Dios pinarsuana; pinarsuana ida a lalaki ken babai” (Genesis 1:27). Idi nalpas ti Dios dagiti panagparsuana, naragsakan Isuna ken ammona a nasayaat ti aramidna, ket naginana iti maysa a panawen.

Mangipakita iti Ayat dagiti Pinarsua ti Dios

• Kasano nga ipakita dagiti pinarsua ti Dios nga Isu ket ay-ayatennatayo?

Agnanaedtayo itan iti daytoy napintas a lubong. Panunotem ti init, a mangmangted kadatayo iti bara ken lawag. Panunotem ti tudo, a mangpatubo kadagiti mula ken mangaramid iti lubong a makarikna iti nadalus ken nasadiwa. Panunotem no kasano ti kinasayaat a denggen ti maysa a tumatayab nga agkankanta wenno maysa a gayyem nga agkatkatawa. Panunotem no kasano ti kinakaskasdaaw dagiti bagitayo—no kasano a makapagtrabaho ken makapagay-ayam ken makapaginanatayo. No ibilangtayo amin dagitoy a pinarsua, mangrugi a maawatantayo nga anian a nagsirib, nagbileg, managayat a tao ni Jesucristo ken ti Nailangitan nga Amatayo. Impakitada ti naindaklan nga ayat para kadatayo babaen ti panangipaayda iti amin a kasapulantayo.

Naaramid met ti biag ti mula ken biag ti ayup tapno mangted rag-o kadatayo. Kinuna ti Apo, “Wen, amin a banag nga agtaud iti daga, iti panawenda, naaramidda para iti pagimbagan ken aramaten ti tao, agpada a mangparagsak iti mata ken mangparag-o iti puso; wen, para taraon ken para aruaten, ramanan ken lang-aben, a pangpapigsa iti bagi ken pangparegta iti kararua” (DkK 59:18–19). Nupay adu dagiti pinarsua ti Dios, am-ammo ken ay-ayatenna amin dagitoy. Kinunana, “Ammok ti bilang dagiti amin a banag, ta kukuak ida ken ammok ida” (Moises 1:35).

• Ania dagiti sumagmamano a banag a pagyamanam maipapan kadagiti pinarsua ti Dios?

Dagiti Mainayon a Nasantuan a Kasuratan

• Genesis 1; 2:1–7; Abraham 3:22–23; 4–5; Moises 1:27–42; 2–3 (dagiti pakaammuan maipapan iti Panagparsua)

• Hebreo 1:1–3; Taga Colosas 1:12–17; DkK 38:1–3 (ni Jesus a Namarsua)

• DkK 59:18–20; Moises 2:26–31; DkK 104:13–17; Mateo 6:25–26 (ipakita ti panagparsua ti ayat ti Dios)