Dagiti Libro ken Adalen
Kapitulo 28: Panagserbi

Panagserbi

Kapitulo 28

Jesus Christ with the twelve apostles. Christ (depicted wearing a white robe with a yellow sash), is kneeling before one of the apostles as He washes the feet of that apostle. The other eleven apostles are gathered around a table (having just completed the last supper). They are watching Christ. (John 13:1-20)

Kasano a Makapagserbitayo?

  • Panunotem ti maipapan kadagiti wagas a nakapagserbian dagiti tao kenka ken dagiti miembro ti pamiliam.

Kinuna ni Jesus, “Kadakayo siak ti kas la agserbi” (Lucas 22:27). Kas napudno a pasurot ni Jesus, nasken nga agserbitayo met kadagiti dadduma.

Ti panagserbi ket panangtulong kadagiti dadduma nga agkasapulan iti tulong. Ti panagserbi a kas iti panagserbi ni Cristo ket agtaud iti napudno a panagayat iti Mangisalakan ken addaan panangipateg ken pakaseknan kadagiti tao a nangtedanna kadatayo kadagiti gundaway ken pangiturong tapno tumulong. Nabilbileg ti panagayat ngem iti rikna; no ayatentayo dagiti dadduma, kayattayo a tulongan ida.

Nasken a sitatatallugodtayo amin nga agserbi, ania man ti matmatgedan, tawen, wenno saadtayo iti gimong. Adda dagiti tao a mamati a dagiti laeng napanglaw ken napakumbaba ti nasken nga agserbi. Ipagarup met dagiti dadduma a tao a dagiti laeng nabaknang ti nasken a mangipaay iti panagserbi. Ngem sabali ti insuro ni Jesus. Idi dinawat Kenkuana ti ina dagiti dua a disipulona a padayawanna dagiti annakna a lallaki iti pagarianna, insungbat ni Jesus, “Siasinoman nga agtarigagayto nga isu ti kadakkelan kadakayo, isunto ti agserbi kadakayo; ket ti siasinoman nga agayatto nga isu ti umuna kadakayo, isunto ti adipenyo” (Mateo 20:26–27).

Adu dagiti wagas tapno makapagserbi. Matulongantayo dagiti dadduma maipapan iti panagsalimetmet, pannakilangen, maipapan iti bagi ken naespirituan. Kas pagarigan, mabalintayo ti mangibinglay iti taraon wenno dadduma pay a banag kadagiti agkasapulan kadagitoy. Makatulongtayo kadagiti agkasapulan babaen ti panangted iti nawadwad a daton iti panagayuno. Mabalintayo ti makigayyem iti kasangsangpet a kaarrubatayo. Mabalintayo a mulaan ti minuyongan para iti maysa a nataenganen a tao wenno taripatuen ti maysa a masaksakit a tao. Mabalintayo nga isuro ti ebanghelio iti maysa a tao nga agbirbirok iti kinapudno wenno liwliwaen ti maysa a maladladingitan a tao.

Makaaramidtayo kadagiti babassit ken dadakkel a tignay ti panagserbi. Nasken a ditay kaano man mangliwat a tumulong iti maysa a tao gapu ta ditayo kabaelan ti agaramid kadagiti dadakkel a banag. Maysa a balo a babai ti nangisalaysay maipapan iti dua nga ubbing nga immay iti ruanganna apaman a nakasangpet isuna iti kabarbaro a pagnaedanna. Nangyeg kenkuana dagiti ubbing iti maysa a basket a naglaon iti taraon ken maysa a surat a mabasa ti, “No adda pangibaonanyo iti asino man kadakami, ayabannakami laeng.” Naragsakan ti balo a babai iti bassit a kinaimbag ket saanna iti kaano man a malipatan daytoy.

Nupay kasta, no dadduma, nasken nga agsakripisiotayo iti dakkel tapno makapagserbi iti maysa a tao. Inted ti Mangisalakan ti biagna iti panagserbina kadatayo.

  • Panunotem ti maipapan kadagiti tao iti pamiliam wenno iti komunidadmo nga agkasapulan maipapan iti panagsalimetmet, pannakilangen, mainaig iti bagi, wenno mainaig iti naespirituan. Utobem dagiti banag a maaramidmo a makapagserbi kadakuada.

Apay a Kayat ti Mangisalakan nga Agserbitayo kadagiti Dadduma

  • Apay a kayat ti Apo nga agserbitayo kadagiti dadduma?

Babaen ti panagserbi dagiti lallaki ken babbai ken babbarito ken babbalasitang, maaramid ti trabaho ti Dios. Inlawlawag ni Presidente Spencer W. Kimball: “Madlawnatayo ti Dios, ken bambantayannatayo. Ngem gagangay a babaen ti sabali a tao nga itedna dagiti kasapulantayo” (Teachings of Presidents of the Church: Spencer W. Kimball [2006], 82).

Iti unos ti panagbiagtayo agpannuraytayo amin iti tulong ti sabali. Idi maladagatayo pay, tinaraonan, kinawesan, ken inaywanandatayo dagiti nagannak kadatayo. Nataytayo koma no awan daytoy a pannakaaywan. Idi dimmakkeltayo, sabali a tattao ti nangisuro kadatayo kadagiti paglaingan ken kababalin. Adu kadatayo ti nagkasapulan iti pannaripato bayat ti panagsakittayo wenno iti panawen a kaawan ti gastuen a kuarta. Sumagmamano kadatayo ti agkiddaw iti Dios a bendisionanna dagiti tao nga agsagsagaba ket kalpasanna awan met ti aramidentayo para kadakuada. Nasken a laglagipentayo nga agtartrabaho ti Dios babaen kadatayo.

No agtitinnulongtayo ti tunggal maysa, agserserbitayo iti Dios. Insuro ni Ari Benjamin, maysa a naindaklan nga ari iti Libro ni Mormon, daytoy a pagbatayan kadagiti taona babaen ti wagas ti panagbiagna. Nagserbi kadakuada iti unos ti panagbiagna, nga inullona ti bukodna a pagbiag imbes a nagpatulong kadagiti tao. Iti maysa a naparegta a sermon inlawlawagna no apay nga impategna ti panagserbi, a kinunana:

“No agserbikayo iti padayo a tao agserserbikayo laeng iti Dios. …

“Ket no siak, nga awaganyo iti ariyo, agbannogak tapno agserbiak kadakayo, saan, aya, a rumbeng nga agbannogkayo nga agserbi iti tunggal maysa?” Mosiah 2:17–18).

  • Ania ti maaramidtayo tapno nakasagana a mangted iti kasapulan dagiti dadduma?

Umawattayo kadagiti Bendision babaen ti Panagserbi

  • Ania dagiti bendision nga awatentayo babaen ti panagserbi kadagiti dadduma?

No agserbitayo kadagiti dadduma makagun-odtayo kadagiti napapateg a bendision. Babaen ti panagserbi mapadur-astayo ti kabaelantayo nga agayat. Agbalintayo a saan a managimbubukod. Bayat ti panangpanunottayo iti parikut dagiti dadduma, kasla lumag-an dagiti bukodtayo a parikut. Nasken nga agserbitayo kadagiti dadduma tapno magun-odtayo ti agnanayon a biag. Kinuna ti Dios a dagiti makipagtaeng Kenkuana ket nasken nga ayaten ken pagserbianda dagiti annakna (kitaen iti Mateo 25:34–40).

No panunotentayo ti biag dagiti tao nga agserserbi nga awanan iti panagimbubukod, makitatayo nga ad-adu pay ti magun-odda ngem ti itedda. Maysa a kasta a tao ti Santo iti Ud-udina nga aldaw nga agnagan iti Paul a nabaldado iti dua a luppona iti maysa nga aksidente. Adda met dagiti tao a nasugat ti riknada ken awan kaes-eskanda, ngem pinili ni Paul a pinanunot ketdi dagiti dadduma. Nasursurona ti agtrabaho tapno makaurnong iti umdas a kuarta a panggatang iti maysa a balay. Linuktanda nga agassawa ti balayda para kadagiti adu nga awanan iti pagtaengan, ken nabaybay-an nga ubbing. Adda dagiti nakaro ti diperensiana. Agingga iti ipapatayna kalpasan ti 20 a tawen, pinagserbianna dagitoy nga ubbing ken dagiti dadduma pay. Kas supapak, isu ket naipatpateg unay, ket saannan a nalaglagip dagiti baldado a sakana. Dimmakkel nga asideg iti Apo.

Kinuna ni Presidente Spencer W. Kimball, “Agbalintayo a napatpateg bayat ti panagserbitayo kadagiti dadduma—kinapudnona, nalaklaka a ‘biroken’ dagiti bagitayo gapu ta nakaad-adu kadatayo ti agbirok!” (Teachings of Presidents of the Church: Spencer W. Kimball, 85–86).

Dagiti Gundaway nga Agserbi

Sumagmamano kadatayo ti agserbi laeng kadagiti tao a kaay-ayotayo a kalangen ket liklikantayo dagiti amin a dadduma pay. Nupay kasta, imbilin ni Jesus kadatayo nga ayaten ken pagserbiantayo ti tunggal maysa. Adu dagiti gundaway a makapagserbi (kitaen iti Mosiah 4:15–19).

Makapagserbitayo kadagiti miembro ti pamiliatayo. Nasken nga ammo dagiti agassawa ti kasapulan ti tunggal maysa kadakuada. Nasken a pagserbian dagiti nagannak dagiti annakda saan laeng a babaen ti panangtaraon ken panangkawes kadakuada ngem babaen pay ti panangisuro ken pannakipagay-ayam ken pannakipagtrabaho kadakuada. Makapagserbi dagiti annak babaen ti itutulongda kadagiti aramid iti uneg ti balay ken kadagiti kakabsatda.

Pagserbian ken tulongan dagiti agassawa ti tunggal maysa. Makapagtinnulongda a mangaywan kadagiti ubbing, ken makapagtinnulongda kadagiti paggugusto ken tartarigagayanda. Mabalin ti ina ken ama ti agsakripisio a mangibaon iti maysa nga anak iti mision. Mabalin ti in-inauna nga ubing a lalaki a patibkeren ti nakem ti adina a babai a mabuteng iti sipnget wenno tulonganna daytoy nga agsursuro nga agbasa. Imbaga kadatayo dagiti propetatayo a ti pamilia ti kapatgan a yunit iti kagimongan. Nasken a pagserbiantayo a nasayaat dagiti pamiliatayo (kitaen iti Mosiah 4:14–15).

Addaantayo iti adu a gundaway tapno mapagserbian dagiti kaarrubatayo, dagiti gagayyemtayo, ken uray pay dagiti saantayo nga am-ammo. No ti maysa a kaarruba ket marigatan a mangani kadagiti apitna sakbay ti bagyo, makatulongtayo. No masaksakit ti maysa nga ina, mabantayantayo dagiti annakna wenno matulongantayo kadagiti aramid iti balay. No ti maysa nga agtutubo a lalaki ket umad-adayo iti Simbaan, maiturongtayo isuna nga agsubli. No maum-umsi ti maysa nga ubing, mabalintayo a gayyemen isuna ken maallukoytayo dagiti dadduma nga agbalin a nasingpet. Saan a nasken a maam-ammotayo dagiti tao a pagserbiantayo. Nasken a mangkitatayo kadagiti wagas a makapagserbitayo iti adu nga annak ti Nailangitan nga Amatayo agingga a kabaelantayo.

No addaantayo kadagiti naisangsangayan a talento, nasken nga usarentayo dagitoy tapno makapagserbi kadagiti dadduma. Bendisionannatayo ti Dios kadagiti talento ken kabaelan tapno tumulong a mangpasayaat iti biag dagiti dadduma.

Addaantayo kadagiti gundaway a makapagserbi iti Simbaan. Maysa a panggep ti organisasion ti Simbaan ket mangted kadatayo kadagiti gundaway nga agtitinnulong iti tunggal maysa. Agserbi dagiti miembro ti Simbaan babaen ti panagaramid iti aramid ti misionario, panangawat kadagiti naituding nga aramiden iti panangidaulo, panangbisita kadagiti dadduma a kameng ti Simbaan, panangisuro kadagiti klase, ken panagaramid iti dadduma pay a trabaho iti Simbaan. Iti Ti Simbaan ni Jesucristo dagiti Santo iti Ud-udina nga Aldaw awan ti masusuelduan nga agserserbi a dadaulo, isu a nasken nga ipatungpal dagiti natudingan a miembro ti amin nga aramiden iti Simbaan.

  • Kasano a makaitedtayo iti umdas a panawen iti pamiliatayo, uray kadagiti adu a gundawaytayo nga agserbi iti Simbaan ken komunidad?

Ni Jesucristo ti Naan-anay a Pagwadan iti Panagserbi

  • Ania ti sumagmamano kadagiti paggugustom nga estoria iti nasantuan a kasuratan a nangipakitaan ti Mangisalakan iti pagwadan iti panagserbi?

Nangted ti Mangisalakan iti naan-anay a pagwadan iti panagserbi. Inlawlawagna a saan nga immay Isuna iti daga tapno pagserbian ngem ketdi tapno agserbi ken itedna ti biagna para kadatayo (kitaen iti Mateo 20:28).

Ay-ayatennatayo amin ni Jesucristo iti nalablabes pay ngem iti maawatantayo. Idi adda Isuna iti daga pinagserbianna ti napanglaw, ti awan ammona, ti managbasol, ti maum-umsi. Insurona ti ebanghelio kadagiti amin a dumngeg, pinakanna dagiti ummong dagiti mabisin a tattao nga immay tapno dumngeg Kenkuana, pinaimbagna dagiti masakit, ken pinagungarna dagiti natay.

Isu ti Namarsua ti daga ken Mangisalakantayo, ngem nagaramid Isuna kadagiti adu a napakumbaba nga aramid ti panagserbi. Sakbay ti Pannakailansana iti Krus nakipagkita Isuna kadagiti disipulona. Kalpasan ti panangisurona kadakuada, nangala Isuna iti sangapalanggana a danum ken tualia ket binugguanna dagiti sakada (kitaen iti Juan 13:4–10; kitaen met iti ladawan iti daytoy a kapitulo). Kadagidiay nga aldaw ti panangbuggo kadagiti saka ti maysa a sangaili ket tanda ti panagdayaw ken gagangay nga aramiden ti maysa nga adipen. Inaramid daytoy ni Jesus a kas maysa a pagwadan ti ayat ken panagserbi. No sitatallugodtayo nga agserbi kadagiti dadduma iti espiritu ti ayat, ad-adda nga agbalintayo a kas ken ni Cristo.

  • Ania ti masursurotayo manipud iti pagwadan ti panagserbi ti Mangisalakan?

Dagiti Mainayon a Nasantuan a Kasuratan