Dagiti Libro ken Adalen
Kapitulo 46: Ti Maudi a Panangukom

Ti Maudi a Panangukom

Kapitulo 46

Resurrected Christ with arms outstretched stands above a throng of people of all races and times, some prone, some standing. The people on the right side of Christ are in the attitude of worship. The people on the left side of Christ are in anguish. Scenes of ruin are in the foreground and background. The Washington D.C. temple is pictured in the upper left corner.

Dagiti Panangukom ti Dios

  • Ania dagiti sumagmamano a nadumaduma a panangukom nga umay sakbay ti Maudi a Panangukom? Ania ti pagkakanaigan amin dagitoy a panangukom iti tunggal maysa?

Masansan a maibaga kadatayo kadagiti nasantuan a kasuratan a dumtengto dayta nga aldaw nga agtakdertayonto iti sango ti Dios ket maukomtayto. Nasken a maawatantayo no kasano ti pannakapasamak ti panangukom tapno nasaysayaat ti panagsaganatayo para iti daytoy napateg a pasamak.

Isuro dagiti nasantuan a kasuratan a maukomtayonto amin a mayannurot kadagiti aramidtayo: “Ket nakitak dagiti natay, babassit ken dadakkel, a nagtakder iti sanguanan ti trono; ket nabistrad dagiti pagbasaan: nabistrad met ti sabali a pagbasaan, nga isu ti pagbasaan ti biag: ket dagiti natay naukomda kadagiti bambanag a naisurat kadagiti pagbasaan kas mayannurot kadagiti aramidda” (Apocalipsis 20:12; kitaen met iti DkK 76:111; 1 Nephi 15:32; Abraham 3:25–28). Maukomtayonto pay a “maibatay iti tarigagay ti puspuso[tayo]” (DkK 137:9; kitaen met iti Alma 41:3).

Masansan a makedngantayo ditoy daga a maibatay iti pannakaikaritayo nga umawat kadagiti gundaway iti ikub ti pagarian ti Dios. Makedngantayo a maikari no mabuniagantayo nga umawat iti daytoy nga ordinansa. Makedngantayo no maawagantayo nga agserbi iti Simbaan wenno mainterbyu para iti pannakaital-o iti priesthood wenno temple recommend.

Insuro ni Alma a no mataytayo maipan dagiti espiritutayo iti kasasaad ti kinaragsak wenno kinaladingit (kitaen iti Alma 40:11–15). Daytoy ket maysa a panangukom.

Mausar dagiti Balikas, Aramid, ken Pampanunottayo a Pangukom Kadatayo

  • Panunotem ti pannakakednganmo iti amin a pampanunot, balikas, ken aramidmo.

Impaneknek ni propeta Alma, “Dagiti balikastayo ti mangkeddeng kadatayo, wen, kedngandatayo dagiti amin nga aramidtayo; … ket kedngandatayo met ti pampanunottayo” (Alma 12:14).

Kinuna ti Apo: “Amin a sao nga awan kapapay-anna a sawento dagiti tao, isu ti sungbatandanto iti aldaw ti pannakaukom. Ta gapu kadagiti saom maibilangkanto a nalinteg, ket gapu kadagiti saom maibilangkanto a dakes” (Mateo 12:36–37).

Tulongannatayo ti pammati ken ni Jesucristo nga agsagana para iti Maudi a Panangukom. Babaen ti panagbalin a napudno a disipulo Kenkuana ken panagbabawi kadagiti amin a basol, mabalin a mapakawantayo kadagiti basoltayo ket agbalin a natarnaw ken nasantuan tapno makapagnaedtayo iti sidong ti Dios. Bayat ti panagbabawitayo kadagiti basbasoltayo, panangtallikud iti tunggal narugit a pampanunot ken aramid, baliwanto ti Espiritu Santo dagiti pusotayo tapno awanen kadatayo ti tarigagay pay nga agbasol (kitaen iti Mosiah 5:2). Ket inton maukomtayo, makitanto a nakasaganatayon a sumrek iti sidong ti Dios.

  • Panunotem ti maipapan iti mabalinmo nga aramiden tapno mapasayaat dagiti pampanunot, balikas, ken aramidmo.

Maukomtayonto babaen kadagiti Kasuratan

  • Manipud kadagiti ania a kasuratan ti pakaukomantayonto? Asinonto ti mangukom kadatayo?

Kinuna ni Propeta Joseph Smith a maukomto dagiti natay babaen kadagiti kasuratan a naidulin iti daga. Maukomtayonto pay babaen ti “libro ti biag,” a naidulin iti langit (kitaen iti DkK 128:6–8).

“Tunggal maysa kadakayo … masapul a sumaklang iti ‘pangukoman ti Nasantuan ti Israel … ket iti kasta … maukom babaen ti nasantuan a panangukom ti Dios.’ (2 Nephi 9:15.) Ken segun iti parmata ni Juan, ‘Nabistrad dagiti pagbasaan: nabistrad met ti sabali a pagbasaan, nga isu ti pagbasaan ti biag: ket dagiti natay naukomda kadagiti bambanag a naisurat kadagiti pagbasaan kas mayannurot kadagiti aramidda.’ (Apo. 20:12 .) Dagiti ‘pagbasaan’ a nasao ket maiturong kadagiti ‘kasuratan [dagiti aramidyo] a naidulin iti daga. … Ti libro ti biag ket isu ti kasuratan a nakadulin iti langit.’ (Dok. ken Kat. 128:7.)” Teachings of Presidents of the Church: Harold B. Lee (2000), 226–27).

Adda pay sabali a kasuratan a mausarto a pangukom kadatayo. Insuro ni Apostol Pablo a datayo a mismo ket maysa a kasuratan ti biagtayo (kitaen iti Taga Roma 2:15). Naidulin iti bagi ken panunottayo ti naan-anay a pakasaritaan ti amin a banag nga inaramidtayo. Insuro ni Presidente Taylor daytoy a kinapudno: “Isalaysay [ti tao] mismo ti estoria, ken ipaneknekna ti maibusor iti bagina. … Dayta a kasuratan nga insurat ti tao mismo kadagiti pinanid iti bukodna a panunot, dayta a kasuratan a saanto a makapaglibak ket maibutaktakto iti dayta nga aldaw iti sango ti Dios ken dagiti anghel, ken kadagiti agtugawto a kas ukom” (Deseret News, Mar. 8, 1865, 179).

Insuro ni Apostol Juan a “ti Ama awan ti ukomenna, no di ket isu amin a panangukom intedna iti Anakna” (Juan 5:22). Ti Anak, ngarud, umawagto kadagiti dadduma a tumulong iti Panangukom. Ukomento dagiti Sangapulo-ket-dua a kaduana idi iti panagministrona dagiti sangapulo-ket-dua a tribu ti Israel (kitaen iti Mateo 19:28; Lucas 22:30). Ukomento dagiti sangapulo-ket-dua a disipulo a Nephite dagiti tattao a Nephite ken Lamanite (kitaen iti 1 Nephi 12:9–10; Mormon 3:18–19).

Panangtawid iti maysa a Lugar iti Pagarian ti Gloria

  • Kasano nga impluensiaan ti kinapudnotayo bayat daytoy a biag iti daga ti biagtayo kadagiti kinaagnanayon?

Iti Maudi a Panangukom tawidentayonto ti maysa a lugar iti pagarian a nakaisaganaantayo. Isuro dagiti nasantuan a kasuratan ti maipapan kadagiti tallo a pagarian ti gloria—ti celestial a pagarian, ti terestrial a pagarian, ken ti telestial a pagarian (kitaen iti DkK 88:20–32).

Iti Doktrina and Katulagan 76, inladawan ti Apo dagiti wagas a pakapagpiliantayo nga agbiag iti mortal a biagtayo. Inlawlawagna a dagiti pilitayo ti mangikeddeng no ania a pagarian ti nakaisaganaantayo. Maammuantayo manipud iti daytoy a paltiing a tawidento uray dagiti miembro ti Simbaan dagiti agduduma a pagarian gapu ta saanda nga agpapada a napudno ken natured iti panagtungpalda ken ni Cristo.

Dagiti sumaganad ket dagiti kita ti biag a mabalintayo a pilien a pagbiagan ken dagiti pagarian a magun-od para kadagiti pilitayo.

Celestial

“Isuda dagiti immawat iti pammaneknek ni Jesus, ken namati iti naganna ken nabuniagan, … a babaen ti panagtungpalda kadagiti bilin mabalin a mabugguan ken madalusanda kadagiti amin a basolda, ket awatenda ti Nasantuan nga Espiritu.” Isuda dagiti makaparmek iti lubong babaen ti pammatida. Isuda dagiti nalinteg ken napudno tapno mailantip kadakuada ti Espiritu Santo dagiti bendisionda. (Kitaen iti DkK 76:51–53.) Dagiti agtawid iti kangatuan a tukad ti celestial a pagarian, nga agbalin a dios, ket nasken pay a naikallaysadan para iti kinaagnanayon iti templo (kitaen iti DkK 131:1–4). Makipagtaengto amin dagiti agtawid iti celestial a pagarian iti Nailangitan nga Ama ken ni Jesucristo iti agnanayon (kitaen iti DkK 76:62).

Babaen iti aramid nga aramidentayo kadagiti templo, maaddaanto ti amin a tao a nagbiag iti rabaw ti daga iti agpada a gundaway tapno umawat iti pakabuklan ti ebanghelio ken dagiti ordinansa ti pannakaisalakan tapno makapagtawidda iti lugar iti kangatuan a tukad ti celestial a pagarian.

Terestrial

Dagitoy dagiti saan a nangawat iti ebanghelio iti daga ngem kalpasanna inawatda daytoy iti lubong dagiti espiritu. Dagitoy dagiti madaydayaw a tao iti daga a nabulsek iti ebanghelio ni Jesucristo iti kinasikap dagiti tao. Isuda pay dagiti immawat iti ebanghelio ken pammaneknek ni Jesus ngem saanda a natured. Sarungkaranto ida ni Jesucristo ngem saan a ti Nailangitan nga Amatayo. (Kitaen iti DkK 76:73–79.)

Telestial

Saan nga inawat dagitoy a tao ti ebanghelio wenno ti pammaneknek ni Jesus iti man daga wenno iti lubong dagiti espiritu. Agsagabadanto gapu kadagiti bukodda a basol iti impierno agingga a kalpasan ti Milenium, inton agungarda. “Dagitoy dagiti ulbod, ken manggagamud, ken mannakikamalala, ken mannakiabig, ken asino man nga agayat ken agaramid iti inuulbod.” Dagitoy a tao ket kas kaadu dagiti bituen iti langit ken dagiti darat iti igid ti baybay. Sarungkaranto ida ti Espiritu Santo ngem saan a ti Ama wenno ti Anak. (Kitaen iti DkK 76:81–88, 103–6, 109.)

Akinruar a Kasipngetan

Dagitoy dagiti naaddaan iti pammaneknek ni Jesus babaen ti Espiritu Santo ken nakaammo iti pannakabalin ti Apo ngem pinalubosanda ni Satanas a mangparmek kadakuada. Tinallikudanda ti kinapudno ken kinaritda ti pannakabalin ti Apo. Awan ti pannakapakawan para kadakuada, gapu ta tinallikudanda ti Nasantuan nga Espiritu kalpasan nga inawatdan daytoy. Didanto maaddaan iti pagarian ti gloria. Agbiagdanto iti agnanayon a sipnget, rigat, ken kinaay-ay a kaduada ni Satanas ken dagiti anghelna iti agnanayon. (Kitaen iti DkK 76:28–35, 44–48.)

Nasken nga Agsaganatayo Itan para iti Pannakaukom

  • Ania ti nasken nga aramidentayo tapno nakasagana para iti Maudi a Panangukom?

Iti kinapudnona, inaldaw ti aldaw ti panangukom. Agsao, agpanunot, ken agtignaytayo a mayannurot iti celestial, terestrial, wenno telestial a linteg. Ti pammatitayo ken ni Jesucristo, kas ipakpakita dagiti inaldaw nga aramidtayo, ti mangikeddeng no ania a pagarian ti tawidentayto.

Addan kadatayo ti naisubli nga ebanghelio ni Jesucristo iti pakabuklanna. Ti ebanghelio ket isu ti linteg ti celestial a pagarian. Naipalgaken ti amin nga ordinansa ti priesthood a kasapulan para iti panagdur-astayo. Nabuniagan ken nagaramidtayon iti katulagan nga agbiag a kas iti panagbiag ni Cristo. No napudnotayo ken tungpalentayo dagiti katulagan nga inaramidtayo, imbagan ti Apo kadatayo no anianto ti pakaukomantayo. Ibagananto kadatayo, “Umaykayo, dakayo a binendisionan ni Amak, tawidenyo ti pagarian a naisagana kadakayo manipud iti pannakabangon ti lubong” (Mateo 25:34).

Dagiti Mainayon a Nasantuan a Kasuratan