Dagiti Libro ken Adalen
Kapitulo 8: Panagkararag iti Nailangitan nga Amatayo

Panagkararag iti Nailangitan nga Amatayo

Kapitulo 8

A woman sitting at a desk with the scriptures open in front of her. She has her hands clasped and eyes closed in prayer.

Ania ti kararag?

Insuro ni Jesus, “Nasken nga agkararagkayo a kanayon iti Ama iti naganko” (3 Nephi 18:19).

Ti kararag ket maysa kadagiti kaindaklanan a bendision nga adda kadatayo bayat ti kaaddatayo ditoy daga. Babaen iti kararag makasaritatayo ti Nailangitan nga Amatayo ken makiddawtayo ti pannarabayna iti inaldaw.

Ti kararag ket maysa a napudno, naimpusuan a pannakisao iti Nailangitan nga Amatayo. Nasken nga agkakaragtayo iti Dios ken saan nga iti sabali pay. Saantayo nga agkararag iti sabali pay a tao wenno iti ania man a banag nga inaramid ti tao wenno ti Dios (kitaen iti Exodo 20:3–5).

Apay nga Agkararagtayo?

Ti kararag ket maysan a napateg a paset ti ebanghelio manipud pay idi punganay ti lubong. Binilin ti anghel ti Apo da Adan ken Eva nga agbabawi ken awaganda ti Dios iti nagan ti Anak (kitaen iti Moises 5:8). Saan a kaano man naikkat wenno naibabawi daytoy a bilin. Tulongannatayo ti kararag nga umasideg iti Dios. Impluensiaan dagiti kararagtayo ti amin a panunottayo, balikastayo, ken tignaytayo.

Nasken nga agkararatayo para iti pigsa a mangkedked kadagiti sulisog ni Satanas ken dagiti pasurotna (kitaen iti 3 Nephi 18:15; DkK 10:5). Nasken nga agkakaragtayo tapno ipudnotayo dagiti basoltayo iti Dios ken kiddawentayo Kenkuana a pakawanennatayo (kitaen iti Alma 38:14).

Nasken nga agkararagtayo para iti pannarabay ken tulong ti Apo iti inaldaw a panagbiagtayo. Kasapulan nga ikararagantayo dagiti pamilia ken gagayyemtayo, dagiti kaarruba wenno padatayo a tattao, dagiti mulmulatayo ken dagiti ayuptayo, ti inaldaw a trabahotayo, ken dagiti dadduma pay nga aramidentayo. Nasken nga agkakaragtayo para iti pannakasalaknib manipud kadagiti kabusortayo. (Kitaen iti Alma 34:17–27.)

Nasken nga agkararagtayo tapno mayebkas ti ayat iti Nailangitan nga Amatayo ken marikna nga as-asidegtayo Kenkuana. Nasken nga agkararagtayo iti Ama tapno agyaman Kenkuana para iti pagimbagan ken gin-awatayo ken para iti amin a banag nga itedna kadatayo iti tunggal aldaw (kitaen iti 1 Taga Tesalonica 5:18). Kasapulan nga agkararagtayo tapno agkiddaw iti Nailangitan nga Amatayo para iti pigsa nga agtungpal iti ebanghelio.

Nasken nga agkararagtayo tapno makapagtalinaedtayo iti akikid ken nailet a dalan nga agturong iti agnanayon a biag. Nasken nga agkararagtayo iti Dios, ti pagtaudan ti amin a kinalinteg, tapno makapagbalintayo a nalinteg iti panunot, balikas, ken tignaytayo.

  • Kasano a tinulongannaka ti kararag nga umas-asideg iti Nailangitan nga Ama?

Kaano a Nasken nga Agkararagtayo?

Makapagkararagtayo no mariknatayo a kasapulantayo a makasarita ti Nailangitan nga Amatayo, iti naulimek man wenno iti napigsa. No dadduma kasapulantayo ti agmaymaysa a pakaibukbokantayo iti kararuatayo Kenkuana (kitaen iti Mateo 6:6). Mainayon pay, makapagkararagtayo kabayatan dagiti inaldaw nga aramidentayo. Makapagkararagtayo kabayatan ti kaaddatayo iti miting ti Simbaan, iti pagtaengan, no magmagna iti maysa a dalan wenno kalsada, agtartrabaho, agisagsagana iti taraon, wenno sadino man ti yantayo ken ania man ti ar-aramidentayo. Makapagkakaragtayo iti ania man nga oras ti aldaw wenno rabii. Makapagkararagtayo no agmaymaysatayo wenno no kaduatayo dagiti dadduma a tao. Mapanunottayo ti Nailangitan nga Amatayo iti amin a kanito (kitaen iti Alma 34:27). Mabalintayo a “kanayon nga agkararag” (DkK 10:5).

No dadduma nalabit a ditayo marikna a makakarkararagen. Mabalin a makaguratayo wenno mapukawan iti namnama wenno maup-upaytayo. Kadagitoy a panawen nasken nga ikarigatantayo ti agkararag (kitaen iti 2 Nephi 32:8–9).

Nasken nga agkakarag ti tunggal maysa nga agmaymaysa iti uray tunggal rabii wenno iti tunggal agsapa. Dakamaten dagiti nasantuan a kasuratan maipapan iti panagkararag iti agsapa, tengnga ti aldaw, ken rabii (kitaen iti Alma 34:21).

Nabilintayo a maaddaan kadagiti kararag a sangapamiliaan tapno mabendisionan dagiti pamiliatayo (kitaen iti 3 Nephi 18:21). Binalakadannatayo dagiti lidertayo iti Simbaan tapno agkararag a sangapamiliaan iti tunggal agsapa ken rabii.

Addaantayo pay iti gundaway nga agkararag tapno mangted iti panagyaman ken agkiddaw iti pammendision iti taraon sakbay ti tunggal pannangan.

Rugian ken gibusantayo ti amin a mitingtayo iti Simbaan iti kararag. Agyamantayo iti Apo kadagiti bendisionna ken agkiddawtayo iti tulongna tapno makapagdaydayawtayo iti wagas a makaparagsak Kenkuana.

Kasano nga Agkararagtayo?

Sadino man ti yantayo, nakatakdertayo man wenno nakaparintumeng, agkararagtayo man iti napigsa wenno naulimek, agkararagtayo man iti pribado wenno agpaay iti maysa a grupo, nasken nga agkararagtayo a sipapammati, “naimpusuan … ken addaan iti pudno a panggep” (Moroni 10:4).

Kabayatan ti panagkararagtayo iti Nailangitan nga Amatayo, nasken nga ibagatayo Kenkuana no ania ti pudno a mariknatayo iti puspusotayo, agipudnotayo Kenkuana, ken agdawattayo Kenkuana iti pammakawan, agpakaasitayo Kenkuana, agyamantayo Kenkuana, ken yebkastayo ti ayattayo Kenkuana. Nasken a ditayo ulit-uliten dagiti awan kaes-eskanna a balikas ken sasao (kitaen iti Mateo 6:7–8). Nasken a kanayon a kiddawentayo a ti pagayatanna ti maaramid, a laglagipen a ti tartarigagayantayo ket mabalin a saan a kasayaatan para kadatayo (kitaen iti 3 Nephi 18:20). Iti ungto ti kararagtayo, gibusantayo iti nagan ni Jesucristo (kitaen iti 3 Nephi 18:19).

Kasano a Masungbatan dagiti Kararag?

  • Apay iti panagkunam saan a kanayon a madagdagus a nalawag dagiti sungbat kadagiti kararag? Apay iti panagkunam saan a kanayon a dumteng dagiti sungbat kadagiti kararag no kayattayo wenno iti wagas a kayattayo?

Kanayon a masungbatan dagiti napudno a kararagtayo. No dadduma mabalin a saan ti sungbat, gapu ta ti kiniddawtayo ket saan a kasayaatan para kadatayo. No dadduma wen ti sungbat, ket addaantayo iti nabara, nagin-awa a rikna maipapan iti no ania ti nasken nga aramidentayo (kitaen iti DkK 9:8–9). No dadduma ti sungbat ket “aguray bassit.” Kanayon a masungbatan dagiti kararagtayo iti maysa a panawen ken iti wagas nga ammo ti Apo a kasayaatan a makatulongto kadatayo.

No dadduma sungbatan ti Apo dagiti kararagtayo babaen kadagiti dadduma a tao. Ti maysa a naimbag a gayyem, agassawa, naganak wenno sabali pay a miembro ti pamilia, lider ti Simbaan, maysa a misionario—asino man kadagitoy a tao ket maparegta nga agaramid kadagiti tignay a mangsungbatto kadagiti kararagtayo. Maysa a pagarigan daytoy ket ti padas ti ubing pay nga ina a ti maladagana ken nadunor iti maysa nga aksidente iti pagtaengan. Awan ti pamuspusanna a maipan ti maladagana iti doktor. Kabarbarona laeng iti sangakaarrubaan ket saanna nga am-ammo dagiti kaarrubana. Nagkararag ti ubing pay nga ina para iti tulong. Iti sumagmamano a minuto, immay ti maysa a kaarruba iti ridaw, a kinunana, “Nariknak a nasken nga umayak ket kitaek no kasapulam ti ania man a tulong.” Tinulongan ti kaarruba ti ubing pay nga ina a maipan ti maladaga iti maysa a doktor.

Masansan nga ikkannatayo ti Dios iti bileg a tumulong a mangsungbat kadagiti bukodtayo a kararag. No agkakaragtayo para iti tulong, nasken nga aramidentayo ti amin a kabaelantayo a maipatungpal dagiti banag a tartarigagayantayo.

No agbiagtayo a mayannurot iti ebanghelio ni Jesucristo ken agkararagtayo a kanayon, maaddaantayo iti rag-o ken ragsak. “Agpakumbabaka; ket kibinennakanto nga iturong ti Apo a Diosmo, ket itdennanto kenka ti sungbat dagiti kararagmo” (DkK 112:10).

  • Iti ania a wagas a sinungbatanen ti Nailangitan nga Ama dagiti kararagmo?

Dagiti Mainayon a Nasantuan a Kasuratan ken Dadduma pay a Pagadawan