Dagiti Libro ken Adalen
Kapitulo 38: Agnanayon a Kallaysa

Agnanayon a Kallaysa

Kapitulo 38

Ladawan
An African couple on the grounds of the Accra Ghana Temple. Taken in Ghana, West Africa.

Inordenan ti Dios ti Kallaysa

Maysa a napateg unay a paset ti plano ti Dios ti panagkallaysa ti maysa a lalaki ken maysa a babai. Kinuna ti Apo, “Asino man a mangipawil iti panagasawa saanto nga ordenan ti Dios, ta inordenan ti Dios iti tao ti panagasawa” (DkK 49:15). Manipud pay idi punganay, maysan a paglintegan ti ebanghelio ti panagkallaysa. Nairanta nga agpaut iti agnanayon dagiti kallaysa, saan laeng a para iti panagbiagtayo iti daga.

Pinagkallaysa ti Dios da Adan ken Eva sakbay nga adda ipapatay iti lubong. Agnanayon ti kallaysada. Insuroda ti linteg ti agnanayon a kallaysa kadagiti annakda ken kadagiti annak dagiti annakda. Iti panaglabas dagiti tawen, simrek ti kinadangkes iti puspuso dagiti tao ket napukaw manipud iti daga ti turay wenno awtoridad a mangannong iti daytoy sagrado nga ordinansa. Babaen ti Pannakaisubli ti ebanghelio, naisubli iti daga ti agnanayon a kallaysa.

  • Apay a nasken a maammuan nga inordenan ti Dios ti panagkallaysa iti nagbaetan ti maysa a lalaki ken maysa a babai?

Kasapulan iti Pannakaitan-ok ti Agnanayon a Kallaysa

  • Ania ti doktrina ti Apo maipapan iti kallaysa, ken kasano a maigiddiat daytoy kadagiti pannirigan ti lubong?

Adu a tao iti lubong ti mangibilang iti kallaysa a maysa laeng nga ugali iti kagimongan, maysa a legal a katulagan iti nagbaetan ti maysa a lalaki ken maysa a babai tapno agkabbalayda. Ngem kadagiti Santo iti Ud-udina nga Aldaw, dakdakkel nga amang ti kaipapanan ti kallaysa. Agpannuray ti pannakaitan-oktayo iti kallaysa, a kadua dagiti dadduma pay a pagbatayan ken ordinansa, a kas iti pammati, panagbabawi, panagbuniag, ken panangawat iti sagut ti Espiritu Santo. Mamatitayo a ti kallaysa ti kasagraduan a relasion a mapasamak iti nagbaetan ti maysa a lalaki ken maysa a babai. Daytoy sagrado a relasion ti mangaring iti ragsaktayo ita ken kadagiti kinaagnanayon.

Nangted kadatayo ti Nailangitan nga Ama iti linteg ti agnanayon a kallaysa tapno makapagbalintayo a kas Kenkuana. Kinuna ti Apo:

“Iti celestial a gloria adda tallo a langit wenno tukad;

“Ket tapno magun-od ti kangatuan, nasken a sumrek ti tao iti daytoy nga urnos ti kinasaserdote [kayatna a sawen ti baro ken agnanayon a katulagan ti panagasawa];

“Ket no dina aramiden, saanna a magun-od daytoy” (DkK 131:1–3).

Nasken a Maannong ti Agnanayon a Kallaysa babaen ti Umno a Turay wenno Awtoridad iti Templo

  • Apay a nasken a maannong ti kallaysa babaen ti umno a turay wenno awtoridad iti templo tapno agbalin nga agnanayon?

Ti agnanayon a kallaysa ket nasken nga annongen ti maysa a tao nga addaan iti bileg a mamaglantip. Inkari ti Apo, “No mangasawa ti lalaki iti babai babaen … ti baro ken agnanayon a katulagan … babaen kenkuana a natudingan, … ket no agtungpal[da] iti katulagan [ti Apo], … daytoy … maipatungpalto a mamimpinsan no addadan iti ruar ti lubong” (DkK 132:19).

Saan laeng a nasken a maannong ti agnanayon a kallaysa babaen ti umno a turay wenno awtoridad ti priesthood, ngem nasken pay a maaramid daytoy iti maysa kadagiti nasantuan a templo ti Apotayo. Ti templo ti kakaisuna a lugar a mabalin a pakaannongan daytoy nasantuan nga ordinansa.

Iti templo, agparintumeng dagiti agkallaysa a Santo iti Ud-udina nga Aldaw iti maysa kadagiti sagrado nga altar iti imatang ti pamilia ken gagayyemda a nakaawaten iti endowment iti templo. Aramidenda dagiti katulaganda iti kallaysa iti sango ti Dios. Maibaga nga agassawadan para ita a panawen ken iti amin a kinaagnanayon. Aramiden daytoy ti maysa nga addaan iti nasantuan a priesthood ti Dios ken naikkan iti turay wenno awtoridad a mangannong iti daytoy sagrado nga ordinansa. Agtignay isuna babaen ti panangiturong ti Apo ken ikarianna dagiti agkallaysa kadagiti bendision ti pannakaitan-ok. Isurona kadakuada dagiti banag a nasken nga aramidenda tapno maawatda dagitoy a bendision. Ipalagipna kadakuada nga agpannuray ti amin a bendision iti panagtungpal kadagiti linteg ti Dios.

No pagkallaysaennatayo ti ania man nga awtoridad malaksid iti priesthood iti maysa a templo, ti kallaysa ket agpaay laeng iti daytoy a biag. Kalpasan ti ipapatay, awanen ti karbengan dagiti agassawa ti tunggal maysa wenno kadagiti annakda. Mangted kadatayo ti agnanayon a kallaysa iti gundaway nga agtultuloy a kas pamilia kalpasan daytoy a biag.

Dagiti Pagimbagan ti Agnanayon a Kallaysa

  • Ania dagiti bendision ti agnanayon a kallaysa iti daytoy a biag ken iti kinaagnanayon?

Kas Sasanto iti Ud-udina nga Aldaw, agbibiagtayo nga addaan iti agnanayon a pannirigan, saan laeng a para iti kanito. Nupay kasta, makaawattayo kadagiti bendision iti daytoy a biag kas bunga ti panagkallaysa para iti kinaagnanayon. Sumaganad ti sumagmamano kadagidiay a bendision:

  1. Ammotayo a mabalin nga pagpaut ti kallaysatayo iti agnanayon. Ti ipapatay ket mapagsinanatayo iti tunggal maysa iti saan nga agbayag laeng. Awan ti makapagsina kadatayo iti agnanayon malaksid iti bukodtayo a panagsukir. Tumulong kadatayo daytoy a pannakaammo iti panagtrabahotayo a nasaysayaat tapno maaddaan iti naragsak, naballigian a kallaysa.

  2. Ammotayo a makapagtultuloy dagiti relasiontayo iti pamilia agingga iti kinaagnanayon. Tumulong kadatayo daytoy a pannakaammo tapno agan-annad iti panangisuro ken panangsanay kadagiti annaktayo. Makatulong pay daytoy kadatayo a mangipakita kadakuada iti ad-adu a panaganus ken panangipateg. Kas bungana, maaddaantayo iti naragragsak a pagtaengan.

  3. Gapu ta naikallaysatayo iti naordenan a wagas ti Apo, maikaritayo iti panangibukbok ti Espiritu iti kallaysatayo bayat ti panagtalinaedtayo a maikari.

Sumaganad ti sumagmamano kadagiti bendision a masagraptayo para iti kinaagnanayon:

  1. Makapagnaedtayo iti kangatuan a tukad ti celestial a pagarian ti Dios.

  2. Mabalintayo ti maitan-ok a kas iti Dios ken makaawat iti naan-anay a rag-o.

  • Kasano a maimpluensiaan ti agnanayon a pannirigan ti panagriknatayo maipapan iti kallaysa ken dagiti pamilia?

Nasken nga Agsaganatayo para iti Agnanayon a Kallaysa

  • Ania ti maaramidtayo a makatulong kadagiti agtutubo nga agsagana para iti agnanayon a kallaysa?

Insuro ni Presidente Spencer W. Kimball: “Mabalin a ti kallaysa ti kapatgan unay kadagiti amin a pangeddeng ken addaan kadagiti kapautan nga epekto, gapu ta saan laeng a mainaig daytoy iti apagbiit a ragsak, ngem ketdi mainaig pay kadagiti agnanayon a ragsak. Aringanna saan laeng ti dua a tao a maseknan, ngem aringanna pay ti pamiliada ken nangnangruna pay dagiti annakda ken dagiti annak dagiti annakda agingga iti adu a kaputotan. Iti panagpili iti katakunaynay para iti daytoy a biag ken para iti kinaagnanayon, awan duadua a nasken a maaramid ti kaannadan a panagplano ken panagpanunot ken panagkararag ken panagayuno tapno mapennek nga awan biddut ti amin a pangeddeng, awan ti biddut iti daytoy” (Teachings of Presidents of the Church: Spencer W. Kimball [2006], 193).

Ti agnanayon a kallaysa ti nasken a kalikaguman a tun-oyen ti tunggal Santo iti Ud-udina nga Aldaw. Pudno daytoy uray para kadagiti nagkallaysa iti linteg a sibil. Agkasapulan iti adu a panagpanunot ken panagkararag ti panagsagana para iti agnanayon a kallaysa. Dagiti laeng miembro ti Simbaan nga agbibiag a sililinteg ti mapalubosan a sumrek iti templo (kitaen iti DkK 97:15–17). Saan a basta lattan ikeddengtayo iti maysa nga aldaw a kayattayo ti agkallaysa iti templo, ket sumrektayo iti templo iti dayta nga aldaw ket maikallaysatayo. Nasken nga umuna a matungpaltayo ti sumagmamano a kasapulan:

Sakbay a makapantayo iti templo, nasken nga aktibo, maikaritayo a miembro ti Simbaan iti uneg ti makatawen. Nasken nga addaan dagiti lallaki iti Melchizedek Priesthood. Nasken a mainterbyunatayo ti branch president wenno bishop. No matakuatanna a maikaritayo, ikkannatayonto iti temple recommend. No saantayo a maikari, balakadannatayonto ken tulongannatayo a mangituding kadagiti panggep a tun-oyen tapno agbalintayo a maikari a mapan iti templo.

Apaman a makaawattayo iti rekomenda manipud iti bishop wenno branch presidenttayo, nasken a mainterbyunatayo ti stake president wenno ti mission president. Masaludsodtayo iti kas iti sumaganad iti interbyu para iti temple recommend:

  1. Addaanka kadi iti pammati ken pammaneknek iti Dios, ti Agnanayon nga Ama; iti Anakna, a ni Jesucristo; ken ti Espiritu Santo? Addaanka kadi iti natibker a pammaneknek maipapan iti naisubli nga ebanghelio?

  2. Kanunongam kadi ti Presidente ti Ti Simbaan ni Jesucristo dagiti Santo iti Ud-udina nga Aldaw a kas propeta, mammadto, ken mammaltiing? Bigbigem kadi isuna a kas kakaisuna a tao iti daga a napusgan a mangaramat iti amin a tulbek ti priesthood?

  3. Agtungtungpalka kadi iti linteg ti kinadalus ti dayaw?

  4. Agbaybayadka kadi iti naan-anay nga apagkapullo?

  5. Tungtungpalem kadi ti Word of Wisdom?

  6. Napudnoka kadi iti pannakilangenmo kadagiti dadduma?

  7. Ikarkarigatam kadi a tungpalen dagiti katulagan nga inaramidmon, a dumardar-ayka kadagiti miting iti sakramento ken priesthood, ken pagtaltalinaedem ti biagmo a maitunos kadagiti linteg ken bilin ti ebanghelio?

No dumawatka iti temple recommend, nasken a laglagipem a sagrado a pribilehio ti sumrek iti templo. Maysa daytoy a serioso a tignay, saan a banag a tagtagilag-anen.

Nasken a sipapasnek a kalikagumantayo ti agtungpal iti tunggal katulagan nga aramidentayo iti templo. Kinuna ti Apo a no napudno ken natallugodtayo, sumrektayonto nga agturong iti pakaitan-okantayo. Agbalintayonto a kas iti Nailangitan nga Amatayo. (Kitaen iti DkK 132:19–20.) Ti kallaysa iti templo ket kas kapateg ti ania man a panagsakripisio. Maysa a wagas daytoy a panggun-od kadagiti saan a marukod nga agnanayon a bendision.

  • Ania ti maaramidtayo tapno maallukoytayo dagiti agtutubo a mangituding iti panggep a tun-oyen a makapagkallaysadanto iti templo? Kasano a matulongantayo ida nga agsagana para iti daytoy?

Dagiti Mainayon a Nasantuan a Kasuratan

Iprenta