Dagiti Libro ken Adalen
Kapitulo 22: Dagiti Sagut ti Espiritu

Dagiti Sagut ti Espiritu

Kapitulo 22

Two elder missionaries in Korea talking to a young man. They are standing on a sidewalk.

Dagiti Sagut ti Espiritu

  • Ania dagiti naespirituan a sagut nga ited ti Dios kadatayo?

Kalpasan ti panagbuniag, masapul ti pannakaipatay dagiti dakulap iti ulotayo tapno umawattayo iti sagut ti Espiritu Santo. No napudnotayo, mabalin nga agtultuloy nga adda kadatayo ti impluensiana. Babaen Kenkuana, mabalin a mabendisionan ti tunggal maysa kadatayo kadagiti masinunuo a naespirituan a bileg a maawagan kadagiti sagut ti Espiritu. Maited dagitoy a sagut kadagiti napudno ken ni Cristo. “Naggapu amin dagitoy a sagut iti Dios, a para iti pagimbagan dagiti annak ti Dios” (DkK 46:26).Tulongandatayo a mangammo ken mangisuro kadagiti kinapudno ti ebanghelio. Tulongandatayonto a mangbendision kadagiti dadduma. Tarabayendatayonto nga agsubli iti Nailangitan nga Amatayo. Tapno mausartayo a nainsiriban dagiti saguttayo, kasapulantayo nga ammuen no ania dagitoy, no kasano a mapadur-astayo dagitoy, ken no kasano a mabigbigtayo dagiti panangtulad ni Satanas kadagitoy.

Dakamaten dagiti nasantuan a kasuratan ti adu a sagut ti Espiritu. Naiteden dagitoy a sagut kadagiti kameng ti pudno a Simbaan idi addan daytoy iti rabaw ti daga (kitaen iti Marcos 16:16–18). Mairaman kadagiti sagut ti Espiritu dagiti sumaganad:

Ti Sagut dagiti Pagsasao (DkK 46:24)

No dadduma kasapulan ti panangisarita iti ebaghelio iti pagsasao a saan a pamiliar kadatayo. No mapasamak daytoy, mabalinnatayo a bendisionan ti Apo iti kabaelan a mangisarita iti dayta a pagsasao. Adu a misionario ti nakaawaten iti sagut dagiti pagsasao (kitaen ti ladawan iti daytoy a kapitulo). Kas pagarigan, maysa a misionario iti Holland ni Elder Alonzo A. Hinckley a nakaawat ken nakapagsarita iti bassit a pagsasao nga Olandes uray no nagkararag ken nagadal a naimbag. Idi nagsubli iti pagtaengan a sinarungkaranna idi, maysa a babai ti nangilukat iti ridaw ket nakapungtot a nakisao kenkuana iti pagsasao nga Olandes. Iti siddaawna naawatanna ti tunggal balikas. Nakarikna iti napigsa a tarigagay a mangiburay iti pammaneknekna kenkuana iti Olandes. Rinugianna ti nagsao, ket nakalawlawag dagiti panagsaona iti Olandes. Ngem idi nagsubli tapno ipakitana iti mission presidentna a makapagsaon isuna iti Olandes, awan metten ti kabaelanna nga agsao. Adu a napupudno a miembro ti naparaburanen iti sagut dagiti pagsasao. (Kitaen iti Joseph Fielding Smith, Answers to Gospel Questions, comp. Joseph Fielding Smith Jr., 5 vols. [1957–66], 2:32–33.)

Ti Sagut ti Panagipatarus kadagiti Pagsasao (DkK 46:25)

No dadduma maited daytoy a sagut kadatayo no saantayo a maawatan ti pagsasao ken no kasapulantayo nga awaten ti napateg a mensahe manipud iti Dios. Kas pagarigan, naaddaan ni Presidente David O. McKay iti dakkel a tarigagay nga agsarita kadagiti Santo iti New Zealand nga awan agipatarus iti saona. Imbagana kadakuada a sapay koma ta bendisionan ida ti Apo tapno maawatanda isuna. Nagsarita isuna iti Ingles. Nagpaut ti mensahena iti agarup 40 a minuto. Kabayatan ti panagsaritana, maibagana babaen iti ekspresion iti adu a ruprupada ken iti lua kadagiti matada a maawatanda ti mensahena. (Kitaen iti Answers to Gospel Questions, 2:30–31.)

Ti Sagut ti Panagipatarus (DkK 5:4)

No inawagandatayo dagiti dadaulo ti Simbaan a mangipatarus iti balikas ti Apo, makaawattayo iti sagut nga agipatarus iti labes ti gagangay a kabaelantayo. Kas iti amin a sagut, nasken nga agbiagtayo a sililinteg, agadaltayo a nasayaat, ken agkararagtayo tapno maawattayo daytoy. No aramidentayo dagitoy a banag, iparikna ti Dios ti ibabara ti kaunggantayo maipanggep iti kinaumno ti patarus (kitaen iti DkK 9:8–9). Addaan ni Joseph Smith iti sagut ti panagipatarus idi impatarusna ti Libro ni Mormon. Immay laeng daytoy a sagut kenkuana idi nakitunos iti Espiritu.

Ti Sagut ti Kinasirib (DkK 46:17)

Sumagmamano kadatayo ti naparaburan iti kabaelan a makaawat kadagiti tao ken dagiti pagbatayan ti ebanghelio no mayaplikarda iti panagbiagtayo. Naibaga kadatayo:

“No siasino man kadakayo ti agkurang iti kinasirib, agdawat koma iti Dios, isu a mangted a sikakaasi kadagiti isu amin, ket saan a mangpabain ket maitedto kenkuana.

“Ngem agdawat koma a babaen ti pammati nga awan ket ti panagduadua. Ta ti managduadua umasping iti maysa a dalluyon ti baybay nga iduron ti angin ket agpallayug.”

“Saan koma ngarud a panunoten daydiay a tao nga addanto ania man nga awatenna iti Apo” (Santiago 1:5–7).

Kinuna ti Apo, “Dikayo agsapul iti kinabaknang no di ketdi ti pagsiriban, ket adtoy, maiparangto kadakayo dagiti kinadatdatlag ti Dios” (DkK 6:7).

Ti Sagut ti Pannakaammo (DkK 46:18)

Tunggal maysa nga agbalin a kas iti Nailangitan nga Ama ket maammuanna ti amin a banag iti kamaudianan. Maipalgak ti pannakaammo maipapan iti Dios ken dagiti lintegna babaen iti Espiritu Santo (kitaen iti DkK 121:26). Saantayo a maisalakan no awan ti ammotayo maipapan kadagitoy a linteg (kitaen iti DkK 131:6).

Impalgak ti Apo, “No ti tao makagun-od iti ad-adu a pannakaammo ken saririt iti daytoy a biag babaen ti kinaregta ken kinatulnog ngem iti sabali, dakdakkelto nga amang ti gundawayna iti lubong nga umay” (DkK 130:19). Binilinnatayo ti Apo nga agsursuro iti amin a kabaelantayo maipapan iti aramidna. Kayatna a masursurotayo maipapan kadagiti langit, daga, dagiti banag a napasamaken ken mapasamakto, dagiti banag iti pagtaengan ken kadagiti ganggannaet a pagilian (kitaen iti DkK 88:78–79). Nupay kasta, adda dagitay agkalikagum a manggun-od iti pannakaammo iti bukodda a panagadal nga agmaymaysa. Saanda nga agkiddaw iti tulong ti Espiritu Santo. Isuda dagitay kanayon nga agad-adal ngem dida kaano man makagteng iti pannakaammo maipapan iti kinapudno (kitaen iti 2 Timoteo 3:7). No umawattayo iti pannakaammo babaen iti paltiing manipud iti Espiritu Santo, agsarita ti Espirituna iti pampanunot ken puspusotayo (kitaen iti DkK 6:15, 22–24; 8:2; 9:7–9).

Ti Sagut ti Panangisuro iti Sirib ken Pannakaammo (Moroni 10:9–10)

Maikkan ti sumagmamano a tao iti naisangsangayan a kabaelan a mangilawlawag ken mamaneknek maipapan kadagiti kinapudno ti ebanghelio. Mabalin a mausar daytoy a sagut no mangisurotayo iti klase. Mabalin nga usaren dagiti nagannak a mangisuro kadagiti annakda. Tulongannatayo pay daytoy a sagut a mangisuro kadagiti dadduma tapno maawatanda ti ebanghelio.

Ti Sagut ti Pannakaammo nga Anak ti Dios ni Jesucristo (DkK 46:13)

Daytoy ti sagut dagiti propeta ken apostol a naawagan kas naisangsangayan a saksi ni Jesucristo. Nupay kasta, naikkan pay dagiti dadduma iti daytoy a sagut. Mabalin a maaddaan ti tunggal tao iti pammaneknek babaen kadagiti arasaas ti Nasantuan nga Espiritu. Insuro ni Presidente David O. McKay : “Maited daytoy iti sumagmamano, kuna ti Apo iti Doktrina ken Katulagan, a mangammo babaen iti Espiritu Santo nga Anak ti Dios ni Jesus ken nga Isu ket nailansa iti krus gapu kadagiti basbasol ti lubong [kitaen iti DkK 46:13]. Iti daytoy a pangibasarak nga isu nga agtakder a natibker iti rabaw ti bato ti paltiing iti pammaneknek nga iburayda iti lubong” (Teachings of Presidents of the Church: David O. McKay [2003], 166).

Ti Sagut ti Panamati iti Pammaneknek dagiti Sabali DkK 46:14)

Babaen iti bileg ti Espiritu Santo maammuantayo ti kinapudno ti amin a banag. No kayattayo a maammuan no agsasao met laeng ti maysa a tao iti kinapudno, nasken a saludsodentayo iti Dios a sipapammati. No pudno ti banag nga ikarkararagantayo, agsaonto ti Apo iti kappia iti pampanunottayo (kitaen iti DkK 6:22–23). Iti kastoy a wagas maammuantayo no nakaawat ti maysa a tao, uray ti propeta, iti paltiing. Indawat ni Nephi iti Apo a makita, marikna, ken maammuanna koma a pudno ti tagtagainep ti amana (kitaen iti 1 Nephi 10:17–19).

Ti Sagut ti Panamadto (DkK 46:22)

Dagiti umawat kadagiti pudno a paltiing maipapan iti napalabas, agdama, wenno masakbayan ket addaanda iti sagut ti panamadto. Addaan dagiti propeta iti daytoy a sagut, ngem mabalintayo met ti maaddaan iti daytoy tapno makatulong kadatayo a mangituray iti bukodtayo a biag (kitaen iti 1 Taga Corinto 14:39). Mabalintayo ti umawat kadagiti paltiing manipud iti Dios para iti bagbagitayo ken kadagiti bukodtayo nga awag, ngem saan a kaano man a para iti Simbaan wenno kadagiti dadaulona. Maisuppiat daytoy iti pagtuladan ti langit para iti tao nga umawat iti paltiing para iti maysa a tao a saanna nga idadauluan. No sipupudno nga addaantayo iti daytoy a sagut ti panamadto, saantayonto nga umawat iti ania man a paltiing a maisuppiat iti kinuna ti Apo kadagiti nasantuan a kasuratan.

Ti Sagut ti Panagagas (DkK 46:19–20)

Sumagmamano ti addaan iti pammati a mangagas, ken addaan dagiti dadduma pay iti pammati a maagasan. Maaramattayo amin ti pammati a maimbagan no masakittayo (kitaen iti DkK 42:48). Adu nga addaan iti priesthood ti addaan iti sagut ti panagagas iti masakit. Mabalin a maikkan dagiti dadduma iti pannakaammo iti no kasano nga agasan ti sakit.

Ti Sagut ti Panagaramid kadagiti Milagro (DkK 46:21)

Binendisionan ti Apo dagiti taona iti adu a gundaway iti namilagruan a wagwagas. Idi intukit dagiti nagkauna a kameng [pioneer] iti Utah dagiti umuna a mulada, dumani dinadael ti linaklaksa a dudon dagitoy. Nagkararag dagiti nagkauna a kameng [pioneer] nga isalakan koma ti Apo dagiti mulada, ket nangipatulod kadagiti tumatayab iti baybay [seagull] tapno lamutenda dagiti dudon. No kasapulantayo ti tulong ket agkiddaw a sipapammati, no agpaay daytoy iti pagimbagantayo agtrabahonto ti Apo kadagiti milagro para kadatayo (kitaen iti Mateo 17:20; DkK 24:13–14).

Ti Sagut ti Pammati (Moroni 10:11)

Adda dakkel a pammati ti kabsat a lalaki ni Jared. Gapu iti pammatina, immawat kadagiti dadduma pay a sagut. Dakkel unay ti pammatina ta nagparang ti Mangisalakan kenkuana (kitaen iti Ether 3:9–15). No awan pammati, awan ti maited a sabali pay a sagut. Ikari ni Moroni, “Siasino man a mamati ken ni Cristo, nga awan ti pagduaduaanna, maited kenkuana ania man ti dawatenna iti Ama iti nagan ni Cristo” (Mormon 9:21). Nasken nga agkalikagumtayo a mangpadakkel iti pammatitayo, mangtakuat kadagiti saguttayo, ken mangusar kadagitoy.

Agkurang iti pammati ti sumagmamano a tao ken ilibakda a pudno nga adda dagitoy a sagut ti Espiritu. Kuna ni Moroni kadakuada:

“Ket agsaoak manen kadakayo a nangtallikud iti paltiing ti Dios, ket kunayo a nalpasdan, nga awan ti paltiing, wenno padto, wenno sagut, wenno panagagas, wenno pagsasao ti dila, ken ti pannakaipatarus ti pagsasao;

“Adtoy kunak kadakayo, siasino man a mangtallikud kadagitoy a banag saanna nga ammo ti ebanghelio ni Cristo; wen saanna a nabasa ti nasantuan a kasuratan; no kasta saanna a maawatan ida” (Mormon 9:7–8).

  • Apay nga ikkannatayo ti Apo kadagiti naespirituan a sagut?

Mapadur-astayo dagiti Saguttayo

  • Kasano a “sapulen[tayo] a sipapasnek dagiti kasayaatan a sagut”? (DkK 46:8).

Kinuna ti Apo: “Ta saan a maikkan ti amin iti sagut; ta adu ti sagut, ket ikkan ti Espiritu ti Dios ti tunggal tao iti sagut. Maikkan ti sumagmamano iti saggaysa, ket ti dadduma maikkan iti sabali; tapno mairanud ti amin iti kastoy a wagas” (DkK 46:11–12).

Tapno mapadur-as dagiti saguttayo, nasken a takuatentayo no ania dagiti sagut nga adda kadatayo. Aramidentayo daytoy babaen iti panagkararag ken panagayuno. Nasken a sapulentayo dagiti kasayaatan a sagut (kitaen iti DkK 46:8). No dadduma tulongannatayo dagiti bendisiontayo iti kinapatriarka no ania kadagiti sagut ti naiteden kadatayo.

Nasken a managtungpal ken napudnotayo tapno maited kadatayo dagiti saguttayo. Kalpasanna nasken nga usarentayo dagitoy a sagut nga agaramid iti aramid ti Apo. Saanda a naited a mangpennek iti kuriosidadtayo wenno mangpaneknek iti ania man a banag kadatayo gapu ta agkurangtayo iti pammati. Maipapan kadagiti naespirituan a sagut kinuna ti Apo, “Naitedda a para iti pagimbagan dagiti mangayat kaniak ken mangtungpal kadagiti amin a bilinko” (DkK 46:9).

  • Panunotem ti sumagmamano a naespirituan a sagut a mangpapigsanto mismo kenka wenno makatulong kenka nga agserbi iti Apo ken iti dadduma. Anianto ti aramidem a mangsapul kadagitoy a sagut?

Tuladen ni Satanas dagiti Sagut ti Espiritu

  • Kasano a mailasintayo dagiti pudno a sagut ti Espiritu ken dagiti panagtulad ni Satanas?

Mabalin a tuladen ni Satanas dagiti sagut ti pagsasao, pammadto, parmata, panagagas, ken dadduma pay a milagro. Nasken a makibalubal ni Moises kadagiti panagtulad ni Satanas iti korte ni Faraon (kitaen iti Exodo 7:8–22). Kayat ni Satanas a mamatitayo kadagiti palso a propetana, palso a mangngagas, ken palso nga agar-aramid iti milagro. Mabalinda ti agparang kadatayo a kasla pudnoda unay isu a ti laeng wagas a pakaammuantayo ket panagdawat iti Dios iti sagut ti panagrikna. Mabalin ti sairo mismo ti agparang a kas maysa nga anghel ti lawag (kitaen iti 2 Nephi 9:9).

Kayat ni Satanas a bulsekennatayo iti kinapudno ken lapdannatayo iti panagsapul kadagiti pudno a sagut ti Espiritu. Pinaregta ni Satanas dagiti malugluganan, astrologo, agipalpalad, ken manggagamud uray no ibagada a sursurotenda ti Dios. Makarimon iti Apo dagiti aramidda (kitaen iti Isaias 47:12–14; Deuteronomio 18:9–10). Nasken a liklikantayo ti pannakipulapol kadagiti addaaan iti bileg ni Satanas.

Nasken a Naannadtayo kadagiti Saguttayo iti Espiritu

  • Kasano a marespetotayo ti kinasagrado dagiti naespirituan a sagut?

Kinuna ti Apo, “Itedko kadakuada ti bilin a saandanto a pagpannakkel dagitoy a banag wenno irakurak iti lubong; ta naited dagitoy a banag kadakayo para iti pagimbagan ken pannakaisalakanyo” (DkK 84:73). Nasken a laglagipentayo a sagrado dagiti naespirituan a sagut (kitaen iti DkK 6:10).

Kas supapak iti panangtedna kadatayo kadagitoy a sagut, idawat ti Apo nga “agyaman[tayo] iti Dios iti Espiritu iti ania man a bendision a nakabendisionanyo” (DkK 46:32).

Dagiti Mainayon a Nasantuan a Kasuratan