Dagiti Libro ken Adalen
Ti Sagut ti Espiritu Santo

Ti Sagut ti Espiritu Santo

Kapitulo 21

A young girl being confirmed. Two men are standing behind her with their hands on her head.

Ti Espiritu Santo

Iti kapitulo 7, nasursurotayo a ti Espiritu Santo ket maysa a kameng ti Kinadios. Isu ti “kinatao ti Espiritu” (DkK 130:22). Awanan daytoy iti bagi a nagtagilasag ken nagtagitulang. Mabalin a ti impluensiana ket adda iti amin a lugar iti maysa a gundaway. Misionna ti mangipaneknek maipapan iti Ama ken ti Anak ken ti amin a kinapudno. Mainayon pay, ti Espiritu Santo ket mangpatarnaw, wenno mangpasanto kadatayo tapno maisaganatayo nga agindeg iti sidong ti Dios. Patarnawen ti Espiritu Santo ti puspusotayo tapno maawanen kadatayo ti tarigagay nga agaramid iti dakes.

Adda pagdumaan ti Espiritu Santo ken ti sagut ti Espiritu Santo. Iti daytoy a kapitulo masursurotayonto no ania ti sagut ti Espiritu Santo ken no kasano a maawattayo daytoy naindaklan a sagut manipud iti Dios.

Ti Sagut ti Espiritu Santo

  • Ania ti pagdumaan ti Espiritu Santo ken ti sagut ti Espiritu Santo?

Ti sagut ti Espiritu Santo ket ti pribilehio—a naited kadagiti tao nga addaan iti pammati ken ni Jesucristo, nabuniagan, ken nakumpirmaan a kas miembro ti Simbaan—tapno umawat iti agtultuloy a pannarabay ken pammaregta manipud iti Espiritu Santo.

Kinuna ni Joseph Smith a mamatitayo iti sagut ti Espiritu Santo a siwawadwad a masagsagrap itan a kas iti sigud kadagidi aldaw dagiti immuna nga Apostol. Mamatitayo iti daytoy a sagut iti amin a pakabuklan, bileg, kinaindaklan, ken gloriana. (Kitaen iti Teachings of Presidents of the Church: Joseph Smith (2007), 97–98.)

Mabalin a di agbayag a tarabayen ti Espiritu Santo ti maysa a tao a saanna nga awaten ti sagut ti Espiritu Santo (kitaen iti DkK 130:23). Nupay kasta, saanto nga agtultuloy daytoy a pannarabay malaksid no mabuniagan ti tao ken awatenna ti pannakaipatay dagiti dakulap para iti sagut ti Espiritu Santo. Mabasatayo iti Dagiti Aramid 10 nga immawat ti soldado a Romano a ni Cornelio iti Espiritu Santo tapno maammuanna a pudno ti ebanghelio ni Jesucristo. Ngem saan nga immawat ni Cornelio iti sagut ti Espiritu Santo agingga a kalpasan ti pannakabuniagna. Insuro ni Propeta Joseph Smith a no saan nga inawat ni Cornelio ti panagbuniag ken ti sagut ti Espiritu Santo, pinanawan koma ti Espiritu Santo isuna (kitaen iti Teachings of Presidents of the Church: Joseph Smith, 97).

Iti agdama masursuro babaen iti Espiritu Santo dagiti tao a saan a miembro ti Simbaan a pudno ti Libro ni Mormon (kitaen iti Moroni 10:4–5). Ngem dayta damo a pammaneknek ti mangibati kadakuada no saanda nga awaten ti sagut ti Espiritu Santo. Saanda a maawat ti agtultuloy a pammatalged a mabalin a sumangbay kadagiti addaan iti sagut ti Espiritu Santo.

Panangawat iti Sagut ti Espiritu Santo

  • Ania ti nasken nga aramidentayo tapno maawattayo ti kanayon a panangkadkadua ti Espiritu Santo?

Kalpasan a mabuniagan dagiti tao, makumpirmaanda a miembro ti Simbaan ken maikkanda iti sagut ti Espiritu Santo babaen iti panangipatay kadagiti dakulap. Kinuna ti Apo, “Asino man nga addaan iti pammati patalgedanyonto iti simbaanko, babaen ti panangipatay kadagiti dakulap, ket isagutkonto kadakuada ti sagut ti Espiritu Santo” (DkK 33:15).

Tunggal maikari nga elder ti Simbaan, no napusgan, ket mabalinna nga ited ti sagut ti Espiritu Santo iti sabali pay a tao. Nupay kasta, saan a naipanamnama nga umawatto dayta a tao iti pammaregta ken pannarabay manipud iti Espiritu Santo gapu laeng ta impatay dagiti elder dagiti dakulapda iti ulona. Nasken a tunggal tao ket “umawat iti Espiritu Santo.” Kayat a sawen daytoy nga umayto laeng ti Espiritu Santo kadatayo no napudnotayo ken agtarigagaytayo iti tulong manipud iti daytoy nailangitan a mensahero.

Tapno maikaritayo a maaddaan iti tulong ti Espiritu Santo, nasken a sipapasnek a kalikagumantayo ti agtungpal kadagiti bilin ti Dios. Nasken a pagtalinaedentayo a natarnaw dagiti panunot ken tignaytayo.

Panangbigbig iti Impluensia ti Espiritu Santo

Gagangay a siuulimek a makisarita kadatayo ti Espiritu Santo. Masansan a makuna ti impluensiana a kas “naalumamay a bassit a timek” (kitaen iti 1 Ar-ari 19:9–12; Helaman 5:30; DkK 85:6). Inlawlawag ni Presidente Boyd K. Packer: “Agsao ti Espiritu Santo iti timek nga ad-adda a mariknam ngem iti mangngegam. … Idinto nga isaotayo maipapan iti ‘panangdengngeg’ kadagiti arasaas ti Espiritu, masansan unay a mailadawan ti naespirituan a parikna babaen iti panagkuna, ‘Adda nariknak …’” Intuloyna: “Agsao a naalumamay ti timek ti Espiritu, a parpariknaannaka no ania ti aramidem ken no ania ti sawem, wenno mabalin a patigmaanan wenno ballaagannaka” (iti Conference Report, Okt. 1994, 77; wenno Ensign, Nob. 1994, 60).

Maysa kadagiti Kaindaklanan a Sagut ti Dios

  • Ania dagiti bendision a maawattayo babaen iti sagut ti Espiritu Santo?

Ti sagut ti Espiritu Santo ket maysa kadagiti kaindaklanan a sagut ti Dios kadatayo. Babaen iti Espiritu Santo mabalin a maammuantayo a sibibiag ti Dios, a ni Jesus ti Cristo, ken naisublin ti Simbaanna ditoy daga. Mabalin a maaddaantayo kadagiti parikna ti Espiritu Santo tapno ipakitana kadatayo ti amin a banag a nasken nga aramidentayo (kitaen iti 2 Nephi 32:5). Pasantuennatayo ti Espiritu Santo tapno maisaganatayo para iti sidong ti Dios. Mabalintayo a sagrapen dagiti sagut ti Espiritu (kitaen iti kapitulo 22 iti daytoy a libro). Daytoy a naindaklan a sagut manipud iti Nailangitan nga Amatayo ket makaisangbay iti talna iti puspusotayo ken pannakaawat kadagiti banag maipanggep iit Dios (kitaen iti 1 Taga Corinto 2:9–12).

  • Apay a ti sagut ti Espiritu Santo ti maysa kadagiti kaindaklanan a sagut ti Dios kadatayo?

Dagiti Mainayon a Nasantuan a Kasuratan