Dagiti Libro ken Adalen
Kapitulo 47: Pannakaitan-ok

Pannakaitan-ok

Kapitulo 47

Two planets orbiting in a sky where clouds show swirlling movement.

Ti Plano para iti Panagdur-astayo

Idi nagnaedtayo iti Nailangitan nga Amatayo, inlawlawagna ti maysa a plano para iti panagdur-astayo. Makapagbalintayo a kas Kenkuana, maysa a naitan-ok a tao. Kasapulan ti plano a maisinatayo Kenkuana ket umay iti daga. Kasapulan daytoy a pannakaisina tapno mapaneknekan no agtungpaltayo met laeng kadagiti bilin ti Ama nupay awantayon iti sidongna. Intuding ti plano a no naggibusen ti biag iti daga, maukom ken magunggonaantayto a mayannurot iti tukad ti pammati ken panagtungpaltayo.

Manipud kadagiti nasantuan a kasuratan maammuantayo nga adda tallo a pagarian ti gloria iti langit. Dinakamat ni Apostol Pablo nga ammona ti maysa a tao a “naipangato iti maikatlo a langit” (2 Taga Corinto 12:2). Innaganan ni Pablo ti dua kadagiti pagarian iti langit: ti celestial ken ti terestrial (kitaen iti 1 Taga Corinto 15:40–42). Ti celestial ti kangatuan, ket ti terestrial ti maikadua. Babaen iti paltiing iti ud-udina nga aldaw maammuantayo a telestial a pagarian ti maikatlo a pagarian (kitaen iti DkK 76:81). Maammuantayo pay nga adda tallo a langit wenno tukad iti ikub ti celestial a pagarian (kitaen iti DkK 131:1).

Pannakaitan-ok

  • Ania ti pannakaitan-ok?

Agnanayon a biag ti pannakaitan-ok, ti kita ti biag a pagbibiagan ti Dios. Agbibiag Isuna iti naindaklan a gloria. Perpekto wenno naan-anay Isuna. Adda amin kenkuana ti amin a pannakaammo ken amin a kinasirib. Isu ti Ama dagiti espiritu nga annak. Isu ti namarsua. Makapagbalintayo a kas iti Nailangitan nga Amatayo. Pannakaitan-ok daytoy.

No mapaneknekantayo a napudnotayo iti Apo, agbiagtayonto iti kangatuan a tukad ti celestial a pagarian ti langit. Maitan-oktayonto, tapno makipagnaed iti Nailangitan nga Ama kadagiti agnanayon a pamilia. Ti pannakaitan-ok ti kaindaklanan a sagut a maited ti Nailangitan nga Ama kadagiti annakna (kitaen iti DkK 14:7).

Dagiti Bendision ti Pannakaitan-ok

  • Ania dagiti sumagmamano a bendision a maitedto kadagiti maitan-ok?

Naan-anay ti Nailangitan nga Amatayo, ken nagloriaan iti kinapudno a mabalin para kadagiti annakna ti agbalin a kas Kenkuana. Ti aramid ken gloriana ket “mangipatungpal iti saan nga ipapatay ken agnanayon a biag ti tao” (Moises 1:39).

Dagiti umawat iti pannakaitan-ok iti celestial a pagarian babaen ti pammati ken Jesucristo ket umawatdanto kadagiti naisangsangayan a bendision. Inkari ti Apo, “Kukuada amin a banag” (DkK 76:59). Dagitoy ti sumagmamano kadagiti bendision a maited kadagiti naitan-ok a tao:

  1. Agnaeddanto iti agnanayon iti sidong ti Nailangitan nga Ama ken ni Jesucristo (kitaen iti DkK 76:62).

  2. Agbalindanto a dios (kitaen iti DkK 132:20–23).

  3. Maikaysadanto iti agnanayon kadagiti nalinteg a miembro ti pamiliada ken kabaelandanto ti maaddaan iti agnanayon a panagdur-as.

  4. Umawatdanto iti naan-anay a ragsak.

  5. Maaddaandanto iti amin a banag nga adda iti Nailangitan nga Amatayo ken ni Jesucristo— amin a bileg, gloria, masakupan, ken pannakaammo (kitaen iti DkK 132:19–20). Insurat ni Presidente Joseph Fielding Smith: “Inkari ti Ama babaen ti Anakna nga amin nga adda Kenkuana ket maitedto kadagiti natulnog kadagiti bilinna. Dumur-asdanto iti pannakaammo, kinasirib, ken bileg, bendision iti kada bendision, agingga a maibukbok kadakuada ti kinaan-anay ti naan-anay nga aldaw” (Doctrines of Salvation, comp.Bruce R. McConkie, 3 vols. [1954–56], 2:36; nagiray a balikas iti orihinal).

Dagiti Naidawat a Kasapulan para iti Pannakaitan-ok

Ita ti panawen a panangipatungpal kadagiti naidawat a kasapulan para iti pannakaitan-ok (kitaen iti Alma 34:32–34). Kinuna ni Presidente Joseph Fielding Smith, “Tapno magun-od ti pannakaitan-ok nasken nga awatentayo ti ebanghelio ken amin dagiti katulaganna; ken aramidentayo dagiti pagrebbengan nga indiaya ti Apo; ken magna iti lawag ken pannakaawat iti kinapudno; ken ‘agbiag iti tunggal balikas a nagtaud iti ngiwat ti Dios’” (Doctrines of Salvation, 2:43).

Tapno maitan-ok, nasken nga umuna a maaddaantayo iti pammati ken ni Jesucristo ket kalpasanna agibtur iti dayta a pammati agingga iti gibus ti biagtayo. Ti pammatitayo Kenkuana ket nasken a mangallukoy kadatayo nga agbabawi kadagiti basoltayo ken agtungpal kadagiti bilinna.

Bilinennatayo amin nga umawat kadagiti masinunuo nga ordinansa:

  1. Nasken a mabuniagantayo.

  2. Nasken nga awatentayo ti pannakaipatay dagiti ima tapno makumpirmaan a miembro ti Simbaan ni Jesucristo ken umawat iti sagut ti Espiritu Santo.

  3. Nasken nga awaten dagiti kakabsat a lallaki ti Melchizedek Priesthood ken padur-asenda dagiti awagda iti priesthood.

  4. Nasken nga umawattayo iti endowment iti templo.

  5. Nasken nga agkallaysatayo para iti kinaagnanayon, iti daytoy man a biag wenno iti sumaruno.

Mainayon iti panangawat kadagiti naidawat a kasapulan nga ordinansa, bilinennatayo amin ti Apo nga:

  1. Ayatentayo ti Dios ken dagiti padatayo a tao.

  2. Agtungpal kadagiti bilin.

  3. Agbabawi kadagiti biddut nga aramidtayo.

  4. Agsukisok kadagiti natayen a kabagiantayo ken awaten dagiti pangisalakan nga ordinansa ti ebanghelio para kadakuada.

  5. Dumar-ay a kanayon agingga a mabalin kadagiti miting ti Simbaan tapno mapabarotayo dagiti katulagantayo iti panagbuniag babaen ti pannakiranud iti sakramento.

  6. Ayatentayo dagiti miembro ti pamiliatayo ken papigsaen ida kadagiti wagas ti Apo.

  7. Inaldaw nga adda sangapamiliaan ken bukod a panagkararag.

  8. Isuro ti ebanghelio kadagiti dadduma babaen ti balikas ken pagwadan.

  9. Adalen dagiti nasantuan a kasuratan.

  10. Dumngeg ken tungpalen dagiti naparegta a balikas dagiti propeta ti Apo.

Kamaudiananna, kasapulan ti tunggal maysa kadatayo nga awaten ti Espiritu Santo ken sursuruen ti agtungpal iti panangiturongna iti biagtayo.

  • Kasano nga isagananatayo dagiti ordinansa ken katulagan para iti pannakaitan-ok?

  • Kasano a matulongannatayo ti pammati ken ni Jesucristo nga agtungpal kadagiti bilin?

  • Apay a nasken a sursuruentayo a suroten ti panangiturong ti Espiritu Santo tapno maitan-ok?

Kalpasan ti Panagbalintayo a Napudno ken Nakaibtur agingga iti Panungpalan

  • Ania ti mapasamak no nakapagibturtayo agingga iti panungpalan a kas napudno a disipulo ken ni Cristo?

Kinuna ti Apo, “No tungpalem dagiti bilinko ken agibturka agingga iti panungpalan maaddaanka iti agnanayon a biag, a sagut a kapatgan iti amin a sagut ti Dios” (DkK 14:7). Kinuna ni Presidente Joseph Fielding Smith, “No agtultuloytayo iti Dios; a kas iti panagtungpal kadagiti bilinna, agrukbab kenkuana ken agbiag iti kinapudnona; dumtengto ti panawen a madigustayo iti kinaan-anay ti kinapudno, a lumawlawag a lumawlawag agingga iti naan-anay nga aldaw” (Doctrines of Salvation, 2:36).

Insuro ni Propeta Joseph Smith: “No umulika iti agdan, nasken a mangrugika iti baba, ket umulika a saggaysaem dagiti pangalna, agingga a makadanonka iti ngato; ket kasta met dagiti pagbatayan ti ebanghelio—nasken a mangrugika iti umuna, ket ituloymo agingga a masursurom amin dagiti pagbatayan ti pannakaitan-ok. Ngem kalpasan ti panaglasatmo iti belo [ipapatay] mabayagto pay a panawen sakbay a maadalmo dagitoy. Saan nga amin ket maawatan iti daytoy a lubong; dakkelto nga aramid ti panangsursuro iti pannakaisalakan ken pannakaitan-oktayo uray kalpasan ti ipapatay” (Teachings of Presidents of the Church: Joseph Smith [2007], 268).

Insuro ni Joseph Smith: “Umuna a pagbatayan ti Ebanghelio ti panangammo iti pudno a Kinatao ti Dios. … Isu ket maysa idi a tao a kas kadatayo; … ti Dios mismo, ti Amatayo amin, ket nagnaed iti daga, a kas iti inaramid a mismo ni Jesucristo” (Teachings of the Prophet Joseph Smith, sel. Joseph Fielding Smith [1976], 345–46).

Ammo ti Nailangitan nga Amatayo dagiti pannuboktayo, dagiti pagkapsutantayo, ken dagiti basoltayo. Adda pannakipagrikna ken panangngaasina kadatayo. Kayatna nga agballigitayo a kas Kenkuana.

Panunoten ti ragsak nga addanto iti tunggal maysa kadatayo inton agsublitayo iti Nailangitan nga Amatayo no maisaotayo: “Ama, nagbiagak a maibatay iti pagayatam. Nagbalinak a napudno ken tinungpalko dagiti bilinmo. Maragsakanak nga agawid manen.” Ket mangngegtayo Isuna nga agkuna, “Naimbag … ; napagtalkanka iti bassit, isaadkanto nga agaywan iti adu: makipagragsakka iti apom” (Mateo 25:23).

  • Sublien nga adalen ti Mateo 25:23. Panunotem ti maipapan iti no kasano ti panagriknam no nangngegmo a sinao ti Apo kenka dagitoy a balikas.

Dagiti Mainayon a Nasantuan a Kasuratan