Pannakabukel ti Priesthood

Kapitulo 14

Adda ti Priesthood iti Daga iti Agdama

Ti Simbaan ni Jesucristo dagiti Santo iti Ud-udina nga Aldaw ket iturayan ti priesthood. Ti priesthood, a kanayon nga adda pakainaiganna iti aramid ti Dios, “nagtultuloy iti Simbaan ti Dios iti amin a kaputotan nga awanan iti punganay nga aldaw wenno ngudo ti tawen” (DkK 84:17). Adda daytoy iti daga iti agdama. Mabuniagan iti Simbaan dagiti lallaki nga agtutubo ken nataengan, ken no makednganda a maikari maordenanda iti priesthood. Maikkanda iti turay nga agtignay para iti Apo ken agaramid iti trabahona iti daga.

Dua a Dibision ti Priesthood

• Kasano a naala ti Melchizedek ken Aaronic Priesthood ti nagnaganda?

Para kadagiti mannursuro: Usarenyo dagiti saludsod iti rugi ti maysa a benneg a mangirugi iti panaglilinnawag ken iturongyo dagiti kameng ti klase wenno kameng ti pamilia iti teksto a mangsapul iti ad-adu pay nga impormasion. Usarenyo dagiti saludsod iti ungto ti maysa a benneg a mangtulong kadagiti miembro ti klase wenno miembro ti pamilia a mangutob ken mangilawlawag iti kaipapanan ti nabasadan ken mangyaplikar iti daytoy iti biagda.

Mabingay ti priesthood iti dua a paset: Ti Melchizedek Priesthood ken ti Aaronic Priesthood (kitaen iti DkK 107:1). “Naawagan ti umuna iti Kinasaserdote a Melchizedek … gapu ta naindaklan a nangato a saserdote ni Melchizedek.

“Naawagan sakbay ti aldawna iti Nasantuan a Kinasaserdote, a naibatay iti Urnos ti Anak ti Dios.

“Ngem kas iti panagdaydayaw wenno panagraem iti nagan ti Kangatuan iti Amin, tapno maliklikan ti pannakadagdagullit iti naganna, inawaganda iti simbaan, kadagiti nagkauna nga aldaw, iti kinasaserdote a naipasurot ken ni Melchizedek, wenno ti Kinasaserdote a Melchizedek” (DkK 107:2–4; nagiray a balikas iti orihinal).

Mainayon iti Melchizedek Priesthood ti nababbaba a priesthood. Maawagan daytoy iti Aaronic Priesthood gapu ta naitalek daytoy ken ni Aaron ken kadagiti annakna a lallaki nga agtultuloy kadagiti amin a kaputotanda. Adda turay wenno awtoridad dagiti addaaan iti Aaronic Priesthood tapno mangannong kadagiti agpaay iti ruar nga ordinansa ti sakramento ken panagbuniag. (Kitaen iti DkK 20:46; 107:13–14, 20.)

Addaan iti bileg ken turay dagiti addaan iti Melchizedek Priesthood tapno mangidaulo iti Simbaan ken mangiturong iti pannakaikasaba ti ebanghelio iti amin a paset ti lubong. Isuda ti mangannong iti amin a naespirituan nga aramid ti Simbaan (kitaen iti DkK 84:19–22; 107:8). Isuda ti mangiturong iti trabaho a maar-aramid kadagiti templo; isuda ti mangidaulo kadagiti ward, branch, stake, ken mision. Ti napili a propeta ti Dios, ti Presidente ti Simbaan, ti mangimatmaton a high priest ti Melchizedek Priesthood (kitaen iti DkK 107:65–67).

Dagiti Tulbek ti Priesthood

• Ania ti paggidiatan ti priesthood ken dagiti tulbek ti priesthood? Asino dagiti dadaulo ti priesthood nga umaw-awat kadagiti tulbek?

Adda paggidiatan ti pannakaorden iti maysa a saad iti priesthood ken panangawat kadagiti tulbek ti priesthood. Insuro ni Presidente Joseph F. Smith:

“Ti Priesthood iti sapasap ket ti turay wenno awtoridad a naited iti lalaki tapno agtignay para iti Dios. Tunggal lalaki a naordenan iti ania man a saad ti Priesthood ket addaan iti daytoy a turay wenno awtoridad a naitalek kenkuana.

“Ngem kasapulan a tunggal tignay a maannong iti babaen daytoy a turay ket maaramidto iti umno a panawen ken lugar, iti umno a wagas, ken maibatay iti umno nga urnos. Ti bileg a pangiturong kadagitoy nga aramid ket mangbukel kadagiti tulbek ti Priesthood. Iti pakabuklanda, iggeman ti maysa laeng a tao dagiti tulbek iti maysa a panawen, ti propeta ken presidente ti Simbaan. Mabalinna nga italek ti ania man a paset daytoy a bileg iti sabali, no la ketdi iggem dayta a tao dagiti tulbek dayta a masinunuo nga aramid. Ngarud, ti presidente ti templo, ti presidente ti stake, ti bishop ti ward, ti presidente ti mision, ti presidente ti korum, iggem ti tunggal maysa dagiti tulbek dagiti aramid a maannong iti dayta a masinunuo a grupo wenno lugar. Saan nga umadu ti Priesthoodna babaen iti daytoy a naisangsangayan a pannakatuding; … kas pagarigan, ti presidente ti korum dagiti elder ket saan nga ad-adu ti Priesthoodna ngem iti asino man a miembro dayta a korum. Ngem iggemna ti bileg a mangiturong kadagiti opisial nga aramid a maannong iti … kurom, wenno iti sabali a pannao, dagiti tulbekdayta a bingay dayta nga aramid” (Teachings of Presidents of the Church: Joseph F. Smith [1998], 141; nagiray a balikas iti orihinal).

• Kasano a masaluadan dagiti tulbek ti priesthood ti Simbaan?

Dagiti Saad ken Pagrebbengan ti Aaronic Priesthood

• Iti ania a wagwagas a pakapagserbian dagiti addaan iti Aaronic Priesthood?

No maitalek ti Aaronic Priesthood iti maysa a lalaki wenno barito, maordenan isuna iti saad iti dayta a priesthood. Dagiti saad iti Aaronic Priesthood ket deacon, teacher, priest, ken bishop. Ipatungpal ti tunggal saad dagiti pagrebbengan ken responsibilidad. Tunggal korum ket imatonan ti maysa a presidente ti korum, a mangisuro kadagiti miembro iti pagrebbenganda ken mangkiddaw kadakuada a mangipatungpal kadagiti naituding nga aramiden.

Kumappeng ti sumagmamano a lallaki iti Simbaan wenno agbalinda nga aktibo kalpasan ti pannakadanonda iti gagangay nga edad nga umawat kadagiti saad daytoy a priesthood. Gagangay a maordenanda iti maysa a saad iti Aaronic Priesthood ken iti di mabayag maordenanda kadagiti sabali pay a saad no agtalinaedda a maikari.

Deacon

Ti maysa nga agtutubo a lalaki a nabuniagan ken nakumpirmaanen a miembro ti Simbaan ken maikari ket mabalin a maordenan iti saad ti deacon no agtawen isuna iti 12. Gagangay a matudingan dagiti deacon a mangibunong iti sakramento kadagiti miembro ti Simbaan, mangpatalinaed iti nasayaat nga urnos dagiti pasdek ken paraangan ti Simbaan, agakem a kas babaonen para kadagiti dadaulo ti priesthood, ken mangipatungpal kadagiti naisangsangayan a naituding nga aramiden kas iti panangummong kadagiti daton iti panagayuno.

Teacher

Mabalin a maordenan a teacher ti maysa a maikari nga agtutubo a lalaki no agtawen isuna iti 14 wenno natataengan. Addaan dagiti teacher iti amin a pagrebbengan, karbengan, ken bileg ti saad ti deacon a mainayon dagiti dadduma pay. Dagiti teacher iti Aaronic Priesthood ket nasken a tulonganda dagiti miembro ti Simbaan nga agtungpal kadagiti bilin (kitaen iti DkK 20:53–59). Tapno makatulong a maipatungpal daytoy a pagrebbengan, gagangay a matudinganda nga agserbi a kas home teacher. Sarungkaranda dagiti pagtaengan dagiti miembro ti Simbaan ken allukoyenna ida nga agtungpal kadagiti pagbatayan ti ebanghelio. Nabilinda a mangisuro kadagiti kinapudno ti ebanghelio manipud kadagiti nasantuan a kasuratan (kitaen iti DkK 42:12). Isagana pay dagiti teacher ti tinapay ken danum para iti serbisio ti sakramento.

Priest

Mabalin a maordenan a priest ti maysa a maikari nga agtutubo a lalaki no agtawen isuna iti 16 wenno natataengan. Addaan dagiti priest iti amin a pangrebbengan, karbengan, ken bileg dagiti saad ti deacon ken teacher a mainayon ti sumagmamano a dadduma pay (kitaen iti DkK 20:46–51). Mabalin ti maysa a priest ti mangbuniag. Mabalinna pay ti mangannong iti sakramento. Mabalinna ti mangorden kadagiti dadduma pay a priest, teacher, ken deacon. Mabalin ti maysa a priest ti mangimaton kadagiti miting no awan ti addaan iti Melchizedek Priesthood. Nasken nga ikasabana ti ebanghelio kadagiti adda iti aglawlawna.

Bishop

Maordenan ken mapasingkedan [set apart] ti maysa a bishop tapno mangimaton iti Aaronic Priesthood iti maysa a ward. Isu ti presidente ti korum dagiti priest (kitaen iti DkK 107:87–88). No ak-akmenna ti saadna iti Aaronic Priesthood, kangrunaan a pagrebbengan ti bishop ti maipanggep kadagiti pakaseknan a temporal, kas iti panangimaton kadagiti pakaseknan iti kuarta ken rekord ken panangiturong iti panangaywan kadagiti napanglaw ken agkasapulan (kitaen iti DkK 107:68).

Maordenan pay ti bishop a high priest tapno maiduluanna ti amin a miembro iti ward (kitaen iti DkK 107:71–73; 68:15). Ti bishop ket maysa nga ukom iti Israel (kitaen iti DkK 107:74) ken kaumanna dagiti miembro para kadagiti rekomenda iti templo, ordinasion iti priesthood, ken dadduma pay a kasapulan. Karbenganna ti maaddaan iti sagut ti panagrikna [discernment].

• Kasano a nabendisionanka babaen iti panagserbi dagiti addaan iti Aaronic Priesthood?

Dagiti Saad ken Pagrebbengan ti Melchizedek Priesthood

• Iti ania a wagwagas a pakapagserbian dagiti addaan iti Melchizedek Priesthood?

Dagiti saad ti Melchizedek Priesthood ket elder, high priest, patriarch, Pitupulo, ken Apostol.

Elder

Dagiti elder ket naawagan a mangisuro, mangilawlawag, mangigunamgunam, mangbuniag, ken mangkita iti Simbaan (kitaen iti DkK 20:42). Elder ti amin nga addaan iti Melchizedek Priesthood. Addaanda iti turay wenno awtoridad a mangted iti sagut ti Espiritu Santo babaen iti panangipatay kadagiti dakulap (kitaen iti DkK 20:43). Nasken a mangiturong dagiti elder kadagiti miting iti Simbaan no iturong ida ti Espiritu Santo (kitaen iti DkK 20:45; 46:2). Mabalin dagiti elder ti mangannong kadagiti masakit (kitaen iti DkK 42:44) ken mangbendision kadagiti babassit nga ubbing (kitaen iti DkK 20:70). Mabalin dagiti elder ti mangidaulo kadagiti miting iti Simbaan no awan ti high priest (DkK 107:11).

High Priest

Maikkan ti maysa a high priest iti turay wenno awtoridad a mangiwardas iti Simbaan ken mangannong kadagiti naespirituan a banag (kitaen iti DkK 107:10, 12). Mabalinna pay ti mangiwardas iti amin a nababbaba a saad (kitaen iti DkK 68:19). Naordenan a high priest dagiti stake president, mission president, high councilor, bishop, ken dadduma pay a dadaulo ti Simbaan.

Patriarch

Dagiti patriarch ket inordenan dagiti General Authority, wenno dagiti stake president no pinusgan ida ti Konseho dagiti Sangapulo-ket-dua, tapno mangted iti bendision ti kinapatriarka kadagiti miembro ti Simbaan. Dagitoy a bendision ti mangted kadatayo iti sumagmamano a pannakaawat kadagiti awagtayo iti daga. Dagitoy ti balikas ti Apo a personal kadatayo. Naordenan pay a high priest dagiti patriarch. (Kitaen iti DkK 107:39–56.)

Pitupulo

Dagiti Pitupulo ket naisangsangayan a saksi ni Jesucristo iti lubong ken tumulongda iti panangbangon ken panangtimon iti Simbaan babaen ti panangiturong ti Umuna a Panguluen ken Korum dagiti Sangapulo-ket-dua nga Apostol (kitaen iti DkK 107:25, 34, 38, 93–97).

Apostol

Ti Apostol ket maysa a naisangsangayan a saksi ti nagan ni Jesucristo iti intero a lubong (kitaen iti DkK 107:23). Dagiti Apostol ti mangannong kadagiti aramid a pakaseknan ti Simbaan iti intero a lubong. Dagiti maordenan iti saad ti Apostol iti Melchizedek Priesthood ket gagangay a mapasingkedan [set apart] kas miembro ti Korum dagiti Sangapulo-ket-dua nga Apostol. Maikkan ti tunggal maysa iti amin a tulbek ti pagarian ti Dios iti daga, ngem ti laeng senior nga Apostol, nga isu ti Presidente ti Simbaan, ti sireregta a mangaramat iti amin a tulbek. Agtignay dagiti dadduma pay iti babaen ti panangiturongna.

• Kasano a nabendisionankan babaen iti panagserbi dagiti addaan iti Melchizedek Priesthood?

Dagiti Korum ti Aaronic Priesthood

Imbilin ti Apo a mabukel kadagiti korum dagiti addaan iti priesthood. Ti korum ket maysa a ragup dagiti lallaki nga agig-iggem iti isu met la a saad iti priesthood.

Adda tallo a korum ti Aaronic Priesthood:

1. Ti korum dagiti deacon, a buklen ti agingga iti 12 a deacon (kitaen iti DkK 107:85). Ti panguluen ti korum dagiti deacon ket awagan ti bishop manipud kadagiti miembro ti korum.

2. Ti korum dagiti teacher, a buklen ti agingga iti 24 a teacher (kitaen iti DkK 107:85). Ti panguluen ti korum dagiti teacher ket awagan ti bishop manipud kadagiti miembro ti korum.

3. Ti korum dagiti priest, a buklen ti agingga iti 48 a priest (kitaen iti DkK 107:87–88). Idauluan daytoy ti bishop ti ward a pakaibilangan ti korum. Ti bishop ket maysa a high priest ket ngarud maibilang pay iti korum dagiti high priest.

No agsurok ti bilang a naitudo para iti maysa a korum, mabalin a mabingay ti korum.

Dagiti Korum ti Melchizedek Priesthood

Iti lebel ti sapasap a Simbaan, mabukel a maysa a korum dagiti miembro ti Umuna a Panguluen, kas iti pannakabukel dagiti Sangapulo-ket-dua nga Apostol. Mabukel pay a korum dagiti Pitupulo.

Iti lebel ti lokal a Simbaan—kadagiti ward ken branch ken stake ken district—mabukel dagiti addaan iti Melchizedek Priesthood kadagiti sumaganad a korum:

Korum dagiti Elder

Tunggal korum dagiti elder ket “narugian para kadagiti agpapaay a ministro; nupay kasta makapagdaliasatda, maordenanda pay nga agbalin nga agpapaay a ministro” (DkK 124:137). Aramidenda ti kaaduan a trabahoda iti asideg dagiti pagtaenganda. Nasken a buklen ti korum ti agingga iti 96 nga elder, nga idauluan ti panguluen ti korum. No agsurok daytoy a bilang, mabalin a mabingay ti korum.

Korum dagiti High Priest

Iraman ti tunggal korum ti amin a high priest nga agnanaed iti uneg dagiti beddeng ti maysa a stake agraman dagiti patriarch ken bishop. Ti stake president ken dagiti mammagbagana ti panguluen daytoy a korum. Mabukel iti maysa a grupo dagiti high priest iti tunggal ward nga addaan iti lider ti grupo.

Kinapateg dagiti Korum ti Priesthood

• Kasano a makatulong dagiti korum ti priesthood a mangpapigsa iti tunggal maysa ken pamilia?

No naordenan iti priesthood, dagus nga agbalin ti maysa a lalaki wenno barito a miembro ti maysa a korum ti priesthood. Manipud iti dayta a kanito ken iti unos ti biagna, manamnama nga ikutannanto ti kinamiembrona iti maysa a korum ti priesthood a maibatay iti saadna (kitaen iti Boyd K. Packer, “What Every Elder Should Know—and Every Sister as Well: A Primer on Principles of Priesthood Government,” Ensign, Peb. 1993, 9).

No agtrabaho a nasayaat ti korum ti priesthood, dagiti miembro ti korum ket paregtaen, bendisionan, ken kasinninged, ken suruan ida iti ebanghelio dagiti dadauloda. Nupay mabalin a mapalusposan [release] ti maysa a lalaki iti awagna, kas iti teacher, quorum president, bishop, high councilor, stake president, saan nga agbalbaliw ti kinamiembrona iti korumna. Ti kinamiembro iti maysa a korum ti priesthood ket nasken a maibilang a sagrado a pribilehio.

Dagiti Auxiliary iti Priesthood

• Kasano a makatulong dagiti auxiliary iti priesthood a mangpapigsa iti tunggal maysa ken pamilia?

Agtrabaho ti amin nga organisasion iti Simbaan iti babaen ti panangiturong dagiti dadaulo ti priesthood ken tumulong kadakuada a mangipatungpal iti aramid ti Apo. Kas pagarigan, dagiti panguluen iti organisasion ti Relief Society, Young Women, Young Men, Primary, ken Sunday School iti ward ket agserbida iti babaen ti panangiturong ti bishopric. Maawagan dagitoy nga organisasion kadagiti auxiliary iti priesthood.

• Ania ti akem nga adda kenka kas maysa a tao a makatulong iti panagballigi dagiti korum ken auxiliary ti priesthood?

Dagiti Mainayon a Nasantuan a Kasuratan

• Alma 13:1–19 (wagas a nakaordenan dagiti lallaki iti priesthood)

• Mateo 16:19; DkK 68:12 (naikkan dagiti Apostol kadagiti tulbek ken bileg ti priesthood; no ania man ti ilantipda iti daga ket mailantip iti langit)

• DkK 20:38–67 (dagiti pagrebbengan dagiti elder, priest, teacher, deacon)

• DkK 84; 107 (dagiti paltiing maipapan iti priesthood)

• 1 Taga Corinto 12:14–31 (napateg ti amin a saad ti priesthood)