Dagiti Libro ken Adalen
Kapitulo 29: Ti Linteg ti Salun-at ti Apo

Ti Linteg ti Salun-at ti Apo

Kapitulo 29

A young girl eating an apple.

Templo ti Dios dagiti Bagitayo

Maysa kadagiti kaindaklan a bendision a naawattayo idi immaytayo iti daga ket ti pisikal a bagi. Kasapulantayo ti pisikal a bagi tapno agbalin a kas iti Nailangitan nga Amatayo. Napateg unay dagiti bagitayo isu nga inawagan ida ti Apo a templo ti Dios (kitaen iti 1 Taga Corinto 3:16–17; 6:19–20). Nasantuan dagiti bagitayo.

Gapu ta napateg dagiti bagitayo, kayat ti Nailangitan nga Amatayo a taripatuentayo ida a nasayaat. Ammona a makapagbalintayo a naragragsak, nasaysayaat a tattao no nasalun-attayo. Mabalin nga adda kadatayo ti Espiritu Santo no nadalus dagiti bagi ken panunottayo. Ammo ti Amatayo a maipasangotayo kadagiti pannulisog a mangtrato iti saan a nasayaat kadagiti bagitayo wenno agipaunegtayo kadagiti banag a makadangran kadagitoy. Daytoy ti gapuna nga imbagana kadatayo no ania dagiti banag a nasayaat para iti salun-attayo ken no ania dagiti banag a makapadakes. Masarakan ti kaaduan nga impormasion nga inted kadatayo ti Dios maipapan iti nasayaat a salun-at iti Doktrina ken Katulagan 89. Maawagan daytoy a paltiing iti Nainsiriban a Balikas [Word of Wisdom].

Nasken a tungpalentayo ti Nainsiriban a Balikas tapno maikaritayo a sumrek iti templo. No ditayo tungpalen ti Nainsiriban a Balikas, pumanaw kadatayo ti Espiritu ti Apo. No rugitantayo ti “templo ti Dios,” nga isu ti bagitayo, dangrantayo ti pisikal ken naespirituan a bagitayo.

Nabilintayo a Saan nga Agipauneg iti Sumagmamano a Banag iti Bagitayo

  • Ania ti imbilin kadatayo ti Apo a saantayo nga ipauneg iti bagitayo?

Binilinnatayo ti Apo a ditay agusar iti arak ken dagiti naingel nga inumen, kayatna a sawen a dagiti inumen nga adda alkoholna wenno makabartek. Insuro ti Umuna a Panguluen a masansan a mangparnuay ti naingel nga inumen iti kinaulpit, kinapanglaw, sakit, ken angol iti pagtaengan. Masansan a pagtaudan daytoy ti panagkusit, pannakapukaw ti kinadalus, ken pannakapukaw ti nasayaat a panagpampanunot. Maysa daytoy a lunod iti amin nga uminum iti daytoy. (Kitaen iti “Message of the First Presidency,” Improvement Era, Nob. 1942, 686.) Ti panaginum iti arak dagiti masikog nga inna ket mabalin a makadangran iti bagi ken panunot dagiti sikogda. Adu nga aksidente iti lugan iti tinawen ket parnuay dagiti tao nga umin-inum iti alcohol wenno makabartek nga inumen.

Imbaga pay kadatayo ti Apo a “saan a para iti bagi ti tabako” (DkK 89:8). Makadangran daytoy kadagiti bagi ken espiritutayo. Nasken a ditay agsigarilio wenno agtabako wenno agusar iti tabako a pagmuskada. Napaneknekanen dagiti sientista a mangparnuay iti adu a sakit ti tabako ken makadangran kadagiti ubbing a di pay naitao.

Binalakadannatayo pay ti Apo a maibusor iti panagusar kadagiti “napudot nga inumen” (DkK 89:9). Kinuna dagiti dadaulo ti Simbaan a kaipapanan daytoy ti kape ken tsaa, nga addaan kadagiti makadangran a sustansia. Nasken a liklikantayo amin a mainum nga addaan kadagiti makadangran a sustansia.

Nasken a ditay agusar kadagiti druga malaksid no kasapulan dagitoy a kas agas. Sumagmamano a druga ti ad-adda a makadangran ngem iti alkohol wenno makabartek nga inumen ken tabako (a makuna met a druga). Kasapulan dagiti agabuso iti druga ti dumawat iti tulong, agkararag para iti pigsa, ken agpabalakad iti bishopda tapno siaan-anayda a makapagbabawi ken agbalinda a nadalus.

Nasken a liklikantayo ti ania man a banag nga ammotayo a makadangran kadagiti bagitayo. Nasken a ditay agusar iti ania man a sustansia a makaigapu iti pannakairuam. Nasken pay a liklikantayo ti nalabes a pannangan. Saan nga ibaga kadatayo ti Nainsiriban a Balikas ti amin a banag a liklikan wenno ipaunegtayo, ngem ik-ikkannatayo kadagiti pangiwanwan. Napateg daytoy a naindagaan a paglintegan. Naindaklan a naespirituan a linteg pay daytoy. Babaen ti panagtungpal iti Nainsiriban a Balikas, agbalintayo a napigpigsa iti kinaespirituan. Dalusantayo dagiti bagitayo tapno makapagtaeng kadatayo ti Espiritu ti Apo.

  • Ania dagiti sumagmamano a banag a nasken a liklikantayo a saan a nalawag a nadakamat iti Nainsiriban a Balikas?

Naisuro Kadatayo nga Adda dagiti Banag a Nasayaat para kadagiti Bagitayo

  • Segun iti Nainsiriban a Balikas, ania dagiti sumagmamano a banag a kuna ti Apo a nasayaat para kadatayo?

Nasayaat para kadatayo dagiti prutas, natnateng, ken nasustansia a ruruot. Nasken nga usarentayo dagitoy nga addaan iti sirib ken panagyaman.

Naited pay para iti taraontayo ti lasag dagiti tumatayab ken ayup. Nupay kasta, nasken a mangantayo iti karne iti sagpaminsan (kitaen iti DkK 49:18; 89:12). Nasayaat pay a taraon para kadatayo ti ikan.

Nasayaat para kadatayo dagiti bukbukel. Nangnangruna a nasayaat pay ti trigo para kadatayo.

  • Kasano a binendisionannaka ti panagusar kadagitoy a banag?

Napateg ti Panagtrabaho, Panaginana, ken Panagwatwat

  • Ania ti pakainaigan ti panagtrabaho, panaginana, ken panagwatwat iti linteg ti salun-at ti Apo?

Kas mainayon iti Doktrina ken Katulagan 89, ibaga kadatayo dagiti dadduma pay a nasantuan a kasuratan no kasano ti agbalin a nasalun-at. Ibagada kadatayo a nasken nga “isardeng[tayo] ti agbalin a nasadut; isardeng[tayo] ti agbalin a narugit; … isardeng[tayo] ti maturog iti at-atiddog ngem iti kasapulan; maturog[tayo] a masapa, tapno masalibukagan dagiti bagi ken panunot[tayo]” (DkK 88:124). Naibaga pay kadatayo, “Innem nga aldaw nga agtrabahokanto, ket aramidem amin nga aramidmo” (Exodo 20:9). Balbalakadannatayo ti Apo a saantayo nga agtrabaho iti ad-adu pay ngem iti kabaelantayo (kitaen iti DkK 10:4).

Imbaga kadatayo ti maysa a propeta iti ud-udina nga aldaw a nasken a pagtalinaedentayo a nasalun-at dagiti bagitayo. Imbalakadna, “Kasapulan para iti napigsa a bagi dagiti nasustansia a taraon, kanayon a panagwatwat, ken umisu a pannaturog, a kas iti panangpapigsa ti agtultuloy a panagadal iti nasantuan a kasuratan ken panagkararag iti panunot ken espiritu” (Thomas S. Monson, iti Conference Report, Oct. 1990, 60; wenno Ensign, Nob. 1990, 46).

Dagiti Naikari a Bendision iti Panagtungpal iti Linteg ti Salun-at ti Apo

  • Ania dagiti bendision a sumangbay kadatayo bayat ti panagtungpaltayo iti Nainsiriban a Balikas?

Inikkannatayo ti Nailangitan nga Amatayo kadagiti linteg ti salun-at a mangisuro kadatayo no kasano nga aywanantayo dagiti bagitayo. Ibaga kadatayo dagiti nasantuan a kasuratan ti maipapan kadagiti linteg ti Dios: “Awan ti intedko a naindagaan a bilin … , ta naespirituan dagiti bilinko” (DkK 29:35). Kayatna a sawen a dagiti bilinna maipapan iti kasasaad ti bagitayo ket para iti naespirituan a pagsayaatantayo.

No tungpalentayo ti linteg ti salun-at ti Apo ken tungpalentayo dagiti bilinna, ikari ti Apo a bendisionannatayo iti salun-at ti bagi ken espiritu.

Naikariantayon iti nasayaat a salun-at ti bagi. Kas bunga daytoy nasayaat a salun-at “agtaray[tay]to a di mabannog, ket magna[tay]to a di agkapsut” (DkK 89:20). Napateg daytoy a bendision, ngem napatpateg pay dagiti naespirituan a bendision nga inkarinan kadatayo ngem dagiti bendision a mainaig iti bagi.

Ikari ti Apo kadatayo a “makasarak[tay]to iti sirib ken dakkel a kinabaknang iti pannakaammo, a kas kadagiti nailemmeng a kinabaknang” (DkK 89:19). Isuronto ti Espiritu Santo kadatayo dagiti napateg a kinapudno babaen ti paltiing. Insuro ni Presidente Boyd K. Packer: “Ti pisikal a bagitayo ti ramit ti espiritutayo. Iti dayta nakakaskasdaaw a paltiing ti Nainsiriban a Balikas, naibaga kadatayo no kasano a pagtalinaedentayo dagiti bagitayo a nawaya manipud kadagiti narugit a mabalin a mangpangudel, wenno mangdadael, kadagiti nakain-inaka a sentido ti bagi a mainaig iti naespirituan a pannakisao. Ti Nainsiriban a Balikas ket tulbek iti paltiing ti tunggal maysa” (iti Conference Report, Okt. 1989, 16; wenno Ensign, Nob. 1989, 14).

Ikari pay ti Apo a liklikannatayonto ti anghel a manangdadael. Kinuna ni Presidente Heber J. Grant, “No agtarigagaykayo ken agtarigagayak kadagiti bendision ti biag, ti salun-at, ti pigsa ti bagi ken panunot; no tarigagayantayo a liklikannatayo ti anghel a managdadael, a kas iti inaramidna kadagiti aldaw dagiti annak ti Israel, nasken a tungpalentayo ti Nainsiriban a Balikas; kalpasanna masinunuo ti Dios, ket sumangbayto ti bendision kadatayo” (Teachings of Presidents of the Church: Heber J. Grant [2002], 192).

  • Kasano a matulongantayo a maawatan dagiti ubbing ken agtutubo ti agnanayon a kinapateg ti Nainsiriban a Balikas?

  • Ania ti maaramidtayo a makatulong kadagiti miembro ti pamilia wenno gagayyem a marigatan nga agtungpal iti Nainsiriban a Balikas?

Dagiti Mainayon a Nasantuan a Kasuratan