Aramid iti Templo ken Family History

Kapitulo 40

Kayat ti Nailangitan nga Ama nga Agsubli Kenkuana dagiti Annakna

Ipatalged ti Pannubbot ni Jesucristo iti tunggal maysa kadatayo nga agungar ken agbiagtayonto iti agnanayon. Ngem no nasken nga agbiagtayo iti agnanayon a kadenna dagiti pamiliatayo iti sidong ti Nailangitan nga Ama, nasken nga aramidentayo ti amin nga imbilin ti Mangisalakan nga aramidentayo. Iraman daytoy ti panagpabuniag ken panagpakumpirma ken panangawat kadagiti ordinansa ti templo.

Kas miembro ti Ti Simbaan ni Jesucristo dagiti Santo iti Ud-udina nga Aldaw, tunggal maysa kadatayo ket binuniagan ken kinumpirmaan ti maysa a tao nga addaan iti umno a turay wenno awtoridad ti priesthood. Mabalin met ti tunggal maysa kadatayo ti mapan iti templo tapno umawat kadagiti pangisalakan nga ordinansa ti priesthood a maan-annong idiay. Ngem adu nga annak ti Dios ti awanan kadagitoy isu met la a gundaway. Nagbiagda iti panawen wenno lugar a saanda pay a mabalin a gun-oden ti ebanghelio.

Kayat ti Nailangitan nga Ama nga agsubli ken makipagtaeng Kenkuana ti amin nga annakna. Kadagitay natay a saan pay nabuniagan wenno awanan pay kadagiti ordinansa ti templo, nangted Isuna iti maysa a wagas a pakaaramidan daytoy. Kiniddawna kadatayo nga annongentayo dagiti ordinansa para kadagiti kapuonantayo kadagiti templo.

Dagiti Templo ti Apo

• Apay a napateg dagiti templo iti biagtayo?

Para kadagiti mannursuro: Makaparnuay iti interes dagiti ladawan ken makatulong kadagiti agsursuro a mangpadur-as iti pannakaawatda. Ibilangyo ti panangkiddaw kadagiti miembro ti klase wenno miembro ti pamilia a mangutob iti riknada maipapan iti aramid ti templo bayat ti panagbuyada iti ladawan ti maysa a templo iti daytoy a kapitulo.

Naisangsangayan a pasdek dagiti templo ti Ti Simbaan ni Jesucristo dagiti Santo iti Ud-udina nga Aldaw a naidaton iti Apo. Mabalin dagiti maikari a miembro ti Simbaan ti mapan sadiay tapno umawat kadagiti sagrado nga ordinansa ken agaramid kadagiti katulagan iti Dios. Kas iti panagbuniag, kasapulan dagitoy nga ordinansa ken katulagan para iti pannakaisalakantayo. Nasken a maannongda kadagiti templo ti Apo.

Mapantayo pay iti templo tapno agsursuro iti ad-adu maipapan iti Nailangitan nga Ama ken ti Anakna, ni Jesucristo. Makagun-odtayo iti nasaysayaat a pannakaawat maipapan iti panggeptayo iti biag ken ti pakainaigantayo iti Nailangitan nga Ama ken ni Jesucristo. Masuruantayo maipapan iti biagtayo sakbay ti biag iti daga, ti kaipapanan ti biag iti daga, ken ti biag kalpasan ti ipapatay.

Paglantipen dagiti Ordinansa ti Templo dagiti Pamilia iti Agnanayon

• Ania ti kaipapanan ti mailantip?

Maannong amin nga ordinansa ti templo babaen ti bileg ti priesthood. Babaen daytoy a bileg, mailantip, wenno mabegkes, iti langit dagiti ordinansa a maannong iti daga. Insuro ti Mangisalakan kadagiti Apostolna, “Ania man a galutamto ditoy daga, magalutanto idiay langit” (Mateo 16:19; kitaen met iti DkK 132:7).

Iti laeng templo a mabalintayo a mailantip a sangkamaysa iti agnanayon a kas pamilia. Ti kallaysa iti templo ti mamagtipon iti maysa a babai ken ken maysa a lalaki a kas agassawa iti agnanayon no dayawenda dagiti katulaganda. Ti panagbuniag ken ti amin a dadduma pay nga ordinansa ket mangisagana kadatayo para iti daytoy sagrado a pagteng.

No agkallaysa ti lalaki ken babai iti templo, dagiti annakda a mayanak kalpasanna ket agbalin met a paset ti agnanayon a pamiliada. Mabalin dagiti agassawa a nagkallaysa iti sibil ti umawat kadagitoy a bendision babaen ti panangisaganada iti bagbagida ken dagiti annakda a mapan iti templo ket mailantipda iti tunggal maysa. Dagiti nagannak a legal nga agampon kadagiti ubbing ket mabalinda nga ilantip dagita nga ubbing kadakuada.

• Ania ti nasken nga aramiden dagiti agassawa tapno maaramid a nasamay ti bileg a pangilantip iti kallaysada?

Kasapulan dagiti Kapuonantayo ti Tulongtayo

• Ania dagiti pagrebbengantayo kadagiti kapuonantayo a pimmusay a saan pay a nakaawat kadagiti ordinansa ti priesthood?

Inkallaysa ni Mario Cannamela ni Maria Vitta idi 1882. Nagindegda idiay Tripani, Italy, a nangpatanoranda iti pamilia ken naglinnak-amanda iti ragsak iti uneg ti adu a nakaskasdaaw a tawen. Saan a nangngeg da Mario ken Maria ti mensahe ti naisubli nga ebanghelio ni Jesucristo idi sibibiagda pay. Saanda a nabuniagan. Awananda idi iti gundaway a mapan iti templo ken mailantip a sangkamaysa a kas agnanayon a pamilia. Iti ipapatay, naggibus ti kallaysada.

Kalpasan ti nasurok a maysa a siglo maysa a dakkel a panagtitipon ti napasamak. Napan dagiti an-annabo da Mario ken Maria iti Los Angeles Temple, a nagparintumengan iti altar ti maysa nga apoko iti tumeng ken ti asawana ket nagserbida a kas proxy para iti pannakailantip da Mario ken Maria. Napno iti lua dagiti matada bayat ti pannakipagrag-oda kada Mario ken Maria.

Adu kadagiti kapuonantayo ti maibilang kadagiti pimmusay a saan pay a nakangngeg maipapan iti ebanghelio bayat ti kaaddada iti daga. Agnanaedda itan iti lubong dagiti espiritu (kitaen ti kapitulo 41 iti daytoy a libro). Sadiay a maisuro kadakuada ti ebanghelio ni Jesucristo. Agur-uray dagiti immawat iti ebanghelio kadagiti ordinansa ti templo a maannong para kadakuada. Bayat ti panangannongtayo kadagitoy nga ordinansa iti templo para kadagiti kapuonantayo, mabalintayo ti makipagrag-o kadakuada.

• Kasano nga ipakita ti doktrina ti pannakaisalakan para kadagiti natay ti hustisia, pannakipagrikna, ken panangngaasi ti Dios?

• Ania dagiti padasyo iti panagaramidyo iti aramid ti templo para kadagiti kapuonanyo?

Family History—Kasano nga Irugitayo ti Panangtulong kadagiti Kapuonantayo

• Ania dagiti kangrunaan nga addang iti panangaramid iti family history work?

Maparegta dagiti Santo iti Ud-udina nga Aldaw a makiraman kadagiti aktibidad iti family history. Babaen kadagitoy nga aktibidad ammuentayo ti maipapan kadagiti kapuonantayo tapno maannongtayo dagiti ordinansa para kadakuada. Iraman ti family history ti tallo a kangrunaan nga addang:

1. Lasinem dagiti kapuonam.

2. Ammuem no asino kadagiti kapuonan ti agkasapulan kadagiti maannong nga ordinansa iti templo.

3. Penken a maannong dagiti ordinansa para kadakuada.

Kaaduan a ward ken branch ti addaan kadagiti family history consultant a makasungbat kadagiti saludsod ken makaiturong kadatayo kadagiti kasapulantayo a banag. No awanan ti ward wenno branch iti family history consultant, mabalin ti bishop wenno branch president ti mangted iti pangiturong.

Lasinentayo dagiti Kapuonantayo

Tapno maannong dagiti ordinansa ti templo para kadagiti kapuonantayo, kasapulan nga ammuentayo dagiti naganda. Adu a nakakaskasdaaw a pagalaan ti mabalintayo nga usaren ita a makatulong kadatayo a mangilasin iti nagnagan dagiti kapuonantayo.

Maysa a nasayaat a wagas tapno mairugitayo ti mangurnong iti impormasion maipapan kadagiti kapuonantayo ket babaen ti panangkita no ania dagiti adda kadatayo iti bukodtayo a pagtaengan. Mabalin nga addaantayo kadagiti sertipiko ti pannakayanak, panagkallaysa, wenno ipapatay. Mabalin a makakitatayo pay kadagiti Biblia ti pamilia, obituario, family history, wenno listaan ti padpadas ken journal. Mainayon pay, mabalintayo ti agdamag kadagiti kabagian maipapan iti impormasion nga adda kadakuada. Kalpasan ti panangurnong iti impormasion kadagiti pagtaengantayo ken manipud kadagiti kapuonantayo, mabalintayo ti agsukisok kadagiti dadduma pay a pagalaan, kas iti FamilySearch.org. Mabalintayo pay ti sumarungkar iti maysa kadagiti lokal a sentro ti family history ti Simbaan.

Agpannurayto ti kaadu ti maammuantayo iti no ania nga impormasion ti mabalintayo a gun-oden. Mabalin nga addaantayo laeng iti bassit nga impormasion iti pamilia ken mabalin nga awanen ti sabali pay a maaramid no di ti panangilasin kadagiti nagannak ken lelang wenno lelongtayo. No addaantayon iti adu a natipon a rekord ti pamilia, mabalintayon a lasinen dagiti kapuonantayo manipud kadagiti kaputotan iti napalabas a panawen.

Mabalintayo nga isurat ti impormasion a maurnongtayo kadagiti family group record ken pedigree chart.

Ammuem No Asino kadagiti Kapuonan ti Agkasapulan kadagiti Maannong nga Ordinansa iti Templo

Maan-annongen dagiti ordinansa iti templo para kadagiti natay manipud pay kadagiti nagkauna nga aldaw ti Simbaan. Gapu iti daytoy, mabalin a sumagmamanon nga odinansa para kadagiti kapuonantayo ti naannongen. Tapno maammuan no asino dagiti kapuonan nga agkasapulan kadagiti ordinansa ti templo, mabalintayo ti agsapul iti dua a lugar. Dagiti bukodtayo a rekord ti pamilia ket mabalin nga addaanda iti impormasion maipapan iti no ania ti naaramiden. No awan, ti Simbaan ket addaan iti rekord ti amin nga ordinansa a naannongen iti templo. Mabalin a matulongannakayo ti family history consultant iti ward wenno branchyo iti daytoy nga aramid a panagkagumaan.

Penken a Maannong dagiti Ordinansa

Adu kadagiti kapuonantayo iti lubong dagiti espiritu ti mabalin nga agtarigagay nga umawat kadagiti ordinansa ti templo. Apaman a malasintayo dagitoy a kapuonan, nasken nga agsaganatayo para iti daytoy nga aramid a maaramidto para kadakuada.

Maysa kadagiti bendision ti family history work ket sumangbay manipud iti ipapan iti templo ken panangannong kadagiti ordinansa nga agpaay kadagiti kapuonantayo. Nasken nga isaganatayo ti bagbagitayo tapno umawat iti temple recommend tapno, no mabalin, maaramidtayo daytoy nga aramid. No dagiti annaktayo ket agtawen iti 12 wenno natataengan, mabalinda ti makipaglak-am kadagitoy a bendision babaen ti panagpabuniag ken panagpakumpirma para kadagiti kapuonanda.

No di mabalin para kadatayo ti mapan iti templo tapno makiraman kadagiti ordinansa, ti templo ti makipagurnos tapno dagiti ordinansa ket annongento dagiti dadduma pay a miembro ti Simbaan.

• Kasano a tinulongannakan ti Apo wenno dagiti miembro ti pamiliam a nagsapul iti impormasion maipapan kadagiti kapuonanyo?

Dagiti Mainayon a Gundaway para iti Family History

• Ania dagiti sumagmamano a simple a wagas para iti maysa a tao nga addaan iti adu a pagrebbengan tapno makiraman iti family history work?

Mainayon iti panangted kadagiti ordinansa ti templo para kadagiti kapuonan nga ammotayo, makatulongtayo kadagiti adda iti lubong dagiti espiritu iti adu a dadduma pay a wagas. Nasken a kalikagumantayo a gun-oden ti pannarabay ti Espiritu bayat ti sikakararag a panangibilangtayo iti mabalin nga aramidentayo. Agpannuray kadagiti kasasaadtayo, mabalintayo nga aramiden dagiti sumaganad a banag:

1. Kanayon a dumar-ay agingga a mabalin iti templo. Kalpasan a nakapantayon iti templo para iti bagbagitayo, mabalintayo ti mangannong kadagiti pangisalakan nga ordinansa para kadagiti dadduma pay nga agur-uray iti lubong dagiti espiritu.

2. Agaramid iti panagsukisok tapno maammuan dagiti kapuonan a narigrigat a mabirokan. Mabalindatayo a tarabayen dagiti family history consultant kadagiti makatulong a pagalaan.

3. Tumulong iti indexing program ti Simbaan. Babaen daytoy a programa, isagana dagiti miembro ti genealogical information a mausar kadagiti family history computer program ti Simbaan. Dagitoy a programa ti ad-adda a mangpalaka para kadatayo a mangilasin kadagiti kapuonantayo.

4. Mangted iti impormasion ti family history kadagiti agdama a programa ti computer iti Simbaan para iti family history. Aglaon dagitoy a programa kadagiti kapupuon [genealogy] nga inted dagiti tao iti intero a lubong. Palugodanda dagiti tao a mangibinglay iti impormasion ti pamiliada. Mabalin a mangted dagiti family history consultant iti ad-adu pay nga impormasion maipapan kadagiti programa ti computer iti Simbaan.

5. Makiraman kadagiti organisasion ti pamilia. Makaileppastayo iti ad-adu pay para kadagiti kapuonantayo bayat ti pannakitinnulongtayo kadagiti dadduma pay a miembro ti pamilia.

• Panunotem ti maipapan iti mabalinmo nga aramiden tapno manayonan ti pannakiramanmo iti aramid ti templo ken family history.

Dagiti Mainayon a Nasantuan a Kasuratan

• 1 Pedro 4:6 (naikasaba ti ebanghelio kadagiti natay)

• Malakias 4:5–6; DkK 2:2; 3 Nephi 25:5–6 (mision ni Elias)

• 1 Taga Corinto 15:29; DkK 128:15–18 (aramid para kadagiti natay)

• DkK 138 (pannakasubbot dagiti natay)