Dagiti Libro ken Adalen
Kapitulo 34: Panangpadur-as kadagiti Talentotayo

Panangpadur-as kadagiti Talentotayo

Kapitulo 34

A male art student painting as he looks away at a model or object that he is painting.

Addaantayo Amin iti Agduduma a Talento ken Kabaelan

Addaantayo amin kadagiti naisangsangayan a sagut, talento, ken kabaelan nga inted kadatayo ti Nailangitan nga Amatayo. Idi nayanaktayo, naisigud kadatayo dagitoy a sagut, talento, ken kabaelan (kitaen ti kapitulo 2 iti daytoy a libro).

Naindaklan a dadaulo ni propeta Moises, ngem kinasapulanna ni Aaron, ti kabsatna, tapno tumulong a kas tagapagsarita (kitaen iti Exodo 4:14–16). Dadaulo ti sumagmamano kadatayo a kas ken ni Moises wenno nalaing nga agsarita a kas ken ni Aaron. Sumagmamano kadatayo ti nalaing a kumanta wenno agtokar iti instrumento. Mabalin a nalaing iti isport wenno ay-ayam dagiti dadduma kadatayo wenno makapagtrabaho a nasayaat babaen kadagiti imatayo. Dagiti dadduma pay a talento a mabalin nga adda kadatayo ket ti kinamannakaawat kadagiti dadduma, kinaanus, kinaragsak, wenno ti kabaelan a mangisuro kadagiti dadduma.

  • Kasano a natulongannaka dagiti talento dagiti dadduma?

Nasken nga Usaren ken Padur-asentayo dagiti Talentotayo

  • Kasano a mapadur-astayo dagiti talentotayo?

Addaantayo iti pagrebbengan a mangpadur-as kadagiti talento a naited kadatayo. No dadduma ipapantayo nga awanantayo iti adu a talento wenno nabendisionan dagiti dadduma a tao iti ad-adu pay a kabaelan ngem iti adda kadatayo. No dadduma saantayo nga us-usaren dagiti talentotayo gapu ta mabutengtayo amangan ta mapaaytayo wenno dillawen laeng dagiti dadduma. Nasken a ditayo ilemmeng dagiti talentotayo. Nasken nga usarentayo dagitoy. Iti kasta makita dagiti dadduma dagiti naimbag nga aramidtayo ket dayawenda ti Nailangitan nga Amatayo (kitaen iti Mateo 5:16).

Adda dagiti masinunuo a banag a nasken nga aramidentayo tapno mapadur-as dagiti talentotayo. Umuna, nasken a takuatentayo dagiti talentotayo. Nasken nga amirisentayo ti bagbagitayo tapno maammuan dagiti pagpigsaan ken kabaelantayo. Makatulong kadatayo dagiti pamilia ken gagayyemtayo a mangaramid iti daytoy. Nasken pay a kiddawentayo iti Nailangitan nga Amatayo a tulongannatayo a mangammo maipapan kadagiti talentotayo.

Maikadua, nasken a natallugodtayo a mangbubos iti panawen ken mangikarigatan a mangpadur-as iti talento a kalkalikagumantayo.

Maikatlo, nasken a maaddaantayo iti pammati a tulongannatayo ti Nailangitan nga Amatayo, ken nasken nga adda pammatitayo kadagiti bagitayo.

Maikapat, nasken nga ammuentayo dagiti paglaingan a kasapulantayo a mangpadur-as kadagiti talentotayo. Mabalin a maaramidtayo daytoy babaen ti panagadal, panangkiddaw iti maysa a gayyem a mangisuro kadatayo, wenno panagbasa iti maysa a libro.

Maikalima, nasken nga agsanaytayo a mangusar iti talentotayo. Kasapulan ti panagkagumaan ken aramid tapno mapadur-as ti tunggal talento. Nasken a maullo ti panagsanay iti maysa a talento.

Maikanem, nasken nga ibinglaytayo ti talentotayo kadagiti dadduma. Iti babaen ti panangusartayo kadagiti talentotatayo a dumur-asda (kitaen iti Mateo 25:29).

Amin dagitoy nga addang ket nalaklaka nga aramiden no agkararag ken dawatentayo ti tulong ti Apo. Kayatna a padur-asentayo dagiti talentotayo, ket tulongannatayto.

Mapadur-astayo dagiti Talentotayo iti Laksid dagiti Pagkapsutantayo

  • Kasano a mapadur-astayo dagiti talentotayo iti laksid dagiti pagkapsutantayo?

Gapu ta mortal ken natnagtayo, addaantayo kadagiti pagkapsutan. Babaen ti tulong ti Apo, mabalintayo a parmeken ti pagkapsutan ken natnag a kasasaadtayo (kitaen iti Ether 12:27, 37). Insurat ni Beethoven ti kapintasan a musikana kalpasan ti pannakabulsekna. Naparmek ni Enoc ti kinabuntogna nga agsao tapno agbalin a nasamay a mannursuro (kitaen iti Moises 6:26–47).

Sumagmamano a naindaklan nga atleta ti nangparmek kadagiti pagkuranganda sakbay a nagballigida a nangpadur-as kadagiti talentoda. Ni Shelly Mann ti maysa a pagarigan ti kasta. “Napolio isuna idi agtawen ti lima. … Inaldaw nga impan dagiti nagannak kenkuana iti paglalangoyan a nangnamnamaanda a makatulong ti danum a mangitag-ay kadagiti imana bayat ti panangikariganna a mangusar manen kadagitoy. Idi maingatonan dagiti imana iti danum babaen ti bukodna a pigsa, nakasangit iti ragsakna. Kalpasanna pinanggepna a malangoy ti kaakabaan a paset ti paglalangoyan, sa ti kaatiddogan, kalpasanna ti sumagmamano a kaatiddogan. Nagtultuloy iti panangikarigatan, panaglangoy, panagibturna, iti inaldaw, agingga a nangabak isuna iti [Olympic] medalia a balitok para iti butterfly stroke—maysa kadagiti karigatan iti amin a wagas ti panaglangoy” (Marvin J.Ashton, in Conference Report, Abr. 1975, 127; wenno Ensign, Mayo 1975, 86).

Naparmek ni Heber J. Grant ti adu kadagiti pagkapsutanna ket pinagbalinna ida a talentona. “Ti banag a kanayontayo nga ar-aramiden ket agbalin a nalaklaka para kadatayo nga aramiden; saan a gapu ta nabaliwan ti kasasaad ti banag, ngem gapu ta pimmigsa ti kabaelantayo nga agaramid” (iti Teachings of Presidents of the Church: Heber J. Grant [2002], 35).

Bendisionannatayo ti Apo No Usarentayo a Nainsiriban dagiti Talentotayo

Kinuna ni Presidente Joseph F. Smith, “Tunggal lalaki ken babai nga anak ti Dios ket immawat iti talento, ket tunggal maysa agsungbatto iti panangusar wenno di panangusar iti nasken a pakausaranna” (Gospel Doctrine, 5th ed. [1939], 370). Ti maysa a talento ket maysa a kita ti panangimaton (pagrebbengan iti pagarian ti Dios). Isalaysay kadatayo ti pangngarig dagiti talento a no agserbitayo a nasayaat iti panangimatontayo, maikkantayto iti daddadakkel a pagrebbengan. No saantayo nga agserbi a nasayaat, maibabawinto iti kamaudiananna ti panangimatontayo. (Kitaen iti Mateo 25:14–30.)

Naibaga pay kadatayo kadagiti nasantuan a kasuratan a magunggonaantayto a mayannurot kadagiti aramidtayo (kitaen iti Mateo 16:27). Babaen ti panangpadur-as ken panangusar kadagiti talentotayo para kadagiti dadduma a tao, agar-aramidtayo kadagiti nasayaat nga aramid.

Maragsakan ti Apo no usarentayo a nainsiriban dagiti talentotayo. Bendisionannatayonto no usarentayo dagiti talentotayo a mangpaimbag kadagiti dadduma a tao ken tapno mangbangon iti pagarianna iti daga. Sumagmamano kadagiti bendision a magun-odtayo ket ragsak ken ayat manipud iti panagserbi kadagiti kakabsattayo ditoy daga. Masursurotayo pay ti panangteppel iti bagi. Kasapulan amin dagitoy a banag no kayattayo ti agbalin a maikari a makipagtaeng manen iti Nailangitan nga Amatayo.

  • Ania dagiti sumagmamano a pagarigan ti tattao a napadur-as dagiti talentoda gapu ta inusarda a nainsiriban dagitoy? (Ibilang dagiti tao nga am-ammom wenno dagiti tao kadagiti nasantuan a kasuratan wenno pakasaritaan ti Simbaan.)

Dagiti Mainayon a Nasantuan a Kasuratan