Dagiti Libro ken Adalen
Kapitulo 23: Ti Sakramento

Ti Sakramento

Kapitulo 23

Jesus Christ depicted preparing the sacrament for the Last Supper.

Inyam-ammo ni Cristo ti Sakramento

  • Ania ti isuro dagiti tanda ti sakramento maipapan iti Pannubbot ni Jesucristo?

Kayat ti Mangisalakan a laglagipentayo ti naindaklan a pangsubbot a sakripisiona ken agtungpaltayo kadagiti bilinna. Tapno matulongannatayo a mangaramid iti daytoy, binilinnatayo nga agtataripnong a masansan ket makiranudtayo iti sakramento.

Ti sakramento ket nasantuan nga ordinansa ti priesthood a makatulong a mangipalagip kadatayo maipapan iti Pannubbot ti Mangisalakan. Kabayatan ti sakramento, makiranudtayo iti tinapay ken danum. Aramidentayo daytoy kas panglaglagip iti lasagna ken darana, nga intedna a kas sakripisiona para kadatayo. No makiranudtayo iti sakramento, pabaruentayo dagiti sagrado a katulagan iti Nailangitan nga Amatayo.

Nabiit sakbay ti Pannakailansana iti krus, inummong ni Jesucristo dagiti Apostolna iti aglawlawna iti maysa a dakkel a salas. Ammona nga asidegen ti ipapatayna iti krus. Daytoy ti maudi a gundaway a pannakisangona kadagitoy ipatpategna a lallaki sakbay ti ipapatayna. Kayatna ida a kanayon a manglaglagip Kenkuana tapno agbalinda a napigsa ken napudno.

Tapno matulongan ida a manglaglagip, inyam-ammona ti sakramento. Pinirsapirsayna ti tinapay key binendisionanna daytoy. Kalpasanna kinunana, “Mangalakayo, mangankayo; daytoy ti panglagip iti bagik nga itedko a pangsaka kadakayo” (Patarus ni Joseph Smith, Mateo 26:22). Kalpasanna innalana ti kopa ti arak, binendisionanna daytoy, intedna kadagiti Apostolna nga inumenda, ket kinunana, “Daytoy ti panglagip iti darak … , a nagsayasay para kadagiti amin a mamatinto iti naganko, para iti pannakaugas dagiti basbasolda” (Patarus ni Joseph Smith, Mateo 26:24; kitaen met iti Mateo 26:26–28; Marcos 14:22–24; Lucas 22:15–20).

Kalpasan ti Panagungarna, immay ti Mangisalakan kadagiti kontinente ti America ket insurona kadagiti Nephite ti isu met la nga ordinansa (kitaen iti 3 Nephi 18:1–11; 20:1–9). Kalpasan ti pannakaisubli ti Simbaan kadagiti ud-udina nga aldaw, binilin manen ni Jesus dagiti taona a makiranud iti sakramento kas panglaglagip Kenkuana, a kunkunana, “Mayalubog unay ti masansan a panagmimiting ti simbaan tapno makiranud iti tinapay ken danum a panglagip ken ni Apo Jesus” (DkK 20:75).

No Kasano a Maannong ti Sakramento

Ilawlawag a nasayaat dagiti nasantuan a kasuratan no kasano ti nasken a pannakaannong ti sakramento. Agmimiting dagiti miembro ti Simbaan iti tunggal aldaw ti Sabbath tapno agdaydayaw ken makiranudda iti sakramento (kitaen iti DkK 20:75). Ti sakramento ket an-annongen dagiti addaan iti kasapulan a turay wenno awtoridad ti priesthood. Pirsapirsayen ti maysa a priest wenno ti addaan iti Melchizedek Priesthood ti tinapay, agparintumeng, ket bendisionanna daytoy (kitaen iti DkK 20:76). Ibunong ti maysa a deacon wenno ti dadduma pay nga addaan iti priesthood ti tinapay ti sakramento iti kongregasion. Kalpasanna bendisionan ti priest wenno ti addaan iti Melchizedek Priesthood ti danum, ken maibunong met daytoy kadagiti miembro. Inikkan ni Jesus dagiti disipulona iti arak idi inyam-ammona ti sakramento. Nupay kasta, iti paltiing iti ud-udina nga aldaw kinunana a saan a nasken no ania ti kanen ken inumentayo kabayatan ti sakramento no la ketdi laglagipentayo Isuna (kitaen iti DkK 27:2–3). Iti agdama, uminum iti danum dagiti Santo iti Ud-udina nga Aldaw imbes nga arak.

Impalgak ni Jesus dagiti umno a balikas para kadagiti agpada a kararag ti sakramento. Nasken a dumngegtayo a naimbag kadagitoy napipintas a kararag ket padasentayo nga awaten no ania dagiti ikarkaritayo ken no ania ti maikarkari kadatayo. Adtoy ti kararag a maidaton a pangbendision iti tinapay:

“O Dios, Agnanayon nga Ama, dawatenmi kenka iti nagan ti Anakmo, ni Jesucristo, a bendisionan ken pasantuem daytoy a tinapay kadagiti kararua dagiti amin a mairanud iti daytoy, tapno lak-amenda a silalagip ti bagi ti Anakmo, ken paneknekanda kenka, O Dios, Agnanayon nga Ama, tapno siaayatda a mangawat iti nagan ti Anakmo, ken kanayon a laglagipenda, ken tungpalenda dagiti bilin nga intedna kadakuada; tapno kanayon nga agtaeng kadakuada ti Espirituna. Amen” (DkK 20:77).

Adtoy ti kararag a maidaton a pangbendision iti danum:

“O Dios, Agnanayon nga Ama, dawatenmi kenka iti nagan ti Anakmo, ni Jesucristo, a bendisionan ken pasantuem daytoy a [danum] kadagiti kararua dagiti amin nga uminum iti daytoy, tapno aramidenda a silalagip iti dara ti Anakmo, a nagsayasay gapu kadakuada; tapno paneknekanda kenka, O Dios, Agnanayon nga Ama, tapno kanayon a laglagipenda, tapno agtaeng kadakuada ti Espirituna. Amen” (DkK 20:79).

Maannong a simple unay ken siraraem ti ordinansa ti sakramento.

  • Amirisem a nasayaat dagiti kararag iti sakramento. Panunoten maipapan iti kaipapanan ti tunggal ragup ti balikas.

Dagiti Katulagan a Pabaruentayo Kabayatan ti Sakramento

  • Ania dagiti katulagan a pabaruentayo kabayatan ti sakramento? Ania dagiti bendision nga ikari ti Apo kadatayo no tungpalentayo dagidiay a katulagan?

Tunggal kanito a makiranudtayo iti sakramento, pabaruentayo dagiti katulagan iti Apo. Ti katulagan ket sagrado a kari iti nagbaetan ti Apo ken dagiti annakna. Dagiti katulagan nga aramidentayo ket silalawag a madakamat kadagiti kararag iti sakramento. Napateg a maammuan no ania dagidiay a katulagan ken no ania ti kaipapananda.

Makitulagtayo a siaayattayo a mangawat iti bagbagitayo ti nagan ni Jesucristo. Babaen iti daytoy ipakitatayo a siaayattayo a mabigbig Kenkuana ken ti Simbaanna. Agkumittayo nga agserbi Kenkuana ken iti padatayo a tao. Agkaritayo a ditayto mangted iti pakaibabainan wenno pakadadaelan dayta a nagan.

Makitulagtayo a kanayon a laglagipentayo ni Jesucristo. Amin a pampanunoten, marikrikna, ken tignaytayo ket impluensiaannanto ken ti misionna.

Agkaritayo nga agtungpal kadagiti bilinna.

Awatentayo dagitoy nga obligasion iti bagbagitayo no mabuniagantayo (kitaen iti DkK 20:37; Mosiah 18:6–10). Iti kasta, no makiranudtayo iti sakramento, pabaruentayo dagiti katulagan nga inaramidtayo idi nabuniagantayo. Inted kadatayo ni Jesus ti pagtuladan para iti pannakiranud iti sakramento (kitaen iti 3 Nephi 18:1–12) ket kinunana a no surotentayo daytoy a pagtuladan, nga agbabbawitayo kadagiti basbasoltayo ken mamatitayo iti naganna, magun-odtayto ti pannakaugas dagiti basbasoltayo (kitaen iti Patarus ni Joseph Smith, Mateo 26:24).

Ikari ti Apo a no tungpalentayo dagiti katulagantayo, kanayonto nga adda ti Espirituna kadatayo. Ti tao a tartarabayen ti Espiritu ket maaddaanto iti pannakaammo, pammati, bileg, ken kinalinteg tapno magun-odna ti agnanayon a biag.

  • Ania ti maaramidtayo tapno malaglagip dagitoy a kari kabayatan ti lawas?

Ti Galadtayo No Makiranranudtayo iti Sakramento

  • Kasano a maisaganatayo ti bagbagitayo a makiranud iti sakramento? Ania ti mabalintayo a panunoten kabayatan ti sakramento a makatulong kadatayo a manglagip iti Pannubbot ti Mangisalakan?

Sakbay ti pannakiranud iti sakramento, nasken nga isaganatayo a naespirituan dagiti bagbagitayo. Yunay-unay ti Apo a nasken nga awan ti makiranud iti sakramento a saan a maikari. Kayatna a sawen a nasken nga agbabawitayo kadagiti basbasoltayo sakbay ti panangawattayo iti sakramento. Kuna dagiti nasantuan a kasuratan, “Asino man ti nagbasol, diyo pakiranuden agingga a di makikinnatunosan” (DkK 46:4). Binilin ti Apo dagiti sangapulo-ket-dua a disipulo a Nephite, “Saanyo a palubosan a makiranud iti lasag ken darak ti asino man nga ammoyo a saan a maikari, no dakayonto ti mangipaay iti dayta; ta asino man a mangan ken uminum iti lasag ken darak a saan a maikari kanen ken inumenna ti pannakailunod ti kararuana” (3 Nephi 18:28–29).

Kabayatan ti serbisio iti sakramento masapul nga iwaksitayo iti panunottayo ti amin a nailubongan a pampanunot. Masapul a mariknatayo ti panagkararag ken panagraem. Masapul a panunotentayo ti Pannubbot ti Mangisalakantayo ket agyamantayo iti daytoy. Masapul nga amirisentayo ti biagtayo ket agsapultayo kadagiti wagas a pakapasayaatan. Masapul pay a pabaruentayo ti pangngeddengtayo nga agtungpal kadagiti bilin.

Saan a kasapulan nga agbalintayo a perpekto sakbay ti pannakiranud iti sakramento, ngem nasken nga adda kadatayo ti espiritu ti panagbabawi iti puspusotayo. Ti galad a maibuyog iti pannakiranudtayo iti sakramento ket mangimpluensia iti padastayo iti daytoy. No makiranudtayo iti sakramento nga addaan iti natarnaw a puso, umawattayo kadagiti naikari a bendision ti Apo.

  • Apay iti panagkunayo a ti maikari a pannakiranud iti sakramento ket mangnayon iti naespirituan a pigsatayo?

Dagiti Mainayon a Nasantuan a Kasuratan