Pakauna

Pangiwanwan iti Panagadal ken Pagbasaan ti Mannursuro

Ti Dagiti Pagbatayan ti Ebanghelio ket naisurat nga agpada a kas bukod a pangiwanwan iti panagadal ken kas pagbasaan ti mannursuro. Bayat ti panangadalmo iti daytoy, nga agkalkalikagum a maaddaan iti Espiritu ti Apo, mapadur-asmo ti pannakaawat ken pammaneknekmo maipapan iti Dios Ama, ni Jesucristo ken ti Pannubbotna, ken ti Pannakaisubli ti ebanghelio. Masarakam dagiti sungbat kadagiti saludsod ti biag, magun-odmo ti pammatalged ti panggep ken pateg ti bagim, ken masangom dagiti bukodmo a karit ken ti pamiliam nga addaan iti pammati.

Dagiti Pangiturong para iti Panangisuro iti Simbaan ken iti Pagtaengan

Ti panagbalin a maysa a mannursuro ket naindaklan a pagrebbengan a pakairamanan ti adu a gundaway a mangpapigsa kadagiti dadduma ken mangkita nga isuda ket “mataraonanda kadagiti nasayaat a balikas ti Dios” (Moroni 6:4). Mangisuroka a sisasamay bayat ti panangsurotmo kadagitoy a pagbatayan:

Ayatem dagiti sursuruam.
Mangisuro babaen ti Espiritu.
Isurom ti doktrina.
Yawis ti napasnek a panagsursuro.

Ayatem dagiti Sursuruam

No ipakitam ti ayat kadagiti sursuruam, agbalinda nga ad-adda pay a nakasagana nga umawat iti Espiritu ti Apo. Agbalinda a naregregget iti panagsursuro ken ad-adda a nataltallugodda a dumngeg kenka ken iti dadduma pay. Ikarigatam a makaam-ammo dagiti sursuruam, ket ipakaammom kadakuada nga ipatpategmo ida a sipupudno. Agbalinka a managrikna kadagiti karit dagiti addaan kadagiti naisangsangayan a kasapulan. Mangparnuayka iti nagin-awa nga aglawlaw iti klasem tapno marikna dagiti makiraman a nawayada nga agdamag kenka tapno agpatulong kadagiti saludsodda maipapan kadagiti pagbatayan ti ebanghelio ken no kasano a mayaplikar dagitoy iti biag.

Addanto ti Espiritu ti Apo no aggiinnayat ken agkaykaysa ti tunggal maysa. Kinuna ti Apo, “Maysa a bilin a baro ti itdek kadakayo, tapno aggiinnayatkayo iti maysa ken maysa; kas iti panagayatko kadakayo” (Juan 13:34).

Para iti ad-adu pay maipapan iti daytoy a topiko, kitaen iti Teaching, No Greater Call, kadagiti panid 31–39.

Mangisuro babaen ti Espiritu

Dagiti kapatgan a banag nga isuromto ket isu dagiti doktrina ni Cristo kas naipalgak babaen kadagiti nasantuan a kasuratan ken propeta ken kas impatalged ti Espiritu Santo. Tapno maaramid a nasamay daytoy, nasken a gun-odem ti Espiritu ti Apo. “Maitedto kadakayo ti Espiritu babaen ti kararag ti pammati,” kinuna ti Apo, “ket no diyo maawat ti Espiritu, saankayo a mangisuro” (DkK 42:14; kitaen met iti DkK 50:13–22). Ti Espiritu Santo ti pudno a mannursuro, isu a nasken a mangparnuay iti maysa nga aglawlaw a mabalin a pagindegan ti Espiritu ti Apo.

Para iti ad-adu pay maipapan iti daytoy a topiko, kitaen iti Teaching, No Greater Call, kadagiti panid 41–48.

Isurom ti Doktrina

Sakbay a mangisuroka manipud iti maysa a kapitulo, adalem a nasayaat daytoy tapno mapennek a maawatam ti doktrina. Kasta met nga adalem dagiti mainayon a nasantuan a kasuratan a nailista iti ungto ti kapitulo. Mangisurokanto nga addaan iti dakdakkel a sinseridad ken bileg no personal a nakaimpluensia kenka dagiti pannursuro iti kapitulo. Dika kaano man mangpugto wenno mangipapan maipanggep iti doktrina ti Simbaan. Isurom laeng no ania ti suportaran dagiti nasantuan a kasuratan, dagiti balikas dagiti propeta ken apostol iti ud-udina nga aldaw, ken ti Nasantuan nga Espiritu (kitaen iti DkK 42:12–14; 52:9).

No naawaganka a mangisuro iti maysa a korum wenno klase nga us-usarem daytoy a libro, saanmo a sukatan kadagiti material nga aggapu iti ruar, nupay makaay-ayo man dagitoy. Agtalinaed a nakapokus kadagiti nasantuan a kasuratan ken dagiti balikas iti libro. No maitutop, agusar kadagiti bukod a padas ken artikulo manipud kadagiti magasin ti Simbaan a mangsuplemento kadagiti leksion.

Para iti ad-adu pay maipapan iti daytoy a topiko, kitaen iti Teaching, No Greater Call, kadagiti panid 50–59.

Yawis ti Napasnek a Panagsursuro

Bayat ti panangisurom, tulongam dagiti dadduma a mangkita no kasano a mayaplikar dagiti pagbatayan ti ebanghelio iti inaldaw a panagbiag. Allukoyem dagiti miembro ti klase a paglilinnawaganda maipapan iti no kasano a mabalin nga aringan dagitoy a pagbatayan ti panagriknatayo maipapan iti Dios, iti bagbagitayo, iti pamiliatayo, ken iti padatayo a tattao. Allukoyem dagiti makiraman nga agbiagda a mayannurot kadagiti pagbatayan.

Padasem nga iraman ti adu a tattao agingga a mabalin kadagiti leksion. Maaramidmo daytoy babaen ti panangawismo kadakuada nga agbasa iti napigsa, agsungbat kadagiti saludsod, wenno agiburay kadagiti padas, ngem aramidem laeng no masiguradom a saanto a mangpabain daytoy kadakuada. Mabalin a napintas a kapanunotan a kiddawem kadagiti makiraman sakbay nga isurom ti leksion a makiramanda iti maysa a paset dagiti leksion kabayatan ti panangisaganam kadagiti leksion. Agbalinka a managrikna kadagiti kasapulan ken panagrikna dagiti dadduma. Mabalin a kasapulam a kasao iti nalimed ti tunggal maysa sakbay ti leksion ket saludsodem no kasano ti panagriknada maipapan iti pannakiramanda.

Para iti ad-adu pay maipapan iti daytoy a topiko, kitaen iti Teaching, No Greater Call, kadagiti panid 61–74.

Mainayon a Tulong para kadagiti Mannursuro

Tunggal kapitulo iti daytoy a libro ket naglaon iti maysa wenno dua a pakaammo para kadagiti mannursuro. Iraman dagitoy a pakaammo dagiti kapanunotan a makatulong kenka kadagiti panagkagumaanmo a mangipateg kadagiti sursuruam, mangisuro babaen ti Espiritu, mangisuro iti doktrina, ken mangyawis iti napasnek a panagsursuro kadagiti sursuruam.