Dagiti Libro ken Adalen
Dagiti Pagilasinan ti Maikadua a Yaay

Dagiti Tanda ti Maikadua a Yaay

Kapitulo 43

The resurrected Jesus Christ (wearing white robes with a magenta sash) standing above a large gathering of clouds. Christ has His arms partially extended. The wounds in the hands of Christ are visible. Numerous angels (each blowing a trumpet) are gathered on both sides of Christ. A desert landscape is visible below the clouds. The painting depicts the Second coming of Christ. (Acts 1:11)

Agsublinto ni Jesucristo iti Daga

  • Ania dagiti sumagmamano a tanda ti Maikadua a Yaay?

Imbaga ti Mangisalakan ken ni Joseph Smith, “Ipalgakkonto ti bagik manipud iti langit nga addaan bileg ken naindaklan a dayag … ket makipagnaed iti kinalinteg kadagiti tao iti daga iti sangaribu a tawen, ket saanto a tumakder dagiti nadangkes” (DkK 29:11; kitaen met kadagiti kapitulo 44 ken 45 iti daytoy a libro). Imbaga kadatayo ni Jesus a ballaagannatayto dagiti sumagmamano a tanda ken pagteng no asidegen ti panawen ti Maikadua a Yaayna.

Iti rinibribu a tawen, pinaspasungadan dagiti pasurot ni Cristo ti Maikadua a Yaay a kas maysa a panawen ti kappia ken ragsak. Ngem sakbay nga umay ti Mangisalakan, aglasatto dagiti tao iti daga iti dadakkel a pannubok ken didigra. Kayat ti Nailangitan nga Amatayo nga agsaganatayo para kadagitoy a parikut. Namnamaenna pay a nakasaganatayon a naespirituan inton umay ti Mangisalakan iti dayagna. Ngarud, intednan kadatayo dagiti tanda, dagiti pagteng wenno pasamak a mangibaganto kadatayo no asidegen ti Maikadua a Yaay ti Mangisalakan. Iti unos dagiti panawen impalgaken ti Dios dagitoy a tanda kadagiti propetana. Kinunana nga ammonto amin dagiti napudno a pasurot ni Cristo no ania dagiti tanda ket siputandanto dagitoy (kitaen iti DkK 45:39). No natulnog ken napudnotayo, adalentayonto dagiti nasantuan a kasuratan ket ammuentayo ti maipapan kadagiti tanda.

Sumagmamano kadagiti tanda a mangipaspasimudaag iti Maikadua a Yaay ni Jesucristo ti napasamaken wenno maipatpatungpalen iti agdama. Maipatungpalto dagiti dadduma pay iti masakbayan.

Kinadangkes, Gubat, ken Riribuk

Adu kadagiti tanda ti nakabutbuteng ken nakaal-alingget. Imballaag dagiti propeta a mapadasanto ti daga ti adu a riribuk, kinadangkes, gubat, ken panagsagaba. Kinuna ni propeta Daniel a ti panawen sakbay ti Maikadua a Yaay ket panawen ti riribuk a saan pay iti kaano man naammuan ti daga (kitaen iti Daniel 12:1). Kinuna ti Apo, “Lumamiisto ti ayat dagiti tao, ket rumsuanto ti basbasol” (DkK 45:27). “Agarimbangawto amin a banag; ket … sumallukobto ti buteng iti amin a tao”(DkK 88:91). Manamnamatayo dagiti gingined, sakit, panagbisin, napipigsa a bagyo, kimat, ken gurruod (kitaen iti Mateo 24:7; DkK 88:90). Dadaelento ti napigsa a bagyo ti uraro dagiti mula iti daga (kitaen iti DkK 29:16).

Imbaga ni Jesus kadagiti disipulona a mapnonto iti gubat ti daga: “Makangngegkayto kadagiti gubgubat ken damdamag ti gubgubat. … Ta tumakderto ti nasion a bumusor iti sabali a nasion, ken pagarian a bumusor iti sabali a pagilian” (Mateo 24:6–7). Kinuna ti Propeta Joseph Smith: “Saankayo a maupay no ibagami kadakayo ti maipapan kadagiti napeggad a panawen, ta nasken nga umayda iti mabiit, ta ti espada, panagbisin, ken peste umas-asidegdan. Addanto nakaro a pannakadadael iti rabaw daytoy a daga, ta saanyo a kasapulan nga ipapan a mapaayto ti maysa a tuldek wenno pirgis dagiti padto ti amin a propeta, ken adda adu pay a nasken a maipatungpal” (Teachings of Presidents of the Church: Joseph Smith [2007], 252).

Adu kadagitoy a tanda ti matungtungpalen. Nagsaknapen ti kinadangkes. Kanayon nga aggugubat dagiti pagilian. Mapaspasamak dagiti ginggined ken dadduma pay a didigra. Adu a tao ita ti agsagsagaba kadagiti managdadael a bagyo, tikag, panagbisin, ken saksakit. Ditay makapagduadua a kumarkaronto dagitoy a didigra sakbay nga umay ti Apo.

Nupay kasta, saan amin a pasamak sakbay ti Maikadua a Yaay ket nakabutbuteng. Adu kadagitoy ti mangisangbay iti ragsak iti lubong.

Ti Pannakaisubli ti Ebanghelio

Kinuna ti Apo, “Agburakto ti lawag kadagiti nagtugaw iti kasipngetan, ket isunton ti pakabuklan ti ebangheliok” (DkK 45:28). Impadto dagiti nagkauna a propeta ti Pannakaisubli ti ebanghelio. Nakita ni Apostol Juan nga isublinto ti maysa nga anghel ti ebanghelio (kitaen iti Apocalipsis 14:6–7). Iti pannakaipatungpal daytoy a padto, inyeg ni anghel Moroni ken dadduma pay a nailangitan a sangaili ti ebanghelio ni Jesucristo ken ni Joseph Smith.

Ti Idadateng ti Libro ni Mormon

Imbaga ti Apo kadagiti Nephite ti sabali pay a tanda: umayto ti Libro ni Mormon kadagiti an-annaboda (kitaen iti 3 Nephi 21). Nakita idin da propeta Isaias ken Ezequiel kadagiti panawen ti Daan a Tulag ti idadateng ti Libro ni Mormon (kitaen iti Isaias 29:4–18; Ezequiel 37:16–20). Maipatpatungpalen itan dagitoy a padto. Dimtengen ti Libro ni Mormon ket maip-ipanen iti intero a sangalubongan.

Maikasaba ti Ebanghelio iti Intero a Sangalubongan

Sabali pay a tanda kadagiti maudi nga aldaw ket ti “ebanghelio ti pagarian maikasabanto iti amin a lubong tapno mangpaneknek iti amin a nasion” (Mateo 24:14; kitaen met iti Joseph Smith—Mateo 1:31). Mangngegto amin a tao ti pakabuklan ti ebanghelio iti bukodda a pagsasao (kitaen iti DkK 90:11). Manipud pay iti Pannakaisubli ti Simbaan, inkasaban dagiti misionario ti ebanghelio. Dimmakkel ti aramid ti misionario agingga a rinibribun a misionario ti mangaskasaba iti adu a pagilian iti lubong iti adu a pagsasao. Sakbay ti Maikadua a Yaay ken kabayatan ti Milenium, mangtedto ti Apo kadagiti wagas a pakaisangbayan ti kinapudno iti amin a nasion.

Ti Yaay ni Elias

Impadto ni propeta Malakias a sakbay ti Maikadua a Yaay ti Mangisalakan, maibaonto ni propeta Elias iti daga. Isubli ni Elias dagiti bileg a pangilantip tapno mailantip a sangkamaysa dagiti pamilia. Paregtaennanto pay dagiti tao tapno agbalin a maseknan maipapan kadagiti kapuonan ken an-annaboda. (Kitaen iti Malakias 4: 5–6; DkK 2.) Sinarungkaran ni propeta Elias ni Joseph Smith idi Abril 1836. Manipud iti dayta a panawen, dimmakkel ti essem dagiti tao iti kapupuon ken family history. Kabaelantayo met ti mangannong kadagiti ordinansa a pangilantip kadagiti templo para kadagiti sibibiag ken pimmusayen.

Agbalinto a Naindaklan a Tattao dagiti An-annabo ni Lehi

Kinuna ti Apo a no asidegton ti yaayna, agbalinto a nalinteg ken madaydayaw a tattao dagiti Lamanite. Kinunana, “Sakbay a dumteng ti naindaklan nga aldaw ti Apo, … agbukarto dagiti Lamanite a kas iti rosas” (DkK 49:24). Dadakkelen a bilang dagiti an-annabo ni Lehi ti umaw-awat itan kadagiti bendision ti ebanghelio.

Panangbangon iti Baro a Jerusalem

Iti panawen nga asidegen ti yaay ni Jesucristo, mangbangonto dagiti napudno a Santo iti nalinteg a siudad, maysa a siudad ti Dios, a maawagan iti Baro a Jerusalem. Ninto Jesucristo a Mismo ti mangituray sadiay. (Kitaen iti 3 Nephi 21:23–25; Moises 7:62–64; Pagannurotan ti Pammati 1:10.) Kinuna ti Apo a mabangonto ti siudad iti estado ti Missouri iti Estados Unidos (kitaen iti DkK 84:2–3).

Dagitoy ket sumagmamano laeng kadagiti tanda nga inteden ti Apo kadatayo. Ad-adu pay ti iladladawan dagiti nasantuan a kasuratan.

  • Ania a pammaneknek ti makitkitam a maipatpatungpalen dagiti tanda?

Makatulong Kadatayo ti Pannakaammo kadagiti Tanda ti Panawen

  • Kasano a makapagtalinaedtayo a natalinaay ken natalna uray no nakabutbuteng ken nakaal-alingget ti sumagmamano kadagiti tanda?

Iti panagsaona maipapan iti Maikadua a Yaayna, kinuna ti Apo, “Awan ti tao a makaammo iti aldaw ken oras, uray pay dagiti anghel iti langit” (DkK 49:7). Insurona daytoy babaen ti pangngarig maipapan iti pinuon nga igos. Kinunana a no makitatayo nga agbulongen ti pinuon ti igos, maibagatayon nga asidegen ti idadateng ti kalgaw. Kasta met, a no makitatayon dagiti tanda a nailadawan kadagiti nasantuan a kasuratan, ammotayon nga asidegen ti yaayna. (Kitaen iti Mateo 24:32–33.)

It-ited ti Apo dagitoy a tanda tapno matulongantayo. Maurnostayo ti biagtayo ken maisaganatayo ti bagbagitayo ken dagiti pamiliatayo para kadagiti banag nga umay.

Naballaagantayon maipapan kadagiti didigra ken naibagan nga agsaganatayo para kadagitoy, ngem mabalintayo met a padpadaanantayo ti yaay ti Apo ken agragsak. Kinuna ti Apo, “Saankayo a mariribukan, ta, inton mapasamak amin dagitoy a banag, ammoyonton a matungpalton dagiti karik kadakayo” (DkK 45:35). Kinunana a dagiti nalinteg inton umay Isuna ket saandanto a madadael “ngem mailusotandanto ti aldaw. Ket maitedto ti daga kadakuada a tawidenda; … ket dumakkelto dagiti annakda nga awanan iti basol. … Ta addanto ti Apo iti tengngada, ket maipaayto kadakuada ti dayagna, ket isunto ti arida ken mangted kadakuada iti paglintegan” (DkK 45:57–59).

Dagiti Mainayon a Nasantuan a Kasuratan