Dagiti Libro ken Adalen
Kapitulo 45: Ti Milenium

Ti Milenium

Kapitulo 45

A male lion and lamb lying peacefully next to each other in a grassy field. Rolling hills are in the background. There are clouds in the sky. The image portrays the peace among animal life that will exist during the Millennium.

Dagiti Tao iti Daga kabayatan ti Milenium

  • Asinonto dagiti adda iti daga kabayatan ti Milenium?

Mangruginto ti sangaribu a tawen ti talna, ayat, ken ragsak iti daga iti Maikadua a Yaay ni Jesucristo. Maawagan daytoy a panawen ti sangaribu a tawen iti Milenium. Tulongandatayo dagiti nasantuan a kasuratan ken dagiti propeta iti pannakaawattayo no anianto ti langa ti panagbiag iti daga kabayatan ti Milenium.

Gapu iti pannakadadael dagiti nadangkes iti Maikadua a Yaay ti Mangisalakan, dagitinto laeng nalinteg a tao ti agnaed iti daga iti rugi ti Milenium. Isudanto dagiti nagbiag iti nasagudayan ken napudno a biag. Tawidento dagitoy a tao ti terestrial wenno celestial a pagarian.

Kabayatan ti Milenium, agbiagto pay laeng iti daga dagiti mortal, ken agtultuloydanto a maaddaan kadagiti annak a kas iti ar-aramidentayo ita (kitaen iti DkK 45:58). Kinuna ni Joseph Smith a masansanto a sarungkaran dagiti imortal a tao ti daga. Tumulongto dagitoy nagungar a tao iti panangituray ken iti dadduma pay a trabaho. (Kitaen iti Teachings of the Prophet Joseph Smith, sel. Joseph Fielding Smith [1976], 268.)

Addanto pay laeng kadagiti tao ti kinawayada nga agpili, ket iti maysa a panawen nawayanto ti adu nga agtultuloy kadagiti relihion ken kapanunotanda. Iti kamaudiananna ipudnonto ti amin a ni Jesucristo ti Mangisalakan.

Kabayatan ti Milenium, ni Jesus “agturayto a mismo iti daga” (Pagannurotan ti Pammati 1:10). Inlawlawag ni Joseph Smith a ni Jesus ket “agturay[to] kadagiti Santo ket bumaba ken mangisuronto” (Teachings of Presidents of the Church: Joseph Smith [2007], 258).

Ti Aramid ti Simbaan kabayatan ti Milenium

  • Ania dagiti dua a naindaklan nga aramid a maitrabahonto bayat ti Milenium?

Addanto dua a naindaklan nga aramid para kadagiti miembro ti Simbaan kabayatan ti Milenium: aramid iti templo ken aramid ti misionario. Iraman ti aramid iti templo dagiti ordinansa a kasapulan para iti pannakaitan-ok. Iraman dagitoy ti panagbuniag, panangipatay kadagiti ima para iti sagut ti Espiritu Santo, ken dagiti ordinansa iti templo—ti endowment, kallaysa iti templo, ken ti panangilantip a sangkamaysa kadagiti yunit ti pamilia.

Adu a tao ti natay a saan pay a nakaawat kadagitoy nga ordinansa. Nasken nga annongen dagiti tao iti daga dagitoy nga ordinansa para kadakuada. Daytoy nga aramid ket maar-aramid itan kadagiti templo ti Apo. Nakaad-adu pay ti aramid a maileppas sakbay a mangrugi ti Milenium, tapno makompleto daytoy kabayatan dayta a panawen. Tulongandatayonto dagiti nagungar a tao a mangatur kadagiti biddut a naaramidtayo iti panagsukisok maipanggep kadagiti pimmusayen a kapuonantayo. Tulongandatayonto pay a mangsapul kadagiti impormasion a kasapulantayo tapno makumpleto dagiti rekordtayo. (Kitaen iti Joseph Fielding Smith, Doctrines of Salvation, comp. Bruce R. McConkie, 3 vols. [1954–56], 2:167, 251–52.)

Ti sabali pay a naindaklan nga aramid kabayatan ti Milenium ket ti aramid ti misionario. Maisuronto ti ebanghelio iti naindaklan a bileg iti amin a tao. Iti kamaudiananna saanton a kasapulan nga isuro kadagiti dadduma dagiti umuna a pagbatayan ti ebanghelio gapu ta “isuda amin am-ammodakto, manipud iti kababassitan agingga iti kadadakkelan kadakuada, kuna ni Jehova” (Jeremias 31:34).

  • Kasano a makapagsaganatayo itan para iti aramid iti Milenium?

Dagiti Kasasaad kabayatan ti Milenium

  • Iti ania a wagwagas a maigiddiatto ti biag kabayatan ti Milenium manipud iti biag iti daga ita?

Insuro ni Joseph Smith a kabayatan ti Milenium, “mapabaronto ti daga ken awatennanto ti kangayedan a pannakaitan-okna” (Pagannurotan ti Pammati 1:10).

Maigalut ni Satanas

Kabayatan ti Milenium, maigalutto ni Satanas. Kayat a sawen daytoy nga awanto ti bilegna a mangsulisog kadagiti agbibiag iti dayta a panawen (kitaen iti DkK 101:28). “Dumakkelto dagiti annak nga awanan iti basol nga agturong iti pannakaisalakan” (DkK 45:58). “Gapu iti kinalinteg dagiti tao [ti Apo], awan ti bileg ni Satanas; gapuna, saan a makaruk-at iti uneg ti adu a tawen; gapu ta awan ti bilegna a mangituray kadagiti tao, ta agbibiagda iti kinalinteg, ken ti Nasantuan ti Israel ti agturay” (1 Nephi 22:26).

Talna iti Daga

Kabayatan ti Milenium, awanto ti gubat. Agbiagto a sangkamaysa dagiti tao iti talna ken panagtutunos. Dagiti banag a naar-aramat a panggubat ket maaramatdanto kadagiti nasayaat a panggep. “Pandayendanto dagiti kampilanda a pagbalinen a dingding ti arado, ket dagiti pikada pandayendanto a kumkumpay: ti maysa a nasion saannanto nga itag-ay ti kampilan a maibusor iti nasion, ket didanto met adalenen ti pannakigubat uray kaano” (Isaias 2:4; kitaen met iti Isaias 11:6–7; DkK 101:26).

Nalinteg a Gobierno

Insuro ni Presidente Taylor: “Ti Apo ti arinto iti intero a daga, ket literal nga addanto ti amin a sangkataw-an iti babaen ti pannakabalinna, ket tunggal nasion iti babaen ti langit ket bigbigendanto ti turayna, ket agtameddanto iti setrona. Mabalinto dagiti agserbi kenkuana iti kinalinteg ti makisao iti Dios, ken ni Jesus; addaandanto kadagiti agserserbi nga anghel, ken ammodanto ti napalabas, ti agdama, ken ti masakbayan; ket dagiti dadduma a tao, a di naan-anay ti panagtungpalda kadagiti paglinteganna, wenno saan a naan-anay a nasuruan kadagiti katulaganna, nupay kasta, ket naskento a naan-anay nga agtungpalda iti gobiernona. Gapu ta daytanto ti panagturay ti Dios iti daga, ket ipatungpalnanto dagiti paglinteganna, ken ibilinnanto a ti panagtungpal manipud kadagiti pagilian ti daga ket mayannatup a karbenganna” (Teachings of Presidents of the Church: John Taylor [2001], 225).

Awan ti Ipapatay

Kabayatan ti Milenium, awanto ti ipapatay kas iti ammotayo. No nagbiag agingga a lumakay wenno bumaket dagiti tao, saandanto a matay ken maitanem. Ngem ketdi, mabalbaliwandanto manipud iti mortal a kasasaad iti imortal a kasasaad iti “apagdarikmat.” (Kitaen iti DkK 63:51; 101:29–31.)

Maipalgakto Amin a Banag

Sumagmamano a kinapudno ti saan pay a naipalgak kadatayo. Maipalgakto amin a banag kabayatan ti Milenium. Kinuna ti Apo nga “ipalgaknanto amin a banag—dagiti banag a naglabas, ken dagiti banag a nailemmeng nga awan ti tao a nakaammo, dagiti banag ti daga, a nakaaramidanna, ken ti panggep ken ti nagbanagan daytoy—dagiti kapatgan a banag, dagiti banag nga adda iti ngato, dagiti banag nga adda iti baba, dagiti banag nga adda iti daga, ken iti rabaw ti daga” (DkK 101:32–34).

Dagiti Dadduma pay nga Aramid iti Milenium

Iti adu a wagas, ti biag ket kasto met laeng ita, malaksid laeng a maaramidto ti amin a banag iti kinalinteg. Mangan ken uminum ken agkawesto dagiti tao. (Kitaen iti Teachings of Presidents of the Church: Brigham Young [1997], 333). Ituloyto dagiti tao ti agmula ken agani kadagiti apit ken agpatakder kadagiti balbalay (kitaen iti Isaias 65:21).

  • Ania dagiti pampanunotmo ken riknam maipapan kadagiti kasasaad a mapagtengto kabayatan ti Milenium?

Maysa a Maudi a Pannakiranget kalpasan ti Milenium

  • Anianto ti maudi a pagbanagan ti daga?

Iti panaggibus ti 1,000 a tawen, mawayawayaanto ni Satanas iti ababa a panawen. Sumagmamanonto a tattao ti tumallikud manipud iti Nailangitan nga Ama. Ummongento ni Satanas dagiti buyotna, ken ummongento ni Miguel (Adan) dagiti buyot ti langit. Iti daytoy dakkel a panagranget, mapapanawto iti agnanayon ni Satanas ken dagiti pasurotna. Agbalinto ti daga a maysa a celestial a pagarian. (Kitaen iti DkK 29:22–29; 88:17–20, 110–15.)

Dagiti Mainayon a Nasantuan a Kasuratan