Dagiti Libro ken Adalen
Kapitulo 18: Pammati ken ni Jesucristo

Pammati ken ni Jesucristo

Kapitulo 18

Full length profile portrait of Jesus Christ. He is depicted wearing a white robe with a blue belt. He has one hand extended. His other hand is touching His chest.

Ania ti Pammati?

Pammati ken ni Apo Jesucristo ti umuna a pagbatayan ti ebanghelio. Naespirituan a sagut daytoy, ken kasapulan daytoy iti pannakaisalakantayo. Impakdaar ni Ari Benjamin, “Saan a mapasamak ti pannakaisalakan malaksid iti babaen ti panagbabawi ken pammati ken ni Apo Jesucristo” (Mosiah 3:12).

Ti pammati ket “mangnamnamaka iti banag a saan a makita, ngem pudno” (Alma 32:21; kitaen met iti Hebreo 11:1). Ti pammati ket pagbatayan ti tignay ken bileg a mangparegget kadagiti aginaldaw nga aramidentayo.

Agadal ken agsursurotayo kadi no saantayo a mamati a makagun-odtayo iti sirib ken pannakaammo? Agtrabahotayo kadi iti inaldaw no ditayo ninamnama a babaen iti panangaramid iti dayta makaileppastayo iti maysa a banag? Agmula kadi ti maysa a mannalon no saanna a ninamnama ti agani? Inaldaw nga agaramidtayo kadagiti banag a namnamaentayo no ditayo makita ti maudi a resultana. Daytoy ket pammati. (Kitaen iti Hebreo 11:3.)

Adu nga estoria iti nasantuan a kasuratan ti mangisalaysay no kasano a naipatungpal dagiti naindaklan a banag babaen iti pammati.

Babaen iti pammati nakaaramid ni Noe iti daong ket naisalakanna ti pamiliana manipud iti layus (kitaen iti Hebreo 11:7). Pinagsina ni Moises dagiti danum ti Nalabaga a Baybay (kitaen iti Hebreo 11:29). Immawag ni Elijah iti apuy manipud iti langit ( kitaen iti 1 Ar-ari 18:17–40). Immawag ni Nephi iti panagbisin (kitaen iti Helaman 11:3–5). Kiniddawna pay iti Apo a gibusanna ti panagbisin (kitaen iti Helaman 11:9–17). Napalinak dagiti baybay, naluktan dagiti parmata, ken nasungbatan dagiti kararag, amin ket babaen iti bileg ti pammati.

Bayat ti siaannad a panagadaltayo kadagiti nasantuan a kasuratan, masursurotayo a ti pammati ket natibker a panamati iti kaunggantayo a mangparegget kadatayo nga agaramid iti nasayaat. Daytoy ti mangigapu kadatayo nga agsaludsod: Asino ti nasken a pakaaddaantayo iti pammati?

  • Panunotem ti maipapan kadagiti inaldaw nga aramidem. Ania dagiti banag nga aramidem iti inaldaw a saanmo a makita dagiti maudi a resultana? Kasano a pareggetennaka ti pammati nga agtignay?

Apay a Nasken a Maaddaantayo iti Pammati ken ni Jesucristo?

Nasken nga isentrotayo ti pammatitayo ken ni Apo Jesucristo.

Ti maaddaan iti pammati ken ni Jesucristo ket kaipapananna ti maaddaan iti panagtalek Kenkuana nga agtungpaltayo iti ania man nga ibilinna. Bayat ti panamatitayo ken ni Jesucristo, nga agbalintayo a managtulnog a disipulona, pakawanento ti Nailangitan nga Ama dagiti basbasoltayo ket isagananatayo nga agsubli Kenkuana.

Inkasaba ni Apostol Pedro nga “awanto ti sabali a nagan iti babaen ti langit a naited kadagiti tao a pakabalinantayo a maisalakan” (Dagiti Aramid 4:12; kitaen met iti Mosiah 3:17). Insuro ni Jacob a nasken a maaddaan dagiti tao iti “naan-anay a pammati iti Nasantuan ti Israel [Jesucristo], wenno saanda a maisalakan iti pagarian ti Dios” (2 Nephi 9:23). Babaen iti pammati iti Mangisalakan ken babaen iti panagbabawi, maaramidtayo ti Pannubbotna a naan-anay a nasamay iti biagtayo. Babaen iti pammati makaawattayo pay iti pigsa a mangparmek kadagiti sulisog (kitaen iti Alma 37:33).

Ditayo mabalin ti maaddaan iti pammati ken ni Jesucristo no awan met pammatitayo iti Nailangitan nga Amatayo. No adda pammatitayo Kadakuada, addanto met pammatitayo a ti Espiritu Santo, nga ibaonda, ket suruannatayonto iti amin a kinapudno ken liwliwaennatayonto.

  • Kasano a maaringannatayo ti pammatitayo ken ni Jesucristo kadagiti awagtayo iti Simbaan? kadagiti relasiontayo iti pamilia? kadagiti pagtrabahuantayo? Kasano nga aringan ti pammati ken ni Jesucristo ti namnamatayo para iti agnanayon a biag?

Kasano a Mapadakkeltayo ti Pammatitayo ken ni Jesucristo?

Iti pannakaammo maipapan kadagiti adu a bendision a sumangbay babaen iti panangaramat iti pammati ken ni Jesucristo, nasken a kalikagumantayo a padakkelen ti pammatitayo Kenkuana. Kinuna ti Mangisalakan, “No adda koma pammatiyo a kas iti bukel ti mustasa, … awanto ti di mabalin kadakayo” (Mateo 17:20). Bassit unay ti bukel ti mustasa, ngem dumakkel daytoy iti maysa a dakkel a kayo.

Kasano a mapadakkeltayo ti pammatitayo? Mapadakkel wenno mapadur-astayo ti pammatitayo a kas iti panangpadur-astayo iti ania man a sabali pay a paglaingan. Kasano a mapadur-astayo dagiti paglaingantayo iti panagkitikit, panagabel, panagpinta, panagluto, panagdamili, wenno panagtokar iti instrumento ti musika? Adalen ken sanayen ken itrabahotayo daytoy. No aramidentayo daytoy, lumaingtayo. Kasta met iti pammati. No kayattayo a dumakkel ti pammatitayo ken ni Jesucristo, nasken nga itrabahotayo daytoy. Inyarig ni propeta Alma ti balikas ti Dios iti maysa a bukel a nasken a maaywanan iti pammati:

“Ngem adtoy, no riingen ken bangonenyo dagiti pampanunotyo, uray no padasenyo dagiti balikasko, ken tibnokanyo iti bassit a pammati, wen, uray no diyo tarigagayan ti ad-adu a panamati, bay-anyo dayta a tarigagay a mangtignay kadakayo, uray no agingga laeng a mamatikayo iti kasasaad a makaitedkayo iti lugar a pakaibislinan dagiti balikasko.

“Ita, yarigko ti balikas iti bukel. Ita, no ikkanyo ti bukel iti lugar a pakaimulaanna iti pusoyo, adtoy, no pudno a bukel, wenno nasayaat a bukel, no diyo ibelleng dayta gapu iti awan a panamatiyo, ket suppiatenyo ti Espiritu ti Apo, adtoy mangrugi nga agtubo iti barukongyo; ket no mariknayo daytoy a mangrugi a dumakkel, rugianyo a kunaen iti bagiyo—mabalin a nasayaat daytoy a bukel, wenno naimbag ti balikas, ta rugiannan ti mangpadakkel iti kararuak; wen, rugiannan ti magsilaw iti panunotko, wen mangrugin a nananam kaniak. …

“Ita adtoy, saan kadi a daytoy ti mangnayon iti pammatiyo?” (Alma 32:27–29).

Isu a mapadakkeltayo ti pammatitayo iti Dios babaen iti panagtignay iti tarigagaytayo a maaddaantayo iti pammati Kenkuana.

Mapadakkeltayo pay ti pammatitayo babaen iti panagkararag iti Nailangitan nga Ama maipapan kadagiti namnama, tarigagay, ken kasapulantayo (kitaen iti Alma 34:17–26). Ngem nasken a saantayo koma a panunoten nga awanen ti sabali nga aramidentayo no di dumawat. Naibaga kadatayo kadagiti nasantuan a kasuratan a “ti pammati, no awan dagiti ar-aramidna, isu ti pammati a natay” (Santiago 2:17). Ti sumaganad nga estoria ket maipapan iti maysa a lalaki a ti pammatina ket naipakita babaen kadagiti aramidna.

Tinarigagayan daytoy a lalaki ti agadal kadagiti nasantuan a kasuratan, ngem saanna nga ammo ti agbasa. Nagkakarag iti Nailangitan nga Ama a tulonganna koma isuna a makasursuro nga agbasa. Idi agangay dimteng ti maysa a mannursuro iti purokna, ket kiniddawna iti mannursuro a tulonganna isuna. Nasursurona ti alpabeto. Inadalna dagiti aweng ket nasursurona a pinagraraip dagiti letra tapno makaaramid kadagiti balikas. Iti saan a nabayag agbasbasan kadagiti simple a balikas. Iti ad-adda a panagpraktisna, ad-adu met ti nasursurona. Nagyaman iti Apo iti panangibaonna iti mannursuro ken ti panangtulongna kenkuana a makasursuro nga agbasa. Pinadakkel daytoy a lalaki ti pammati, kinapakumbaba, ken pannakaammona iti kasta unay gapu ta nakapagserbi a kas branch president iti Simbaan.

Inlawlawag ni President Spencer W. Kimball, “Nasken nga adda aramid a buyogan ti pammati. Maysa a kinamaag ti agkiddaw iti Apo a mangted kadatayo iti pannakaammo, ngem nainsiriban ti agkiddaw iti Apo a tulongannatayo a manggun-od iti pannakaammo, agadaltayo a nasayaat, agpanunottayo a silalawag, ken mangpatalinaed kadagiti banag a nasursurotayon” (Faith Precedes the Miracle [1972], 205; nagiray a balikas iti orihinal).

Iraman ti pammati ti panangaramidtayo iti amin a kabaelantayo tapno maipatungpal dagiti banag nga inanamaen ken ikarkararagantayo. Kinuna ni Presidente Kimball: “Iti pammati agmulatayo iti bukel, ket iti saan a mabayag makitatayo ti milagro ti panagrusing. Masansan a di naawatan dagiti tao ket binalbaliwanda ti proseso.” Intuloyna babaen ti panangilawlawag nga adu kadatayo ti agtarigagay a maaddaan iti salun-at ken pigsa a saantayo a tungtungpalen dagiti linteg ti salun-at. Tarigagayantayo ti rumang-ay a saantayo nga agbaybayad kadagiti apagkapullotayo. Tarigagayantayo ti mayasideg iti Apo ngem ditayo met kayat ti agayuno ken agkararag. Tarigagayantayo nga adda tudo iti naituding a panawen ken adda talna iti daga a ditayo ngilngilinen ti Sabbath a kas nasantuan nga aldaw ken saantayo a tungtungpalen dagiti dadduma pay a bilin ti Apo. (Kitaen iti Teachings of Presidents of the Church: Spencer W. Kimball [2006], 142.)

Ti napateg a wagas tapno dumakkel ti pammatitayo ket ti panangdengngeg ken panangadal iti balikas ti Apo. Mangngegantayo ti balikas ti Apo kadagiti mitingtayo iti Simbaan. Maadaltayo ti balikasna kadagiti nasantuan a kasuratan. “Gapu ta saan nga amin ket adda pammatina, agsukisokkayo a sireregta ken isuroyo iti tunggal maysa dagiti nainsiriban a balikas; wen sukisokenyo dagiti kasayaatan a libro ti nainsiriban a balikas, agadalkayo, uray pay ti panagadal ken kasta met ti pammati” (DkK 88:118).

  • Ania ti pagnaigan a makitam iti nagbaetan ti pammatitayo ken dagiti tignaytayo?

Ania dagiti Sumagmamano a Bendision a Sumaruno iti Pammati?

Babaen iti sagut ti pammati, mapasamak dagiti milagro, agparang dagiti anghel, maited dagiti dadduma pay a sagut ti Espiritu, masungbatan dagiti kararag, ken agbalin nga annak ti Dios dagiti lallaki nga annak ti Dios (kitaen iti Moroni 7:25–26, 36–37).

“No adda pammati [ditoy daga] mangigapu iti kaadda dagiti … apostol, propeta, ebanghelista, pastor, mannursuro, sagut, sirib, pannakaammo, milagro, panagagas, pagsasao, pannakaipatarus dagiti pagsasao, kdpy. Agparang amin dagitoy no adda pammati ditoy daga, ken agpukawda no awan daytoy iti daga; gapu ta dagitoy ti epekto ti pammati. … Ken isu nga agtagikua iti daytoy, babaen iti daytoy, magun-odnanto ti amin a kasapulan a pannakaammo ken sirib, agingga a maam-ammonanto ti Dios, ken ni Apo Jesucristo, nga imbaonna—a no maam-ammo ket maaddaan iti agnanayon a biag” (Lectures on Faith [1985], 83).

  • Ania ti sumagmamano nga estoria manipud kadagiti nasantuan a kasuratan a nakapagbalinan a napigpigsa dagiti tao gapu ta addaanda iti pammati ken ni Jesucristo? Kasano a nakitamon a napasamak daytoy iti bukodmo a biag?

Dagiti Mainayon a Nasantuan a Kasuratan