Ako ʻo e Tokāteliné
Uluí
Vakai Fakalūkufuá
ʻOku kau ʻi he uluí ha liliu ʻi he tōʻongá, ka ʻoku mahulu atu ia ʻi he tōʻongá; ko ha liliu ia ʻi hotau natulá tonu. Ko ha liliu matuʻaki mahuʻinga ia ʻi he ʻuhinga ki ai ʻa e ʻEikí mo ʻEne kau palōfitá ko ha toe fanauʻi foʻou, ko ha liliu ʻo e lotó, mo e papitaiso ʻaki ʻa e afí. Naʻe folofola ʻa e ʻEikí:
“ʻOua ʻe ofo he ko e faʻahinga kotoa ʻo e tangata kotoa pē, ʻio, ʻa e tangata mo e fefine, ʻa e ngaahi puleʻangá, mo e ngaahi faʻahingá, mo e ngaahi leá, mo e kakai kotoa pē, kuo pau ke fanauʻi foʻou; ʻio, ke nau fanauʻi ʻi he ʻOtuá, ʻo liliu mei honau tuʻunga fakakakano mo tō ki laló, ki ha tuʻunga ʻo e anga-māʻoniʻoni, kuo huhuʻi ʻe he ʻOtuá, ʻo hoko ko hono ngaahi foha mo hono ngaahi ʻofefine;
“Pea ʻoku nau hoko ai ko ha kakai foʻou; pea ka ʻikai ke nau fai ʻeni, ʻe ʻikai te nau teitei lava ʻo maʻu ʻa e puleʻanga ʻo e ʻOtuá” (Mōsaia 27:25–26).
Ko e uluí ko ha ngāue ia, kae ʻikai ko ha meʻa pē ʻoku hoko. ʻOku hoko mai ʻa e uluí ko ha ola ia ʻo e ngaahi feinga māʻoniʻoni ke muimui ki he Fakamoʻuí. ʻOku kau ʻi he ngaahi feinga ko ʻení ʻa hono fakaʻaongaʻi ʻo e tui kia Sīsū Kalaisí, fakatomala mei he angahalá, papitaisó, maʻu ʻa e meʻafoaki ʻo e Laumālie Māʻoniʻoní, pea mo kātaki ki he ngataʻangá ʻi he tui.
Neongo ko e uluí ʻoku fakaofo mo liliu moʻui, ka ko ha mana ia ʻoku hoko fakalongolongo pē. ʻOku ʻikai fakahoko e uluí ia ʻe he ngaahi ʻaʻahi mai ʻa e kau ʻāngeló mo e ngaahi meʻa fakaofo kehé. Naʻa mo ʻAlamā, ʻa ē naʻe mamata ki he ʻāngeló, naʻe toki ului pē ia ʻi he hili ʻo ʻene “ʻaukai mo lotu ʻi he ngaahi ʻaho lahi” ke maʻu ha fakamoʻoni ki he moʻoní (ʻAlamā 5:46). Pea naʻe akoʻi ʻe Paula, ʻa ia naʻá ne mamata ki he Fakamoʻui kuo toetuʻú, “ʻoku ʻikai ha taha te ne faʻa pehē, ko e ʻEikí ʻa Sīsū, ka ʻi he Laumālie Māʻoniʻoní” (1 Kolinitō 12:3).
‘Oku ʻomi ʻe he Tohi ʻa Molomoná ha ngaahi fakamatala ʻo e kakai ʻoku ului ki he ʻEikí:
Naʻa nau holi ke failelei. Ne fakahā ʻe he kakai ʻo e Tuʻi ko Penisimaní, “Ko e Laumālie ʻo e ʻEiki Māfimafí, ʻa ia kuo fakatupu ha fuʻu liliu lahi ʻi loto ʻiate kimautolu, pe ʻi homau lotó, ʻo ʻikai ai te mau toe maʻu ha holi ke faikovi, ka ke failelei maʻu ai pē” (Mōsaia 5:2). Ne lea ʻa ʻAlamā kau ki ha kakai “naʻe ʻikai te nau lava ʻo sio ki ha angahala ka ʻi he fakaliliʻa” (ʻAlamā 13:12).
‘Oku ʻikai ke nau angatuʻu ki he ʻEikí. Ne fakamatala ʻa Molomona ki ha kulupu ʻo e kau Leimaná ʻa ia naʻa nau faiangahala mo loto tāmate ka naʻa nau “ului ki he ʻEikí” (ʻAlamā 23:6). Naʻe liliu ʻe he kakai ko ʻení ʻa honau hingoá ki he ʻAnitai-Nīfai-Līhaí pea nau “hoko ko ha kakai māʻoniʻoni; naʻa nau tuku hifo ʻa e ngaahi mahafu naʻa nau angatuʻu ʻakí, ʻo ʻikai te nau toe tauʻi ʻa e ʻOtuá, pe ko ha taha ʻo honau kāingá” (ʻAlamā 23:7).
ʻOku nau vahevahe ʻa e ongoongoleleí. Naʻe līʻoa ʻa ʻĪnosi, ʻAlamā ko e Lahí, ʻAlamā ko e Siʻí, ngaahi foha ʻo Mōsaiá, ʻAmuleki, mo Sisolome ke malanga ʻaki ʻa e ongoongoleleí hili ʻenau ului ki he ʻEikí (vakai, ʻĪnosi 1:26; Mōsaia 18:1; 27:32–37; ʻAlamā 10:1–12; 15:12).
ʻOku nau fonu ʻi he ʻofá. Hili ʻa e ʻaʻahi ʻa e Fakamoʻui kuo toetuʻú ki he kakai ʻi he ongo ʻAmeliká, naʻe “fakaului ʻa e kotoa ʻo e kakaí ki he ʻEikí, ʻi he funga hono kotoa ʻo e fonuá, ʻa e kau Nīfaí mo e kau Leimaná fakatouʻosi, pea naʻe ʻikai ha ngaahi fekeʻikeʻi pe ngaahi fakakikihi ʻiate kinautolu, pea naʻe fefaitotonuʻaki ʻa e kakai kotoa pē ʻiate kinautolu. …
“Pea naʻe hoko ʻo pehē naʻe ʻikai ha fekeʻikeʻi ʻi he fonuá, koeʻuhi ko e ʻofa ʻa e ʻOtuá ʻa ia naʻe ʻi he loto ʻo e kakaí.
“Pea naʻe ʻikai ha ngaahi femehekaʻaki, pe ngaahi fetēleni, pe ngaahi maveuveu, pe ngaahi feʻauaki, pe ngaahi loi, pe ngaahi fakapō, pe ha faʻahinga holi kovi ʻe taha; pea ko e moʻoni ʻoku ʻikai lava ke ʻi ai ha kakai ʻoku lahi hake ʻenau fiefiá ʻi he kakai kotoa pē kuo fakatupu ʻe he toʻukupu ʻo e ʻOtuá.
“Naʻe ʻikai ke ʻi ai ha kau kaihaʻa, pe kau fakapō, pea naʻe ʻikai foki ke ʻi ai ha kau Leimana, pe ha faʻahinga kakai kehe ʻe taha; ka naʻa nau taha pē, ko e fānau ʻa Kalaisi, pea ko e kau ʻea hoko ki he puleʻanga ʻo e ʻOtuá” (4 Nīfai 1:2, 15–17).
Lekooti e Ngaahi Ongo ʻOkú ke Maʻú
Ngaahi Tefito Fekauʻakí
Ngaahi Folofolá
Ngaahi Fakamoʻoni Fakafolofolá
Ngaahi Maʻuʻanga Tokoni Ako Folofolá
-
Fakahinohino ki he Ngaahi Folofolá, “Uluí, Fakauluí”
Ngaahi Pōpoaki mei he Kau Taki ʻo e Siasí
Ngaahi Pōpoaki Lahi Ange
Ngaahi Vitioó
“Tataki Kimautolu ke Ului”
Ngaahi Vitiō ʻa e Kuaea Tāpanekalé
“Come, Follow Me (Haʻu, Muimui ʻIate Au)”
Ngaahi Maʻuʻanga Tokoni Fakaakó
Ngaahi Maʻuʻanga Tokoni Fakalūkufuá
Ngaahi Makasini ʻa e Siasí
Néstor Curbelo, “Fakaului mo e Liliu ʻi Sileí,” Liahona, ʻOkatopa 2014